དེ་རིང་ཕྱི་ཚེས་ ༡ ཉིན་གྱི་ཕྱི་དྲོ་རྒྱ་ནག་གཞུང་འབྲེལ་ཀན་སུའུ་ཉིན་རེའི་ཚགས་པར་གྱིས། ཀན་ལྷོ་ཁུལ་ཀླུ་ཆུ་རྫོང་མི་དམངས་ཁྲིམས་ཁང་གིས་ཁ་སང་ཕྱི་ཚེས་ ༢༨ ཉིན་ཁྲིམས་ར་ཚོགས་ཏེ། ཤེས་བཞིན་མི་བསད་པའི་ཉེས་མིང་འོག་བོད་མི་ལྷ་མོ་རྡོ་རྗེ་ལ་ལོ་ ༡༥ དང་། སྐལ་བཟང་བསོད་ནམས་ལ་ལོ་ ༡༡ ། ཚེ་བཟང་སྐྱབས་ལ་ལོ་ ༡༠ བཅས་ཀྱི་ཁྲིམས་ཐག་བཅད་ཡོད་ཚུལ་བསྒྲགས་འདུག
རྒྱ་ནག་གཞུང་གི་སྤེལ་བའི་གནས་ཚུལ་ནང་། བོད་མི་ལྷ་མོ་རྡོ་རྗེ་དང་སྐལ་བཟང་བསོད་ནམས། ཚེ་བཟང་སྐྱབས་བཅས་མི་གསུམ་གྱིས། ཕྱི་ལོ་ ༢༠༡༢ ཕྱི་ཟླ་ ༡༡ ཚེས་ ༢༩ ཉིན་ཀླུ་ཆུ་རྫོང་ཟམ་ཚ་ཞང་ལོ་ཚོ་སྡེ་བའི་རང་ལོ་ ༣༡ ཡིན་པའི་རྒྱལ་གཅེས་དཔའ་བོ་ཚེ་རིང་རྣམ་རྒྱལ་ལགས་ཀྱིས། ཡུལ་ཚོ་སྲིད་གཞུང་གི་སྒོ་ཁར་མེར་བསྲེཊ་ཀྱིས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་གནང་སྐབས་སྲོག་སྐྱོབ་ཐབས་མི་བྱེད་པར། རྒྱལ་གཅེས་དཔའ་བོ་ཚེ་རིང་རྣམ་རྒྱལ་ལགས་ཀྱི་ལུས་སྟེང་དུ་ས་སྣུམ་བླུགས་ཏེ། ཁོང་མགྱོགས་མྱུར་བགྲོངས་ཐབས་བྱས་ཡོད་པའི་ཉེས་འཛུགས་བྱས་ཡོད་པ་མ་ཟད། ཐེངས་འདིར་ཁོང་གསུམ་གྱིས་ཤེས་བཞིན་དུ་མི་བསད་པའི་ཉེས་མིང་འོག་ཁྲིམས་ཐག་བཅད་ཡོད་སྐོར་བཀོད་འདུག
གསར་འགོད་པ། དོན་གོ
