ཉེ་ཆར་རྒྱ་ནག་གི་ཧྲང་ཧེ་གཙང་པོའི་ནང་དུ་ཕག་རོ་སུམ་སྟོང་ལྷག་རྙེད་སོན་བྱུང་སྟེ་གནས་ཚུལ་དེར་ཞིབ་འཇུག་བྱེད་ཀྱིན་ཡོད་འདུག
དེ་རིང་སེ་ཨན་ཨན་གསར་འགྱུར་རྒྱུ་ལམ་དུ་གནས་ཚུལ་སྤེལ་བ་ལྟར་ན། ཉེ་ཆར་རྒྱ་ནག་གི་ཧྲང་ཧེ་གཙང་པོའི་ནང་དུ་གར་ཡོང་གི་མགོ་ཁུངས་ཤེས་རྟོགས་མ་ཐུབ་པའི་ཕག་རོ་སུམ་སྟོང་བརྒལ་བ་ཞིག་རྙེད་སོན་བྱུང་འདུག་པ་དང་། གཙང་པོ་དེ་ནི་ས་གནས་དེའི་མི་མང་གི་འཐུང་ཆུ་གཙོ་བོ་དེ་ཡིན་འདུག
ཞིན་ཧྭ་གསར་ཁང་གིས་གནས་ཚུལ་སྤེལ་བར། ཕག་རོ་དེ་ཚོ་ཧན་པོ་གཙང་བོ་བརྒྱུད་ནས་ཡོང་པ་ཞིག་ཡིན་སྐོར་བསྒྲགས་ཏེ། ཧན་པོ་གཙང་པོ་ནི་ཧྲང་ཧེ་ཡི་མི་མང་ས་ཡ་ཉི་ཤུ་ལྷག་གི་འཐུང་ཆུ་ཡིན་པ་དང་། ས་གནས་གསར་ལམ་ཁག་ཏུ་དེ་ནི་ཧྲང་ཧེ་ཡི་ལྷོ་ཕྱོགས་ཀྱི་གྲོང་གསེབ་ཅིག་ཏུ་ཕག་ནད་ཀྱིས་ཕག་པ་སྟོང་ཕྲག་མང་པོ་ཞིག་བསད་པར་ཚོད་དཔག་བྱེད་ཀྱི་འདུག་ཟེར།
ས་གནས་མི་མང་ཚོས་འཐུང་ཆུར་སྦགས་གཙོག་ཤོར་བར་སེམས་ཁྲལ་བྱེད་བཞིན་ཡོད་པ་དང་། དོན་རྐྱེན་འདི་མི་སྒེར་གྱིས་ཊི་ཝེ་ཊིར་(Twitter-)དང་། ཝེ་པོ་(Weibo)སོགས་སུ་ཁྱབ་བརྡལ་བཏང་རྗེས་གཞི་ནས་གཞུང་འབྲེལ་གྱི་གསར་འགྱུར་རྒྱུ་ལམ་ཁག་ཏུ་འཁོད་སྤེལ་བྱས་ཡོད་པ་དང་། ཟླ་འདིའི་ཚེས་ཟ་ ༦ ཉིན་ཊེ་ཅང་གི་ས་གནས་ཚགས་པར་ཞིག་ཏུ། འདས་པའི་ཟླ་གཉིས་ཀྱི་རིང་ཕག་གསོའི་ལས་དོན་ཉེར་བའི་གྲོང་གསེབ་ཅིག་ཏུ་ཕག་ནད་ཀྱིས་ཕག་པ་སྟོང་ཕྲག་མང་པོ་ཤི་ཡོད་པ་དང་། ཁོང་ཚོའི་ཟིན་ཐོ་ལྟར་ན་ཟླ་དང་པོའི་ནང་དུ་ཕག་པ་ ༡༠༠༧༨ ཤི་བ་དང་། ཟླ་གཉིས་པའི་ནང་དུ་ཕག་པ་ ༨༣༢༥ ཤི་ཡོད་པ། ད་སྐབས་ཉིན་རེ་བཞིན་ཕག་པ་ ༣༠༠ ལས་བརྒལ་བ་ཤི་བཞིན་ཡོད་ཚུལ་བཀོད་འདུག
