རིག་པའི་རྡོ་རྗེ།
བོད་རྒྱལ་ལོ་ ༢༡༤༠ ཐམ་པའི་ལོ་སར་སྐོར་ལ་བསམ་ཚུལ་ཐུང་ཐུང་ཞིག་བཤད་ན། ཟླ་ ༢ ཚེས་ ༥ ཉིན། བོད་གཞུང་གི་༼བཙན་བྱོལ་གཞུང་བོད་གཞུང་ནམ་ཡང་ང་ཚོའི་གཞུང་ཡིན།༽བཀའ་བློན་ཁྲི་བ་༼བཀའ་བློན་ཁྲི་བའི་མཚན་གནས་བོད་ཀྱི་ལོ་རྒྱུས་དང་ཁ་བྲལ་ཐབས་མེད།༽མཆོག་གིས། ཡོངས་ཁྱབ་གསལ་བསྒྲགས་སྤེལ་ཏེ། ད་ལོར་བོད་གཞིས་བྱེས་གཉིས་ཀར་སྲོལ་རྒྱུན་ཆོས་ཕྱོགས་ཀྱི་མཛད་རིམ་ཁག་ལས། ལོ་སར་ལ་སྤྲོ་སྐྱིད་མ་གཏོང་ཞེས་བཀའ་ཁྱབ་བཏང་ཡོད།
སྤྱིར་བཏང་མང་གཙོའི་གཞུང་ཞིག་གིས། མང་ཚོགས་ལ་གནས་ཚུལ་ཁྱབ་བསྒྲགས་བྱེད་རྒྱུ་ཙམ་ལས། བཀའ་ཁྱབ་གཏོང་རྒྱུ་ཉུང་ཉུང་ཡིན་མོད། ང་ཚོ་གཞུང་མང་གཉིས་ཀྱི་ཁ་ཕྱོགས་གཅིག་པ་ཡིན་དུས་དེ་ལ་མ་འགྲིག་པའི་ཆ་ཆེན་པོ་མེད། ཡིན་ན་ཡང་། བསམ་ཚུལ་འདི་བཀའ་ཁྲིས་བསྒྲགས་གཏམ་མ་སྤེལ་གོང་ནས་བོད་གཞིས་བྱེས་གཉིས་ཀར་ཡོངས་ཁྱབ་ཏུ་ཕྱིན་ཡོད་ཅིང་། མང་ཚོགས་ཁྲོད་རང་འགུལ་གྱིས་ཁྱབ་པའི་ཡོངས་ཁྱབ་རང་བཞིན་གྱི་ཁ་ཕྱོགས་ཞིག་ཀྱང་ཆགས་ཡོད།
འདི་ལ་གཞུང་གིས་སྟངས་འཛིན་བྱས་ཏེ། བཀའ་ཁྲིས་བསྒྲགས་གཏམ་སྤེལ་བ་ནས་བཟུང་། ཡོངས་ཁྱབ་རང་བཞིན་གྱི་ཁ་ཕྱོགས་འདི་རྒྱ་ནག་གཞུང་ཕྱོགས་ནས་སྲིད་དོན་གྱི་ངོ་བོར་བསྒྱུར་ཏེ། གཞིས་བཞུགས་བོད་མི་ཚོར་ལོ་སར་སྤྲོ་སྐྱིད་གཏོང་དགོས་པའི་སྒོར་གྱི་བསླུ་ཁྲིད་དང་། མེ་མདས་འཇིགས་སྣང་སྐུལ་བཞིན་ཡོད། གནད་དོན་འདིའི་འབྱུང་རྩ་རྒྱ་ནག་གཞུང་ཕྱོགས་གཅིག་པོ་མ་ཡིན་པར་ང་ཚོས་གཞུང་འབྲེལ་གྱི་བྱེད་ཕྱོགས་དང་། སྲིད་དོན་གྱི་ངོ་བོར་བསྒྱུར་བ་དེ་རེད།
གལ་ཏེ་བོད་གཞུང་དང་བཀའ་བློན་ཁྲི་བས། ལོ་སར་སྤྲོ་སྐྱིད་མེད་པའི་ཡོངས་ཁྱབ་བསྒྲགས་གཏམ་སྤེལ་མེད་ན། ལོ་སར་སྤྲོ་སྐྱིད་ཡོད་མེད་ཟེར་བ་འདི་མང་ཚོགས་ཀྱི་ཁ་ཕྱོགས་ཞིག་ལས། སྲིད་དོན་གྱི་ལས་འགུལ་མངོན་གསལ་ཞིག་མིན་སྟབས། འདི་ལ་རྒྱ་ནག་གཞུང་གིས་ཀྱང་ཐད་ཀར་རྒོལ་ལན་བྱེད་ས་མེད།
གང་ལྟར་བོད་གཞུང་བཀའ་ཤག་གིས། བོད་ལ་ལོ་སར་སྤྲོ་སྐྱིད་མེད་ཅེས་ཐག་གཅོད་རང་བཞིན་གྱིས་བཀའ་ཁྱབ་སྤེལ་བ་ནས་བཟུང་། མང་ཚོགས་རང་འགུལ་གྱི་བྱེད་ཕྱོགས་འདི་སྲིད་དོན་གྱི་ངོ་བོར་གྱུར་ཚར་བ་རེད། དེར་བརྟེན་རྒྱ་ནག་གཞུང་ཕྱོགས་ནས་བོད་ནང་ཁུལ་དུ་ཞི་དྲག་གཉིས་ཀྱི་ཐོག་ནས་ལོ་སར་སྤྲོ་སྐྱིད་གཏོང་དགོས་པའི་བྱེད་ཐབས་སྤེལ་བཞིན་ཡོད།
དེས་ན་ང་ཚོའི་གཞུང་དང་བཀའ་བློན་ཁྲི་བས་དབུས་མི་སྣ་ཆེ་ཁག་གིས་ཀྱང་། དེ་མཚུངས་ཀྱི་ལས་འགུལ་དང་རྣམ་འགྱུར་སྟོན་དགོས། རང་གིས་གང་བཤད་པའི་སྐད་ཆའི་འགན་རང་གིས་ཁུར་དགོས། ཡིན་ན་ཡང་ངས་གོ་ཐོས་ལྟར་ན། བཀའ་བློན་ཁྲི་བ་མཆོག་གིས། ཐག་གཅོད་རང་བཞིན་གྱི་ཡོངས་ཁྱབ་བསྒྲགས་གཏམ་སྤེལ་རྗེས། ཁོང་རང་ཉིད་ལོ་སར་གུང་གསེང་ལ་རང་ཁྱིམ་དུ་ཕེབས་ཡོད་ཅིང་། གཞན་པའི་བཀའ་བློན་མང་ཆེ་བ་ཡང་གུང་གསེང་ལ་ཕེབས་ཡོད་ཚུལ་འདུག
སྤྱིར་བཏང་བཀའ་བློན་ཁྲི་བས་དབུས་བཀའ་བློན་དང་མི་སྣ་ཆེ་ཁག་ཚོ་ལོ་སར་སྐབས་གུང་གསེང་ལ་ཕེབས་ན་མ་འགྲིག་པ་ཞིག་མིན་མོད། མང་ཚོགས་རང་འགུལ་ཀྱི་ཁ་ཕྱོགས་རླབས་ཆེན་འདི་གཞུང་འབྲེལ་སྲིད་དོན་གྱི་ངོ་བོར་བསྒྱུར་ཚར་རྗེས། འདིའི་ཐོག་མཐའི་འགན་ཡང་གཞུང་གིས་ཁུར་དགོས། དེས་ན་བཀའ་བློན་ཁྲི་བས་དབུས་གཞུང་གི་མཐོ་རིམ་ལས་བྱེད་རྣམས་ཀྱིས། བོད་ཀྱི་ལོ་སར་ཉིན་བསྒྲགས་གཏམ་གྱི་ནང་དོན་དང་མཚུངས་པའི་ལས་འགུལ་སྤེལ་དགོས། བོད་ལ་ལོ་སར་སྤྲོ་སྐྱིད་མེད་པའི་རྣམ་འགྱུར་སྟོན་དགོས། རྒྱ་ནག་གཞུང་གིས་བོད་ནང་ཁུལ་དུ་སྤེལ་བཞིན་པའི་ལོ་སར་བྱེད་སྒོའི་གཡོ་ཐབས་ལ་ཁ་གཏད་གཅོག་དགོས།
གལ་ཏེ་བོད་གཞུང་གིས་དེ་ལྟར་བྱེད་འདོད་མེད་ན། ཅིས་ཕྱིར་མང་ཚོགས་རང་འགུལ་གྱི་ཁ་ཕྱོགས་འདི་གཞུང་འབྲེལ་སྲིད་དོན་གྱི་ངོ་བོར་བསྒྱུར་བ་ཡིན་ནམ། མང་ཚོགས་རང་འགུལ་གྱི་ཁ་ཕྱོགས་ཡོད་ཚད་གཞུང་འབྲེལ་སྲིད་དོན་གྱི་ངོ་བོར་བསྒྱུར་བས། བོད་ནང་ཁུལ་དུ་དཀའ་ངལ་འཕར་མ་འཕྲད་བཞིན་ཡོད། དཔེར་ན། ལྷག་དཀར་ནི་མང་ཚོགས་རང་བཞིན་གྱི་ཁ་ཕྱོགས་ཅིག་ཡིན་ལ། དེ་ནི་བོད་ནང་ནས་མགོ་བརྩམས་ཏེ་ཡོངས་ཁྱབ་ཏུ་ཕྱིན་པ་ཞིག་ཡིན་མོད། དེ་ཡང་གཞུང་འབྲེལ་སྲིད་དོན་གྱི་ངོ་བོར་ཡང་ཡང་བསྒྲགས་པས། ད་ལྟའི་ཆར་བོད་ནང་དུ་དེའི་ཐོག་ལ་ཡང་དཀའ་ངལ་ཆེན་པོ་འཕྲད་བཞིན་ཡོད།
བོད་ཕྱི་ནང་གཉིས་ཀྱི་མང་ཚོགས་རང་བཞིན་གྱི་བྱེད་ཕྱོགས་ཡོད་ཚད་གཞུང་འབྲེལ་སྲིད་དོན་གྱི་ངོ་བོར་བསྒྱུར་དགོས་དོན་ཅི་ཡིན་ནམ། གཞུང་འབྲེལ་གྱི་ངོ་བོར་བསྒྱུར་ཚར་རྗེས་གཞུང་གིས་འགན་གང་ཡང་མི་ཁུར་དོན་ཅི་ཡིན་ནམ།
ཕྱི་ལོ་ ༢༠༡༣ ཟླ་ ༢ ཚེས་ ༩ ཉིན།
ལུང་རྟོགས་ལགས་ཀྱིས་གསུང་པ་དེ་རང་རེད། དེང་སང་སྐྱག་འབུ་འདི་ཚོའི་བཤད་ཡ་མ་རག་ནས་དོན་མེད་ཀི་ཅོར་ལུང་པར་བཀང་ནས་ཕྱོགས་གང་སར་དཀྲུགས་ཤིང་སློང་ཐབས་སུ་འབད་བརྩོན་བཟོ་གི་ཡོད་པ་རེད།
སྐྱག་བཤད་མ་མང་ཞིག། རྒྱ་གཞུང་གིས་བོད་ནང་གི་མི་མང་ཀྱི་འགུལ་ཕྱོགས་དང་བཏུན་ནས་དེ་དང་ལྡོག་ཕྱོགས་ཀྱི་ལས་ཀ་བྱེད་ཀྱི་ཡོད་པ་མངོན་གསལ་རེད། ལོ་གསར་སྤྲོ་སྐྱིད་གཏོང་དགོས་པའི་བཙན་བཀའ་འདི་ཡང་ཉེ་བའི་ལོ་ཤས་རིང་རྟག་པར་བཤད་བཞིན་པ་ཞིག་ཡིན་པ་ལས་ད་ལོའི་དམིགས་གསལ་གང་ཡང་མིན་པ་ཚང་མས་ཤེས་གསལ་རེད། མ་གཞི་གཞུང་གིས་ཆབ་སྲིད་ཀྱི་ལས་ཀ་མ་བྱས་ན་ཅི་ཞིག་ལས་དགོས་པ་རེད། བོད་མིའི་སྒྲིག་འཛུགས་སྲིད་གཞུང་ཡིན་པ་ལས་དགོན་སྡེ་མ་རེད་ལ། སྒྲིག་འཛུགས་ཀྱི་དབུ་ཁྲིད་ཆབ་སྲིད་པ་ཡིན་པ་ལས་ཆོས་པ་མ་རེད། ཁྱོད་ཅག་གི་སྐད་ཆ་འདི་ནི་རྒྱ་གཞུང་ལ་དགོས་པ་ཞིག་ལས་བོད་མིར་དགོས་པ་ཞིག་མ་ཡིན་ནོ།
བོད་ཀྱི་བླ་ན་མེད་པའི་སྲིད་སྐྱོང་འདིས་རླབས་ཆེན་གྱི་དོ་ཆེན་ཞིག་འགྲུབ་པར་སྨོན། ཡིན་ནའང་། ཐོག་མར་གཞན་གྱི་གྲིབ་གཟུགས་འོག་ནས་ཐར་དགོས་པའང་གལ་ཆེན་རེད།
རིག་པའི་རྡོ་རྗེས་གསུང་པར་རྒྱ་བསྐྱོར་ཡོད། བློ་སེང་གིས་ཡོད་ཚད་ཁོ་རང་གིས་བྱས་མདོག་སྟོན་གྱི་ཡོད་རེད། སྐུ་ཞབས་བློ་བཟང་ཕུན་ཚོགས་ཁོའི་ཆེད་དུ་མེར་བསྲེགས་བྱས་པ་འདྲ་བོ་དང་། ༧གོང་ས་མཆོག་བོད་ལ་གདན་འདྲེན་ཞུ་དགོས་ཟེར་བའི་སྐད་ཆ་དེ་ཐོག་མར་ཁོ་ཡིན་པ་འདྲ་བོ། ད་དུང་བོད་ལ་ལོ་གསར་མེད་པའི་ལས་འགུལ་ཡང་ཁོས་སྤེལ་བ་ཡིན་པའི་བཟོ་སྟན་སྟོན་གི་ཡོད་རེད། ངོ་མ་དེ་འདྲ་ཡིན་ན་ལོ་གསར་ཚེས་གཅིག་ཉིན་ལས་འགུལ་སྤེལ་མ་ཐུབ་ན་ཡང་ལས་ཁུངས་སུ་བསྡད་དགོས་རེད། དེར་ཡང་མི་སྡོད་པར་ཨ་རིའི་རང་ཁྱིམ་དུ་སོང་ནས་ལོ་གསར་དགའ་སྟོན་ལ་རོལ་བཞིན་ཡོད་རེད། ངོ་མ་སྙིང་ལང་ནི་ཞིག་རེད།
རེད་རེད་་་སྡུག་སྐད་ལ་རྫོགས་ཡ་ཡོད་པ་མ་རེད་་ད་དུང་མང་ཙམ་རྒྱོབས་ཤིག་་་་་
འདི་ལ་རྒྱུ་མཚན་འདུག་ལ་ད་ཆ་དངོས་ནས་བསྒྲགས་གཏམ་གཞིར་ཟུང་བཙན་བྱོལ་སྒྲིགས་ཚུགས་ཀྱིས་ལོ་གསར་གཏོང་མི་དགོས་པའི་ཐོག་རྒྱུན་གཏན་ལྟར་ཕྱག་ལས་གནང་ན་དེ་བས་ཁ་བཤད་ལག་ལེན་དངོས་ནས་མ་ཡིན་ནམ། བོད་ནང་ད་ཆ་གང་ས་སྤྱིར་དམ་བསྒྲགས་བྱེད་བཞིན་དེར་ང་ཚོའི་ལས་སྣེ་ཚོའི་ཆབ་སྲེད་འཁྲབ་དབང་གི་ཡོང་གི་མེད་དམ་སྙམ། བཙན་བྱོལ་སྒྲིགས་ཚུགས་ནི་རྒྱལ་ཁབ་ཡོད་པའི་ཆབ་སྲིད་འཁྲབ་སྟོན་ལྟར་མ་གནང་ན་ལེགས། ངེད་ཚོས་ཁ་བཤད་ལས་ལག་ལེན་བྱེད་རྒྱུའི་དུས་ཚོད་ཞིག་མ་ཡིན་ནམ།