དེ་རིང་ངྷ་རམ་ས་ལའི་ལྷ་རྒྱ་རིའི་སྐོར་ལམ་ནང་རྒྱལ་གཅེས་དཔའ་བོ་འཇལ་དཔལ་ཡེ་ཤེས་ལགས་ཀྱི་རྗེས་དྲན་རྡོ་རིང་བཞེངས་སྐྲུན་གནང་སྟེ། འདས་པོ་ཁོང་གི་ཞལ་ཆེམས་ལྟར་༧གོང་ས་མཆོག་ཕོ་བྲང་པོ་ཏ་ལར་གདན་འདྲེན་ཞུ་ཐུབ་པ་བྱེད་དགོས་ཟེར།
དེ་རིང་ཕྱི་ཟླ་ ༣ ཚེས་ ༢༨ ཉིན་ནི་སྔ་ལོའི་ཕྱི་ཟླ་ ༣ ཚེས་ ༢༥ ཉིན་ལྡི་ལིར་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་སྐུ་གྲོངས་བའི་ཉིན་མོར་ཁེལ་ཡོད་སྟབས། ངྷ་ས་ལྷ་རྒྱ་རིའི་ཕྱི་སྐོར་ནང་ཡོད་པའི་དཔའ་བོ་ཐུབ་བསྟན་དངོས་གྲུབ་ཀྱི་སྐུ་བརྙན་རྡོ་རིང་འགྲམ་དུ་དབུས་བོད་ཀྱི་གཞོན་ནུ་ལྷན་ཚོགས་ཀྱིས་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱི་སྐུ་བརྙན་རྡོ་རིང་ཞིག་བཞེངས་སོང་། ཞོགས་པའི་མཛད་སྒོའི་སྟེང་ཆབ་སྲིད་བཙོན་ཟུར་དགེ་བཤེས་དཔལ་ལྡན་རྒྱ་མཚོ་ལགས་དང་། དབུས་གཞོན་ནུའི་ཚོགས་གཙོ་ཚེ་དབང་རིག་འཛིན། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་མི་མང་བཅས་ཕེབས་འདུག
རྡོ་རིང་དབུ་འབྱེད་ཐོག་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས། རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱིས་གཙོས་བོད་མི་རང་ལུས་མེར་བསྲེགས་གནང་མཁན་རྣམས་འགྲོ་བ་མི་ཞིག་ཡིན་པའི་ཆ་ནས་བློས་གཏོང་གནང་རྒྱུ་ཡོད་ཚད་དེ་གནང་ཟིན་པ་དང་། ཁོང་ཅིག་གི་ཡིད་ཆེས་དང་རེ་བ་དེ་བཙན་བྱོལ་རང་དབང་ལུང་པར་ཡོད་མཁན་ཚོའི་ཕྲག་ཏུ་བབ་ཡོད་སྟབས། བོད་ནང་གི་གནས་སྟངས་རྒྱལ་སྤྱིར་ཁྱབ་བསྒྲགས་བརྒྱུད་རྒྱ་ནག་གཞུང་ལ་གནོན་ཤུགས་སྤྲད་དེ། རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱི་ཞལ་ཆེམས་ནང་བཀོད་པ་ལྟར། བོད་མིའི་དབུ་ཁྲིད་༧གོང་ས་མཆོག་ཕོ་བྲང་པོ་ཏ་ལར་གདན་འདྲེན་ཞུས་ཏེ། བོད་གཞིས་བྱེས་མཉམ་འཛོགས་ཐོག་ཕོ་བྲང་པོ་ཏ་ལའི་མདུན་དུ་བོད་རྒྱལ་ཁབ་ཆེན་པོའི་རྒྱལ་གླུ་གཏོང་ཐུབ་པ་བྱ་དགོས་སྐོར་བརྗོད་བྱུང་།
དེའི་རྗེས་ཆབ་སྲིད་བཙོན་ཟུར་དགེ་བཤེས་དཔལ་ལྡན་རྒྱ་མཚོ་ལགས་ཀྱིས། འཇམ་དཔལ་ཡེ་ཤེས་ལགས་ནི་ནམ་རྒྱུན་དོ་སྣང་བྱེད་ཡུལ་དང་སྐད་གྲགས་ཆེན་པ་ཡོད་པ་དེ་འདྲ་མིན་ཡང་། ཁོང་བོད་མི་རྩམ་གཟན་ཞིག་ཡིན་པའི་ཆ་ནས་བོད་ཀྱི་གནས་བབས་ཧ་ཅང་ཛ་དྲག་ཏུ་གྱུར་པ་མ་བཟོད་པར་རང་ལུས་མེ་རུ་བསྒྲོན་ཏེ་བོད་མིའི་འཐབ་རྩོད་གནང་ཡོད་པ་དང་། ཁོང་གི་ཞལ་ཆེམས་ནང་བོད་མི་ཚོས་བོད་ཀྱི་ལ་རྒྱ་མ་བརླག་པ་བྱེད་དགོས་ཞེས་འཁོད་ཡོད་པ་ལྟར། ལ་རྒྱ་ཟེར་པ་དེ་དེ་སོ་སོའི་འཚོ་བ་འགྲིག་ཙམ་ཞིག་ལ་མི་ཟེར་བར། ཆུང་ས་ནས་སྒེར་གྱི་ཁྱིམ་བརྒྱུད་དང་ཆེ་ས་ནས་རྒྱལ་ཁབ་དང་མི་རིགས་རྒྱུན་གནས་ཐུབ་པ་བྱེད་དགོས་སྐོར་བརྗོད་བྱུང་།
ཁོང་གིས་བརྗོད་དོན་ “རིག་གནས་གསར་རྗེས་སྐབས་ཉིན་གཅིག་ངས་རྒྱ་ནག་གི་ཚགས་པར་ཞིག་མཐོང་པའི་ཁ་བྱང་སྟེང་ཡུལ་གྱར་སྲིད་གཞུང་གིས་ཨ་རིར་དོན་གཅོད་ཁང་བཙུགས་འདུག དོན་གཅོད་ཐུབ་བསྟན་ཐར་པ་ཟེར་པ་རེད་ཅེས་གསལ་འདུག ད་ལྟའི་བཙན་བྱོལ་བོད་མིའི་སྒྲིག་འཛུགས་ལ་སྐབས་དེར་ཡུལ་གྱར་སྲིད་གཞུང་ཞེས་བཀོད་འདུག སྐབས་དེར་རྒྱ་མིས་ཀྱང་ང་ཚོའི་སྒྲིག་འཛུགས་ལ་གཞུང་ཡིན་པ་ཁས་ལེན་བྱེད་ཀྱི་ཡོད་རེད”ཞེས་བརྗོད་སོང་།
མཐར་གཞོན་ནུའི་ཚོགས་གཞོན་དོན་འགྲུབ་ལྷ་དར་ལགས་ཀྱིས། གཙོ་བོ་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་དང་ལྷག་པར་དུ་བོད་ནང་གི་བོད་མི་ ༡༡༡ གིས་རང་ལུས་མེར་བསྲེགས་གནང་སྐབས་ཀྱི་འབོད་སྒྲ་དང་ཞལ་ཆེམས། རེ་བ་གཙོ་བོ་བོད་རང་བཙན་གྱི་གནས་བབས་སླར་གསོའི་ཐོག་༧གོང་ས་མཆོག་བོད་དུ་གདན་འདྲེན་ཞུ་རྒྱུ་དེ་ཡིན་སྟབས། མཆོད་འབུལ་དྲན་རྟེན་ལས་ལྷག་པའི་གནད་དོན་གལ་ཆེ་ཤོས་ཁོང་ཚོའི་འབོད་སྒྲ་དང་ཞལ་ཆེམས། རེ་བ་བསྒྲུབ་ཐུབ་པ་བྱ་རྒྱུ་དེ་ཡིན་སྐོར་དང་། བཙན་བྱོལ་ནང་བོད་མིའི་རང་ལུས་མེར་བསྲེགས་ཀྱི་རྒྱུ་རྐྱེན་ཐད་རྒྱ་ནག་གིས་བོད་ཐོག་འཛིན་པའི་སྲིད་ཇུས་ནོར་འཁྲུལ་ཅན་ལ་བརྟེན་ནས་བྱུང་ཚུལ་ཤོད་ཀྱི་ཡོད་ཀྱང་། གཞོན་ནུ་ལྷན་ཚོགས་ཀྱིས་རྒྱ་ནག་གིས་བོད་བཙན་བཟུང་བྱས་པ་དང་བཙན་བཟུང་དབང་སྒྱུར་གྱི་བརྒྱུད་རིམ་ཁྲོད་བོད་རྩ་མེད་གཏོང་པའི་སྲིད་ཇུས་ལག་བསྟར་བྱེད་ཀྱི་ཡོད་པའི་ཐད་ནས་བྱུང་བ་ཞིག་ལ་ངོས་འཛིན་བྱེད་ཀྱི་ཡོད་སྐོར་བརྗོད་བྱུང་།
ཁོང་གིས་མུ་མཐུད་དུ། འདི་ལོའི་གསུམ་དུས་ཐེངས་ ༥༤ པའི་སྲིད་སྐྱོང་མཆོག་གི་བསྒྲགས་གཏམ་ནང་མེར་བསྲེགས་རྒྱུ་རྐྱེན་སྔར་ལས་ལྷག་ཙམ་ཁ་གསལ་བྱུང་ཡོད་པ་དང་། ལྷག་པར་དུ་ད་ལྟ་འཚོགས་བཞིན་པའི་བོད་མི་མང་སྤྱི་འཐུས་གྲོས་ཚོགས་ར་བའི་ནང་གཞིས་བཞུགས་བོད་རྒྱ་ཆེ་མི་མང་དང་ལྷག་པར་དུ་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་རང་བཙན་གྱི་འབོད་སྒྲ་དང་མངོན་འདོད་ཁ་ཇེ་གསལ་དང་ཤུགས་ཆེ་རུ་ཡོང་གི་ཡོད་པ་དེ་དག་བཟང་ཕྱོགས་ཀྱི་རྣམ་པ་ཞིག་ལ་མཐོང་གི་ཡོད་སྐོར་བརྗོད་སོང་།
གསར་འགོད་པས་སྐུ་བརྙན་རྡོ་རིང་དབུ་འབྱེད་ལ་མཉམ་ཞུགས་གནང་མཁན་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་སུ་བཅར་འདྲི་ཞུས་པར་ཁོང་གིས་བོད་ནང་གི་རང་ལུས་མེར་བསྲེགས་གནང་མཁན་དག་གི་གནས་ཚུལ་ལ་ཞིབ་འཇུག་ཡག་པོ་བྱས་ཏེ་གྲངས་ཀ་ཕྱིར་བསྒྲགས་བྱ་གལ་ཆེ་བ་དང་། བོད་པའི་རྩ་དོན་ཆེད་ཆུ་དང་གཡང་ལ་མཆོང་མཁན་དག་ལའང་དོ་འཁུར་བྱེད་དགོས་སྐོར་བརྗོད་བྱུང་། ཁོང་གིས་མུ་མཐུད་དུ། རང་སྲོག་བློས་གཏོང་གནང་མཁན་ཚོས་བོད་ཀྱི་བདེན་པའི་མར་མེ་དེ་མུ་མཐུད་གསོན་པོར་གནས་བཅུག་ཡོད་པའི་སྐབས་འདིར། གསོན་པོར་གནས་པའི་བོད་མི་རེ་རེ་ནས་ཀྱང་ངེས་པར་དུ་དམ་བཅའ་རེ་བཞག་སྟེ་བདེན་པའི་མར་མེ་བསྒྲོན་པའི་དུས་སླེབས་ཡོད་པ་དང་། འཐབ་རྩོད་ཀྱི་ཕྱོགས་ནས་ཚང་མ་རྡོག་རྩ་གཅིག་སྒྲིལ་ཐོག་འགྲོ་རྒྱུ་ཡིན་ནམ་ཡང་ན་སོ་སོའི་དམིགས་ཡུལ་རང་བཙན་དང་དབུ་མ་ཞེས་ཁ་གྱེས་ནས་འགྲོ་རྒྱུ་ཡིན། འདིའི་ཐད་གཞུང་གི་དབུ་ཁྲིད་ཚོས་དགོངས་པ་བཞེས་དགོས་པའི་དུས་ལ་སླེབས་ཡོད་སྐོར་བརྗོད་བྱུང་། ཁོང་གིས་བརྗོད་དོན། “ང་ལྟ་བུ་ཞིག་ལ་མཚོན་ན། ངའི་ཕ་མ་དམར་གསོད་གཏོང་མཁན་གྱི་ལག་དམར་སྲིད་གཞུང་དེ་ལ་ངའི་ཕྲུ་གུར་ལྟ་སྐྱོང་བྱ་རྒྱུར་རྩིས་སྤྲོད་ཐུབ་ས་མ་རེད་”ཅེས་བརྗོད་བྱུང་།
གསར་འགོད་པ། བནྡེ་སྐྱབས།
ལྷ་བཟང་ཚེ་རིང་གཅིག་པོ་མིན་ང་ཚོ་བཙན་བྱོལ་དུ་འབྱོར་བ་ཚང་མར་བཤད་ན་མི་ཚར་བ་དང། བསམ་ན་བཟོད་དུ་མེད་པའི་སྙིང་ནད་རེ་སེམས་སུ་ཡོད་པ་གཅིག་མཚུངས་རེད། དབུ་མའི་ལམ་གྱིས་གྲོས་མོལ་ཐེང་མང་བྱས་ཀྱང་གྲུབ་འབྲས་ཡག་པོ་ཞིག་མ་ཐོན་པ་གསལ་པོ་རེད། ཀརྨ་ཆོས་འཕེལ་ཡིན་ན་རེད། དོན་གྲུབ་ལྷ་དར་ཡིན་ན་རེད། བཤད་ནས་ཡོང་རྒྱུ་ཅི་འདུག་དོན་ལག་ལེན་བལྟར་ན་དགའ་རབ་རེད། གནད་ལ་ཁེལ་བའི་ལས་བྱ་ལམ་སྟོན་གནང་ནས་བོད་མི་ཡོངས་རྫོགས་ཀྱིས་ནུས་ཤུགས་འདོན་སའི་སྒྲུབ་བྱེད་རེད་ཡོད་ན་མ་གཏོགས་ད་བར་བཤད་ནས་ལུས་རེད། ཕྱི་ལོག་ཏུ་སྐད་འབོད་ཁྲོམ་སྐོར་བྱས་པ་དེ་གཞུང་དང་གཞུང་འབྲེལ་མིན་པ་ཚང་མས་ད་བར་བྱས་པ་གཅིག་མཚུངས་རེད། གཞུང་གིས་རྒྱ་ནག་དང་འབྲེལ་གཏུག་ལན་དུ་མར་བྱས་པ་རེད། ད་ནི་ཞི་དྲག་གང་ཡོད་ན་རང་བཙན་རྩོད་ལེན་པ་ཚོ་ངར་ཡོང་གི་དུས་ཚོད་རེད། སྤྱི་འཐུས་འཚོགས་ཁང་དང་ལྷ་རྒྱལ་རི་ནས་སྟག་བཞིན་ངར་ནས་ཅི་ཕན། ངར་ན་ངར་ས་སྟོབས་ཆེན་རྒྱལ་ནག་འདུག ད་བར་དབུ་མའི་ལམ་གྱིས་གྲུབ་འབྲས་ཡང་དག་མ་རེག་པ་གསལ་པོ་རེད་ལ། ཞི་བའི་འཐབ་རྩོད་ཀྱིས་གྲུབ་འབྲས་མ་ཐོན་པ་ཡང་གསལ་པོ་རེད། ད་ནི་ཞི་དྲག་གཉིས་ལས་དྲག་པོ་དང་། དབུ་མ་རང་བཙན་གཉིས་ལས་རང་བཙན་ཕྱོགས་ལ་རྒྱུགས་ནས་ཚོད་ལྟ་གྱིས།
དཔའ་བོ་འཇམ་དཔལ་ཡེ་ཤེས་ལགས་ནི་དབུ་མའི་ལམ་ལ་ཡིད་ཆེས་བརྟན་པོ་ཡོད་མཁན་གྱི་མི་ཞིག་ཡིན་ལ། ཁོང་གི་ཞལ་ཆེམས་ཀྱང་དཔའ་བོ་ཐུབ་བསྟན་དངོས་གྲུབ་ལགས་ཀྱི་ཞལ་ཆེམས་ལྟར་༧གོང་ས་ཆེན་པོའི་བཀའ་དགོངས་སྙིང་བཅངས་ཀྱིས། དབུ་མའི་ལམ་ནས་བོད་དོན་བདེན་མཐའ་གསལ་ཐབས་བྱ་རྒྱུ་བཀོད་པ་དེ་རེད། ཧུའུ་ཅིན་ཐའོ་རྒྱ་གར་རྒྱལ་ས་ལྡི་ལིར་ཡོང་སྐབས་ཁོང་གིས་རང་ལུས་ཞུགས་འབུལ་གྱིས་དོན་ཚན་ལྔའི་ཞལ་ཆེམས་ཤུལ་དུ་བཞག་ཡོད། ལས་འགུལ་སྐབས་གཞོན་ནུའི་ལས་འགུལ་དང་སྟབས་འགྲིག་པ་མ་གཏོགས། དཔའ་བོ་ཁོང་གི་མངོན་འདོད་དང་ཞལ་ཆེམས་ཀྱི་ནང་དོན་སོགས་བོད་རང་བཙན་ལ་བཙན་བསྒྱུར་བྱེད་པ་ནི་དྲང་པོ་མ་རེད།