གཟའ་སྤེན་པའི་ཉིན་གྱི་ཞོགས་པར་བོད་སྐྱོད་ཞི་བའི་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་ལགས་ཀ་ལོན་སྤུག་ནས་བོར་བརླག་ཕྱིན་འདུག
གླིང་ཚ་ཚེ་བརྟན་རྡོ་རྗེ་ལགས་ཀྱིས་དགོས་འདུན་དོན་ཚན་ ༥ ཡི་འོག ད་ལོའི་གསུམ་བཅུའི་དུས་དྲན་ཉིན་བཞུགས་སྒར་དྷ་རམ་ས་ལ་ནས་བོད་སྐྱོད་ཞི་བའི་གོམ་བགྲོད་ཐེངས་ ༢ པ་མགོ་འཛུགས་གནང་སྟེ་རྒྱ་གར་མངའ་སྡེ་ ༦ ཙམ་བརྒྱུད་ཉིན་གྲངས་ ༨༩ ཙམ་རིང་ཕྱིན་ཏེ། ཁྱོན་སྤྱི་ལེ་ ༢༡༤༨ ཙམ་གྱི་སར་གོམ་བགྲོད་གནང་རྗེས། ཟླ་འདིའི་ཕྱི་ཚེས་ ༨ ཉིན་གྱི་ཞོགས་པར། རྒྱ་གར་ནུབ་བྷིང་གྷིལ་(West Bengal)མངའ་སྡེའི་ཀ་ལོན་སྤུག་སྲད་རྒྱུད་གྲྭ་ཚང་ནས་རྐང་འཁོར་དང་ཅ་ལག་ཚང་མ་བཞག་སྟེ་གར་སོང་ཆ་མེད་ཆགས་ཡོད་འདུག
དེ་རིང་གསར་འགོད་པས་ཁ་པར་བརྒྱུད་ཀ་ལོན་སྤུག་སྲད་རྒྱུད་གྲྭ་ཚང་གི་འགན་འཛིན་ཟུར་བ་བསོད་ནམས་རྒྱལ་མཚན་ལགས་སུ་བཅར་འདྲི་ཞུས་དོན་ལྟར་ན། ཚེ་བརྟན་རྡོ་རྗེ་ལགས་སྲད་རྒྱུད་གྲྭ་ཚང་དུ་ཉིན་ ༢ རིང་གནས་ཚང་གཡར་ནས་བསྡད་པ་དང་། ཚེས་ ༨ ཉིན་གྱི་ཞོགས་པར་ཁོ་རང་གི་ཅ་དངོས་རིགས་ཤུལ་དུ་བཞག་སྟེ་གར་སོང་ཆ་མེད་ཆགས་ཡོད་པ་དང་། དེའི་རྗེས་རྒྱ་གར་ས་གནས་གསང་བའི་ལས་ཁུངས་ཀྱི་མི་སྣ་དགོན་པར་འབྱོར་ཏེ་འབྲེལ་ཡོད་ཚོར་ཚེ་བརྟན་རྡོ་རྗེ་སྐོར་ཐེངས་མང་འདྲི་རྩད་བྱས་སོང་ཟེར།
ཡང་ཁོང་ལ་ཁོ་བོར་བརླག་ཏུ་ཕྱིན་རྗེས་ཕན་ཚུན་འབྲེལ་བ་བྱུང་ཡོད་མེད་དྲིས་སྐབས། “ཁ་སང་ཕར་ཁ་པར་ཞིག་བརྒྱབ་སྐབས། ཁོ་རང་གིས་ད་ཧ་ཅང་ཡག་པོ་བྱུང་སོང་། དེ་རིང་ནས་ཁ་པར་སྒོ་རྒྱག་རྒྱུ་ཡིན། ས་མཚམས་སུ་བསླེབ་སྐབས་འབྲེལ་བ་བྱེད་ཆོག” ཅེས་བརྗོད་སོང་ཟེར།
བསོད་ནམས་རྒྱལ་མཚན་ལགས་ཀྱིས་ད་ལྟ་ཁོ་གང་དུ་ཡོད་མེད་གསལ་བོ་བཤད་ན་དཀའ་ངལ་འཕྲད་ངེས་རེད། སྤྱིར་བཏང་ཀ་ལོན་སྤུག་ནས་བོད་ཀྱི་ས་མཚམས་བར་དུ་སྤྱི་ལེ་ ༣༠ ཙམ་ལས་མེད་པ་དང་། བོད་ནང་འགྲོ་ས་མང་པོ་ཡོད་ཀྱང་འགག་སྒོ་ཚང་མ་དམག་མིའི་ལྟ་སྲུང་འོག་ཡོད་སྟབས། མངོན་གསལ་དོད་པོས་ཐར་ཐབས་ཡོད་པ་མ་རེད། འོན་ཀྱང་ཁོ་རང་ས་གནས་གང་ཞིག་ནས་བོད་ནང་འཛུལ་རྒྱུ་ཡིན་མིན་ངས་ཧ་གོ་མ་སོང་ཞེས་སོགས་བརྗོད་སོང་།
བདུན་ཕྲག་གཅིག་ཙམ་གྱི་གོང་དུ། གླིང་ཚ་ཚེ་བརྟན་རྡོ་རྗེ་ལགས་ཀྱིས་ཁོ་རང་གི་བོད་སྐྱོད་གོམ་བགྲོད་ཐེངས་ ༢ པའི་སྐོར་གྱི་གནས་ཚུལ་ཞིག་སྤེལ་ཡོད་པའི་ནང་། “ ད་ལྟའི་བར་དུ་འདུག་གནས་གཡར་ས་མང་ཤོས་ནི་ཧིན་རྡུའི་ལྷ་ཁང་དང་པན་རྗབ་ལྷ་ཁང་། དུར་ས། གྲོང་གསེབ། སྣུམ་ཚིགས། ས་སྟོང། ས་ཁང་གི་འགྲམ། གཞུང་ལམ་གྱི་ཟུར་སོགས་སྣ་མང་འགྲིམ་ཡང་། ངའི་ལུས་ཐོག་ལ་གས་ཆག་གང་ཡང་མ་ཤོར་བ་འདི་ནི། གཅིག། ༧རྒྱལ་བའི་དབང་བོའི་བྱིན་རླབས་དང་། གཉིས་པ། བོད་རིགས་སུ་ཞིག་གིས་ངའི་ཕྱོགས་སུ་རྣ་བ་གཏོད་མཁན་གྱི་སྤུན་ཟླ་དག་གིས་སེམས་ཀྱི་སྨོན་འདུན་དང་ལྷ་ཆོས་སྐྱོང་སྲུང་མའི་རོགས་རམ། གསུམ་པ། དྲིན་ཕ་མ་གཉིས་ཀྱིས་བློ་བསམ་དཀར་པོས་རང་གི་བུ་མི་རིགས་ཀྱི་བདེན་དོན་ལ་སྲི་ཞུ་བྱེད་པར་ཕུལ་བ། བཞི་པ། སྐྱེ་བོ་ཕལ་བ་ང་ལ་རང་མི་རིགས་ཀྱི་བདེན་དོན་དང་སྐྱབས་མགོན་རྒྱལ་བའི་དབང་བོ་བོད་དུ་གདན་འདྲེན་བྱེད་པར་སྲི་ཞུ་བྱེད་པའི་བསོད་ནམ་ཕྲན་པུ་ཞིག་ཡོད་པས་རེད་སྙམ། ལྔ་པ། རྒྱ་གར་གཞུང་དང་ཡུལ་མི། ཉེན་རྟོག་པ་བཅས་ཀྱི་རོགས་རམ་དང་ལྟ་རྟོག་འོག་ང་དེ་རིང་བར་དུ་ཞི་བའི་གོམ་བགྲོད་ལ་གས་ཆག་མ་ཤོར་བར་སྤྱི་ལེ་ ༢༡༤༨ དང་ཉིན་གྲངས་ ༨༩། མངའ་སྡེ་ ༦ ཙམ་སོང་ཚར་ནས་མི་རིང་བར་མངའ་སྡེ་བདུན་པ་ཞིག་བརྒྱུད་ནས་རང་ཡུལ་གངས་ཅན་ལྗོངས་སུ་རང་ལུས་འདི་འཕེན་ཐུབ་བྱེད་དགོས་པ་དེ་ཡིན། རང་ལུས་འདི་བོད་ཡུལ་ལ་སླེབས་ཉིན་ནས་ནམ་ཞིག་ང་རང་ལ་མཇུག་འབྲས་གསུམ་མ་གཏོགས་གང་ཡང་མེད་པ་རེད། གཅིག་གར་སོང་ཆ་མེད། གཉིས་སྡུག་གཅོང་མནར་གཅོད་ཁྲོད་ནས་ཤི་རྒྱུ་དང་། གསུམ་ལོ་ངོ་མི་ཉུང་བ་ཞིག་ལ་ཁྲིམས་བཅད་ཀྱིས་སྡུག་ལས་སྣ་དགུ་མྱངས་ནས་རྒྱའི་བཙོན་འོག་ནས་ལུས་རྒྱུ་དེ་ཡིན།” ཞེས་བྲིས་འདུག
གསལ་བསྒྲགས་དེའི་ནང་མུ་མཐུད་དུ་བཀོད་དོན། “ ལྡི་ལི་ནས་ཉིན་གྲངས་བཅུ་ལྷག་གི་རྗེས་སུ་ངྷ་སར་གནས་སྡོད། འཚོ་བ་རང་སྐྱོང་དང་མ་བྱན་གྱི་ཕྱག་ལས་གནང་མཁན་ཕོ་གསར་བཀྲ་ཤིས་དོན་འགྲུབ་ལགས་བདག་གི་ཞི་བའི་གོམ་བགྲོད་ནང་ཉིན་ ༡༥ ཏག་ཏག་ལ་མཉམ་ཞུགས་གནང་བ་དང་། དེའི་རྗེས་ང་རང་བྷེ་ཧར་མངའ་སྡེ་ནང་འབྱོར་རྗེས། ཆབ་སྲིད་བཙོན་ཟུར་སྐལ་བཟང་ཐར་ལགས་ཕེབས་ཏེ་རང་གིས་འཁྱོག་ཚད་ཅིག་ལ་ཕེབས་རྒྱུ་ཡིན་གསུངས་ཏེ་བདག་གི་ཞི་བའི་གོམ་བགྲོད་ནང་མཉམ་ཞུགས་བྱས་པ་དང་། ད་ལྟ་ཁོ་རང་དངོས་སུ་མཉམ་ཞུགས་གནང་ནས་ཉིན་ ༢༠ ལྷག་སོང་ཡོད་པ་རེད། ཁོང་ནི་བོད་ནང་དུ་བཙོན་ལས་སྣ་དགུའི་མནར་གཅོད་མྱངས་ཚར་བའི་མི་ཞིག་ཡིན་སྟབས། གཟུགས་པོའི་གནས་སྟངས་ཀྱང་ཧ་ཅང་སྐྱོ་ནའང་། དཔའ་ངར་ཞུམ་མེད་ཀྱི་རང་མི་རིགས་ལ་བཅིངས་པའི་སྙིང་སྟོབས་ནི་ཧ་ལས་པ་ཞིག་འདུག་པ་མ་ཟད། སེམས་ཀྱི་ངར་ཁ་ཡང་མ་ལྷོད་པར་ཁོང་གིས་ནམ་ཞིག་ང་རང་ཕྱིར་རང་གི་ཕ་ཡུལ་བོད་དུ་རོ་འཕེན་ངེས་ཡིན་གསུང་གིན་འདུག་ལ། ད་དུང་མཉམ་ཞུགས་མུ་མཐུད་གནང་གི་ཡོད། ”ཅེས་སོགས་བརྗོད་འདུག
ཁ་སང་ཕྱི་ཚེས་ ༩ དང་ས་ག་ཟླ་བའི་ཚེས་ ༣༠ ཉིན་གྱི་ཞོགས་པར་དྷ་ས་ཐེག་ཆེན་གཙུག་ལག་ཁང་གི་དཔའ་བོའི་དྲན་གསོའི་རྡོ་རིང་མདུན་དུ། གླིང་ཚ་ཚེ་བརྟན་རྡོ་རྗེ་ལགས་ཀྱི་ཨ་མ་ལྡོམ་པོ་སྐྱིད་ཀྱི་ཟླ་ ༡ རིང་གི་བོད་དོན་སྙུང་གནས་མཇུག་བསྡུས་ཏེ། ངྷ་སའི་ཚོགས་སྐྱིད་བཅུ་གཅིག་གི་མི་སྣས་སེམས་གསོ་དང་ཐུགས་རྗེ་ཆེ་ཞུའི་མཇལ་དར་བསྒྲོན་ཡོད་འདུག
ཚེ་བརྟན་རྡོ་རྗེ་བརླགས་ན། བརླག་དགོས་ཆོད་པར་ཤོག དཀོན་མཆོག་གསུམ་པོས་མཁྱེན། ལྷ་ཆོས་སྐྱོང་སྲུང་མས་སྲུངས་ཅིག་ཀྱེེ། གྲོགས་མཛོད་ཅིག་ཀྱེེེ། །
དཔའ་རྒོད་ལགས་་་་་ཁྱོད་གང་དུ་ཡོད།
མགོ་ནག་པའི་དཔའ་རྒོད་ལགས
དེ་རིང་ལྟས་ངན་འུག་པའི་ངུ་ངག་ཞིག་གིས
ཁྱོད་གར་སོང་ཆ་མེད་ལ་གྱུར་འདུག་ཟེར
སྐད་ཆ་དེས
ངའི་ཡ་ཆུང་སྙིང་ལ་གྲི་བཙུག་པ་ལྟར
བཟོད་དཀའ་བའི་ཚོར་སྣང་ཞིག་བྱིན
མུན་པས་བཀླུབས་པའི་འཇིག་རྟེན་འདི་ནས
ཁྱོད་ཀྱི་ནགས་ཁྲོད་འགྲིམས་ནས
སེང་ཕྲུག་་ཚོའི་ཚེ་སྲོག་དང་ལས་དབང་ལ་དམིགས
ཁྱོད་རང་ལ་དག་པའི་ཡོད་ཚད་བསྐྱུར་ནས
ཕ་ཡུལ་ལ་བློ་སེམས་ཕྱོགས་པའི་ཁྱོད
འདི་ལྟར་གོ་མེད་ཚོར་མེད་ངང་བརླགས་ཐལ
འཇིག་སུ་རུང་བའི་འཕྲང་ལམ་འདི་ནས
མགོ་ནག་པར་ཁྱོད་འདྲ་བའི་དཔའ་རྒོད་ཉུང་འདུག
སེམས་བསམ་པའི་དུང་བ་ཡོད་ཚད་ཁྱོད་ལ་ཕྱོགས་ནས
ངས་ཁྱོད་ཀྱི་ཚེ་སྲོག་ལ་བར་ཆད་མེད་པའི་སྨོན་ལམ་ཡོད
ངའི་སྙིང་ཉེ་བའི་འཐབ་གྲོགས་ལགས
ང་ནམ་ཡང་ཁྱོད་ཀྱི་རྒྱབ་ན་ཡོད
ཞུམ་མེད་ཀྱི་སྙིང་སྟོབས་རི་རྒྱལ་ལས་མཐོ་བའི་སེང་གེ་ངོ་མ
ཁྱོད་ཀྱི་རྐང་རྗེས་རེ་རེ་ལ་ངས་མིག་ཟུང་གི་གཅེར་ནས་ཡོད
ཁྱོད་ཀྱི་ཕུགས་བསམ་ནི་ངའི་ཕུགས་བསམ་ཡིན་ལ
མགོ་ནག་པ་ཡོད་ཚད་ཀྱི་ཕུགས་བསམ་ཀྱང་ཡིན
དེས་རྐྱེན་པས
ཁྱོད་འདི་ལྟར་ནམ་ཡང་བརླགས་མི་ཉེན
ཨ་སྒོར་ཡོ་སྒོར་གྱིས་བཟི་བའི་བཙན་བྱོལ་བ་ཚོར
ཁྱོད་ཀྱིས་མིག་དཔེ་བསྟན་པར་དད་གུས་དང་ཡི་རང་ཡོད
ངས་སྔོན་མ་ཁྱོད་ལ་འདི་འདྲ་ཞིག་བཤད་མྱོང
ཕེབས་དང་ཕེབས་དང
ནམ་ཞིག་ཁྱོད་ཀྱིས་རང་ཉིད་ཀྱི་ཕ་ས་མཐོང་ངེས
སྐད་ཆ་འདི་དེ་རིང་སྐྱར་དུ་ངས་ཁྱོད་ལ་བཤད་པ་ཡིན།། །།
འདི་ནི་དེ་རིང་ངས་གླིང་ཚ་ལ་བྲིས་པའི་སྙིང་གཏམ་ཡིན།
ཁྱེད་ཀྱི་སྐུ་ཚེ་ལ་་བར་ཆད་མེད་པའི་སྨོན་ལམ་ཡོད།
༄༅། །ལྟབ་ཡག བདེ་པོ་ཡོད་ན་ཡག་ཤོས་རེད། ལམ་ལྷོང་ཡོང་བའི་སྨོན་བདུན་ཞུ། བཀྲིས་བདེ་ལེགས༎
༄༅། །ཕུན་ཚོགས་ཆོས་རྒྱལ་ལགས། གཞོན་ལྷན་ནས་གླིང་ཚའི་ལས་འགུལ་ལ་ངོ་རྒོལ་གནང་དགོས་གཙོ་བོ་དེ་མཁྱེན་དགོས། དེ་ཡང་རྒྱ་དམར་གྱི་རྒྱ་དར་འཕྱར་བ་བརྟེན་གཞོན་ལྷན་ནས་ང་རྒོལ་གནང་བ་མ་གཏོགས་གཞན་གླིང་ཚ་གང་ཟག་སྒེར་ལ་ངོ་རྒོལ་མ་རེད། གླིང་ཚའི་ལས་འགུལ་གཉིས་པར་ཡང་རྒྱ་དར་གྱི་སྐོར་ལ་མང་ཚོགས་ནང་ལབ་གླེང་མང་དག་ཞིག་བྱུང་བའི་དབང་གིས་ཐེང་འདིར་རྒྱ་དར་དམར་པོ་མི་འཁྱེར་བའི་ཐག་གཅོད་ཐོག་མང་པོ་ཞིག་གིས་རྒྱབ་བསྐྱོར་གནང་གི་ཡོད་པ་རེད།
ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་སྐུ་གཟུགས་བདེ་ཐང་རེད་འདུག ཕྱ་ཚེས་10ཉིན་གྱི་ཞོགས་པའི་ཆུ་ཚོད་11སྟེང་གླིང་ཚ་ཚེ་རྡོར་ལགས་ཀྱིས་གྲོགས་པོ་ཞིག་ལ་ཁ་པར་སླེབས་ཏེ་ཁོང་གཉིས་བདེ་བོ་ཡིན་པ་དང་། བོད་ནང་དུ་འཛུལ་སའི་ལམ་ཁ་ཞིག་འཚོལ་བཞིན་ཡོད་ཚུལ་བརྗོད་འདུག ཁ་པར་སླེབས་རྗེས་སླར་ཡང་ཁ་པར་སྒོ་བརྒྱབ་ཡོད་འདུག
གཞོན་ནུ་ལྷན་ཚོགས་ཀྱིས་གླིང་ཚ་ཚེ་བརྟན་རྡོ་རྗེ་ཁེ་རྐྱང་དུ་ཕུལ་ཐབས་བྱས་པ་རེད་དེ། བདེན་པ་ལ་མཐའ་ཞིག་གསལ་རྒྱུ་ཡོད་པ་ལྟར། བོད་མི་སྤྱི་སྒེར་མང་པོས་ཁོང་གི་ལས་འགུལ་ལ་དངོས་ཤུགས་བརྒྱུད་གསུམ་ནས་རོགས་རམ་གནང་དང་གནང་བཞིན་ཡོད་པ་རེད། སྐབས་དེ་དུས་གཞོན་ནུའི་ཚོགས་གཞོན་དོན་གྲུབ་ལྷ་དར་གྱིས་གསར་འགོད་གསལ་བསྒྲགས་སྤེལ་ཏེ་གླིང་ཚའི་ལས་འགུལ་ལ་ངོ་རྒོལ་བྱས་ཏེ་ཁོ་རང་དམར་གསོད་གཏོང་རྩིས་བྱས་ཡོད་ལ། ཕ་མ་གཉིས་དང་བཟའ་ཚང་བུ་ཕྲུག་བཅས་པ་བློས་བཏང་གིས་བོད་དོན་ལ་ལས་འགུལ་སྤེལ་བ་ནག་གསུབ་གཏོང་རྒྱུའི་རེ་ངན་འཆང་ཡོད་ཀྱང་རྒྱ་ཆེའི་མང་ཚོགས་ཀྱིས་དཀར་ནག་གི་དབྱེ་བ་མ་ནོར་བར་ཁོང་ལ་མུ་མཐུད་དེ་རྒྱབ་དཔུང་བྱས་ཡོད།
བོད་རྒྱལ་ལོ། གླིང་ཚུ་བུ་རྒྱལ་ལོ།
བོད་སྐྱོད་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་ལགས་ཀྱི་གོམ་བགྲོད་ཐེངས་གཉིས་པའི་སྐབས་ཞལ་འདེབས་ཕུལ་བ་ཁག་ཁོ་རང་གིས་མ་སྐུལ་དང་བླངས་ཀྱིས་མི་དམངས་ལ་ཕྱི་གསལ་ནང་གསལ་བཟོས་ཏེ་ཁྱབ་བསྒྲགས་གནང་འདུག
ཡོ་པེའི་མངའ་སྡེ་ནང་གི་རྩྭ་མཆོག་གྲོང་དུ་འབྱོར་བ་དང་རྣམ་རྒྱལ་གྲྭ་ཚང་གི་མགྲོན་ཁང་ལས་འཁུར་བ་རྒན་ཐུབ་བསྟན་སྐལ་བཟང་ལགས་ཀྱིས་སྣེ་ལེན་གཟབ་རྒྱས་གནང་བ་མ་ཟད། རྣམ་རྒྱལ་གྲྭ་ཚང་གི་སྐུ་ཚབ་ཀྱི་མཚན་ཐོག་ནས་ཧིན་སྒོར་ 2500 གྱི་ཞལ་འདེབས་དང་། ངྷ་རམ་ས་ལའི་ཚོགས་པ་བཅུ་གཅིག་གི་སྐུ་ཚབ་དབུ་མའི་ལམ་ལས་འགུལ་ཁང་གི་རྨོག་རུ་བསྟན་པ་དང་ མངའ་རིའི་སྐྱིད་སྡུག་ཚོགས་པའི་ཚོགས་གཞོན་གྲགས་པ་བསམ་གཏན་གཉིས་ཡོ་པེ་མངའ་སྡེ་ནང་ཐུག་འཕྲད་དུང་ཡོང་སྟེ། ཚོགས་པ་བཅུ་གཅིག་གིས་གླིང་ཚ་ཚེ་བརྟན་རྡོ་རྗེ་ལགས་ཀྱི་ལས་འགལ་ལ་རྒྱབ་སྐྱོར་མཐའ་གཅིག་ཏུ་ཡོད་པའི་གྲོས་ཆོད་ཡི་གེ་དང་ཧིན་སྒོར་ 11000 གི་ཞལ་འདེབས་གནང་ཡོད་འདུག
གཞན། མི་སྒེར་བ་ཁག་ཅིག་གིས་ཞལ་འདེབས་ཕུལ་བ་དག་ནི།
མཛོ་དགེ་སྐལ་བཟང་སྦྱིན་པ། རྔ་བ་མཁས་གྲུབ། རྡོ་སྦིས་ཆོས་འཕེལ། སྨན་པ་འཇམ་དབྱངས། དོན་འགྲུབ། དམེ་བ་བསྟན་འཛིན། བླ་བྲང་སྦྱིན་པ། ཁ་ན་ཀྲར་གནས་བཞུགས་པ་ཐུན་མོང་ནས་ཧིན་སྒོར་ 13746 སྐུར་འབྱོར་བྱུང་།
རྒྱ་གར་བོད་དོན་རྒྱབ་སྐྱོར་བ་ཨན་ཀྲས་ཨ་ཤ་ནས་ཧིན་སྒོར་ 5000 གནང་།
རྩོམ་པ་པོ་ཧོར་གཙང་འཇིག་མེད་ཀྱིས་ཧིན་སྒོར་ 2000 སྐུར་འདུག
ལོན་ཌོན་གནས་བཞུགས་རྔ་བ་ཡོན་ཏན་ནས་ཧིན་སྒོར་ 8000 བསྐུར་འདུག
ནུབ་ཨ་རིའི་གནས་བཞུགས་པ་མགོ་ལོག་བརྕོན་འགྲུས་དཔལ་གཙོས་བའི་མགོ་ལོག་པ་ཁག་གཅིག་གིས་ཧིན་སྒོར་ 10000 སྐུར་འབྱོར་བྱུང་།
སྣེ་ལེན་ཁང་གི་མ་བྱན་སྐྱིད་འཛོམ་ནས་ཧིན་སྒོར་ 500 གནང་།
བོད་འབྱོར་བ་པ་སངས་ལགས་ནས་ཧིན་སྒོར་ 500 གནང་བཅས་འདིར་མཚན་མ་བཀོད་པ་རེ་ཟུང་དང་། ད་ལྟའི་བར་རིགས་ཀྱི་འདུ་ཤེས་ཀྱི་རྒྱབ་མདུན་གང་རུང་དུ་བཞུགས་པ་ཡོངས་ལ་སྙིང་ཐག་པ་ནས་བཀའ་དྲིན་ཆེ་ཞུ་ལགས།