ཚགས་པར་འདི་གཉེར་དོན་གཞོན་སྐྱེས་ཚོ་བོད་ཡིག་ལ་དོ་སྣང་ཡོང་ཆེད་ཡིན།

སུ་ཇཱ་བོད་ཁྱིམ་སློབ་གྲྭའི་སློབ་ཕྲུག་སྐོར་ཞིག་གིས་བརྩེ་དུང་ཞེས་པའི་ཚགས་པར་ཞིག་དཔར་འགྲེམས་བྱེད་མགོ་བརྩམས་ཡོད་པ་དང་། དེ་ནི་བོད་སྐད་བོད་ཡིག་རྒྱུན་འཛིན་དང་དར་སྤེལ་ཡོང་ཆེད་དུས་རབས་ཀྱི་ཁ་ཕྱོགས་དང་། གཞོན་སྐྱེས་ཚོའི་མོས་ཕྱོགས་བཟུང་སྟེ་ཞབས་འདེགས་ཞུ་བཞིན་ཡོད་ཟེར།

ཉེ་ལམ་ཞིག་ནས་ཇཱ་བོད་ཁྱིམ་སློབ་གྲྭའི་སློབ་མ་སྐོར་ཞིག་གིས་༼བརྩེ་དུང་༽ཞེས་པའི་ཚགས་པར་ཞིག་དཔར་འགྲེམས་བྱེད་མགོ་བརྩམས་ཡོད་པ་དང་། དེ་ནི་བོད་སྐད་ཡིག་ལ་དུང་བ་ཟབ་ཅིང་གྲོས་ཁ་མཐུན་པའི་སློབ་བུ་འགའ་མཉམ་རུབ་ཐོག ནམ་རྒྱུན་སློབ་གྲྭའི་སློབ་མ་ཚོས་བོད་ཡིག་ལས་དབྱིན་ཡིག་དང་རྒྱ་ཡིག་ལ་དོ་སྣང་བྱེད་པ་དང་། བོད་ཡིག་གི་དཔེ་དེབ་ལས་དབྱིན་ཡིག་དང་རྒྱ་ཡིག་གི་དཔེ་དེབ་ཀློག་པ། དེ་བཞིན། སློབ་གྲྭའི་ཁོར་ཡུག་ནང་ཕ་སྐད་བོད་སྐད་གཙང་མ་ལས། རྒྱ་སྐད་དང་དབྱིན་སྐད་ཆལ་ཆོལ་བཤད་མཁན་ཇེ་མང་དུ་འགྲོ་བཞིན་ཡོད་པའི་གནས་སྟངས་འོག གཞོན་སྐྱེས་ཚོའི་སེམས་ཁམས་དང་དགའ་མོས་ཀྱི་ཁ་ཕྱོགས་བཟུང་སྟེ། བོད་ཡིག་བོད་སྐད་ཀྱི་ལམ་དུ་སྐུལ་འདེད་གཏོང་ཆེད་ ༢༠༡༢ ལོའི་ཕྱི་ཟླ་ ༥ བའི་ཚེས་ ༢༨ ཉིན་ཚགས་པར་འདི་ཐོག་མར་དབུ་བརྙེས་བ་ཞིག་ཡིན་འདུག

བརྩེ་དུང་ཚགས་པར་འདི་ཟླ་རེར་གྲངས་  ༡༠༠༠ ཙམ་རེ་དཔར་བསྐྲུན་བྱས་ཏེ། བོད་ཁྱིམ་ཁྱབ་ཁོངས་ཀྱི་སློབ་གྲྭ་ཁག་དང་། ས་རཱ་དང་ནོར་གླིང་མཐོ་སློབ། བཞུགས་སྒར་ཁུལ་བཅས་སུ་འགྲེམས་སྤེལ་བྱེད་ཀྱི་ཡོད་འདུག ཚགས་པར་དེའི་ནང་། དམངས་ཁྲོད་ཀྱི་ལ་གཞས་དང་བརྩམས་སྒྲུང་། བརྩེ་འཕྲིན། བསྒྱུར་རྩོམ། སྙན་རྩོམ། རྒྱལ་སྤྱིའི་ནང་གི་བརྩེ་དུང་དང་འབྲེལ་བའི་གསར་འགྱུར་བཅས་ལེ་ཚན་ཁག་ཅིག་གིས་གྲུབ་ཡོད་འདུག

ཚགས་པར་འདིའི་རྩོམ་སྒྲིག་པ་ཚོས་བརྗོད་པ་ལྟར་ན། བཙན་བྱོལ་སྤྱི་ཚོགས་ནང་མི་མཐོ་དམན་བར་གསུམ་གྱིས་བོད་སྐད་ཡིག་ཡར་རྒྱས་གཏོང་དགོས་ཞེས་ཞེན་ཁོག་གི་སྐད་ཆ་ཤོད་མཁན་མང་ཡང་། དངོས་ཡོད་དང་མཐུན་པའི་ཁོར་ཡུག་བསྐྲུན་ཐུབ་ཀྱི་མེད་སྟབས། བོད་སྐད་ཡིག་དེ་ཉིད་སྣ་མང་སྣེ་མང་གི་ཕྱོགས་སུ་ཞུགས་ཏེ་དེང་གི་གསར་སྐྱེས་ཚོའི་དང་བ་འདྲེན་བྱེད་དུ་འགྱུར་རྒྱུ་དང་། བརྩེ་དུང་ཞེས་པའི་ཡིག་འབྲུ་འདི་གཉིས་བརྒྱུད་དེ། ན་གཞོན་གསར་བ་དང་དུས་རབས་གསར་བ། བོད་སྐད་ཡིག་ལ་འཕེལ་རིམ་གསར་བ་ཞིག་བསྐྲུན་ཐུབ་པའི་དམིགས་ཡུལ་དང་རེ་བ་བཟུང་ཡོད་ཟེར།

 གསར་འགོད་པས་བརྩེ་དུང་ཚགས་པར་གྱི་རྩོམ་སྒྲིག་པར། སློབ་མ་ཞིག་གིས་ཚགས་པར་འདི་འདྲ་ཞིག་གཉེར་ན་དཀའ་ངལ་ག་རེ་འཕྲད་ཀྱི་ཡོད་མེད་དྲིས་པར། “ང་ཚོ་ཚང་མ་སློབ་མ་ཡིན་པ་དང་། སློབ་གྲྭའི་སྒྲིག་གཞི་དང་མ་འགལ་བ་བྱེད་དགོས་དུས། སློབ་གྲྭའི་ངོས་ནས་བཀག་སྡོམ་བྱེད་མི་ཡོང་ངམ་སྙམ་པའི་སེམས་འཚབ་ཅིག་ཡོང་གི་འདུག དེ་ནས་དཔལ་འབྱོར་ཐད་རེད། སློབ་གྲྭའི་གཞུང་ལ་མཐུན་འགྱུར་ཞུས་པ་ཡིན་ན། ཚགས་པར་གྱི་བརྗོད་བྱའི་ཐོག་ལ་སྟངས་འཛིན་བྱེད་སྲིད་གི་རེད་དྲན་ཡོད། ཚགས་པར་འདི་ལ་སྤྱི་ཚོགས་ནང་དགའ་མོས་བྱེད་ཀྱི་འདུག ལྷག་པར་དུ་སློབ་མ་ཚོའི་ཁྲོད་དུ་དགའ་མོས་བྱེད་མཁན་མང་པོ་རེད། ད་ཆར་ང་ཚོས་སློབ་གྲྭའི་གློག་ཀླད་བེད་སྤྱོད་བཏང་སྟེ་ཚགས་པར་གྱི་ལས་ཀ་བྱས་པ་ཡིན། འདོན་ཐེངས་དང་པོའི་འགྲོ་སོང་ང་རང་ཚོ་སྒེར་གྱིས་བཏང་བ་ཡིན། འདོན་ཐེངས་གཉིས་པ་དང་གསུམ་པ་ཨ་རིའི་རླུང་འཕྲིན་ཁང་གི་གསར་འགོད་པ་ཚེ་རིང་སྐྱིད་ཀྱིས་རོགས་པ་གནང་སོང” ཞེས་བརྗོད་བྱུང་།

 བརྩེ་དུང་ཚགས་པར་གྱི་རྩོམ་སྒྲིག་པ་ཡི་དམ་བཀྲ་ཤིས་ལགས་ནི། བོད་ནང་སློབ་ཆུང་དང་སློབ་འབྲིང་འགྲིམ་མྱོང་མཁན་ཞིག་ཡིན་པ་དང་། ༢༠༠༦ ལོར་རྒྱ་གར་དུ་འབྱོར་ཏེ་སུ་ཇཱ་བོད་ཁྱིམ་དུ་འཛུལ་ཞུགས་ཀྱིས་ད་ལྟ་འཛིན་རིམ་བཅུ་བར་སློབ་སྦྱོང་བྱེད་ཀྱི་ཡོད་འདུག ཁོས་སློབ་སྦྱོང་གི་ཞོར་དུ་འུ་ཅག་གི་སེམས་གཏམ་དང་མ་འོངས་པའི་བགྲོ་གླེང་གི་ཚོགས་མི་དང་༼གངས་ཟླ༽ དུས་དེབ་ཀྱི་རྩོམ་སྒྲིག་པའི་ལས་ཀ་བྱེད་ཀྱི་ཡོད་འདུག ཁོས་བརྗོད་དོན། “  ང་རང་ཉིད་ལ་མཚོན་ན་བོད་སྐད་བོད་ཡིག་ལ་དགའ་ཞེན་ཆེན་པོ་ཡོད་མཁན་ཞིག་ཡིན། ཚགས་པར་འདི་གཉེར་དོན་ཡང་གཞོན་སྐྱེས་ཚོ་བོད་ཡིག་ལ་དོ་སྣང་ཡོང་ཆེད་ཡིན། ང་ཚོ་མི་མང་པོ་ཞིག་གིས་བོད་སྐད་ཡིག་ཅེས་ལབ་ཡོང་དུས་ཁ་གསོ་མི་ཐུབ་པའི་སྐད་ཡིག་ཅིག་ལ་མཐོང་གི་ཡོད་པ་རེད། ང་རང་གི་བསམ་པར་བོད་སྐད་ཡིག་འདི་ཁ་གསོ་བྱེད་མི་ཉན་པའི་སྐད་ཡིག་ཅིག་གཏན་ནས་མ་རེད་དྲན་ཡོད། མ་གཞི་ནས་མི་ཞིག་ཡིན་ན། རང་མི་རིགས་ཀྱི་སྐད་ཡིག་སྦྱོང་དང་མི་སྦྱོང་དེ་རང་ཉིད་ཀྱི་ཁ་གསོ་བྱེད་ཉན་དང་མི་ཉན་གྱི་ཐོག་ནས་ལྟ་གི་ཡོད་ན། ངོ་མ་ཐབས་སྐྱོ་བོ་རེད། རང་གི་ཤ་དང་ཁྲག་བོད་རིགས་རེད། བོད་མི་ཞིག་གིས་བོད་སྐད་དང་བོད་ཡིག་ལ་འགན་མ་འཁུར་ན། མི་རིགས་གཞན་ཞིག་གིས་བདག་པོ་རྒྱག་གི་མ་རེད། ” ཅེས་བརྗོད་བྱུང་།

 རྩོམ་སྒྲིག་པ་བསོད་ནམས་རྡོ་རྗེ་ལགས་ཀྱང་བོད་ནང་སློབ་གྲྭ་ཆུང་འབྲིང་འགྲིམ་མྱོང་ཞིང་། ༢༠༠༧ ལོར་རྒྱ་གར་དུ་འབྱོར་ཏེ་སུ་ཇཱ་བོད་ཁྱིམ་གྱི་འཛིན་རིམ་བཅུ་བ་ཡིན་པ་དང་། ཁོང་གིས་༼སྐྱ་རེངས༽ དུས་དེབ་ཀྱི་རྩོམ་སྒྲིག་པ་དང་བགྲོ་གླེང་གོ་སྒྲིག་ཚོགས་ཆུང་གི་ཚོགས་མི་བཅས་ཀྱི་ལས་ཀ་བྱེད་ཀྱི་ཡོད་འདུག ཁོས་བརྗོད་དོན། “ སྤྱི་ཚོགས་ཤིག་གི་ལང་ཚོ་དེ་ན་གཞོན་གྱི་ལང་ཚོ་ཡིན་ཞེས་པ་ལྟར། ན་གཞོན་གྱི་ལང་ཚོ་གང་འདྲ་ཞིག་ཡིན་པ་དེ་སྤྱི་ཚོགས་དེའི་ལང་ཚོ་ཆགས་ཡོད་པ་རེད། བོད་སྐད་ཡིག་གི་ལང་ཚོ་ངོམས་པ་ལ་ན་གཞོན་ཚོས་སེམས་ཁམས་ལ་སྐད་ཡིག་གི་རིན་ཐང་བསྐྲུན་དགོས་ཀྱི་ཡོད་པ་རེད། གལ་སྲིད། ན་གཞོན་ཚོའི་སེམས་ཁོང་དུ་སྐད་ཡིག་ལ་དགའ་མོས་དང་དུང་བ་ཡོད་པ་ཡིན་ན། ང་ཚོའི་སྤྱི་ཚོགས་ནང་སྐད་ཡིག་ལང་ཚོ་རྒྱས་ཐུབ་པ་རེད། ང་ཚོ་རིག་གནས་སྣ་མང་གི་སྤྱི་ཚོགས་ཤིག་གྲུབ་དགོས་ན། བོད་སྐད་ཡིག་དེ་ཕྱོགས་ཡོངས་ནས་བེད་སྤྱོད་གཏོང་ཐུབ་པའི་ལམ་ཁ་སྣ་མང་བཟོ་དགོས་པ་རེད། ང་ཚོའི་བརྩེ་དུང་ཚགས་པར་འདི་དེའི་ནང་གི་ལམ་ཁ་གཅིག་ཡིན་དྲན་ཡོད” ཅེས་བརྗོད་བྱུང་།