ནང་རུལ་བ་དང་རང་སྲེག་ཀྱི་མཚོན་དོན་གླེང་བ།

ཆབ་འགག་དཔལ་ལྡན།

དེང་སང་བྱེས་འབྱོར་བཙན་བྱོལ་བ་ཙམ་མ་ཟད་གཞིས་བཞུགས་བོད་མིའི་ཁྲོད་དུའང་བོད་ལ་སེམས་ཤུགས་ཡོད་མདོག་གིས་ཁྱི་པགས་གྱོན་པའི་རྒྱའི་རྒྱུག་ཁྱི་མཐོ་སྒང་བའི་ས་ཁམས་གང་སར་ཇེ་མང་དུ་འགྲོ་བཞིན་པ་ཚོས་རྒྱ་དཔོན་གྱི་མདུན་དུ་མཇུག་མ་གཡུག་བཞིན་༧ གོང་ས་རྒྱལ་བ་རིན་པོ་ཆེར་འཕྱར་ཁ་གཏོང་བ་དང་། བཙན་བྱོལ་བོད་མིའི་སྒྲིག་འཛུགས་རྩ་གཏོར། ཕྱི་སྡོད་བོད་རིགས་ནང་རུལ་བ་དང་ལག་སྦྲེལ། རང་རེའི་ཕུལ་བྱུང་གི་མི་སྣ་རྣམས་མུན་ནག་གི་བཙོན་དུ་བཙན་འདེད། ཤུལ་ལུས་ཕ་མ་སྤུན་མཆེད་རྣམས་འཇུ་བཟུང་གིས་གཅར་རྡུང་བྱེད་བཅུག་པ་དག་ནི་བོད་གཞིས་བྱེས་གཉིས་ཀྱི་རྒྱུག་ཁྱི་ནང་རུལ་བ་རྣམས་ཀྱིས་བྱས་འབྲས་རེད།

མི་གྲངས་དུང་ཕྱུར་ ༧༢ ཙམ་འདུས་སྡོད་བྱེད་ཀྱིན་པའི་འཛམ་གླིང་གི་འཇིག་རྟེན་འདིར་འགན་གཅིག་ཀྱང་འཁུར་མི་དགོས་པར་ལྟོ་གོས་སུས་སྤྲད་ན་དེའི་སར་ཕྱིན་ནས་ཁྱི་བཞིན་ལྕེ་བསྣར་ཏེ་མི་བུ་གང་ཞིག་གིས་རང་སྲེག་གནང་མཁན་ལ་ངན་སྐུལ་དང་། འདི་ཕྱི་གཉིས་ཀྱི་སྐྱབས་གནས་དམ་པ་༧རྒྱལ་དབང་མཆོག་དང་། དཔལ་ལྡན་རང་གཞུང་། གཞུང་འབྲེལ་མ་ཡིན་པའི་གཞོན་ནུ་ལྷན་ཚོགས་བཅས་ཀྱིས་ངན་པ་ལག་སྦྲེལ་བྱས་ཡོད་ཚུལ། ཚོ་ཁག་ག་གེ་མོ་ཞིག་གདུང་སེམས་མཉམ་སྐྱེད་དུ་བསྐྱོད་ཚུལ་སོགས་འཁྱོག་བཤད་བྱས་ཏེ་རྒྱ་སྒོར་འགའ་ཐོབ་ཐབས་བྱེད་པའི་ཁེ་སྒྲུབ་རིང་ལུགས་པ་འདི་ཚོར་དངོས་མིང་ཞིག་བཏགས་ན་མཇུག་མེད་མི་པགས་གྱོན་པའི་རྒྱུག་ཁྱི་ཞེས་འདོགས་ཆོག རྒྱུག་ཁྱི་ཚོས་ལྐོག་ལས་བྱེད་པ་ལས་མངོན་སུམ་དོད་པོའི་ལས་རིགས་གང་ཡིན་ཡང་སྒྲུབ་མི་ཐུབ། དེ་ནི་ཁོ་ཚོར་སྙིང་སྟོབས་མེད་པས་རེད།

ཡིན་ནའང་རྒྱུག་ཁྱི་འདི་ཚོས་ལས་དོན་ངོ་མ་གང་ཡིན་ཟེར་ན།  ཕྱི་ལོ་ ༢༠༡༠ ལོའི་ཀྲུང་གོའི་བོད་རིག་པའི་དུས་དེབ་འདོན་ཐེངས་གཉིས་པའི་སྟེང་བཀོད་པའི་འཐབ་ཕྱོགས་གཅིག་གྱུར་ཁང་གི་ལས་དོན་དག་རེད། འདིར་ལུང་འདྲེན་ཞུས་ན། “ཏཱ་ལའི་རུ་ཚོགས་དང་འགྲན་རྒོལ་བྱེད་ཐུབ་པའི་ཕྱི་སྡོད་བོད་རིགས་སྤུན་ཟླའི་སྟོབས་ཤུགས་གསོ་སྐྱོང་བྱེད་དགོས་”  “ཕྱི་སྡོད་བོད་རིགས་སྤུན་ཟླ་མེས་རྒྱལ་ལ་སེམས་ཕྱོགས་པ་འགུག་ཐབས་བྱེད་དགོས་ པ་”  “དུས་རབས་ ༢༠ ལོ་རབས་ ༨༠ ནས་བཟུང་རྒྱལ་ཁབ་ནས་ཕྱིར་སོང་སྟེ་ཕྱི་རྒྱལ་དུ་གནས་སྡོད་བྱས་ཡོད་པའི་བོད་ རིགས་སྤུན་ཟླའི་ལས་དོན་ལ་ཤུགས་སྣོན་རྒྱག་དགོས་པ་དང་།  ཁོང་ཚོ་དང་འབྲེལ་བ་བྱེད་རྒྱུར་ཤུགས་སྣོན་རྒྱག་དགོས་པ་”  “ཕྱི་སྡོད་བོད་རིགས་ཀྱི་མི་རབས་གཉིས་པ་དང་གསུམ་པའི་འབྲེལ་གཏུག་གི་ལས་དོན་ཡག་པོ་སྒྲུབ་དགོས་ཤིང་།  “ཐོག་མཐའ་བར་གསུམ་དུ་དབྱེ་བ་ཡོད་པའི་སྤྱོད་ཚུལ་འཛིན་པ་དང་།  འགལ་ཟླ་བེད་སྤྱོད་བྱེད་པ།  ནང་དཀྲུག་ཁ་གཏོར་བྱེད་པའི་རྩ་དོན་དེ་ཕྱི་སྡོད་བོད་རིགས་སྤུན་ཟླའི་ལས་དོན་གྱི་རིམ་པ་ཁག་གི་ནང་ཁྱབ་དགོས་” ཞེས་སོགས་ཀྱི་སྲིད་བྱུས་འོག་ལས་དོན་སྒྲུབ་ཀྱིན་ཡོད་པ་གཞིས་བཞུགས་ལྷག་བསམ་ཅན་ཞིང་འབྲོག་མང་ཚོགས་ཀྱིས་ཉན་འཇོག་དགོས།

འདས་པའི་ལོ་ངོ་བཅུ་ཕྲག་གཅིག་གི་རིང་ཀྲུང་དབྱང་སྲིད་གཞུང་གི་གསོ་ཁྱི་འདི་དག་གིས་ཕྱི་ཕྱོགས་སུ་དོལ་རྒྱལ་ཕྱོགས་ཁག་དང་མཉམ་འབྲེལ་གྱིས་༸གོང་ས་སྐྱབས་མགོན་ཆེན་པོར་མཚན་སྨད་ཞུས་པ་མ་ཟད། བཙན་བྱོལ་བོད་མིའི་སྒྲིིག་འཛུགས་རྩ་གཏོར་གྱི་ལས་དོན་སྒྲུབ་མུས་ཡིན། ད་དུང་ལོ་རབས་བརྒྱད་ཅུ་པ་ནས་བཟུང་ཕྱིར་སོང་བའི་བོད་རིགས་མི་རབས་གཉིས་པ་དང་གསུམ་པ་བེད་སྤྱད་དེ་རང་བཙན་གྱི་ལྟ་བ་འཛིན་མཁན་དང་དབུ་མའི་ལམ་གྱི་ལྟ་བ་འཛིན་ མཁན་བར་འགལ་ཟླ་བཟོས་ཏེ་ནང་ཕན་ཚུན་དཀྲུག་གཏོར་གྱི་གཏམ་བརྗོད་སྤེལ་རེས་བྱེད་དུ་འཇུག་གི་ཡོད། རྒྱུག་ཁྱི་ཚོར་ཐུན་མོང་བའི་ཁྱད་ཆོས་ཤིག་ཡོད་པ་ནི་བོད་ལ་སེམས་ཤུགས་ཡོད་མདོག་དང་ལ་ཞེན་ཆེ་མདོག་གིས་འཛུམ་དམུལ་ཟོལ་གྱིས་གནས་ཚུལ་འདྲ་མིན་ཐོག་ཐབས་ཤེས་ཡོད་རྒུ་བཏོན་ཏེ་སྐད་ཆ་འདྲི་བ་དང་། ལ་ཞེན་དགོས་གལ་ཆེ་ལུགས་གླེང་ནས་བོད་མིའི་ངག་སྒོ་ནས་སྐད་ཆ་ཅི་ཞིག་ཕྱིར་འཐོན་མིན་ལ་ངང་སྒུག་བྱེད་པ་དག་རེད།

ད་དུང་གསལ་བོ་མཁྱེན་དགོས་རྒྱུ་ཞིག་ལ་ཡུ་རོབ་ཀྱི་རྒྱལ་ཁབ་ཁ་ཤས་ནང་གི་རྒྱ་ནག་གི་གཞུང་ཚབ་ཁང་དུ་བོད་མི་སྐོར་ཞིག་སོང་ནས་སྤྲོ་སྐྱིད་བཏང་ཡོད་པ་དང་། ཁོང་ཚོས་བརྗོད་གསལ་ལ་རྒྱ་ནག་གཞུང་ཚབ་ཁང་དུ་སོང་བ་ནི་བོད་རྒྱ་མཛའ་འབྲེལ་གྱི་དོན་དུ་ཡིན་ཚུལ་གླེང་།  བོད་མི་ཚོས་ཁོ་རང་ཚོ་རྒྱུག་ཁྱི་ཡིན་པའི་དཔང་རྟགས་དངོས་རྙེད་བྱུང་ཉིན་ནས་ཁོ་ཚོར་ཁྲོས་ཏེ་གཅར་རྡུང་དང་དམར་གསོད་རིགས་གཏན་ནས་བྱེད་མི་ཉན་པའི་གནས་ལུགས་འདི་རྟོགས་པར་བྱས་ཏེ་སེམས་སུ་གཟུང་དགོས།  ཡང་གཅིག་བཤད་ན། ད་ལྟའི་དུས་རབས་ནི་གནའ་བོའི་དུས་རབས་བཞིན་གོ་མཚོན་ཐོགས་པའི་དམར་འཛིང་གི་དུས་རབས་ཤིག་མ་ཡིན་པར་ཤོག་སྨྱུག་ཐོགས་པའི་ཀླད་འཛིང་གི་དུས་རབས་ཤིག་ཡིན། ཤོག་སྨྱུག་ཐོགས་པའི་ཀླད་འཛིང་གི་དུས་རབས་ནང་མི་ཚང་མས་རང་གི་ཚེ་སྲོག་དང་གཉིས་སུ་མ་མཆིས་པའི་ཕ་སྐད་རྨང་གཞིར་བཏིང་ནས་འཛམ་གླིང་གི་ལོ་རྒྱུས་ལ་རྒྱུས་ལོན་བྱེད་སླ་བའི་དབྱིན་ཡིག་གིས་གཙོས་ཤར་ནུབ་རྒྱལ་ཁབ་ཀྱི་ཡིག་རིགས་མི་ཉུང་བ་ཞིག་ལ་འབད་འབུངས་བགྱིས་ཏེ་རང་གི་ཐོབ་ཐང་རྩོད་ཀྱིན་པའི་བསླབ་བྱ་རྣམས་རང་ རིགས་བོད་མི་ཚོས་ཀྱང་ལག་ཏུ་བླངས་ནས་ནང་དམེ་དང་རྒྱ་གསོད་དམར་འཛིང་གི་བསམ་བློ་དོར་ཏེ་དུས་རབས་ཉེར་གཅིག་པའི་རྗེས་ཟིན་གྱི་ཞི་བདེའི་གཉིས་ཕན་དབུ་མའི་ལམ་དུ་བསྐྱོད་རྒྱུ་ནི་བོད་མི་ཙམ་མ་ཡིན་པར་འཛམ་གླིང་ཡུལ་ཁག་གི་མི་མང་ལའང་འབྲེལ་བ་དམ་ཟབ་ཅིག་ཡོད་དོ།།

ཕྱི་ལོ་ ༢༠༠༨ ལོར་གཞིས་བཞུགས་བོད་མི་རྣམས་ཀྱིས་ལག་ཏུ་མདའ་མཚོན་གོ་ཆ་མ་བཟུང་བར་ཞི་བའི་ངང་རྒྱ་གཞུང་གི་གདུག་རྩུབ་ཅན་གྱི་དྲག་གནོན་སྲིད་ཇུས་ལ་ངོ་རྒོལ་གནང་བར་རྒྱ་གཞུང་གིས་སྔར་ལས་ལྷག་པའི་དྲག་གནོན་གྱིས་ངོ་རྒོལ་བ་ལ་གཅར་རྡུང་དང་དམར་གསོད་བཏང་བས་བོད་མི་རྣམས་ཀྱི་སེམས་སུ་རྨ་ཁ་གསར་བ་ཞིག་བཟོ་མགོ་བརྩམས། རྨ་ཁ་དེས་མདོ་དབུས་ཁམས་གསུམ་གྱི་མཐོ་སྒང་བ་རྣམས་རྡོག་རྩ་གཅིག་སྒྲིལ་བཟོས། རྨ་ཁ་དེ་ནད་རྙིང་དུ་གྱུར་ཏེ་ཕྱི་ལོ་ ༢༠༠༩ ལོར་ལས་འགུལ་གྱི་ངོ་བོ་སྔར་ལས་ཤུགས་ཆེ་རུ་ཕྱིན་ཏེ་རང་སྲེག་ངོ་རྒོལ་དུ་གྱུར། དུས་དེ་ནས་བཟུང་སྟེ་ད་ལྟའི་བར་བོད་མི་བརྒྱ་ཕྲག་ལྷག་གིས་རྒྱལ་སྲས་བྱང་ཆུབ་སེམས་དཔའི་རྟུལ་ཞུགས་བཟུང་ནས་བོད་རྒྱལ་ཁབ་དང་རང་མི་རིགས་ཀྱི་བདེན་དོན་དུ་རང་ལུས་མེ་རུ་བསྒྲོན་ཡོད། དེ་དག་གིས་ཅི་ཞིག་མཚོན་ཅེ་ན། དེས་འཚེ་མེད་ཞི་བའི་ལྟ་གྲུབ་ཀྱི་ལག་ལེན་ཅི་ཞིག་ཡིན་མིན་འཛམ་གླིང་མི་མང་ལ་གསལ་སྟོན་བྱས་པ་མཚོན།

དེས་མཐོ་སྒང་བའི་ཕ་ས་དེར་རྒྱ་མི་རིགས་ཀྱིས་ཁྲག་གི་མཚོ་མོ་བསྐྱིལ་ཅིང་ཤ་རུས་ཀྱི་ཕུང་བོ་བརྩིགས་པའི་འདས་ཟིན་གྱི་ལོ་རྒྱུས་དེ་བསྐྱར་གླེང་བྱེད་ཀྱི་མེད་པ་མཚོན། དེས་ཕ་གསོད་ཀྱི་ལག་དམར་བ་ཚོའི་སྙིང་ཁྲག་དྲོན་མོ་ས་རུ་བཏོན་མེད་པ་མཚོན།  དེས་གཞིས་བཞུགས་བོད་མི་ཚོས་རྒྱ་གཞུང་ལ་གཏོར་རྒོལ་བྱེད་ཐུབ་པའི་སྙིང་སྟོབས་བཅས་མཚོན་ཡོད། དེ་ལྟར་ལོས་ཡིན་རང་གི་ལུས་པོ་མེ་རུ་སྒྲོན་པའི་སྙིང་སྟོབས་ལྡན་ན་ལག་ཏུ་འབར་རྫས་དང་གོ་མཚོན་བཟུང་ནས་ཕར་རྒོལ་བྱེད་རྒྱུ་ནི་ལས་སླ་བོ་ཞིག་རེད། ཡིན་ནའང་། གཞིས་སྡོད་བོད་ཀྱི་བླ་སྤྲུལ་དགེ་བཤེས་གྲྭ་བ་སྐོར་ཞིག་གིས་རང་བསྲེགས་ནི་འཚེ་ ལས་ཤིག་ཡིན་ཚུལ་མདོ་ལུང་དྲངས་ཁུལ་གྱིས་རྒྱ་གཞུང་ལ་ངོ་དགའ་སྤྲེལ་ལད་ཀྱི་འཁྲབ་གཞུང་ཞིག་འཁྲབ་ཡོད་པ་སོགས་ལ་བལྟས་ཡོང་ན་བོད་ཀྱི་གནས་སྟངས་ནི་ཉིན་རེར་ཛ་དྲག་ཏུ་འགྲོ་བཞིན་འདུག