དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་སྤེལ་གསལ་ལྟར་ན། རྒྱ་ནག་རྒྱལ་ས་པེ་ཅིན་དུ་གནས་སྡོད་རྒྱ་རིགས་སྒྱུ་རྩལ་པ་དང་། དམངས་གཙོ་དོན་གཉེར་བ་ཨེ་ཝེ་ཝེ་( Ai Weiwei)ཡིས་མི་འགྱངས་པར་གླུ་གཞས་སྒྲ་ཐག་ཅིག་འགྲེམས་སྤེལ་བྱ་འཆར་ཡོད་པ་དང་། དེ་ནི་སྒྱུ་རྩལ་པ་ཁོང་གིས་སེམས་ཚོར་བརྗོད་པ་ཞིག་ཡིན་འདུག
ལོ་ ༥༥ ལ་སོན་པའི་ཨེ་ཝེ་ཝེ་ནི་རྒྱ་ནག་གི་གྲགས་ཅན་བཟོ་བསྐྲུན་ཇུས་འགོད་པ་ཞིག་ཡིན་པ་དང་། ༢༠༡༡ ལོར་རྒྱ་ནག་གི་ལངས་ཕྱོགས་ལ་བསམ་ཚུལ་མི་མཐུན་པ་བཏོན་པར་བརྟེན་ཏེ་ད་ལྟ་ཡང་རྒྱ་གཞུང་གི་བཟང་བཙོན་འོག་བཞག་ཡོད།
ཁ་སང་གཟའ་ཟླ་བའི་ཉིན་ཨེ་ཝེ་ཝེ་ལ་ཁ་པར་གྱི་ལམ་ནས་བཅར་འདྲི་བྱས་སྐབས་ཁོང་གིས་མི་རིང་བར་གླུ་གཞས་སྒྲ་ཐག་ཅིག་འགྲེམ་སྤེལ་བྱེད་རྒྱུ་ཡིན་པ་དང་། ཁོང་གིས་ང་ནི་རོལ་དབྱངས་ལ་རྒྱུས་མངའ་དེ་ཙམ་མེད་པ་ཞིག་ཡིན་ན་ཡང་ ༢༠༡༡ ལོར་བཙོན་འཇུག་བྱེད་སྐབས་བཙོན་སྲུང་བ་ཚོས་ང་ལ་གཞས་ཐོངས་དང་ཞེས་ཡང་ཡང་སྐུལ་མ་བྱས་བས་ང་ངོ་ཚ་བོ་བཟོས་པ་དང་། སྐབས་དེར་ངས་ནམ་ཞིག་ང་རང་འདི་ནས་ཕྱིར་ཐོན་པའི་སྐབས་ཞིག་ལ་རོལ་དབྱངས་དང་འབྲེལ་པའི་ལས་ཀ་ཞིག་བྱེད་དགོས་བསམ་སོང་ཟེར།
ཐེངས་འདིའི་བརྙན་འཁོར་ནང་གི་གླུ་གཞས་གཉིས་རྒྱ་ནག་གི་ཁྲིམས་མཐུན་ལས་འགུལ་བ་མིག་ལོང་བ་ཁྲེན་ཀང་ཁྲེན་(Chen Guangcheng)གྱི་སྐོར་ཡིན་ཞིང་། གཅིག་གི་མིང་ལ་ཨ་མེ་རི་ཁའི་མགྲོན་ཁང་( Hotel Americana )ཟེར་ཞིང་། དེ་ནི་ཨ་རིའི་གཞུང་ཚབ་ཁང་གིས་སྐུ་ཞབས་ཁྲེན་ལ་གནས་ཚང་གཡར་བའི་སྐོར་དང་། གཉིས་པ་དེ་མིང་ལ་གྱང་ལ་བརྒལ་བ་(Climbing over the་Wall )ཟེར་ལ་དེའི་མཚོན་དོན་ནི་སྐུ་ཞབས་ཁྲེན་གྱང་ལ་འཛེགས་ཏེ་ཁོང་གི་གྲོང་གསེབ་ནས་བྲོས་བའི་སྐོར་ཡིན་འདུག
ཁོང་གིས་གསུང་རྒྱུར་ངའི་སྒྲ་ཐག་འདི་བདུན་ཕྲག་གསུམ་གྱི་ནང་ཚུན་ལ་ཕྱི་ཕྱོགས་སུ་ཐོན་རྒྱུ་ཡིན་པ་དང་། ངས་གཞུང་ཕྱོགས་ནས་འདི་ལ་སྡང་སེམས་འཛིན་པར་སེམས་ཁྲལ་བྱེད་ཀྱི་མེད་ཀྱང་། ཡིད་མུག་པ་ཞིག་ལ་རྒྱ་ནང་དུ་ཇི་ལྟར་ཚོང་འགྲེམས་བྱེད་རྒྱུ་ཡིན་པ་དེ་ཡིན་ཟེར། ཡང་ཁོང་གིས་ངས་སྒྲ་ཐག་འདི་སྒྲ་འཇུག་བྱེད་ཀྱིན་པའི་སྐབས་ནི་ང་རང་སྒྱུ་རྩལ་དང་ཐག་རིང་དུ་གྱེས་པ་མིན་ལ་ངས་བསམ་ན་སྒྱུ་རྩལ་གྱི་རིགས་གང་ཞིག་ཡིན་ན་ཡང་དེའི་བྱེད་ལས་ནི་གཅིག་རེད་དྲན་པ་ནང་བཞིན་ངའི་སྒྱུ་རྩལ་ལ་མཚོན་ན་ཡང་རང་ཉིད་ཀྱི་བསམ་ཚུལ་བཀོད་འགྲེམས་བྱེད་རྒྱུ་དང་མི་གཞན་དང་མཉམ་དུ་འགྲོག་འདྲིས་བྱེད་རྒྱུ་དེ་རེད་ཟེར། མཐར་ཁོང་གིས་ང་ནི་རོལ་དབྱངས་དང་ཆེས་རྒྱང་ཐག་རིང་པའི་མི་ཞིག་ཡིན་པ་དང་། གཞས་གཅིག་ཀྱང་བཏང་མྱོང་མེད་པའི་མི་ཞིག་ཡིན་ན་ཡང་ཁྱོད་ཀྱིས་ངའི་བརྙན་འཁོར་དེ་ལ་ཉན་རྗེས་ཧ་ལས་བ་དང་དགའ་ཐག་ཆོད་ཡིན་ཟེར།
ཨེ་ཝེ་ཝེ་ལགས་ཀྱིས་བརྙན་འཁོར་གཉིས་པ་ཞིག་ཀྱང་བཟོ་འཆར་ཡོད་པ་དང་། དེ་ནི་དྲག་གཞས་(Rock)དང་གཞས་མ་གཏམ་(Pop)གྱི་ཤུགས་རྐྱེན་ཡོད་པ་ཞིག་ཡིན་པས་ན། མི་མང་ཚོས་དགའ་བསུ་ཐོབ་པར་རེ་བ་བྱེད་ཀྱི་ཡོད་ཟེར།
