ཨ་རིའི་ཕྱི་སྲིད་དུས་དེབ་ཀྱིས་༧གོང་ས་མཆོག་འཛམ་གླིང་ཐོག་གི་ཆོས་དང་ཆབ་སྲིད། དཔལ་འབྱོར་བཅས་ཀྱི་ཐོག་ནས་ཤུགས་རྐྱེན་ཆེ་ཤོས་ཀྱི་མི་སྣའི་གྲས་སུ་བདམས་འདུག
འཛམ་གླིང་ཐོག་སྙན་གྲགས་ཡོད་པའི་ཨ་རིའི་ཕྱི་སྲིད་དུས་དེབ་(Foreign Policy magazine) ཀྱིས། ཟླ་འདིའི་ཕྱི་ཚེས་ ༡ ཉིན་འདི་ལོའི་འཛམ་གླིང་ཐོག་ཆབ་སྲིད་དང་དཔལ་འབྱོར། ཆོས་ལུགས་སོགས་ཀྱི་ཐོག་ནས་ཤུགས་རྐྱེན་ཆེ་ཤོས་མི་སྣ་གྲགས་ཅན་ ༥༠༠ ཡི་མཚན་གཞུང་ཕྱིར་བསྒྲགས་བྱས་པའི་ནང་དུ། ༧གོང་ས་མཆོག་འཛམ་གླིང་ཐོག་ཆོས་ཕྱོགས་ནས་ཤུགས་རྐྱེན་ཆེ་ཤོས་གྲས་སུ་བདམས་འདུག
མཚན་གཞུང་དེའི་ཨང་དང་པོ་ཨ་རིའི་སྲིད་འཛིན་ཨའོ་བྷ་མ་དང༌། གཉིས་པ་འཇར་མན་གྱི་སྲིད་བློན་ལྕམ་ཨན་ཇི་ལཱ་མཱར་ཀལ། གསུམ་པ་ཨུ་རུ་སུའི་སྲིད་འཛིན་པོའུ་ཊིན། བཞི་པ་ཨ་རིའི་གློག་ཀླད་གསར་གཏོད་པ་བྷེལ་གྷི་ཊི། ལྔ་པ་ཡེ་ཤུའི་ཆོས་དཔོན་ཕོབ་བྷེ་ནི་ཌི་ཊི་ Pope Benedict དྲུག་པ་ཨ་རིའི་དཔལ་འབྱོར་རིག་པའི་ཆེད་ལས་པ་བྷིན་བྷར་ནན་ཁི་(Ben Bernanke) བདུན་པ་སོ་ངྷི་ཨ་རབ་གྱི་རྒྱལ་པོ་(Abdullah bin Abdulaziz Al Saud) བརྒྱད་པ་དབུས་ཡུ་རོབ་དངུལ་ཁང་གི་འགན་འཛིན་མཱ་རི་ཨོ་དར་ཧི་(Mario Draghi) དགུ་པ་རྒྱ་ནག་གི་སྲིད་འཛིན་ཞི་ཅིན་ཕིན། བཅུ་པ་དབྱིན་ཇིའི་སྲིད་བློན་ཌཱ་ཝེ་ཌི་ཀམ་རོན་(David Cameron) བཅས་ཡིན་པ་དང༌། དེ་བཞིན་འཛམ་གླིང་རྒྱལ་ཁབ་འདྲ་མིན་གྱི་ཆབ་སྲིད་དང་ཆོས་ལུགས་ཀྱི་དབུ་འཁྲིད། གསར་འགོད་པ། དཔལ་འབྱོར་རིག་པའི་ཆེད་མཁས་པ་སོགས་མིའི་རིགས་ཀྱི་བསམ་བློ་ཀུན་སྤྱོད་ཡར་སྐུལ་དང༌། སྤྱི་ཚོགས་འཚོ་བ་གོང་འཕེལ་གཏོང་བ་སོགས་ལ་མཛད་རྗེས་དང་ཤུགས་རྐྱེན་ཆེ་ཤོས་ཀྱི་མི་སྣ་ ༥༠༠ བདམས་འདུག
མི་སྣ་འདེམས་སྒྲུག་གི་ལས་གཞི་དེ་ ༢༠༠༩ ལོར་མགོ་འཛུགས་བྱས་ཏེ། འདས་པའི་ལོ་ངོ་ ༤ རིང་འཛམ་གླིང་རྒྱལ་ཁབ་མང་པོ་ནས་ཁྱོན་མི་སྣ་གྲགས་ཅན་ ༡༡༧༦ བདམས་ཐོན་བྱུང་ཡོད་ལ། ད་ལོ་ནི་མི་སྣ་བདམས་པ་མང་ཤོས་དེ་ཆགས་ཡོད་པ་རེད།
༧ གོང་ས་མཆོག་གཙོས་འཛམ་གླིང་ན་གྲགས་ཆེ་མི་བོ་ཚང་མར་གུས་བརྩིའི་འཚམས་
འདྲི་བཀྲིས་བདེ་ལེགས་ཞུ།
བརྒྱུད་སྐུལ་ཤུགས་རྐྱེན་མེད་པའི་འདེམས་སྒྲུག་དྲང་མོ་ཞིག་ཡོང་བར་ཤོག