བཙུན་མ་གཉིས་ཀློད་གྲོལ།

རྒྱ་ནག་གཞུང་གིས་ཁམས་དཀར་མཛེས་ཁུལ་དཀར་མཛེས་རྫོང་དགའ་ལྡན་ཆོས་གླིང་བཙུན་དགོན་གྱི་བཙུན་མ་གཉིས་སྔ་ཕྱིར་ཀློད་གྲོལ་བཏང་ཡོད་འདུག

ཕྱི་ལོ་ ༢༠༡༡ ལོའི་ཟླ་ ༦ པའི་ཚེས་ ༢༠ ཉིན་ཁམས་དཀར་མཛེས་ཁུལ་དཀར་མཛེས་རྫོང་དགའ་ལྡན་ཆོས་གླིང་བཙུན་དགོན་གྱི་བཙུན་མ་ཆོས་ཉིད་ལྷ་མོ་ལགས་ཀྱིས། དཀར་མཛེས་ཁུལ་ཐོག་ཏུ་ “ ༸གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས། “ཞེས་སོགས་ཞི་བའི་སྐད་འབོད་དང་ཡིག་ཆ་གཏོར་ཏེ་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་བྱེད་སྐབས། ས་གནས་ཉེན་རྟོག་པས་འཛིན་བཟུང་བཙན་འཁྲིད་བྱས་ཏེ། ཟླ་ ༣ རིང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་མེད་པ་མ་ཟད། ཕྱིས་སུ་ཁོང་ལ་ལོ་ ༣ གྱི་དུས་བཀག་བཙོན་འཇུག་གི་ཁྲིམས་ཐག་བཅད་དེ་སི་ཁྲོན་མེན་ཡཱང་དུ་ཡོད་པའི་བུད་མེད་ཀྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་ཀྱང་། ཟླ་འདིའི་ཕྱི་ཚེས་ ༡༩ ཉིན་གྱི་བོད་ནང་གི་ཞོགས་པའི་ཆུ་ཚོད་ ༩།༠༠ ཡས་མས་སུ་རྒྱ་ནག་གཞུང་གིས་ཁོང་གློ་བུར་བཙོན་གྲོལ་བཏང་ཡོད་འདུག

ཉེ་སྔོན་ནང་མི་ཉེ་འབྲེལ་ཚོས་འབྲེལ་ཡོད་ལས་ཁུངས་ལ་ཁོང་བཙོན་འཇུག་དུས་ཡུན་མ་རྫོགས་སྔོན་ལ་གཏོང་དགོས་པའི་རྒྱུ་རྐྱེན་དྲིས་སྐབས།  འབྲེལ་ཡོད་ལས་བྱེད་ཚོས་གོང་རིམ་གྱིས་མོ་གཏོང་དགོས་པའི་བཀོད་ཁྱབ་བཏང་ཡོད་ཚུལ་བརྗོད་འདུག

དེ་བཞིན། ཕྱི་ལོ་ ༢༠༡༡ ལོའི་ཟླ་ ༦ པའི་ཚེས་ ༡༨ ཉིན་དཀར་མཛེས་ཁུལ་དུ་ཞི་བའི་ངོ་རྒོལ་སྐབས། རྒྱ་ནག་གཞུང་གིས་འཛིན་བཟུང་བྱས་ཏེ་ལོ་ ༣ བཙོན་འཇུག་ཁྲིམས་ཐག་བཅད་ཡོད་པའི་དཀར་མཛེས་རྫོང་དགའ་ལྡན་ཆོས་གླིང་བཙུན་དགོན་གྱི་བཙུན་མ་བཀྲ་ཤིས་སྒྲོལ་དཀར་ལགས། ད་ལྟའི་བར་བཙོན་འཇུག་བཀག་ཉར་བྱས་ཏེ། ཟླ་འདིའི་ཕྱི་ཚེས་ ༡༩ ཉིན་བཙོན་གྲོལ་ཐོབ་ཡོད་འདུག

གནས་ཚུལ་ཤེས་རྟོགས་བྱུང་བ་ལྟར་ན། ༢༠༠༨ ལོར་བཙུན་མ་བཀྲ་ཤིས་སྒྲོལ་དཀར་ལགས་ཀྱི་ཕ་བཀྲ་ཤིས་དཔལ་ལྡན་ལགས་དཀར་མཛེས་ཁུལ་གྱི་ཞི་རྒོལ་སྐབས་རྒྱ་གཞུང་གིས་འཛིན་བཟུང་བྱས་ཏེ་ལོ་ ༣ གྱི་བཙོན་འཇུག་བྱས་ཡོད་འདུག་ལ། ཕྱིས་སུ་བཙུན་མ་ཁོང་བཙོན་ཁང་དུ་སྡོད་སྐབས་ཨ་མ་ལྷ་མོ་མཚོ་ལགས་འདས་གྲོངས་སུ་གྱུར་ཡོད་འདུག

གསར་འགོད་པ། དོན་གོ