ཡུ་རོབ་བོད་ཀྱི་གཞོན་ནུས་སུད་སིའི་མངའ་སྡེ་གསུམ་གྱི་ནང་བོད་ཡིག་རྨོངས་སེལ་འཛིན་གྲྭ་བཙུཊ་ཏེ། དང་བླངས་དགེ་རྒན་ཁག་ཅིག་གིས་དངོས་སུ་སློབ་ཁྲིད་བྱེད་ཀྱི་ཡོད་འདུག
འདི་གར་གནས་ཚུལ་བཏང་འབྱོར་ལ། ཟླ་སྔོན་མའི་ཕྱི་ཚེས་ ༢༠ ཉིན་ཡུ་རོབ་བོད་ཀྱི་གཞོན་ནུས་བོད་སྐད་ཡིག་ཉམས་པ་སླར་གསོ་དང་མི་ཉམས་གོང་འཕེལ་ཆེད། སུད་སི་མངའ་སྡེ་འཛུ་རིག་དང་ཡོ་ནཱ། བེལ་བཅས་མངའ་སྡེ་ཁག་ ༣ ནང་བོད་ཡིག་རྨོངས་སེལ་འཛིན་གྲྭ་ཞིག་གསར་འཛུགས་གནང་སྟེ། ད་ཆར་སུད་སིར་གསར་དུ་འབྱོར་བའི་གཞོན་སྐྱེས་དགེ་རྒན་ ༦ གིས་མ་སྐུལ་དང་བླངས་ཐོག རང་ལོ་ ༡༦ ནས་ ༣༠ བར་གྱི་གཞོན་སྐྱེས་ ༥༠ ལྷག་ལ་བདུན་ཕྲག་རེའི་ནང་ཐེངས་རེར་འཛིན་གྲྭ་ཚོགས་ཀྱིན་ཡོད་འདུག་ལ། ས་གནས་ཁག་ཅིག་ནང་ཐོ་འགོད་རྗེས་ལུས་ཐེབས་པ་དང་སློབ་མའི་གྲངས་འབོར་མ་ལོངས་བ་སོགས་ཀྱི་དབང་གིས་ཐེངས་རྗེས་མའི་འཛིན་གྲྭར་གྲ་སྒྲིག་བྱེད་ཀྱི་ཡོད་འདུག
ཐེངས་འདིའི་བོད་ཡིག་རྨོངས་སེལ་འཛིན་གྲྭའི་ཐད་བུ་མོ་བསྟན་སྒྲོལ་ལགས་ཀྱིས། “ ང་རང་ལ་མཚོན་ན་ཆུང་དུས་བོད་ཡིག་ཏོག་ཙམ་སྦྱངས་མྱོང་ཡོད་མོད། རང་ཁྱིམ་དུ་ཨ་མས་བོད་ཡིག་མི་ཤེས་པ་དང་ཁོར་ཡུག་འདིའི་ནང་བོད་ཡིག་བེད་སྤྱོད་གཏོང་ས་མེད་སྟབས་དྲན་པ་བརྗེད་འདུག ཡིན་ནའང་། ངས་བོད་ཀྱི་སྐད་ཡིག་དང་རིག་གཞུང་ལ་དོ་སྣང་དང་སློབ་སྦྱོང་བྱ་རྒྱུ་དེ་བོད་མི་ཚོས་ལས་འགན་རེད་བསམ་གྱི་ཡོད། ཐེངས་འདིའི་བོད་ཡིག་རྨོངས་སེལ་འཛིན་གྲྭ་གསར་འཛུགས་ཀྱི་གོ་སྐབས་འདི་བརྒྱུད་དེ། མ་འོངས་ལོ་གཅིག་གི་ནང་བོད་ཡིག་གི་འབྲི་ཀློག་ཡག་པོ་ཞིག་ཤེས་ཐུབ་པར་བྱ་རྒྱུ་ཡིན། ” ཞེས་བརྗོད་བྱུང་།
