གཞོན་ནུའི་དབུས་རྒྱུན་གསར་འདེམས་བྱུང་།

མྱི་ལ་ངོ་ཚ་མེད་ལ་ཁྱི་ཡིན། ཁྱི་ལ་རྔ་མ་མེད་ན་འདྲེ་ཡིན་ཞེས་ལྟར་ད་དོན་འགྲུབ་ལྷ་དར་དང་ཁོའི་ཨམ་ཕྲུག་འདི་དག་ལ་དངོས་ནས་ངོ་ཚ་ཞིག་ཡོད་ས་མ་རེད། ད་དུང་ལྷག་བསམ་དང་འཇོན་མདོག་གི་སྐད་ཆ་ཞིག་བཤད་ཡོང་གིན་འདུག གོང་གི་གནས་ཚུལ་དེ་དག་བདེན་པ་མིན་ན་ད་ཐེངས་ཚོགས་ཆེན་ཐོག་ནས་ག་རེ་བྱས་ནས་གྲོས་ཆོད་རུལ་བ་དང་ཧམ་བཤད་ཀྱི་གསར་འགོད་གསལ་བསྒྲགས་དེ་དག་ཕྱིར་འཐེན་བྱེད་དགོས་བྱུང་བ་རེད། ཟམ་གདོང་རིན་པོ་ཆེས་བཀའ་སློབ་གནང་བའི་བརྙན་ཐག་དེར་གཟིགས་དང་ཚོགས་གཙོ་ཚེ་དབང་རིག་འཛིན་ལགས་ཀྱིས་གྲོས་ཆོད་ཁག་བསྒྲོགས་སྦྱངས་གནང་གིན་འདུག

གཞོན་ནུའི་དབུས་རྒྱུན་དང་རིག་གཞུང་འགན་འཛིན་ཟུར་པ་འཇིགས་མེད་ལགས་ནས། ཚོགས་གཞོན་དོན་འགྲུབ་ལྷ་དར་ལ་གཞི་མེད་སྐྱོན་བརྗོད་བྱེད་མཁན་གྱི་དྲ་འབུ་ཚོའི་ཁ་ཐལ་བས་བཅད་སོང་བས་ཐུགས་རྗེ་ཆེ་ཞུ་རྒྱུ་ཡིན། སྤྱོད་ངན་འདི་དག་གི་ནང་དུ་དགྲ་ལ་དགའ་ཞིང་གཉེན་ལ་སྡང་བའི་ཕྱི་མགོ་ནང་ཚོང་མཁན་མང་པོ་ཞིག་ཡོད་མི་སྲིད་པ་མ་རེད་ལ། ཁོང་ཚོའི་བྱེད་སྟངས་འདི་ནི་བོད་མི་སེམས་ཤུགས་དང་ལྷག་བསམ་ཅན་ཚོའི་སེམས་ཤུགས་བཅོག་ཐབས་ཀྱི་ངན་བྱུས་ཤིག་མིན་པའི་ངེས་པ་མི་འདུག སྤྱིར་དུས་བབ་དྲ་བའི་མཆན་འགོད་པའི་ཁྲོད་བཙན་བྱོལ་སྒྲིག་འཛུགས་དང་། གཞུང་འབྲེལ་མིན་པའི་ཚོགས་སྡེ་ཁག་གིས་ལས་དོན་ཅི་ཞིག་བྱས་ཀྱང་སྐྱོན་བརྗོད་ཁོ་ན་ལས་མི་ཤེས་པའི་མི་ཁག་ཅིག་འདུག་ན། བོད་མི་ཚོས་འདི་རིགས་ཀྱི་བྱ་སྤྱོད་ལ་དོ་སྣང་ཆེན་པོས་ཞིབ་དཔྱད་གནང་དགོས་རྒྱུ་གལ་ཆེར་མཐོང་།

དོན་གྲུབ་ལྷ་དར་དང་འབྲེལ་བའི་གཞོན་ལྷན་དབུས་རྒྱུན་ཟུར་པ་སྒེར་ཞིག་གི་གསལ་བཤད།
བར་ལམ་སྤྱི་ཚོགས་ཁྲོད་བརྒྱུད་ལམ་འདྲ་མིན་བེད་སྤྱད་ནས་གཞོན་ལྷན་སྒྲིག་འཛུགས་སྤྱི་དང་དབུས་རྒྱུན་རེ་འགར་དམིགས་ བཀར་གྱིས་གཞི་མེད་སྐྱོན་བརྗོད་མང་དག་ཅིག་བྱས་དང་བྱེད་མུས་དག དེ་མུར་བཞག་ནས་ངན་པ་རྒྱ་ཡན་དུ་བཏང་ན་གཞིས་ལུས་བོད་ མིས་ཡིད་ཆེས་བློ་གཏད་བཅོལ་སའི་གཞོན་ལྷན་གྱི་སྒྲིག་འཛུགས་སྤྱིའི་ཆེ་མཐོང་དང་ཡང་སྒོས་འཐབ་རྩོད་བརྒྱུད་རིམ་གྱི་ལོ་རྒྱུས་ལ་འགན་མ་འཁུར་བའི་རྣམ་པ་ཞིག་རང་བཞིན་དུ་ཐོན་བཞིན་པར་བརྟེན་གཞོན་ལྷན་སྐབས་བཅུ་བཞི་པའི་དབུས་རྒྱུན་ཟུར་པ་ཕྲན་རིག་གཞུང་འགན་འཛིན་འཇིགས་མེད་(ཞོལ་པ།)ནས་གཤམ་འཁོད་དོན་ཚན་ཁག་གི་ཐོག་གསལ་བཤད་བྱ་རྒྱུར།
དང་པོ། གཞོན་ལྷན་གྱི་ལས་དོན་སྐོར།
བོད་ཀྱི་གཞོན་ནུ་ལྷན་ཚོགས་ཀྱི་ལས་དོན་ཁག་ནི་འགན་ལྷན་དང་ཚོགས་ཆེན་གྱི་གྲོས་ཆོད། དེ་བཞིན་དབུས་རྒྱུན་མང་མོས་སམ་སྤྱི་མོས་ ཀྱི་ཐག་གཅོད་དགོས་པ་ཞིག་ལས། གང་ཟག་བྱེ་བྲག་པ་སུ་འདྲ་ཞིག་ལའང་ཐག་གཅོད་བྱེད་དབང་མེད་པའི་དམངས་གཙོའི་འགྲོ་ལུགས་ཚད་ ལྡན་ཞིག་ཡོད་པ་ལྟར། གཞོན་ལྷན་སྐབས་བཅུ་བཞི་པའི་དུས་སུའང་དབུས་རྒྱུན་ཐུན་མོང་གིས་ཐག་གཅོད་དང་། གཞོན་ལྷན་གྱི་འགན་ ལྷན་དང་ཚོགས་ཆེན་རིམ་པའི་གྲོས་ཆོད་དགོངས་དོན་ལྟར་ལས་དོན་བྱས་ཡོད་པ་ལས། དབུས་རྒྱུན་བྱེ་བྲག་པ་སུ་ཞིག་གི་ཐག་གཅོད་ དམིགས་བསལ་བ་བྱས་རིགས་གཏན་ནས་མེད་པ་གསལ་སྟོན་བྱ་རྒྱུ་ཡིན།
གཉིས་པ། དུས་དབང་སྐབས་ཞལ་འདེབས་དང་མ་འོངས་བོད་རྒྱལ་ཁབ་འཛུགས་བསྐྲུན་གྱི་མ་དངུལ་ཐེབས་རྩའི་སྐོར།
ཕྱི་ལོ་༢༠༡༡ ཟླ་བ་༦ པའི་ཚེས་ ༢༢ ཉིན་དབུས་རྒྱུན་ལྷན་འཛོམས་ཀྱིས་དུས་དབང་ཐེངས་སོ་གསུམ་པའི་ཐོག་སྤྱི་ཚོགས་ ཞབས་ཞུའི་ལས་དོན་ཁག་སྔར་ལྷག་བསྒྲུབ་རྒྱུའི་སྤྱི་མོས་གཏན་འབེབས་བྱུང་བ་ལྟར་དངོས་སུ་ལས་དོན་ཐོག་བཞུགས་པའང་མཁྱེན་ཤས་ ཆེ། སྒྲིག་འཛུགས་འདིར་མི་མང་གི་ཡིད་ཆེས་དང་འཐབ་རྩོད་ཀྱི་འགན་འཁུར་ཞིག་གི་ཐོག་ནས་མ་སྐུལ་དྭངས་བླངས་ཀྱིས་ཞལ་འདེབས་ གནང་བ་ཞིག་ཡིན་ལ། དེ་དག་གི་རྩིས་ཁྲ་ཡང་སྦས་བསྐུངས་མེད་པར་ཡོངས་གྲགས་སུ་ཁ་གསལ་གྱིས་ཕྱི་ལོ་༢༠༡༢ ཟླ་བ་༨ ཚེས་ ༦ ནས་ ༡༠ བར་འབིར་བོད་ཚོགས་ཚོགས་ཁང་དུ་བསྐོངས་འཚོགས་ཞུས་པའི་འགན་ལྷན་ཐེངས་ ༤༣ པའི་རྩིས་ཁྲའི་རྩིས་སྒོ་ཨང་དགུ་པའི་ ནང་གསེས་ཀ་པའི་ནང་བྱུང་སོང་གཙང་བཟོ་ཟིན་པ་དང་།
ཕྱི་ལོ་༢༠༡༢ ཟླ་བ་ ༢ ཚེས་ ༧ ཉིན་དབུས་རྒྱུན་ལྷན་འཛོམས་ཀྱིས་བོད་ནང་གི་ཛ་དྲག་གནས་སྟངས་རྐྱེན་པས་ཆུ་སྦྲུལ་ལོའི་ ལོ་གསར་གཏོང་ཕྱོགས་འཐད་དབུས་རྒྱུན་སྤྱི་མོས་ཀྱིས་ཐག་གཅོད་བྱུང་བའི་གནད་དོན་དོན་ཚན་དྲུག་ཡོད་པ་ལས་ནང་གསེས་བཞི་པ་དེ་མ་དངུལ་ཐེབས་རྩའི་སྐོར་དེ་ཡིན་ལས། དེ་ནི་དབུས་རྒྱུན་བྱེ་བྲག་པ་སུ་ཞིག་གི་འདོད་མོས་ཐོག་ཕྱིན་པ་ཞིག་གཏན་ནས་མིན། ལྷག་པར་ཐེབས་རྩའི་མ་དངུལ་ཟུར་འཇོག་གིས་ཕྱི་ལོ་༢༠༡༣ ཟླ་བ་༥ ཚེས་༢༧ ནས་ཟླ་བ་༦ ཚེས་༡བར་བཞུགས་སྒར་དྷ་སར་ ཀ་ལབ་ཚོགས་ཁང་ངུ་བསྐོངས་འཚོགས་ཞུས་པའི་ཚོགས་ཆེན་གྱི་རྩིས་ཁྲའི་ནང་རྩིས་སྒོ་ཨང་བཅུ་གཅིག་གི་ཁ་པའི་ནང་གསེས་གསུམ་ པའི་ནང་གསལ་བ་བཞིན་ཐེབས་རྩའི་མ་དངུལ་ཁྱོན་བྱུང་སྒོར་། ༩༧༠༥༤༤།༠༠ དགུ་འབུམ་བདུན་ཁྲི་ལྔ་བརྒྱ་ཞེ་བཅུ་ཞེ་བཞི་ཐམ་པ་ ཨ་ལ་བྷ་ཏ་དངུལ་ཁང་ནས་གཏན་བཅུག་བྱས་ཡོད། ལྷག་པར་དུ་དུས་དབང་གི་ཞལ་འདེབས་དང་ཐེབས་རྩའི་མ་དངུལ་གཉིས་ཀྱི་ཐོག་ཕྱག་ལས་གནང་མཁན་འབྲེལ་ཡོད་ལས་བྱེད་དང་། དབུས་རྒྱུན་གཞན་དག་ཡོད་པ་ལས། དོན་གྲུབ་ལྷ་དར་ལ་འབྲེལ་བ་མེད་སྟབས་གོང་སྨོས་གནད་དོན་དེ་དག་ལས་གཞི་མེད་སྐྱོན་བརྗོད་དང་མ་ཉེས་ཁ་གཡོག་ཡིན་པ་གསལ་རྟོགས་ཐུབ།
གསུམ་པ། དབུས་རྒྱུན་ཕྱོགས་བསྐྱོད་སྐོར།
སྤྱིར་མཁྱེན་གསལ་ལྟར། གཞོན་ལྷན་གྱི་དབུས་རྒྱུན་རྣམས་རྒྱ་གར་ནང་དུ་ཙམ་མ་ཟད་ཕྱི་རྒྱལ་ཡུལ་གྲུ་མང་དག་ཅིག་ཏུ་ཕྱོགས་ བསྐྱོད་གནང་སྲོལ་ཡོད་ཀྱང་། དེ་དག་ཐམས་ཅད་ནི་དབུས་རྒྱུན་ལས་རྣམས་ཀྱིས་གྲོས་བསྡུར་དང་མཁྱེན་རྟོགས་ཡོད་པའི་ཐོག་ནས་ ཕེབས་པ་ལས། རང་སྣང་གར་དྲན་གནང་མེད་པ་ཡང་གསལ་སྟོན་བྱ་རྒྱུ་ཡིན།
མདོར་ན་གོང་གསལ་གྱི་གནད་དོན་དེ་དག་ནི་དབུས་སྤྱི་ཁྱབ་རྒྱུན་ལས་ཟུར་པ་ཞིག་གིས་འདས་པའི་ལོ་གསུམ་གྱི་ཉམས་མྱོང་ལ་གཞི་བཅོལ་བྱས་ནས་འགན་འཁུར་ཞིག་གི་ཐོག་ནས་གསལ་བཤད་བྱས་པ་ཞིག་ཡིན་པས་ཀུན་གྱིས་ཡིད་འཇགས་ཡོང་བ་ཞུ།

Tsering Samdupལགས་ཀྱི་ངོ་དེབ་ལས་བཤུས་དེ་འདིར་བཀོད་པ་ཡིན།
གཞོན་ནུའི་དབུས་རྒྱུན་ཞིག་གིས་བཤད་པ་ལྟར་བྱས་ན། རྒྱུན་ལས་ནང་ཁུལ་ཚོགས་འདུ་ཚོགས་སྐབས་ཚོགས་གཞོན་གྱིས་ལས་ཀ་ཚང་མ་སྒེར་སྤྱོད་བྱས་ཏེ་ཐག་གིས་བཅད་བཞག་གི་རེད་གསུངས་སོང་།
བོད་ཀྱི་གཞོན་ནུའི་སྒྲིག་འཛུགས་ལ་གུས་བཀུར་བརྒྱ་ཆའི་བརྒྱ་ཡོད་པ་དང་རང་བཙན་ལངས་ཕྱོགས་དེའང་བཟུང་ཆོག་གི་རེད་དྲན་ཡོད། ཡིན་ན་ཡང་གཞོན་ནུའི་དབུས་བརྒྱུན་ལས་རྣམས་ཀྱི་ལས་ཀ་བྱེད་ཕྱོགས་ལ་ངོ་རྒོལ་མཐའ་གཅིག་ཏུ་ཡོད། སྤྱིར་བཏང་སུ་ཞིག་ནོར་བ་རེད་ཟེར་ན་གཞོན་ནུ་ལྷན་ཚོགས་ནོར་བ་རེད། གཞོན་ནུ་ལྷན་ཚོགས་ཀྱི་ནང་ནས་སུ་ཞིག་ནོར་བ་རེད་ཟེར་ན་སྐབས་བཅུ་བཞི་བའི་དབུས་རྒྱུན་ལས་དེ་ཚོ་ནོར་བ་རེད། དབུས་རྒྱན་ལས་ནང་ནས་སུ་ཞིག་གིས་ནོར་འཁྲུལ་བཟོས་པ་རེད་ཟེར་ན་དོན་གྲུབ་ལྷ་དར་གྱིས་བཟོས་པ་རེད། འདིའི་སྐོར་ལ་ང་རང་ལ་གསལ་གསལ་ཐང་ཐང་གིས་ཞུ་རྒྱུ་ཡོད་ནའང་མདོ་བསྡུས་སུ་རོབ་ཙམ་ཞིག་བཤད་རྒྱུ་ཡིན།
1)
བཙན་བྱོལ་བོད་གཞུང་བོད་མིའི་སྒྲིག་འཛུགས་ལ་འགྱུར་བ་གཏོང་སྐབས། དེ་ལ་ངོས་ལེན་རྩ་བ་ནས་མེད་བོད་ཀྱི་གཞོན་ནུ་ལྷན་ཚོགས་ཀྱིས་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་མུ་མཐུད་ཉར་རྒྱུ་ཡིན་ཟེར་མཁན་དོན་གྲུབ་ལྷ་དར་རེད།
2) ཚོགས་གཙོ་ཚེ་དབང་རིགས་འཛིན་གྱི་སྒང་ནས་ལས་ཀ་བྱས་ཏེ་རྒྱ་ནག་གི་རྒྱལ་དར་མེར་སྲེག་བཏང་སྟེ་བོད་གཞུང་དང་རྒྱ་གཞུང་གཉིས་ཀར་ཕོག་ཐུག་འགྲོ་བའི་ལས་ཀ་རྩོམ་མཁན་དོན་གྲུབ་ལྷ་དར་རེད།
3) བོད་རྒྱལ་ཁབ་བསྐྱར་འཛུགས་ཀྱི་མ་དངུལ་བསྡུ་རྒྱུ་ཡིན་ཟེར་ནས་གསལ་བསྒྲགས་བསྐྱངས་ཏེ་མང་ཚོགས་ལ་མགོ་བསྐོར་བཏང་སྟེ་དངུལ་བསྡུ་མཁན་དོན་གྲུབ་ལྷ་དར་རེད།
4) ཨ་རིའི་ནའེ་ཡོག་གི་དུས་འཁོར་དབང་ཆེན་སྐབས་སུ་བསྟོད་ལོ་ཡི་སྟེང་དུ་བོད་གཞུང་དགའ་ལྡན་ཕོ་བྲང་བཀོད་དེ་རྙོག་དྲ་བྱུང་སྐབས་ཨེ་ཤ་ཡ་རང་དབང་རླུང་འཕྲིན་ཁང་གི་ལས་བྱེད་དང་དུས་འཁོར་དབང་ཆེན་གོ་སྒྲིག་ཚོགས་ཆུང་གི་ཚོགས་གཙོ་དགའ་ལྡན་བློ་གྲོས་ཀྱི་སྟེང་ལ་གསར་འགོད་བསྒྲགས་གཏམ་སྤེལ་ཏེ་རྒྱ་མི་ལ་བཤད་མ་ཐུབ་པའི་ཚིག་སྡུག་ཅག་བེད་སྤྱོད་གཏོང་མཁན་དོན་གྲུབ་ལྷ་དར་རེད།
5) སྤྱི་ལོ་༢༠༡༢ ་ལོར་གླིང་ཚ་ཚེ་བརྟན་རྡོ་རྗེ་མི་སྒེར་གྱིས་བོད་ནང་གོམ་བགྲོད་གནང་སྐབས་རྒྱ་ནག་གི་རྒྱལ་དར་མཉམ་འཁྱེར་བྱས་སྐབས། གང་ཟག་སྒེར་བ་མི་གཅིག་གི་ལས་འགུལ་སྤེལ་ཕྱོགས་ཐོག་ལ་བོད་ཀྱི་གཞོན་ནུ་ལྷན་ཚོགས་ཀྱི་མིང་འཁྱེར་ནས་ངོ་རྒོལ་གྱི་གསར་འགོད་གསལ་བསྒྲགས་སྤེལ་མཁན་དོན་གྲུབ་ལྷ་དར་རེད།
6) སྤྱི་ལོ་༢༠༡༡་ཟླ་བ་༡༢་པའི་ནང་ལ་རྡོ་རྗེ་གདན་ནས་༧གོང་ས་སྐྱབས་མགོན་ཆེན་པོ་མཆོག་གིས་དུས་འཁོར་དབང་ཆེན་བསྐུར་གནང་བའི་སྐབས་སུ་སྤྱི་ཚོགས་ཞབས་ཞུ་སྒྲུབ་ཀྱི་ཡོད་མདོག་གི་ཞོར་དུ་མི་མང་ལ་ཞལ་འདེབས་བསྡུས་ཏེ་སྐད་གྲགས་བཞག་པ་མ་ཟད། སྐབས་དེར་བོད་ནང་ནས་ཆོས་ཞུ་བར་ཕེབས་མཁན་དག་ལ་སྐད་ཆ་འདྲ་མིན་བཤད་དེ་དངུལ་ཕོན་ཆེན་བསྡུ་མཁན་དོན་གྲུབ་ལྷ་དར་རེད།
7) བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ནང་ཁུལ་གྱིས་མཁྱེན་རྟོགས་དང་གསལ་ཆ་མེད་པར་བོད་མིའི་སྒྲིག་འཛུགས་ཀྱི་གནད་ཡོད་མི་སྣ་དང་ཀློག་འབྲེལ་བྱས་ཏེ་ཨ་རི་དང་ཁ་ན་ཌ་ལ་ཕྱིན་ཏེ་དབུ་མའི་ལམ་ལ་སྐྱོན་བརྗོད་དང་༧གོང་ས་རྒྱལ་བ་རིན་པོ་ཆེ་མཆོག་དང་བོད་གཞུང་ལ་ཟུར་ས་བྱས་ཏེ་མང་ཚོགས་ལ་བློ་ཕམ་བྱུང་འཇུག་མཁན་དོན་གྲུབ་ལྷ་དར་རེད།
8) གཞོན་ནུ་ལྷན་ཚོགས་ཀྱི་དབུས་རྒྱུན་ལས་ནང་ཁུལ་དང་ས་གནས་གཞོན་ནུ་ཁག་ལ་བཙན་གནོན་འཇིགས་སྐུལ། དེ་ནས་བོད་རང་དབང་སློབ་ཕྲུག་ཚོགས་པ་སོགས་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་ལ་གཉའ་གནོན་བརྙས་བཅོས་གཏོང་མཁན་དོན་གྲུབ་ལྷ་དར་རེད།
9) ཕྱི་ཟླ་ ༥ པའི་ཚེས་ ༢༣ ། ༢༤ ། ༢༥ བཅས་ཉིན་གསུམ་རིང་བཞུགས་སྒར་ངྷ་རམ་ས་ལར་རྒྱལ་སྤྱི་རང་བཞིན་གྱི་རང་བཙན་ཚོགས་འདུ་ཞིག་ཚོགས་རྒྱུ་ཡིན་ཞེས་འུར་བརྒྱབ་སྟེ་རྗེས་སུ་ཁུངས་མ་འཁྱོལ་བར་ཕྱིར་འཐེན་བྱེད་དགོས་བྱུང་བ་དང་། སྤྱི་ལོ་ ༢༠༡༣ ལོ་ནི་བོད་རང་བཙན་གྱི་ལོ་ལ་སྲུང་བརྩི་ཞུ་རྒྱུ་དང་དེ་ལ་རང་བཙན་མཚོན་རྟགས་ཤིག་བཟོ་སྐྲུན་ཇུས་འགོད་འགྲན་བསྡུར་གྱི་ལས་གཞི་ཞིག་སྤེལ་རྒྱུ་ཡིན་རབས་བཤད་རྗེས་མཇུག་སྐྱོང་མ་ཐུབ་པར་ལྷག་པ་ཡང་དོན་གྲུབ་ལྷ་དར་རེད།
10) ད་རེས་ཚོགས་ཆེན་གྱི་མགོ་འཛུགས་ཉིན་ནས་ཚོགས་མི་ཚོར་མཐོང་ཆུང་ཁྱད་གསོད་བྱས་པ་དང་། ཚོགས་འདུ་མ་ཚོགས་སྔོན་ནས་ལྐོག་ངན་ཇུས་འགོད་དང་ལས་འཆར་བསྒྲིགས་མཁན་ཚང་མ། ད་དུང་ཚོགས་འདུ་དངོས་གཞིའི་སྐབས་སྒེར་སྤྱོད་ཀྱིས་ས་གནས་ཚོགས་ཞུགས་པ་མང་པོ་ཞིག་ལྐུགས་པའི་གྲས་སུ་བཞག་སྟེ་སྐད་ཆ་རྫིག་པོ་ཤོད་མཁན་དོན་གྲུབ་ལྷ་དར་རེད།

སྐབས་བཅུ་བཞི་པའི་གཞོན་ནུ་ལྷན་ཚོགས་ཀྱི་དབུས་རྒྱུན་ལས་ཚོས་ནོར་འཁྲུལ་མང་པོ་ཞིག་བཟོས་ཡོད་པ་དེ་དག་ཚོགས་གཞོན་དོན་གྲུབ་ལྷ་དར་ཡིན་པ་ང་ལ་རྒྱུ་མཚན་ཆེན་པོ་ཞིག་ཤོད་རྒྱུ་ཡོད། དབྱིན་ཇུའི་ནང་གཏམ་བཤད་དང་སྒྲགས་གཏམ་སྤེལ་བ། གསར་འགོད་གསལ་བསྒྲགས་བསྐྱངས་པ། ཡིག་འབྲེལ་བྱས་པ་ཚང་མ་ཚོགས་གཙོ་ཚེ་དབང་རིག་འཛིན་མཆོག་གིས་བྲིས་པ་རེད། རྒྱུ་མཚན་ཚོགས་གཞོན་དོན་གྲུབ་ལྷ་དར་གྱིས་དབྱིན་ཇི་ཤེས་ཀྱི་ཡོད་མ་རེད། དབྱིན་ཇིའི་ནང་གི་གསལ་བསྒྲགས་དང་ཡིག་ཆ་ཚང་མར་ཞིབ་གཟིགས་གནོངས་དང་། ནོར་འཁྲུལ་དང་ཐལ་ཆ་ཆེ་བ་རྐང་གཅིག་ཀྱང་ཡོད་པ་མ་རེད། བོད་ཡིག་ནང་ཡིག་ཆ་བཟོས་པ་དང་གསར་འགོད་བསྒྲགས་གཏམ་སྤེལ་བ་ཁག་ཡོངས་སུ་རྫོགས་པ་དོན་གྲུབ་ལྷ་དར་གྱིས་བཟོས་པ་རེད། རྒྱུ་མཚན་ཚེ་དབང་རིག་འཛྀན་གྱིས་བོད་ཡིག་ཡག་པོ་ཤེས་ཀྱི་ཡོད་མ་རེད། བོད་ཡིག་ནང་བསྒྲགས་གཏམ་སྤེལ་བ་རྣམས་ལ་གཟིགས་དང་གཞོན་ནུའི་ནོར་འཁྲུལ་དང་ཐལ་ཆ་འགལ་བ་ཚང་མ་དེ་དག་ནང་སྤུངས་ཡོད་རེད། དགྲ་དམར་རྒྱ་ནག་གཞུང་ལ་བཤད་པ་ལས་སྡུག་པ་མང་པོ་ཡོད་རེད།

ཧེཧེཧེ ཆོས་སྲིད་མཉམ་བསྲེས་ལ་དགག་རྒྱག་བརྒྱ་བཤད་སྟོང་བཤད་བྱུང་ཀྱང་མཐའ་མའི་མཐའ་མར་གཞོན་ལྷན་སྒྲིག་འཛུགས་རྩ་ཆེན་དེ་དགའ་ལྟན་ཕོ་བྲང་གིས་༼དཀའ་ཉོག་ནས་༽སྐྱབས་སོང་། ཟེར་གླུ་ཞིག་གཏོང་འདོད་བྱུང་།

བོད་ཀྱི་གཞོན་ནུ་ཚོགས་པ་ནི་ང་ལ་མཚོན་ན་ཡང་ཡང་གོ་མྱོང་བ་ཙམ་ལས་ཆ་རྒྱུས་གང་མེད་ཀྱང་། གོ་ཚོད་ལ་ཚོགས་པ་འདིའི་ལྟ་བ་དང་ལངས་ཕྱོགས་ནི་བོད་རང་བཙན་ཡིན་ཟེར། སྤྱིར་ལྟ་བ་ལངས་ཕྱོགས་ཟེར་ན་གང་ཟག་རང་རང་གིས་རྒྱུ་མཚན་གྱི་ལམ་ནས་རྙེད་པའི་གནས་ལུགས་ཡིན་དགོས་ན།གཞོན་ནུས་རྒྱ་ནག་ལ་བོད་རང་བཙན་གྱི་སྒྲུབ་བྱེད་དང་ང་ཚོ་ལ་རང་བཙན་ཐོབ་ཐུབ་པའི་རྒྱུ་མཚན་ཡང་དག་པ་ཅི་ཞིག་བཤད་ཡོད། དེ་མེད་ན་རང་བཙན་ཟེར་བ་ནི་འདོད་པ་ཙམ་རེད།ཡང་མི་ཚོས་ཟེར་ན་གཞོན་ནུས་རང་བཙན་འཐབ་རྩོད་བྱེད་ཀྱི་ཡོད་ཟེར། རྒྱལ་ཁབ་ཅིག་གི་རང་དབང་འཐབ་རྩོད་བྱེད་པ་ལ་རང་སྲོག་བློས་གཏོང་གི་བྱེད་དགོས་ན་གཞོན་ནུ་ཚོགས་པའི་ད་བར་ཏུ་རང་སྲོག་བློས་གཏོང་གིས་འཐབ་རྩོད་ཞིག་བྱེད་མྱོང་ཨེ་ཡོད་ན། གཞོན་ནུ་་ཚང་གི་མི་ག་ཚོད་ཅིག་བོད་རང་བཙན་ཆེད་དུ་གྲོངས་རེད་། བཙོན་ཁང་དུ་མི་ག་ཚོད་གཅིག་ཡོད་ན། དེ་མིན་རང་བཙན་འཐབ་རྩོད་བྱེད་ཀྱི་ཡོད་ཟེར་ན་ཧིན། དེ་ལས་གཞོན་ནུ་ཚོགས་པའི་རང་དབང་ལུང་བ་ནས་བོད་རང་བཙན་དགོས་ཟེར་ནས་སྐད་འབོད་བྱེད་ཀྱི་ཡོད་ཟེར་དགོས། དེ་མིན་ཡང་རྣ་བར་གཏན་ནས་མི་འགྲོ་བ་ཞིག་ནི་གཞོན་ནུ་ཚོགས་པའི་ང་ཚོ་ནི་༧གོང་ས་མཆོག་གི་བཀའ་དགོངས་གི་འོག་ལ་ཤར་སྐྱོད་བྱེད་མཁན་ཡིན་ཟེར། དེ་ལས་ང་ཚོ་༧་གོང་ས་མཆོག་གི་བཀའ་དང་ནམ་ཡང་མི་འགལ་བ་བྱེད་ཀྱི་ཡིན་ཟེར་ན་དོན་དངོས་དང་མཐུན་ཙམ་རེད། བཀའ་དགོངས་བཞིན་སྒྲུབ་པ་དང་བཀའ་དང་མ་འགལ་བ་ནི་སོ་སོ་ཡིན། འོན་ཀྱང་ད་རེ་གཞོན་ནུ་་ཚོགས་པ་འཐོར་ཞིག་སུ་མ་སོང་བ་དེ་ནི་ལགས་ཙམ་རེད།

ཐོག་མར་རྩ་ཆེའི་གཞོན་ནུ་ལྷན་ཚོགས་ཀྱི་རྒྱུན་གསར་འདེམས་བྱུང་བར་དགའ་སྤྲོའི་སྒོ་ནས་བཀྲིས་བདེ་གྲངས་མེད་ཞུ། དྲ་འབུ་ཚོ་བསམ་བློ་ཡག་པོ་གཏང་ནས་བསམ་ཚུལ་བྲིས་པ་ལས་རང་ཉིད་ཀྱི་ལྟ་ཚུལ་མ་མཐུན་པ་དང་། དགའ་མིན་དབང་གིས་རྒྱུ་མཚན་དང་གནས་ལུགས་ཀྱི་ཕུངས་པའི་གཞི་མེད་ཀྱིས་གཏམ་ལུང་པ་གང་སྨྲས་ན་ཁྱེེད་ཚོ་ངོ་མི་ཚ་འམ། འདྲེ་ཤར་ལ་བཞགས་གླུད་ནུབ་སྒོར་བཀྱལ་ཞེས་པའི་དཔེ་ལྟར་དགོས་སར་ཆད། མ་དགོས་སར་ལུས་ན་ཆོ་འདུག་གམ། དོན་གྲུབ་ལྷ་དར་ལ་སོགས་ སེམས་ཤུགས་དང་མི་རིགས་ལ་རྒྱ་ཡོད་པ། རང་ཉིད་གཅེས་པའི་སྲོག་ཡན་ཆད་རྒྱལ་ཁབ་དང་མི་རིགས་སྐད་ཡིག་ཀྱི་ཆེད་དུ་ཐེངས་མ་གཉིས་ཙམ་བློས་བཏང་མཁན་གྱི་དཔའ་བོ་ཞིག་ལ་ལོག་བཤད་མ་བྱས་གོང་སོ་སོ་རང་ཉིད་ཀྱི་གང་བྱས་ཡོད་མེད་བསམ་བློ་བཏང་ངམ། རང་ཉིད་ཀྱི་གང་ཡང་བྱེད་མ་ཐུབ་པར་དྲ་རྒྱའི་ཐོག་ནས་དཀྲུགས་ཤིང་ལུང་པ་གང་སྨྲས་རྒྱུ་ལས་མེད་པའིདྲ་བུ་ཁྱེད་ཚོར་རྒྱལ་མབ་ཆེད་དུ་དཀའ་ལས་གྲངས་མེད་རྒྱག་མྱོང་མཁན་གྱི་མི་ཞིག་ལ་སྐྱོན་བརྗོད་བྱ་ཡས་ཀྱི་སྤོབ་པ་ཡོད་པས། ངས་བལྟས་རྩ་ནས་ཡོག་མ་རེད་དྲ་འབུ་ཚོ། ལས་རྒྱུ་འབྲས་འཁོར་ཡོང་ད་དྲ་འབུ་ཚོ། བོད་རྒྱལ་ལོ། གཞོན་ནུ་རྒྱལ་ལོ། རང་བཙན་རྒྱལ་ལོ། རྒྱལ་གཅེས་ཀྱི་མི་སྣ་ཚོ་རྒྱས་གྱུར་ཅིག དྲང་བདེན་དང་གནས་ལུགས་ཀྱི་ཕུངས་པའི་སྤྱི་ཚོགས་དཀྲུགས་མཁན་གྱི་དྲ་འབུ་དག་གང་མྱུར་འཆི་བ་ཤོག

གལ་སྲིང་གཞོན་ནུ་ལྷན་ཚོགས་དེ་དབུ་མའི་ལམ་ལ་གྱུར་སོང་ན་བོད་ཀྱི་གཞོན་ནུ་ཚོགས་པ་ཟེར་བ་ཞིག་དུས་དེ་ནས་དགོས་པ་གང་ཡང་མེད་པ་རེད །དེ་ནི་དབུ་མའི་ལམ་ལ་མཆོག་ཏུ་གྱུར་བ་བོད་མི་སྒྲིག་འཛུགས་ཡོད་པས་རེད།

ཆབ་སྲིད་དང་ཆོས་ལུགས་ཀྱི་ལང་ཕྱོགས་གཉིས་ཤར་ནུབ་བཞིན་ཡིན་རུང་། སྲིད་ཞི་མཉམ་ཉིད་རྟོགས་པའི་རྣལ་འབྱོར་པ་རྣམས་ལ་སྲིད་ཞི་གཉིས་ལ་ཁྱད་མེད་དུ་མཛད་པ་འཕྲིན་ལས་ཇི་དགོས་ཕྱག་བསྟར་ཐུབ་ཀྱི་ཡོད་པ་ལྟར། མཆོག་གྱུར་སྐྱེས་ཆེན་དམ་པ་རྣམས་ཀྱིས་ཀྱང་དེ་བཞིན་ཆབ་སྲིད་དང་ཆོས་ལུགས་གཉིས་མེད་རྟོགས་པ་རྣམས་ཀྱིས་གཉིས་ཆར་མཉམ་འགྲུབ་ཐུབ་པས་དམིགས་གསལ་ཆགས་ཡོད། ང་ཚོ་དཀྱུས་མའི་རིགས་དག་ལ། ཆབ་སྲིད་ཀྱི་ལྟ་བའི་ལང་ཕྱོགས་སོ་སོའི་གཞི་རྩའི་ལྟ་གྲུབ་དང་མཐུན་པར་ཡོད་ལ། དེ་ཡོད་དགོས་ཤིང་། དེ་འཛིན་ཆོག་པ་དེ་མང་གཙོའི་ཁེ་ཕན་བླ་ན་མེད་པར་ངོས་འཛིན་ཞུ་བཞིན་ཡོད། གཞོན་ལྷན་གྱིས་ལྟ་གྲུབ་རྩོད་འབད་བོད་རང་བཙན་གཙང་མ་ཡིན་པ་ཡོངས་གྲགས་ཡིན་པ་ལ། ང་ཚོ་དབུ་མའི་ལམ་ཀྱི་ལྟ་གྲུབ་ཀྱི་རྗེས་སུ་འབྲངས་པ་གཉིས་རྦད་དེ་ཁ་ཁར་ཆགས་ཀྱི་འདུག་ཀྱང་། ཁོ་ཚོའི་ལང་ཕྱོགས་ལ་གུས་བཀུར་ཚད་ལྡན་ཞུ་བཞིན་ཡིན། ལང་ཕྱོགས་དེ་འཛིན་པའི་སྐབས་སུ། གོང་ས་མཆོག་གི་བཀའ་སློབ་དང་། མཁན་དབང་ཟམ་གདོང་སོགས་ཀྱི་བཀའ་སློབ་ལ་གཟློགས་ཕྱོགས་མཛད་དགོས་ཀྱང་། དེ་གོང་ས་མཆོག་ལ་གུས་བཀུར་མེད་པ་དང་། ཁྱད་གསོད་བྱས་པ་རུ་དུས་ནམ་ཡང་ངོས་འཛིན་བྱེད་མི་རུང་། གལ་སྲིད་དེ་ལྟར་བྱས་ན། ཆོས་ལུགས་ཀྱི་བླ་མ་བསྟེན་ཕྱོགས་དེ་སྲིད་ཇུས་འཐབ་རྩོད་ལ་ཁྱེར་ནས། སྒེར་སྤྱོད་རིང་ལུགས་ཀྱི་ཕྱོགས་ལས་འདས་ཀྱི་མེད། གཞོན་ནུས་ལྷན་ཚོགས་ཀྱིས་དེ་སྔོན་ཡང་སོ་སོའི་ལྟ་གྲུབ་དང་མཐུན་པར་འབད་བརྩོན་རབ་དང་རིམ་པར་གནང་བ་ལ་ངོ་གུས་བཀུར་ཞུ་རྒྱུ་ཡིན། ལྷག་པར་ཟས་བཅད་ངོ་རྒོལ་སོགས་ཞི་བའི་སྒོ་ནས་འཐབ་རྩོད་བྱེད་པ་ལ་གུས་བཀུར་དང་རྗེས་སུ་ཡིད་རངས་ཞུ་རྒྱུ་ཡིན། ཆབ་སྲིད་ཀྱི་གོ་རྟོགས་ཀྱི་མ་འདངས་པའི་སྐབས་སུ། ལྟ་གྲུབ་དང་། སྒེར་གྱི་གནས་དོན་གཉིས་མཉམ་བསྲེས་སྤྱི་ཚོགས་ལ་དཀྲོག་གཏམ་སྣ་ཚོགས་འབྱུངས་ཉེས་ཆེན་པོ་ཡོད་པས། དོག་ཟོན་ཆེན་པོ་དགོས།

ཚོགས་གཙོ་གཙོ་བྱས་ཏེ་རྒྱུན་ལས་ཡོངས་ལ་བཀྲ་ཤིས་བདེ་ལེགས་ཞུ།
གཞོན་ནུའི་ལངས་ཕྱོགས་ལ་འགྱུར་བ་མ་ཕྱིན་པ་ནི་བོད་མིའི་སྤོབས་པ་རེད།

ད་རེས་གཞོན་ནུའི་ཚོགས་འདུ་ལེགས་སྒྲུབ་བྱུང་བ་མ་ཟད་རྒྱུན་ལས་གསར་འདེམས་བྱུང་བར་བླ་ན་མེད་པའི་དགའ་བསུ་བཞུ་བ་དང་ཆབ་གཅིག་རྒྱུན་ལས་གསར་པ་རྣམས་ལ་བཀྲིས་བདེ་ལེགས་ཞུ།། འོན་ཀྱང་འདིར་མཆན་བྲིས་པ་འགའ་རེའི་ཀུན་སློང་ག་རེ་ཡོད་མིན་མི་ཤེས་ཀྱང་དགྲ་དགའ་གཉེན་སྡུག་གི་སྐད་ཆ་འདྲ་མིན་ཤོད་ཀྱིས་འདུག ཁོང་རྣམས་པར་བཞུ་རྒྱུར་མི་དང་རང་གིས་བསྡོད་ས་བརྗེས་ནས་བསམ་བློ་རེ་གཏོང་རོགས། ཚིག་སྒྲིལ་དགོས་པ་ཤེས་པ་གནང་རོགས།

ནམ་མཁའ་སྟན་འཛིན་ལགས། སྟན་འཛུན་འཇིགས་མེད་ཀྱི་ངོ་དེབ་ཁ་བྱང་འདིར་བསྐུར་རོགས་ཞུ།

ཚོགས་གཙོ་གསར་པ་དང་ཚོགས་མི་ཡོངས་ལ་བཀྲ་ཤིས་བདེ་ལེགས་ཞི།
གོང་དུ་ལི་ཐང་བསྟན་ནམ་གྱིས་གསུང་བ་ལ་མོས་མཐུན་ཡོད་དོན་འགྲུབ་ལྷ་དར་གྱིས་གཞོན་ནུ་ཚོགས་པའི་འབག་གོན་ནས་ད་བར་རང་གི་རང་ཉིད་ཆེ་མདོག་གི་ལམ་ལས་ལས་ཀ་འདྲ་མིམ་བྱས་པར་གྲངས་ཀྱིས་མི་ལང་་་་་ཚང་མས་ཁོས་སྔར་བཤད་དག་ལ་བསྐྱར་གཟིགས་གནོང་དང་་་་མི་འདིས་སྤྱི་ཚོགས་ཆུང་ཆུང་འདིའི་ནང་དུ་དབང་ཤུགས་བསྐྱེད་ནས་ལས་ཀ་ཅི་བྱས་གོང་དུ་ལི་ཐང་བསྟན་ནམ་གྱིས་གསལ་བོ་གསུང་འདུག་པས་ཚང་མས་ཞིབ་འཇུག་བྱོས་དང་་་

གཞོན་ནུའི་ཚོགས་གཙོ་གསར་པ་བསྟན་འཛིན་འཇིགས་མེད་ལགས་ལ་བཀྲ་ཤིས་བདེ་ལེགས་ཞུ་བཞིན་ཡོད། མི་གསར་པ་ལོ་ཆུང་ཞིག་རེད་ག་འདྲ་ཡོང་ན་བསམ་བསམ་ཞིག་འདུག དེ་ནས་བསྟན་འཛྀན་བརྩོན་འགྲུས་ཚོགས་གཙོ་ཚོགས་གཞོན་དྲུང་ཆེ་གང་ཡང་མ་ཐོབ་པ་འདི་བརྒྱུད་ནས་ཁོ་རང་གི་བྱེད་སྟངས་སྤྱོད་སྟངས་ལ་ངོས་འཛིན་གསལ་བོ་ཡོང་བའི་རེ་བ་ཡོད།

ལི་ཐང་བསྟན་རྣམ་ལགས་ཀྱི་སྐད་ཆ་ལ་བརྒྱ་ཆའི་བརྒྱ་མོས་མཐུན་ཡོད། དོན་གྲུབ་ལྷ་དར་དང་ཚེ་དབང་རིག་འཛིན་ཚོགས་གཙོ་ཚོགས་གཞོན་གྱིས་ཀྱི་སྐབས་སུ་བོད་ཀྱི་གཞོན་ནུ་ཚོགས་པ་དུམ་བུ་གཉིས་ལ་བཏང་སོང་བ་མ་ཟད། དེ་རིང་ཚོགས་པ་སྒོ་རྒྱག་གྲབས་ཤིག་བྱེད་སོང་བ་ཚང་མས་མཁྱེན་གསལ་ལྟར་རེད། ཡིན་ནའང་གོ་ཚོད་ལ་ཚེ་དབང་རིག་འཛིན་གྱི་རྐུབ་སྟེགས་མཐོ་བ་ལས་དོན་གྲུབ་ལྷ་དར་ལ་དབང་ཚད་ཆེ་བ་ཡོད་པ་རེད་ཟེར་བ་ཞིག་གོ་སོང་། དེ་འདྲ་སོང་ཙང་ནོར་ཁྲལ་དང་བྱས་ཉེས་འདི་དག་ལྷ་དར་གྱི་མགོ་ལ་མི་འཇོག་ག་མེད་ཆགས་སོང་།

ཚོགས་འདུ་མ་གྲོལ་གོང་ནས་ཁོས་ངོ་དེབ་བརྒྱུད་ནས་དབུ་མ་བ་ཚོར་དྲ་དམག་འདྲེན་བཞིན་འདུག

ད་རེས་གཞོན་ནུའི་ལངས་ཕྱོགས་ལ་འགྱུར་བ་མ་ཕྱིན་པ་དེར་དགའ་སྤོབས་ཆེན་པོ་སྐྱེས་སོང་། ཡིན་ནའང་དབུས་རྒྱུན་དོན་གྲུབ་ལྷ་དར་ཟེར་བ་དེས་བོད་ཀྱི་གཞོན་ནུ་ལྷན་ཚོགས་ལ་དགོངས་སེལ་ཞུ་དགོས་ཡོད། ད་རེས་ཚོགས་ཆེན་སྟེང་དཀའ་ལས་ཁག་པོ་བྱུང་བའི་རྐྱེན་རྩ་ཡོངས་རྫོགས་དོན་གྲུབ་ལྷ་དར་གྱི་བྱས་ཉེས་དག་ལས་བྱུང་བ་ཤ་སྟག་ཆགས་ཡོད་པས་ཁོ་རང་གིས་གཞོན་ནུ་ལྷན་ཚོགས་ལ་དགོངས་དག་ཞུ་དགོས་ཡོད།

ཐེངས་འདིར་གཞིན་ནུའི་ཚོགས་མི་རེ་ཟུང་གིས་༧གོང་ས་མཆོག་དང་བཙན་བྱོལ་བོད་གཞུང་ལ་ཀྱག་ཀྱག་བྱས་ཏེ་བསྟན་འཛིན་འཇིགས་མེད་ཚོགས་གཙོར་བདམས་པ་རེད། ས་གནས་ཁག་བརྒྱད་གཞོན་ནུ་ལྷན་ཚོགས་ལས་ཕྱིར་འཐེན་བྱས་པ་ཡོད་པའི་དབང་གིས་ད་རེས་ཀྱི་ཚོགས་གཙོ་དེ་མི་སྒེར་བ་ཁག་ཅིག་གི་ཚོགས་གཙོ་རེད་མ་གཏོགས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟེར་བའི་མིང་དེ་རྩ་བ་ཉིད་ནས་འགྲིག་གི་མ་རེད། ངོས་ལེན་རྩ་བ་ཉིད་ནས་མེད།
ཁ་སང་སྐུ་སྒེར་ཡིག་ཚག་གི་སྐུ་ཚབ་ཁྲི་ཟུར་ཟམ་གདོང་རིན་པོ་ཆེ་མཆོག་ཕེབས་ཏེ་ཞལ་གསལ་བོས་གསུངས་ཡོད་པ་རེད། རང་བཙན་རྩོད་རྒྱུ་དེ་ཐོབ་ཐང་རེད་ཅེས་གསུངས་ཡོད། འདི་༧གོང་ས་མཆོག་གིས་ཐེངས་བརྒྱ་ཕྲག་ལ་གསུངས་ཚར་པ་རེད། ཐོབ་ཐང་རེད་ཟེར་བ་དེ་བོད་རང་བཙན་བོད་མི་རིགས་ཀྱི་ཐོབ་ཐང་ཡིན་མིན་གྱི་སྐད་ཆ་བཤད་ཀྱི་ཡོད་པ་རེད་མ་གཏོགས་ཐོབ་ཐང་དེ་ངེས་པར་དུ་རྩོད་དགོས་པ་རེད་ནམ་ཡང་གསུངས་ཡོད་པ་མ་རེད། ཐོབ་ཐང་རེད་གསུང་གི་ཡོད་པ་དེས་དོན་དག་ག་རེ་སྟོན་གྱི་ཡོད་པ་རེད་ཟེར་ན། རང་བཙན་རྩོད་རྒྱུ་བོད་མི་ཚོའི་ཐོབ་ཐང་རེད། ཡིན་ནའང་ཡུལ་དུས་གནས་བབ་གང་ཐད་ནས་རང་བཙན་བརྩད་དེ་ཐོབ་ཐང་དེ་རྩོད་ལེན་བྱེད་རྒྱུ་གལ་ཆེན་ཡིན་མིན་ལ་དགོངས་པ་ཏན་ཏན་བཞེས་དགོས་པ་རེད་གསུང་གི་ཡོད་པ་རེད།
དབུས་རྒྱུན་དོན་གྲུབ་ལྷ་དར་དང་ཚོགས་མི་ཁག་ཅིག་གིས་༧གོང་ས་མཆོག་གི་བཀའ་གསུང་གི་དགོངས་དོན་ཤེས་བཞིན་དུ་མ་ཤེས་མ་རྟོགས་མདོག་མདོག་གིས་ཀྱག་ཀྱག་བྱས་པ་རེད། རྐང་བཙུགས་ཏེ་ད་རེས་དཀའ་ལྡན་ཕོ་བྲང་གི་སྐུ་ཚབ་ཀྱི་བཀའ་སློབ་ལམ་སྟོན་ལ་རྡོག་རོལ་བཏང་སྟེ་ཕྱིན་པ་རེད། བྱ་སྤྱོད་འདི་བོད་རྒྱ་ཆེའི་མི་མང་གིས་ཤེས་དགོས་པ་གལ་ཆེན་པོ་ཞེ་དྲག་རེད། ད་རེབ་བསྟན་འཛིན་འཇིགས་མེད་ལ་འོས་བླུགས་དགོས་པའི་རྒྱུ་མཚན་རྒྱབ་ལྗོངས་གསལ་བོ་ཤེས་དགོས། མི་འདིའི་ད་བར་སྐད་ཆ་ག་རེ་བཤད་པ་དང་བསམ་སྤྱོད་ག་རེ་འཁྱེར་པ། མི་སུ་དང་གང་ལ་འགྲོག་འདྲིས་བྱས་ཏེ་ལས་ཀ་ག་རེ་བྱས་པ་སོགས་ཤེས་དགོས། ད་དུང་མང་པོ་ཞིག་ཞུ་རྒྱུ་ཡོད་ནའང་དགོས་པ་བྱུང་ན་རེ་རེ་བཞིན་ཞུ་རྩིས་ཡོད།

རང་ཉིད་དང་ཆབ་སྲིད་ལང་ཕྱོགས་གཅིག་མིན་ལ་མ་ལྟོས་པར།
བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་གསར་བ་དང་། ཚོགས་གཙོ་གཞོན་དྲུང་ཆེ་སོགས་དང་བཅས་པ་བདམས་ཐོན་བྱུང་བར་བཀྲ་ཤིས་རྟེན་འབྲེལ་ཞུ། དེ་ནས་ཁ་སང་བྲིས་པའི་མཆན་ཞིག་འདིར་བསྐྱར་འགོད་བྱེད་འདུན་བྱུང་།

གཞོན་ནུ་ལྷན་ཚོགས་ལ་གྲོས་སུ་བཏབ་པ་ཁ་ཚ་དགོས་གཏུགས་མ།

འདིར་ཚིག་ཉུང་ངུའི་སྒོ་ནས་གོ་བདེ་བར་ཞུ་རྒྱུར། དུས་དང་གནས་སྐབས་ལ་དཔག་ནས་བཤད་ན།
ང་ཚོའི་སྒྲིག་འཛུགས་གཞུང་གི་ཆབ་སྲིད་ལང་ཕྱོགས་ནི་ལམ་དབུ་མ་ཉག་གཅིག་ལ་ཡིད་ཆེས་བརྟན་པོའི་ངང་། བོད་ཁུལ་སྣོད་བཅུད་ཡོངས་རྫོགས་གཅིག་ཏུ་སྒྲིལ་བའི་ཆེས་ཚད་མཐོའི་རང་སྲིད་རང་སྐྱོང་ལ་དངོས་ཤུགས་བརྒྱུད་གསུམ་ནས་འབད་ཅིང་སྐྱོད་རྒྱུ་ནི་ཅི་ནས་ཀྱང་གལ་ཆེ་བ་ནང་བཞིན། རང་བཙན་གཙང་མ་རྩོད་མཁན་གྱི་གཞུང་འབྲེལ་མ་ཡིན་པའི་ཚོགས་སྒེར་སྤྱི་དང་། སྐབས་བབ་གཞོན་ནུ་ལྷན་ཚོགས་ཀྱི་རང་བཙན་གཙང་མའི་འཐབ་རྩོད་རྒྱུན་སྐྱོང་བྱེད་རྒྱུ་ནི་གོང་དང་གཅིག་མཚུངས་ཀྱི་གནད་འགག་གལ་བོ་ཆེ་ཞིག་ཏུ་མཐོང་ཡོད།
ལང་ཕྱོགས་ལ་འགྱུར་བ་ཟེར་བ་དེའི་གོ་བ་རང་བཙན་བློས་གཏོང་ལ་གོ་གི་ཡོད་ན།དེ་ནི་ནོར་འཁྲུལ་ཚབ་པོ་ཆེ་ཞིག་ཡིན་ལ། ཉི་མ་དེ་ནས་བཟུང་གཞོན་ལྷན་ནི་ལས་མེད་ཕོ་ལྷག་འབའ་ཞིག་ལས་ཅི་ཡང་མེད།
རེད་དེ་གཤམ་གསལ་དོན་ཚན་འགའ་ལ་དོ་སྣང་ཆེན་པོ་བྱེད་རྒྱུར་སྐུལ་གྱིན་ཡོད།
༼༡༽༧གོང་ས་མཆོག་སྐུ་སྒེར་དང་།སྒྲིག་འཛུགས་གཞུང་།དེའི་ལང་ཕྱོགས་ལམ་དབུ་མ་དང་བཅས་པ་ལ།མཚོན་ཁ་ནང་སྐོར་གྱིས་མ་ཉེས་ཁ་ཡོག་དང་།མ་གོ་ལོག་འགྲེལ། སྒྲོ་འདོགས་སྐུར་འདེབས་སོགས་རྩ་བ་ནས་མི་བྱེད་རྒྱུ་དང་། དེ་རིགས་བྱེད་མཁན་གྱི་གཞོན་ནུའི་ཚོགས་མི་བྱུང་ན་ཕྱིར་འཕུད་ཀྱི་ཡོངས་ཁྱབ་གསལ་བསྒྲག་བྱེད་རྒྱུ།
༼༢༽ སྒྲིག་འཛུགས་གཞུང་གིས་ལས་འགུལ་ཆེ་ཕྲ་སྤེལ་རིགས་ལ ། གཞོན་ནུའི་ཚོགས་མི་སྒེར་བ་མཉམ་ཞུགས་བྱས་ཡོད་ནའང་། སྐབས་དེར་གཞུང་གི་ལང་ཕྱོགས་ལ་བརྩི་བཀུར་ཐོག་འབོད་ཚིག་སོགས་དབུ་མའི་ལམ་དང་བསྟུན་དགོས་པ་ལས།( བོད་རང་བཙན་གཙང་ཡིན)སོགས་སྐབས་འཚོལ་རིང་ལུགས་བྱེད་མི་རུང་།
༼༣༽རང་བཙན་འཐབ་རྩོད་ཀྱི་དགོས་པ་རྒྱུ་མཚན་གསལ་པོར་ངེས་ཐོག ཐབས་ལམ་སྣ་མང་ཅན་དང་།ཤེས་རབ་ཅན། གསར་གཏོད་ཅན ། ཞི་བ་ཅན། ཆེ་མཐོང་ཅན། མིག་རྒྱང་ཅན། སྟུན་མཁས་ཅན་བཅས་བྱེད་དགོས་རྒྱུ།

༼༤༽རང་བཙན་མི་སྤྲོད་མཁན་དེ་སུ་ཡིན་མིན་ངོས་ཟིན་པའི་ཐོག་ནས།འཐབ་རྩོད་བྱེད་སའི་ཁ་ཕྱོགས་ཕྱི་ནང་མ་ནོར་བ་བྱེད་རྒྱུ་བཅས་དཔྱད་གཞི་ཙམ་ལ་ཕུལ་བ་ལགས།

གཞོན་ལྷན་ཀྱི་ཚོགས་མི་གསར་པ་ཚོ་ལ་དགའ་བསུ་ཞུ་རྒྱུ་འབྲེལ། ཁྱེད་རང་རྣམས་ཀྱི་མ་འོངས་པའི་ཁ་ཕྱོགས་དེ་ནམ་ཡང་རང་བཙན་ལ་འགྲོ་རྒྱུ་དེ་ངས་རེ་བ་ཉག་གཅིག་ཡིན། ང་ཚོ་མཐོ་སྒང་བོད་པ་ཚང་ནི་ལོ་རྒྱུས་དང་རྒྱབ་ལྗོངས་གང་ལ་བལྟས་ཀྱང་རྒྱ་ནག་དམར་འོག་ལ་འདུག་ཐབས་བྲལ་བས། ང་ཚོའི་རང་བཙན་རྩོད་དགོས།
ད་དུང་ང་ཚོ་གདོང་དམར་བ་ལ་དགོས་པའི་ལག་ཆ་གཙོ་བོ་དེ་མཐུན་བསྒྲིལ་ཡིན་པས། ནམ་ཡང་ཐུགས་ནས་མ་བོར་རོགས།།
ཆིག་བསྒྲིལ།

དམངས་གཙོའི་འགན་དབང་མི་ཤེས་ཤིང་ལྟ་གྲུབ་མེད་པའི་འགོ་གཉིས་མ་རྒས་འཁོགས་གཞོན་ནུའི་མིང་ཅན་འདི་ཚོ་འོས་འཕེན་སར་ཞུགས་མ་ཞུགས་ལ་གཞོན་ནུ་ལ་དེ་ཙམ་ཁྱད་པར་མེད་ཀྱང་སོ་སོའི་ངོ་གདོང་ཕྱིར་བཏོན་པ་རེད།

རྟེན་འབྲེལ་ཞུ་ལོས་དགོས། ང་དང་ལངས་ཕྱོགས་མི་གཅིག་ཀྱང་བོད་རིགས་སྤུན་ཟླ་གཅིག་ལ། བོད་ཀྱི་མདུན་ལམ་བཤད་ཀྱི་ཡོད་ཙང་རྟེན་འབྲེལ་ཞུ་གདའ་ཞུ། ཡིན་ནའང། དེ་དང་མཉམ་དུ། ད་ཐེངས་ཚོགས་འདིའི་སྟེང་དབུས་རྒྱུན་རྙིང་པ་ཚོའི་ལས་ནོར་རེ་རེ་བཞིན་ཐེར་འདོན་དང། ལྷག་པར་དོན་གྲུབ་ལྷ་དར་གྱིས་གླེན་རྟགས་ཧམ་ཤེད་ཆེན་པོས་བོད་སྤྱི་ཚོགས་ནང་གཞོན་ནུའི་ཆེ་མཐོང་རྦད་དེ་མེད་པ་བཟོ་གྲབས་བྱས་པའི་ནག་ཉེས། ༧གོང་ས་མཆོག་ཐུགས་ཕམ་བྱུང་བའི་ནག་ཉེས། འཇམ་དབྱངས་ནོར་བུའི་རྒྱལ་ཡོངས་རང་བཙན་ལྷན་ཚོགས་ཟེར་བར་འབྲེལ་བ་གཏན་གཅོད་ཐུབ་པ་བཅས་ནི་ཧ་ཅང་གི་གྲུབ་འབྲས་རླབས་ཆེན་དག་རེད། དེ་བཞིན་ས་གནས་བརྒྱད་ནས་ས་གཞོན་ཚོགས་མི་དང་བཅས་པ་ཚོགས་ཁོངས་ནས་ཐོན་པ་དེའང་ཁོང་ཚོའི་རང་དབང་རེད། ཁོང་ཚོར་རྗེས་སུ་ཡི་རངས་ཡོད། ད་མ་འོངས་པར་དབུ་མའི་ལམ་དང་༧གོང་ས་མཆོག ཟམ་གདོང་རིན་པོ་ཆེ་བཅས་ལ་དོན་མེད་སྐྱོན་བརྗོད་མ་བྱས་པར། སོ་སོའི་ལས་ཀ་སོ་སོས་ལྷག་བསམ་རྣམ་དག མགོ་ཚོས་པ་བྱས་ཏེ་ལས་ན་དེས་འགྲིག་གི་རེད། ད་རྩིས་ཁྲ་རྩིས་ལེན་ཞིབ་ཚགས་ཡག་པོ་ཞིག་གནང་ནས་མི་མང་ལ་གསལ་བསྒྲགས་བྱེད་དགོས་རིགས་མ་ནོར་བ་གནང་རྒྱུ་གལ་ཆེན་རེད། དེ་ནས་ལས་མགོ་གསར་པ་འཛུགས་རོགས།།