ལྷ་ས་ར་མོ་ཆེ་དཔལ་ལྡན་རྒྱུད་སྟོད་གྲྭ་ཚང་གི་ལྷ་ཁང་ཁག་ལ་དཀར་རྩི་དང་། སྒོ་དང་སྒེའུ་ཁུང་སྟེང་ལ་ལོ་གསར་པའི་དགའ་སྟོན་རྣམ་པ་འབུར་དུ་འཐོན་པའི་དར་མཚོན་དང་གཤམ་བུས་བརྒྱན་དགོས་པའི་བཙན་བཀའ་བཏང་འདུག
ལྷ་ས་ནས་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༥ ཉིན་གྱི་ཞོགས་པར་བོད་རང་སྐྱོང་ལྗོངས་ཟེར་བའི་མགོ་ཁྲིད་དགོན་པོ་བཀྲ་ཤིས་དང་། ༼ལྕགས་རག༽བློ་བཟང་བསྟན་འཛིན་སོགས་ལས་དོན་རུ་ཁག་དང་ལྷན་དུ་ལྷ་ས་ར་མོ་ཆེ་དཔལ་ལྡན་རྒྱུད་སྟོད་གྲྭ་ཚང་ལ་འཚམས་འདྲིའི་མིང་ཐོག་ནས་ཡོང་སྟེ། བོད་ཆུ་མོ་སྦྲུལ་ལོའི་གནམ་ལོ་གསར་ཚེས་ལ་གྲ་སྒྲིག་བཟང་བོ་བྱེད་དགོས་ཤིང་། འདུ་ཁང་དང་ལྷ་ཁང་ཁག་གི་རྩིག་ངོས་ལ་དཀར་རྩི་གཏོང་དགོས་པ་དང་། སྒོ་དང་སྒེའུ་ཁུང་སྟེང་གི་ཆུ་དར་དང་གཤམ་བུ་རྙིང་པ་ཡོངས་གསར་བརྗེ་བྱས་ཏེ། ལོ་གསར་པའི་དགའ་སྟོན་མཚོན་པའི་ཁ་དོག་སྣ་ཚོགས་ཀྱི་དར་ལྕོག་དང་གཤམ་བུ་སོགས་འདོག་དགོས་པའི་བཙན་བཀའ་བཏང་ཡོད་འདུག དེ་བཞིན། གྲྭ་ཤག་སོ་སོས་ཀྱང་ལོ་གསར་གྱི་རྣམ་པ་ཤུགས་ཆེན་པོ་མ་བསྟན་ཚེ་ཆབ་སྲིད་ཀྱི་ཉེས་པ་འཕོག་རྒྱུ་ཡིན་པའི་འཇིགས་སྐུལ་ཡང་བྱས་ཡོད་འདུག
ཕྱི་ལོ་ ༢༠༠༨ ལོར་ཞི་རྒོལ་ཐོག་རྒྱ་གཞུང་གིས་དྲག་གནོན་བྱས་ཏེ་བོད་མི་མང་པོ་དམར་གསོད་བཏང་བ་ནས་བཟུང་རྒྱུད་སྟོད་དགོན་པས་ལོ་ལྟར་རྒྱས་སྤྲོས་མ་བཏང་བར་བརྟེན། ད་ལོ་སྲིད་གཞུང་གི་མི་སྣ་ཆེད་དུ་ཡོང་སྟེ་བཙའ་བཀའ་དེ་བཏང་བ་ཞིག་ཡིན་འདུག
