བོད། མེ་ལྕེའི་འཐབ་རྩོད་ཀྱི་ཞི་རྒོལ།

བིཇཱྱ་ཀྲནཏིས་བརྩམས། རིག་འཛིན་ལྷུན་གྲུབ་ཀྱིས་བསྒྱུར།

རྒྱའི་དབང་བསྒྱུར་ལ་བོད་མི་རིགས་ཀྱིས་ངོ་རྒོལ་གྱི་མེ་ལྕེའི་ཚ་རླབས་འཕྱུར་ཡང་རྒྱལ་སྤྱིས་དོ་སྣང་བྱེད་ཀྱི་མེད། དོ་འཁུར་མི་བྱེད་པ་ནི་དོན་དུ་འཚེ་བར་རྒྱབ་སྐྱོར་བྱས་པ་ཞིག་ཡིན་པ་སྟོན་གྱི་ཡོད། ཕྱི་ཟླ་ ༡ ཚེས་ ༡༩ ཉིན་ཀླུ་ཆུ་ཤིས་ཚང་དཔོན་སྐོར་སྡེ་བའི་རང་ལོ་ ༡༧ ཡིན་པའི་འཇིགས་བྱེད་སྐྱབས་ལགས་ཀྱིས་སྡེ་བའི་སང་བར་དུ་བོད་ལ་རང་དབང་དགོས་པ་དང་༧གོང་ས་མཆོག་བོད་ལ་གདན་འདྲེན་ཞུ་དགོས་ཞེས་འབོད་སྒྲ་སྒྲོག་བཞིན་བརྒྱུགས། ཁོང་གི་གཟུགས་པོར་ས་སྣུམ་གཤོ་ཡོད་པ་མ་ཟད་ལག་ཏུ་མེ་ཆ་གཉིས་འཁྱེར་ཡོད། གལ་སྲིད་ཁོང་གིས་མེ་སྤར་ཐུབ་ཡོད་ཚེ། ཁོང་ནི་ཕྱི་ལོ་ ༢༠༠༩ ཟླ་ ༢ ནས་བཟུང་བོད་ནང་རང་ལུས་མེར་བསྲེགས་ཀྱི་རླབས་རྒྱུན་མུ་མཐུད་བྱུང་པའི་ནང་གི་ཐེངས་ ༩༨ པ་དེ་ཆགས་ཡོད། འོན་ཀྱང་དེ་ལྟར་མ་བྱུང་པའི་སྔོན་ལ་ཁོང་སར་འགྱེལ་ཏེ་སྐུ་གྲོངས། རྗེས་སུ་ཁོང་གིས་བཞག་པའི་ཞལ་ཆེམས་ལས་ཤེས་རྟོགས་བྱུང་པར་གཞིག་ན། ཁོང་གིས་དུག་ཤུགས་ཆེན་བཏུང་སྟེ། གལ་ཏེ་རང་ཉིད་མེ་ལྕེའི་ཁྲོད་མ་ཤི་པའི་གནས་སྟངས་བྱུང་ཚེ་རྒྱའི་ཉེན་རྟོག་པའི་ལག་འོག་ཏུ་གསོན་པོར་གནས་འདོད་མེད་པ་སེམས་ཐག་གཙང་བཅད་གནང་ཡོད་འདུག

འཇིགས་བྱེད་སྐྱབས་རྒྱའི་སྤྱི་བདེ་ཉེན་རྟོག་པར་འཇིགས་སྣང་དེ་ནི་འཇར་མན་ནང་ནཱ་རྫེའི་དུས་སྐབས་སུ་ཧེ་ཐི་ལིའི་ ‘གསང་བའི་དྲག་ཆས་བདེ་ཚོགས’ ཀྱི་གནས་བབ་དང་གཅིག་མཚུངས་ཆགས་ཡོད། བོད་མི་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་བཏོན་པའི་སྙན་ཐོ་ཕྱོགས་བསྒྲིགས་ནང་། རྒྱའི་ཉེན་རྟོག་པ་ཚོས་བོད་མིའི་རང་ལུས་མེར་བསྲེགས་གནང་མཁན་ཚོར་སྲོག་སྐྱོབ་བྱེད་རྒྱུ་ལས་ལྡོག་སྟེ། ཁོང་ལ་རྡུང་རྡེག་དང་གློག་རྒྱུག་བེད་སྤྱོད་བཏང་འདུག གསོན་པོར་ལུས་པའི་རང་ལུས་མེར་བསྲེགས་གནང་མཁན་ ༡༥ ལས་མང་ཆེ་བ་གར་ཡོད་ཤེས་ཀྱི་མེད། ད་དུང་ཕ་མ་སྤུན་མཆེད་དང་ནང་མི་ཚོས་ཉེན་རྟོག་པ་དང་སྲིད་གཞུང་གི་སུན་གཙེར་མང་པོར་གདོང་ལེན་བྱེད་དགོས་ཀྱི་ཡོད།

སྙན་གྲགས་ཅན་གྱི་ཀིརྟི་དགོན་པ་དང་ཉེ་བའི་ལོ་ཟླའི་ནང་རྒྱ་གཞུང་ལ་ངོ་རྒོལ་དང་རང་ལུས་མེར་བསྲེགས་ཀྱི་དོན་རྐྱེན་གཙོ་ཆེར་བྱུང་ས་རྔ་པར་ ༢༠༡༡ ལོའི་ཟླ་ ༨ ཚེས་ ༡༣ ཉིན་རང་ལོ་ ༢༡ ལ་སོན་པའི་གྲྭ་བཀྲ་ཤིས་དང་རང་ལོ་ ༢༠ ལ་སོན་པའི་གྲྭ་ལུང་རྟོགས་གཉིས་ཀྱིས་མཉམ་དུ་རང་ལུས་མེ་རུ་བསྒྲོན། སྐབས་དེར་ལུང་རྟོགས་ཉེན་རྟོག་པ་མ་འབྱོར་གོང་ལ་སྐུ་གྲོངས་ཡོད་ཅིང་། བཀྲ་ཤིས་ལ་ཉེན་རྟོག་པ་ཚོས་རུབ་རྡུང་ཚབས་ཆེན་བཏང་རྗེས་བཙན་འཁྲིད་བྱས་ཡོད། དེའི་རྗེས་བཀྲ་ཤིས་ཚེ་ལས་འདས་པ་གསལ་བསྒྲགས་བྱས་མོད། ཉེན་རྟོག་ལས་ཁུངས་ནས་ཁོང་མེ་བསྲེགས་དང་ཉེན་རྟོག་པའི་རྡུང་རྡེག་གང་གིས་གྲོངས་པ་བརྗོད་མེད།

ཕྱི་ལོ་ ༢༠༡༡ ཟླ་ ༡༠ ཚེས་ ༧ ཉིན་རང་ལོ་ ༡༩ ལ་སོན་པའི་ཆོས་འཕེལ་དང་རང་ལོ་ ༡༨ ལ་སོན་པའི་མཁའ་དབྱིངས་གཉིས་རྔ་པའི་ཁྲོམ་གཞུང་དུ་རང་ལུས་མེ་རུ་བསྒྲོན། མཁའ་དབྱིངས་ནི་ཀིརྟི་དགོན་པ་ནས་ཐོན་ཞིང་། ཆོས་འཕེལ་ནི་ཕྱི་ཟླ་ ༣ པའི་མགོ་སྟོད་དུ་རང་ལོ་ ༢༡ ལ་སོན་པའི་གྲྭ་ཕུན་ཚོགས་ཀྱིས་རང་ལུས་ཞུགས་འབུལ་གནང་རྗེས་དགོན་པ་ནས་ཕྱིར་འཕུད་བཏང་པ་ཞིག་ཡིན། ཕྱི་ལོ་ ༢༠༠༨ ཟླ་ ༣ པའི་ངོ་རྒོལ་སྐབས་ཀིརྟི་ནི་དྲག་ཆས་ཉེན་རྟོག་པས་ཁེངས་ཡོད་ཅིང་། བོད་མི་ཞི་རྒོལ་པ་ ༡༣ ཙམ་མེ་མདས་དམར་གསོད་བཏང་ཡོད། དོན་རྐྱེན་གཞན་ཞིག་ནི། བཙུན་མ་ཞིག་གིས་མེ་ལྕེའི་ཁྲོད་འབོད་ཚིག་སྒྲོག་བཞིན་པའི་སྐབས་སུ། གསར་དུ་གཞིས་ཆགས་པའི་རྒྱ་རིགས་ཚོས་རྡོ་རུབ་བརྒྱབས་ཏེ་དམར་གསོད་བཏང་ཡོད།

རང་ལུས་མེར་བསྲེགས་གནང་མཁན་གྱི་ཐོ་གཞུང་ནང་ཕལ་མོ་ཆེ་གྲྭ་པ་དང་བཙུན་མ་ཡིན་པའི་རྒྱུ་མཚན་ནི། ཉེན་རྟོག་པའི་དམ་དྲག་དང་དགོན་པའི་ནང་དམར་པོའི་སློབ་གསོ་ཆད་མེད་དུ་སྤྲོད་བཞིན་ཡོད་སྟབས། དགོན་པ་ནི་ཧ་ཅང་སུན་སྣང་ཅན་གྱི་ཁོར་ཡུག་ཅིག་ཏུ་བསྒྱུར་ཡོད། རྒྱལ་གཅེས་ཆོས་གཅེས་ཟེར་བ་དེ་ནི་གྲྭ་པ་ཚོས་ངེས་པར་དུ་དམར་པོའི་ལམ་ལུགས་ལ་སློབ་སྦྱོང་བྱེད་དགོས་ཤིང་། ༧གོང་ས་མཆོག་ལ་མཚན་སྨོད་དང་བོད་རྒྱ་ནག་དང་ཐ་དད་ཡིན་པའི་ལོ་རྒྱུས་རང་བཞིན་ལ་མོས་མཐུན་མེད་པའི་རྩོམ་ཡིག་འབྲི་དགོས་པ་དེ་རེད།

འདས་པའི་ལོ་ངོ་བཅུ་ཕྲག་གཉིས་ལྷག་རིང་པེ་ཅིན་གྱི་མགོ་གཉིས་སྲིད་ཇུས་འོག བོད་བརྒྱུད་ནང་བསྟན་དར་སྤེལ་གྱི་གནས་སྟངས་ནི། དགོན་པ་དང་ལྷ་ཁང་། རི་མོ་དང་བཟོ་བཀོད་དག་རྒྱལ་སྤྱིའི་ཡུལ་སྐོར་སྤྲོ་འཆམ་པ་ཚོར་མགོ་སྐོར་གཏོང་ཆེད་ཙམ་དང་། བོད་ཀྱི་དགོན་པའི་གདན་རབས་ལུགས་སྲོལ་ལ་སྲིད་གཞུང་གི་སྒྲིག་གནོན་བཀོད་འདོམས་བྱེད་པ་ནི་དགོན་སྡེ་ཁག་ལ་དེ་བས་སུན་སྣང་ཆེ་ཤོས་ཆགས་ཡོད། ཕྱི་ལོ་ ༡༩༩༤ ལོར་བོད་ཐོག་ཞུགས་མོལ་ཚོགས་འདུ་ཐེངས་གསུམ་པ་ཚོགས་སྐབས། རྒྱ་ནག་དམར་པོས་བོད་ཐོག་སྟངས་འཛིན་བཀོད་སྒྲིག་སྲིད་ཇུས་ནི་དམར་པོའི་མགོ་གཙོ་ཚོས་བོད་དབང་འགྱུར་བྱས་ཏེ་ལོ་ ༤༣ ཕྱིན་རྗེས་བོད་པའི་སྤྱི་ཚོགས་ནང་། ཆོས་ལུགས་གལ་དགངས་ཆེན་པོ་ཡིན་པར་ངོས་འཛིན་བྱས་པ་ཐེངས་དང་པོ་དེ་ཆགས་ཡོད། དེ་ནི་སྲིད་ཇུས་ཀྱི་ཐབས་ཕྱོགས་གསར་པ་ཞིག་རེད།

སྲིད་ཇུས་འདིའི་འོག་པེ་ཅིན་གྱིས་ཕྱི་ལོ་ ༡༩༩༤ ལོར་ཀརྨ་པ་སྐུ་གོང་མ་དང་དེའི་རྗེས་ཕྱི་ལོར་ ༡༩༩༥ ལོར་པཎ་ཆེན་རིན་པོ་ཆེའི་ཡང་སྲིད་འཚོལ་སླད་བོད་རིགས་དགེ་འདུན་པ་དང་སྲིད་གཞུང་གི་ལས་བྱེད་མཉམ་འདུས་ཀྱི་ཚོགས་ཆུང་བཟོས་ཡོད། འོན་ཀྱང་། ཚོགས་ཆུང་གིས་ངོས་འཛིན་བྱས་པའི་ཀརྨ་པ་ཕྱིས་སུ་རྒྱ་གར་ལ་བྲོས་བྲོལ་དུ་ཕེབས་ཡོད་མོད། དགུང་ལོ་ལྔར་ཕེབས་པའི་དགེ་འདུན་ཆོས་ཀྱི་ཉི་མ་ནི་པེ་ཅིན་གྱིས་ཐག་གཅོད་མ་བྱས་སྔོན་ལ་བཙན་བྱོལ་ནས་༧གོང་ས་མཆོག་གིས་ངོས་འཛིན་གནང་པ་ཡིན་སྟབས། ཕྱི་ལོ་ ༡༩༩༥ ལོར་རྒྱ་གཞུང་གིས་ཁོང་འཛིན་བཟུང་བྱས་པ་ནས་བཟུང་གར་སོང་ཆ་མེད་ཆགས། པེ་ཅིན་རྒྱལ་མཚན་ནོར་བུ་ཟེར་བའི་བྱིས་པ་གཞན་ཞིག་པཎ་ཆེན་ངོ་མ་ཡིན་པར་བསྒྲགས།

ཕྱི་ལོ་ ༢༠༠༧ ཟླ་ ༨ ཚེས་ ༣ ཉིན་པེ་ཅིན་གྱིས་ཆོས་ལུགས་དམ་དྲག་ཆེ་རུ་བཏང་སྟེ། ཆོས་ལུགས་ལས་དོན་ལྷན་ཁང་གིས་ཡིག་ཆ་ཨང་ ༥ ཞེས་པ་ཞིག་བཏོན་པའི་ནང་། སྤྲུལ་སྐུ་ངོས་འཛིན་གྱི་མཐའ་མའི་ཐག་གཅོད་དབང་ཆ་བོད་ཀྱི་དགོན་པའི་འགན་འཁུར་ཚོགས་ཆུང་ནས་དམར་ཤོག་ཚོགས་པའི་ལག་ཏུ་བཅོས་བསྒྱུར་བྱས་ཤིང་། སྲིད་གཞུང་གིས་སྟངས་འཛིན་དོ་དམ་བྱེད་རྒྱུ་བྱས་ཡོད། རྙོག་ཟིང་གཞན་ཞིག་ནི་ ༧ གོང་ས་ཏཱ་ལའི་བླ་མ་སྐུ་ཕྲེང་རྗེས་མ་གལ་ཏེ་དམར་པོའི་སྲིད་གཞུང་གིས་འབྲེལ་ཡོད་འགན་འཁུར་བ་ཚོས་ཡང་སྲིད་ཐག་གཅོད་བྱས་པ་དེ་ནི་ཁྲིམས་མཐུན་དང་ཏཱ་ལའི་བླ་མ་ངོ་མ་ཡིན་པར་བསྒྲོག་ངེས། དེ་འདྲའི་འགྲེལ་བརྗོད་ཀྱིས་དེང་སྐབས་བོད་ཀྱི་དགེ་འདུན་པའི་ཁྲོད་ཞེ་སུན་དམིགས་བསལ་ཞིག་འབྱུང་བཞིན་ཡོད།

རྒྱ་ནག་གི་དབང་བསྒྱུར་འོག་བོད་རང་སྐྱོང་ལྗོངས་དང་། རྒྱ་ནག་གི་ཞིང་ཆེན་ཡུ་ནན་དང་སི་ཁྲོན། ཀན་སུའུ་དང་ཧྲན་ཧ་ཞིང་ཆེན་གྱི་ཁྱབ་ཁོངས་སུ་བཏང་པའི་ཁམས་ཨ་མདོ་བཅས་སུ་འཚོ་སྡོད་བྱེད་མཁན་བོད་རིགས་མི་མང་འགོས་ཀྱིས་བསྒྱུར་བཅོས་སྲིད་ཇུས་དེ་བཞིན་བོད་ཀྱི་དཀའ་རྙོག་སེལ་ཐབས་ཉག་ཅིག་ཡིན་པར་རློམ་པ་ནི། བོད་མི་མང་གི་སྤྱི་ཚོགས་ནང་སུན་སྣང་དང་བྱེད་ཐབས་ཟད་པའི་གནས་ཚུལ་དག་གི་བྱུང་རྐྱེན་གཙོ་པོ་དེ་ཆགས་ཡོད།

པེ་ཅིན་གྱི་ནུབ་རྒྱུད་སྒོ་འབྱེད་ཅེས་པའི་ལས་གཞིའི་འོག་འདས་པའི་ངོ་ལོ་བཅུ་ཕྲག་གཉིས་ཙམ་ནང་རྒྱ་རིགས་ས་ཡ་མང་པོ་བོད་ས་ཁུལ་དུ་གནས་སྤོར་གཞིས་ཆགས་བཞིན་ཡོད། དེས་རྐྱེན་པས་བོད་མི་རྣམས་སོ་སོའི་གྲོང་སྡེ་དང་བོད་ཡོངས་སུ་ཡ་ང་བའི་གྲངས་ཉུང་མི་རིགས་ཆགས་ཟིན། གནའ་སྔ་མོ་ལྷ་སར་ནམ་རྒྱུན་གནས་སྡོད་བྱེད་མཁན་མི་འབོར་སྟོང་ཕྲག་ ༢༠ ཙམ་དང་། ལོ་འཁོར་སྨོན་ལམ་ཆེན་མོའི་སྐབས་སུ་ཡང་སྟོང་ཕྲག་ ༡༠༠ ཙམ་ལས་མེད་པའི་རྒྱལ་ས་ཞིག་ཡིན་མོད། ༢༠༠༨ ལོར་དེབ་སྐྱེལ་བྱས་པའི་སྣུམ་འཁོར་གྲངས་སྟོང་ཕྲག་ ༡༠༠ ཟིན་ཡོད་འདུག དེང་སྐབས་ལྷ་ས་ཁུལ་རང་དུ་ཧན་རིགས་ས་ཡ་གཅིག་ལས་མང་པ་གནས་སྡོད་བྱེད་ཀྱི་ཡོད།

ས་ཁུལ་བཟང་ས་ཚང་མ་ཞིང་ས་དང་གྲོང་སྡེ་གསར་འཛུགས། གྲོང་ཁྱེར་རྒྱ་སྐྱེད་དང་གཏེར་ཁ་སྔོག་གདོན་ལས་འཆར་བཅས་ཀྱི་ཆེད་བཀོལ་སྤྱོད་བྱེད་ཀྱི་ཡོད། ལས་འཆར་གསར་བསྐྲུན་བྱེད་པ་དང་ཚོང་ལས་རིགས་ཀྱི་དམིགས་ཡུལ་ནི་རྒྱ་རིགས་ཚོའི་ཆེད་དུ་ཡིན། བོད་སྐད་ལའང་རྒྱ་སྐད་ཀྱི་བཙན་འཛུལ་ཐེབས་ཏེ་བོད་རིགས་གཞོན་སྐྱེ་ཚོར་གྱོང་གུད་ཆེན་པོ་རག་གི་ཡོད་པ་མ་ཟད། རྒྱ་རིགས་ཆེན་པོའི་ཁྲོད་སྤྱི་ཚོགས་དང་ཆབ་སྲིད་དོན་གཉེར་བྱེད་རྒྱུའི་གནས་བབ་ཧ་ཅང་ཞན་པ་བཅས་ཀྱིས་བོད་མིར་སུན་སྣང་ཆེ་རུ་འགྲོ་བཞིན་ཡོད།

ཕྱི་ལོ་ ༢༠༡༢ ཟླ་ ༨ ཚེས་ ༡༣ ཉིན་རང་ལོ་ ༦༠ ལ་སོན་པའི་བུད་མེད་པ་སངས་ལྷ་མོས་པེ་ཅིན་དུ་སྲིད་གཞུང་ལས་ཁུངས་མདུན་དུ་རང་ལུས་མེར་བསྲེགས་བཏང་། དྲང་བདེན་གྱི་ཆེད་དུ་ཁོ་མོས་བོད་ཤར་རྒྱུད་ནས་འགྲུལ་བཞུད་ཀྱིས་པེ་ཅིན་དུ་ཡོང་དོན། ས་གནས་དབང་འཛིན་པས་ས་ཡོམ་བརྒྱབ་རྗེས་བསྐྱར་སྐྲུན་ལས་གཞིར་ཁ་གཡར་ཏེ་ཁོ་མོར་བདག་པའི་ས་ཁང་བཙན་འཕྲོག་བྱས་པར་གུན་གསབ་སྤྲད་མེད་པས་རེད།

གཅིག་མཚུངས་ཀྱིས་ཕྱི་ལོ་ ༢༠༡༢ ཟླ་ ༦ ཚེས་ ༢༧ ཉིན། རང་ལོ་ ༤༠ ལ་སོན་པའི་བུད་མེད་བདེ་སྐྱིད་ཆོས་འཛོམས་ཀྱིས་སྐྱེ་རྒུ་མདོར་མི་མང་ངོ་རྒོལ་སྐབས་རང་ལུས་མེར་བསྲེགས་གནང་། ས་ཡོམ་བརྒྱབ་རྗེས་སུ་བསྐྱར་འཛུགས་ཀྱི་ལས་གཞིར་ཁ་གཡར་ནས་བཙན་འཕྲོག་བྱས་པའི་བོད་རིགས་ཁྱིམ་ཚང་ ༧༠ ལྷག་གི་ས་ཁང་བདག་དབང་ཕྱིར་སྤྲོད་དགོས་པའི་དགོས་འདུན་བཏོན་ཡོད།

ཉེ་ཆར་ང་བོད་ནང་འགྲུལ་སྐྱོད་སྐབས་ཤིག་ཁྲན་ཏུའུ་དང་ལི་ཐང་བར་གྱི་རི་འདབས་ཀྱི་གཞུང་ལམ་ཐོག་ཤིང་སྡོང་འོར་འདྲེན་བྱེད་པ་དང་། སྡོང་པོ་བརྒྱ་ཕྲག་མང་པོ་རི་འདབས་སུ་འོར་འདྲེན་བྱེད་ཆེད་བཞག་འདུག་པ་མཐོང་། རྒྱལ་སྤྱིའི་འཆར་རྩིས་སྣ་ཚོགས་ཀྱི་ནང་བོད་ནས་རྒྱ་ནག་ནང་འོར་འདྲེན་བྱས་པའི་ཤིང་སྡོང་རིན་བབ་ནི་ཨ་སྒོར་ཐེར་འབུམ་ ༥༠ ཟིན་གྱི་ཡོད། དེ་ནི་ལོ་ནས་ལོ་བསྟུད་དེ་རྒྱ་ནག་དམར་པོའི་མགོ་ཁྲིད་ཁག་ཅིག་གི་ཨམ་ཕྲག་ནང་འཐིམ་བཞིན་ཡོད།

ཉེ་ཆར་རྒྱ་གཞུང་གིས་ས་ཁུལ་དེ་དག་ནང་ཁོར་ཡུག་སྲུང་སྐྱོབ་ཀྱི་ལས་གཞིའི་འོག བོད་པའི་མི་འབོར་གསུམ་ཆ་གཅིག་ཟིན་པའི་འབྲོག་པར་གཏོར་ཤིག་གཏོང་མགོ་ཚུགས། སྤྱི་ཚོགས་ཚན་རིག་དང་མཐུན་པའི་ལས་འཆར་ཞེས་པའི་ཁོངས་སུ་འབྲོག་པ་ཚོས་གནས་ངེས་མེད་དང་། ཕྱུགས་ཟོག་བདག་གཉེར་གྱི་འཚོ་ཐབས་བསྐྱུར་ནས་གྲོང་ཁྱེར་གསར་པའི་ནང་འཚོ་སྡོད་བྱེད་དགོས་པའི་བཙན་བཀའ་གཏོང་གི་ཡོད། སོ་ཕག་གི་ཁང་ཆུང་ནང་སྡོད་བཟོད་མི་བདེ་པ་དང་། གྲོང་ཁྱེར་གྱི་ལམ་ལུགས་གསར་པའི་ནང་འཚོ་ཐབས་དཀའ་ཚེགས་ཅན་དུ་གྱུར་ཡོད་པ་མ་ཟད། གཞོན་སྐྱེས་ཚོ་ལས་མེད་ཆགས་ཏེ་ཉལ་ཐ་སྤྱོད་པ་དང་རྒྱན་འགུག་ཤོ་རྒྱག ཆང་རག་བག་མེད་ལོངས་སུ་སྤྱོད་པ་སོགས་འབྱུང་བཞིན་ཡོད། ཕྱི་ལོ་ ༢༠༡༢ ཟླ་ ༡༡ཚེས་ ༢༦ ཉིན་རང་ལོ་ ༡༨ ལ་སོན་པའི་དཀོན་མཆོག་ཚེ་རིང་ལགས་རང་ལུས་མེར་བསྲེགས་ཀྱིས་སྐུ་གྲོངས། ཁོང་ནི་གཉེན་འགྲིག་ཟིན་པ་དང་། སྔོན་མ་འབྲོག་པ་ཡིན་ཞིང་ཉེ་བའི་ལོའི་ནང་བཙན་དབང་གིས་ཀན་སུ་ཞིང་ཆེན་གྱི་ཨ་མཆོག་སྡེ་པར་གནས་སྤོ་བྱེད་བཅུག་པ་ཞིག་རེད།

དེང་སྐབས་རྒྱ་གཞུང་འོག་དཀའ་ངལ་ཡོད་པ་དང་མི་སེར་སྤེལ་ཡུལ་གྱི་དབང་སྒྱུར་བྱེད་མཁན་ཧན་རྒྱ་རིགས་ལ་ངོ་རྒོལ་བྱེད་མཁན་བོད་པ་གཅིག་པུ་མ་རེད། ཉེ་རབས་ལོ་ཟླའི་ནང་ཞིན་ཅཱིང་དང་ནང་སོག་བཅས་ཀྱིས་ཀྱང་ངོ་རྒོལ་བརྒྱ་ཕྲག་མང་པོ་འབྱུང་བཞིན་ཡོད། བོད་མི་རང་ལུས་མེར་བསྲེགས་གནང་མཁན་མི་གྲངས་ ༩༩ ལས་སུ་གཅིག་གིས་ཀྱང་ངོ་རྒོལ་བྱེད་སྐབས་རང་ཡུལ་ལ་བཙན་འཛུལ་བྱེད་མཁན་རྒྱ་རིགས་སུ་གང་དམར་གསོད་དང་གནོད་འཚེ་བྱས་མེད། དེ་ནི་སྤྱི་ཚོགས་ཆབ་སྲིད་དཔྱད་རྗོད་པ་ཚོར་དོ་སྣང་བྱེད་གཞི་ཞིག་ཆགས་ཡོད། ལྡོག་ཕྱོགས་ནས་ ༢༠༠༩ ལོའི་ཟླ་ ༦ ནང་ཀོང་ཏུང་ཞིང་ཆེན་དུ་ཧན་རྒྱ་རིགས་གཞོན་སྐྱེས་འགས་ཡུ་གུར་མི་ ༣ བསད་ཡོད་པ་དང་། ཡུརུམཅི་དང་ཀཱཤིགྷར་དུ་ཊུཀི་ཁ་ཆེ་ཚོས་ཧན་རྒྱ་རིགས་ཡུལ་བྱོལ་པ་དང་ཉེན་རྟོག་པ་ ༢༠༠ ལྷག་ལ་རྡུང་རྡེག་བཏང་ཡོད། འོན་ཀྱང་རྒྱའི་ཉེན་རྟོག་པ་དང་ཧན་རྒྱ་རིགས་མཉམ་རུབ་ཀྱིས་ཞེ་འཁོན་བརྩད་དེ་ཞིན་ཅཱིང་དུ་ཡུ་གུར་པ་སྟོང་ཕྲག་ལྷག་དམར་གསོད་དང་བཙོན་འཇུག་གི་བྱ་འགུལ་སྤེལ་ཡོད།

དེང་སྐབས་བོད་ནང་རང་ལུས་མེར་བསྲེགས་ཀྱི་རླབས་རྒྱུན་དྲག་ཏུ་འཕྱུར་བཞིན་པ་དེར། རྒྱལ་སྤྱིའི་སྤྱི་ཚོགས་ཀྱིས་མི་སྨྲ་བའི་བརྟུལ་ཞུགས་འཛིན་པ་ནི་བློ་ཕམ་དགོས་པ་ཞིག་རེད། འཛམ་གླིང་འདིར་ཊུའུ་ནེ་ཤི་ཡའི་སྲང་ལམ་དུ་ཚོང་པ་ཆུང་ཆུང་ཞིག་གིས་རང་ལུས་མེར་བསྲེགས་ཀྱིས་རྒྱལ་ཁབ་བཅུ་ཕྲག་ལྷག་ནང་གཅིག་རྗེས་གཉིས་མཐུད་ཀྱིས་གྱེན་ལངས་བྱུང་ ཡོད་ཀྱང་། ཚེ་སྲོག་བརྒྱ་ཕྲག་ཅིག་མེ་ཕུང་ཁྲོད་འདས་ཟིན་ཡང་ད་དུང་ཞི་བདེའི་ཁ་ཕྱོགས་མ་མངོན། དེང་སྐབས་པེ་ཅིན་གྱི་དཔལ་འབྱོར་དང་དམག་སྟོབས་འགྲན་ཐབས་བྲལ་ཏེ་མགོ་དུད་མཁན་ཇེ་མང་དུ་འགྲོ་བཞིན་པ་དེས། འཛམ་གླིང་ཧྲིལ་པོར་ཁྱབ་པའི་འཐབ་རྩོད་པ་རྣམས་ལ་བརྡ་ལན་ངན་པ་ཞིག་སྤྲོད་ཀྱི་ཡོད། དེ་ནི་འཚེ་བའི་རྣམ་འགྱུར་ཁོ་ན་མ་གཏོགས་འཛམ་གླིང་ཐོག་བདག་པོ་མེད་པ་སྟོན་གྱི་ཡོད། དེ་ལྟར་གྱུར་ཚེ། རྒྱལ་སྤྱིའི་ཚོགས་སྡེ་ཁག་ཏུ་མི་སེར་སྤེལ་ཡུལ་གྱི་དབང་བསྒྱུར་འོག་གི་བོད་པ་ལས་ལྷག་པའི་གྱོང་གུད་རག་ངེས་ཡིན།