མིག་མི་འཛུམ།
ཚང་མར་གསལ་བ་ལྟར། གླིང་ཚ་ཚེ་བརྟན་རྡོ་རྗེ་མ་བུ་གསུམ་གྱིས་སྔར་ལོའི་གསུམ་བཅུའི་དུས་དྲན་ཉིན་ནས་ཞི་བའི་གོམ་བགྲོད་ཀྱིས་ལྡི་ལི་བརྒྱུད་བལ་ཡུལ་གྱི་ས་མཚམས་བར་དུ་སོང་ཞིང་། དེ་ནས་དཀའ་སྡུག་རབས་དང་རིམ་པ་བརྒྱུད་ནས་མཐར་ཁོ་རང་གཅིག་བུ་གོམ་བགྲོད་ཀྱིས་བལ་ཡུལ་བར་དུ་སོང་ཞིང་བལ་བོའི་བཙོན་དུ་བཅུག་ནས་ཟླ་བ་ཁ་ཤས་རིང་བསྡད་རྗེས། འདི་ལོའི་ཚེས་མགོར་ཕྱིར་ངྷ་སར་བསླེབས་ཏེ་ཡང་བསྐྱར་ད་ལོའི་གསུམ་བཅུའི་དུས་དྲན་གྱི་ཉིན་མོ་དང་བསྟུན་ནས་ཞི་བའི་གོམ་བགྲོད་མགོ་འཛུགས་རྒྱུ་ཡིན་པའི་གསར་འགོད་གསལ་བསྒྲགས་སྤེལ་བ་རེད།
གསར་འགོད་གསལ་བསྒྲགས་སྐབས་གསར་འགོད་པ་མང་བོས་རྒྱ་ནག་གི་རྒྱལ་དར་དང་འབྲེལ་བའི་དྲི་བ་མང་ཙམ་བཏོན་པར། ཁོས་སྤོབས་པ་ཆེན་པོས་མགོ་རང་གིས་བཙུགས་པ་དེར་མཇུག་ཀྱང་རང་གིས་སྐྱོང་གི་ཡིན་པར་བརྗོད་བྱུང་། གསར་འགོད་གསལ་བསྒྲགས་ཀྱི་གསར་འགྱུར་དྲ་ཐོག་ཏུ་བཀོད་མ་ཐག་ཕྱོགས་གང་སར་བཞུགས་པའི་བོད་དོན་དོ་སྣང་ཅན་དག་གིས་མཆན་བུ་བཏབ་ཅིང་རྒྱ་དར་འཁུར་བ་ལ་མི་འདོད་པའི་རྣམ་འགྱུར་ཤུགས་ཆེན་བསྟན་བྱུང་། དེ་མུར་གླིང་ཚ་ཁོ་རང་གི་ངོས་ནས་ཀྱང་དེའི་སྐོར་ལ་དོགས་བློ་ཞིག་འཆར་ནས་བསམ་ཚུལ་བསྡུ་རུབ་དང་མི་མང་ལ་བགྲོ་གླེང་ཞིག་གོ་སྒྲིག་བྱས་ཏེ་རྒྱ་དར་འཁུར་མིན་ཐད་ཀྱི་བསམ་ཚུལ་ཞིག་བསྡུས་སོང་། བགྲོ་གླེང་སྟེང་མི་མང་བརྒྱ་ཆའི་བརྒྱད་ཅུས་རྒྱ་དར་འཁུར་བ་དང་མ་འཁུར་བ་གཉིས་ལས་མ་འཁུར་བར་དགེ་ཕན་ཆེ་བའི་བསམ་ཚུལ་བྱུང་བ་དང་། བསམ་ཚུལ་དེ་དག་ཀྱང་རེ་རེ་བཞིན་དགོས་པ་དང་རྒྱུ་མཚན་གྱིས་བརྗོད་བྱུང་བའི་རྣམ་ པ་ཞིག་མཐོང་སོང་བས་ན། བདག་གི་ངོས་ནས་ཀྱང་རང་གི་སེམས་གཏིང་གི་བསམ་ཚུལ་མཚོན་པའི་སྐད་ཆ་མདོར་བསྡུས་ཤིག་བརྗོད་འདོད་བྱུང་།
སྤྱིར་བཏང་གིས་བཤད་ན། རྒྱ་དར་འཕྱར་དང་མི་འཕྱར་དེ་ཆབ་སྲིད་ཀྱི་རྩ་དོན་ཞིག་དང་ཚད་མཐོའི་རང་སྲིད་རང་ སྐྱོང་གི་དགོས་དབང་ཞིག་ཡིན་དུ་ཆུགས་ཀྱང་། དོན་དངོས་ཀྱི་ཐད་ནས་མཚམས་མིན་དེ་མི་རང་རང་གི་སེམས་ཀྱི་གཏིང་དང་མཐའ་དང་དབུས་ཀྱི་ངོས་ནས་བསམ་བློ་ཞིག་ཐོངས་དང་། ཡུལ་དང་དུས་ཀྱི་དབང་གིས་དང་གནས་བབ་ཀྱི་མི་མང་གི་ངོས་ནས་དང་ལེན་བྱེད་དཀའ་བ་ནི་བཤད་ཅི་ལ་དགོས། དེའི་སྟབས་ཀྱིས་གླིང་ཚའི་འཐབ་རྩོད་འདི་མི་སྒེར་ཞིག་གི་ལས་འགུལ་ཡིན་སྟབས། ཚོགས་པ་ག་གེ་མོ་དང་གང་ཟག་ཆེ་གེ་མོའི་བསམ་ཚུལ་དང་ལང་ཕྱོགས་འཁུར་དགོས་པའི་རྒྱུ་མཚན་སྤུ་ཙམ་མེད་པས་ན། གླིང་ཚས་རྒྱ་དར་འཁུར་བ་ལ་དགེ་དང་སྐྱོན་གཉིས་ལས་སྐྱོན་གྱི་ཕྱོགས་ཆེ་ངེས་པ་དེ་གསལ་བོ་རེད།
ཡང་ཕྱོགས་གཞན་ཞིག་ནས་བཤད་ན། གླིང་ཚས་རྒྱ་དར་མ་འཁུར་བའི་སྐབས་ཀྱི་རྣམ་པ་དང་མི་མང་གི་རྒྱབ་སྐྱོར། རྒྱལ་ཁབ་ཕྱི་ནང་གི་གདུང་སེམས་མཉམ་སྐྱེད་སོགས་ཧ་ཅང་གི་ཚད་མཐོ་བོ་ཡིན་པ་དང་། དེ་འདྲ་ཞིག་ཡིན་ཀྱང་ལོས་དགོས་མོད། འོན་ཀྱང་ལྡི་ལི་ནས་རྒྱ་དར་འཁུར་བ་དེས་ཕྱོགས་གང་སར་བཞུགས་པའི་བོད་རིགས་དོ་སྣང་ཅན་མང་བོར་ཕོག་ཐུག་བཟོས་ཤིང་། ག་ལེར་གདུང་སེམས་མཉམ་སྐྱེད་དང་རྒྱབ་སྐྱོར་གྱི་རྣམ་པ་ཤུགས་ཆུང་དུ་སོང་ཡོད་པ་སུ་ལའང་རྒྱུས་མངའ་ཡོད་པ་ཞིག་ཡིན།
དེ་དང་མཉམ་དུ་གཞོན་ནུ་དང་དབུ་མའི་ལམ་མི་མང་ལས་འགུལ་ཁང་གཉིས་ཀྱིས་ཕན་ཚུན་ལ་ཤགས་འགྱེད་བྱས་པ་དང་མི་མང་གི་ངོས་ནས་ཀྱང་ཤགས་འགྱེད་ཀྱི་མགོ་བཙུགས་སོང་། རླབས་ཆེ་ཞིང་དཔའ་ངར་ལྡན་པའི་གླིང་ཚའི་འཐབ་རྩོད་དེ་རིམ་གྱིས་ཁྱབ་རྒྱ་ཇེ་ཆུང་དང་མི་མང་གི་གདེང་འཇོག་ཀྱང་ཇེ་ཆུང་དུ་སོང་ཡོད་པ་ནི་ས་རིས་ཐང་གསལ་ཡིན་པས། གླིང་ཚ་ཁོ་རང་གི་ངོས་ནས་ཀྱང་འདས་པའི་ཉམས་མྱོང་གིས་མ་འོངས་པའི་ཁ་ཕྱོགས་ཀྱི་ཆེད་དུ། མི་མང་གི་མདུན་ནས་ནོར་འཁྲུལ་ཡོད་ཚེ་ངོས་ལེན་དང་མི་མང་གི་ཤ་ཚ་ཞིང་རྒྱབ་སྐྱོར་ལྡན་པའི་བསམ་ཚུལ་ལ་ཆ་འཇོག་ཅིག་ཏན་ཏན་བྱ་འོས་པར་མཐོང་། དེ་དང་མཉམ་དུ་སྐབས་འདིར་གཞུང་ངོས་ཀྱི་ལང་ཕྱོགས་དེ་རྒྱ་དར་བསྲེགས་པ་དང་འཕྱར་བ་གཉིས་ཀར་ངོས་ལེན་མེད་པའི་དགོངས་གཞི་དེའི་འོག་ནས་རང་ཉིད་ཀྱི་རྟག་བརྟན་ཐེར་ཟུག་གི་ལང་ཕྱོགས་དེ་བརྟན་པོ་དང་སྔ་མའི་གས་ཆག་ལ་ཡོ་སྲང་བྱེད་རྒྱུ་ཧ་ཅང་གལ་ཆེ་བར་མཐོང་།
དེ་མིན་འདི་མུར་མི་མང་གི་བསམ་ཚུལ་དང་རེ་བ་སྣང་མེད་ཀྱིས་མགོ་རང་གིས་བཙུགས་པ་དེའི་མཇུག་རང་གིས་སྐྱོང་རྒྱུ་ཡིན་པའི་ཨུ་ཚུགས་ཀྱི་ངོས་ནས་ཤར་བསྐྱོད་བྱས་ཚེ། མཐོང་ན་སྙིང་ཤ་འདར་བ་དང་གོ་ན་མིག་ཆུ་འཆོར་བའི་རླབས་ཆེན་གྱི་ལས་འགུལ་དེ་ཕན་པ་ལས་གནོད་དུ་མི་འགྲོ་བའི་ངེས་པ་མི་འདུག་ལ། མི་མང་གི་ཁྲོད་དུ་ཡང་ཡ་ང་བའི་རྩོད་གླེང་དང་རྡོག་རྩ་ཆིག་སྒྲིལ་གྱི་གོང་བུ་རྩ་གཏོར་མི་གཏོང་བའི་ངེས་པ་མི་འདུག་ཞུ་རྒྱུ་ཡིན། དེ་བས་ཡག་སྡུག་གི་བསམ་ཚུལ་ཡོང་རྒྱུར་གཡོལ་ནས་སྔར་ལོའི་གསུམ་བཅུའི་དུས་དྲན་ཉིན་མོ་བཞིན་ཚོགས་པ་དང་ལྟ་བ། དེའི་ལང་ཕྱོགས་ཀྱི་སྐད་ཆ་མེད་པར་བརྒྱ་ཁ་གཅིག་གཅོད་ཀྱི་དཔེ་བཞིན་ཚང་མས་ཐུན་མོང་གི་ངང་ནས་རྒྱབ་སྐྱོར་ཡོད་པ་སྟེ། རྒྱ་དར་ས་ལ་གཡུགས་ནས་འགྲོ་རྒྱུ་དེ་ཁ་ཚ་དགོས་གཏུགས་ཀྱི་གནད་དོན་ཞིག་ཡིན་པར་འདོད།
ཁ་གསལ་བོར་བཤད་ན། བདག་ཉིད་ནི་རྒྱ་དར་འཁུར་བས་སྐྱོན་དང་མ་འཁུར་བས་དགེ་རུ་མཐོང་མཁན་དེ་འདྲ་གང་ ཡང་མིན་ནའང་། རླབས་ཆེན་གྱི་ལས་འགུལ་བ་གང་ཉིད་ཁ་ལ་གཡར་ནས་གོ་སྐབས་ལ་སྒུག་མཁན་ཁག་ཅིག་གིས་མི་མང་ལ་དཀྲུག་ཤིང་གི་ལག་ཆར་བེད་སྤྱོད་མི་གཏོང་བའི་ངེས་པ་གཏན་ནས་མེད་པའི་དོགས་བློ་ཞིག་ཡང་ཡང་འཆར་བ་ལ་བརྟེན་ནས་འཛེམ་ཟོན་གང་ཡང་མེད་པའི་བསམ་ཚུལ་ཙམ་ཞུས་པ་ལགས།
༢༠༡༣ ། ༣ ། ༥ ལ་བྲིས།
གྲོགས་པོ་རྣམ་རྒྱལ་ལགས་བོད་བསྟན་པ་ཆབ་སྲིད་ཀྱི་ཆེད་ལས་ངག་ཡིད་གསུམ་ཕུལ་ལ་ཕུལ་སྟངས་ཡོད་བ་རེད་ལབ་ན་ག་རེ་རེད་ཁོས་སེམས་ཐག་གཙང་གཅོད་དང་བསམ་པ་རྣམ་དག་གིས་ཀུན་སློང་ཁུར་ནས་མུ་མཐུད་ལས་འགུལ་སྤེལ་བ་ལ་བློ་ཕམ་དང་ཐུགས་མི་སྤྲོ་དགོས་དོན་ཅི་ཡིན་ནམ་དངོས་གནས་ཁྱེད་རང་གི་གོང་ནས་བཤད་པ་ལྟར་རྒྱ་དར་འཕྱར་འདུག་བས་ཡག་པོ་མི་འདུག་ལབ་པ་ཡིན་དེ་ནི་ཁྱེད་རང་གིས་རྣམ་རྟོག་གི་བསླང་བའི་དགོས་མེད་ཀྱི་དཔྱོད་ཤེས་ཞིག་རེད་དེ་ལ་སྐྱོན་གང་ཡང་མེད་རྒྱ་དར་འཕྱར་མི་ཆོག་པ་དང་འཕྱར་ན་མེས་པོ་དག་གིས་སྨྲེ་སྔགས་འདོན་ནི་རེད་མ་ལབ་མ་གཏོགས་འོ་ན་རྒྱ་དར་འོག་ལ་བསྡད་ཡང་མི་ཆོག་པ་འདྲ་དེ་ལྟར་ན་རྒྱ་དར་འོག་གི་རང་དབང་དང་དབུ་མའི་ལམ་གྱི་འཚོ་བ་ལ་ཅི་ལྟར་བྱེད།
རྩོམ་ཐུང་འདིས་བསྟན་པའི་དོན་གནད་ལ་ངེས་པར་དུ་གླིང་ཚས་བསམ་གཞིག་བྱས་ན་འགྲིག་གི་སྙམ། ཡུལ་དུས་གནས་སྐབས་དང་། རང་མི་མང་གི་བསམ་པའི་འཁྱེར་ཕྱོགས་ལ་བལྟས་ཏེ་ཕོག་ཐུག་མི་གཏོང་རྒྱུ་ཧ་ཅང་གལ་ཆེ།
གླིང་ཚ། གཡས་གཡོན་ལ་མི་ལྟ་བའི་དེང་གི་སྐུ་ངོ་གསར་པ་འདི་ཚོས། རང་རང་གི་ལས་དོན་མ་སྒྲུབ་པར། ཁྱེད་གཅིག་པུ་རྗེས་དེད་གཏོང་གིན་འདུག ཁྱེད་གང་དུ་བྲོས་འགྲོ་གིན་ཡོད། ཐག་རིང་རྡ་ས་ནས་བོད་དང་ཁ་ཐག་ཉེ་བའི་བལ་ཡུལ་བར་དབུགས་ཐེངས་གཅིག་ལ་བྲོས་སམ། ཡང་ན། མུན་ནག་གི་བཙོན་དོང་ཞིག་ནང་ཡིབ་ནས་ཡོད། ཁོ་ཚོས་ཁྱེད་འབོད་ཀྱིན་འདུག ཨི་ཛི་རལ་ལ་འབོད་ཀྱིན་འདུག ཁ་ཟས་ཞིམ་པོ་དང་ཕ་བུ་ལྷན་འཛོམས་འབྱུང་བར་འབོད་ཀྱིན་འདུག ད་ལྟ་ཡང་བསྐྱར། ཁྱེད་ཁོ་ཚོར་སྐྲག་ནས། གཉེན་ཉེ་ཙམ་ཡང་མི་དྲན་པར། བྲོས་གྲབས་བྱེད་ཀྱིན་ཡོད་དམ། ངོ་མ་ཁྱེད་ནི་རང་གི་ཉེ་དུ་ལ་སྐྲག་གིན་པའི་མི་བུ་སྡར་མ་ཞིག་རེད། ཁྱེད་བྲོས་དང་ཁོ་ཚོས་རང་ཉིད་ཀྱི་ལས་དོན་དོར་ནས་ཁྱེད་རྗེས་དེད་བྱེད་ཀྱིན་རེད། གཅིག་བྱས་ན་ད་དུང་། ཁོ་ཚོས་ཉེན་རྟོག་པ་འཁྲིད་དེ་ཁྱེད་དེད་ཀྱི་རེད། ཁོ་ཚོས་ཉེས་ཅན་པ་ཁྱེད་རྒྱལ་ཡོངས་སུ་ཁྱབ་བསྒྲགས་བྱས་སོང་།
༄༅། །ལས་འགུལ་དེ་ནི་བོད་པའི་གཏམ་དཔེ་ལྟར། ང་བཟུང་ནས་སྤུ་སྤུད་ཞེས་པ་ལྟར་རེད། གཞན་ཡང་གཏམ་དཔེ་གཅིག་ལ། ངས་ལུང་པའི་འཕུ་ལ་ཕྱིན། ལུང་པའི་མདའ་ལ་ཕྱིན་ཀྱང་སྐད་གྲགས་གང་ཡང་འཇོག་ཐུབ་མ་སོང་བས། ངས་ཕ་རྒན་དེའི་སྐེ་ལྟུབ་པས་ལུང་པར་སྐད་གྲགས་ཆགས་སོང་ཟེར་བའི་དཔེ་ལྟར་གླིང་ཚས་རྒྱ་ཡི་རྒྱ་དར་འཕྱར་ཏེ་བལ་ཡུལ་ནང་བཙོན་ཁང་ནང་བཅུག་པར་སྐད་གྲགས་ཆགས་སོང། ད་ཡང་སྐྱར་སྐད་གྲགས་ཤིག་ཞོག་རྩིས་འདུག །
གླིང་ཚས་ཡོད་ཚད་བློས་བཏང་བྱས་ནས་ལུས་ངག་ཡིད་གསུམ་པོ་བོད་རྒྱལ་ཁབ་དང་མི་རིགས་ཀྱི་ཆེད་དུ་ཕུལ་བ་བདེན་མོད་ཕུལ་བ་ལ་ཡང་ཕུལ་སྟངས་ཡོད་རེད། ལོ་སྔོན་མ་ཐེངས་དང་པོ་གོམ་བགྲོད་བྱས་སྐབས་ཁོང་གིས་བློས་བཏང་གི་ལས་འགུལ་ལ་རྗེས་སུ་ཡི་རངས་བྱས་མྱོང་ལ་དེ་འབྲེལ་མི་ལའང་འབྲེལ་བཤད་བྱེད་མཁན་ཞིག་ཡིན། ཡིན་ན་ཡང་ཁོང་གིས་རྒྱ་མིའི་རྒྱལ་དར་འཕྱར་བ་ནས་བཟུང་དྲང་པོར་བཤད་ན་སེམས་ནང་དུ་དེ་ཙམ་གྱི་ཁོང་ལ་དགའ་ཞེན་སླེབས་ཀྱི་མི་འདུག །ལྷག་པར་དུ་ད་ལོ་རྒྱལ་དར་འཕྱར་ནས་ལས་འགུལ་མགོ་འཛུགས་བྱ་ཡི་ཡིན་སྐོར་གོ་དུས་སུན་སྣང་འདྲ་ཞིག་སྐྱེས་སོང་། མ་ཟད་དེ་ཡང་གསུམ་བཅུ་དུས་དྲན་གྱི་ཉིན་མོ་མགོ་འཛུགས་བྱ་ཡི་ཡིན་པར་གོ་བས་ང་ཚོས་ཕ་མེས་ཡང་མེས་རྣམས་ཀྱིས་ཤི་དུར་ཁུང་ནས་བལྟས་ཡོད་ན་འདི་ལྟར་རུང་གི་མ་རེད་བསམ་སྟེ་གླིང་ཚ་ད་ངོ་མ་ཚར་སོང་བསམ་བྱུང་།
སྤྱི་བཏང་ང་ཚོའི་བོད་པ་ཟེར་བ་འདི་རྣམ་རྟོག་དང་གཡོ་སྒྱུ་འགྲན་སེམས་ཀྱིས་འཚོ་བསྡོད་ཡོད་པ་ཞིག་ཡིན་གླིང་ཚའི་རང་གི་ཁྱིམ་མི་བུ་ཕྲུག་ཚང་མ་བློས་བཏང་ནས་བོད་་མི་རིགས་ཀྱི་བདེན་དོན་དང་དཀའ་རྙོག་སོགས་སེལ་ཕྱིར་རང་གི་ཡོད་ཚད་མི་རིགས་ཀྱི་རྩ་དོན་གྱི་ཆེད་དུ་འབུལ་བ་ལེགས་ན་ཡང་ད་རུང་ཁ་སྟོང་ནང་གི་ཚིག་སྟོང་རྐྱང་རྐྱང་བཤད་བའི་བཙན་བྱོལ་ནང་གི་བོད་རིགས་སྐྱག་ཤོར་འགས་ལས་འགུལ་ལ་བཀག་རྡོ་དང་བྱ་བ་ལམ་སློང་སོགས་མི་ཡོང་བའི་ཆེད་རྩོམ་རྙོག་འདྲ་མིན་དང་གཏམ་བཤད་འདྲ་མིན་སོགས་མང་པོ་ཞིག་སྤེལ་སོང་དེ་དག་ལ་དུས་ནམ་ཡང་བཀྲ་མི་ཤེས་དང་ཁ་མི་དྲོ་སོགས་ཡོང་བའི་སྨོན་ལམ་ཡོད་།