ཆུང་ཚེ་རིང་།
༅༅།། ནུབ་ཕྱོགས་རྒྱལ་ཁབ་ཁག་གི་ནང་། བོད་མིའི་གྲངས་འབོར་ཉིན་རེ་བཞིན་འཕར་བཞིན་པ་དང་མཉམ་དུ། བཙན་བྱོལ་བོད་མིའི་སྤྱི་ཚོགས་ཀྱིས་གདོང་ལེན་བྱེད་དགོས་པའི་གནད་དོན་མང་པོ་འབྱུང་བཞིན་ཡོད། དེའི་ཁྲོད་ནས་གལ་འགངས་ཆེ་ཤོས་ཤིག་ནི། ནུབ་ཕྱོགས་རྒྱལ་ཁབ་ཁག་གི་ནང་འཚར་ལོངས་འབྱུང་བཞིན་པའི་བོད་ཕྲུག་ཚོའི་བོད་སྐད་བོད་ཡིག་དང་རིག་གཞུང་གི་གནས་སྟངས་དེ་རེད།
ནུབ་ཕྱོགས་ཡུལ་ཁག་ནང་། ཕ་མ་མང་ཆེ་བ་འཚོ་ཐབས་ཀྱི་ཆེད་དུ་ཧ་ལམ་ཉིན་ལྟར་ལས་ཀ་བྱེད་དགོས་པ་དང་། ཉེ་འཁོར་དུ་བོད་མིའི་སྤྱི་ཚོགས་གཞི་རྒྱ་ཆེན་པོ་མེད་པ། རྒྱུན་ལྡན་སློབ་གྲྭའི་སློབ་ཁྲིད་ཀྱི་སྐད་བརྡ་ཡོངས་རྫོགས་བོད་སྐད་མིན་པ། གློག་བརྙན་དང་ཚགས་པར། དུས་དེབ་སོགས་མང་ཆེ་བ་ཡུལ་དེ་དང་དེའི་སྐད་ནང་ཡིན་པ། ཕ་མ་མང་པོས་ཁྱིམ་ཚང་ནང་དུའང་བོད་སྐད་བོད་ཡིག་སྤྱོད་རྒྱུར་དོ་སྣང་མི་བྱེད་པ་སོགས་ཀྱི་རྒྱུ་རྐྱེན་དབང་གིས། བོད་ཕྲུག་མང་པོས་བོད་ཡིག་འབྲི་ཀློག་ཐུབ་རྒྱུ་ལྟ་ཅི་བོད་སྐད་ཀྱང་ཡག་པོ་ཞིག་བཤད་ཤེས་ཀྱི་མི་འདུག
སྤྱིར་བཏང་བོད་རིགས་སྤྱི་མཐུན་ཚོགས་པ་ཡོད་ས་མང་ཆེ་བར་གཟའ་འཁོར་མཇུག་གི་གུང་གསེང་(གཟའ་མཇུག་)དུ་སོགས་ལ་བོད་སྐད་ཡིག་གི་འཛིན་གྲྭ་ཟུར་དུ་འཚོགས་བཞིན་ཡོད་པ་དེས་ནུས་པ་ཆེན་པོ་འདོན་བཞིན་ཡོད་ཀྱང་། ད་དུང་བསམ་གཞིགས་བྱ་དགོས་པའི་གནད་དོན་ཁ་ཤས་འདུག་པ་རྣམས་གཤམ་དུ་མདོར་བསྡུས་སུ་ཞུ་གི་ཡིན།
༡) དམིགས་ཚད་གཏན་འཁེལ་དགོས་པ།
སྤྱིར་བཏང་སྐད་ཡིག་སློབ་ཁྲིད་བྱེད་སྐབས། སྐད་ཡིག་དེ་གོ་ཐུབ་པ་དང་། ཀློག་ཐུབ་པ། བཤད་ཐུབ་པ། འབྲི་ཐུབ་པ་བཅས་རྩ་བའི་དམིགས་ཚད་བཞི་རེད། རྒྱ་གར་དང་བོད་ནང་གི་བོད་ཕྲུག་ཚོར་སློབ་ཁྲིད་བྱེད་སྐབས། བོད་ཕྲུག་མང་ཆེ་བས་བོད་སྐད་གོ་ཐུབ་པ་དང་བཤད་ཐུབ་ཀྱི་ཡོད་སྟབས། བོད་ཡིག་ཀློག་ཐུབ་པ་དང་འབྲི་ཐུབ་པ་བྱ་རྒྱུ་དེ་བོད་ཡིག་སློབ་ཁྲིད་ཀྱི་དམིགས་ཚད་གཙོ་བོ་ཆགས་ཡོད།
འོན་ཀྱང་། ནུབ་ཕྱོགས་ཡུལ་གྲུ་ཁག་ཏུ་བོད་ཀྱི་སྐད་ཡིག་སློབ་ཁྲིད་བྱེད་དུས། གོང་གསལ་དམིགས་ཚད་བཟུང་ན་དངོས་ཡོད་ཀྱི་གནས་སྟངས་དང་འཚམས་ཀྱི་མེད་ཀྱང་། དགེ་རྒན་མང་ཆེ་བ་རྒྱ་གར་དང་བོད་ནང་ནས་སླེབས་པ་ཡིན་སྟབས། དམིགས་ཚད་དེ་རང་བཟུང་ནས་སློབ་ཁྲིད་བྱེད་ཀྱི་འདུག ང་རང་གི་ལྟ་སྟངས་ལྟར་ན། ནུབ་ཕྱོགས་ཡུལ་ཁག་ཏུ་བོད་ཀྱི་སྐད་ཡིག་སློབ་ཁྲིད་བྱེད་དུས། དམིགས་ཚད་གཙོ་བོ་ནི། བོད་སྐད་བཤད་ཐུབ་པ་དང་གོ་ཐུབ་པ། བོད་ཡིག་ཀློག་ཐུབ་པ་བཟོ་རྒྱུ་དེ་གཙོ་གནད་དང་། དེའི་སྟེང་འབྲི་ཐུབ་པ་བྱུང་ན་ཡག་ཤོས་རེད། དེ་མིན་བོད་སྐད་རྩ་བ་ནས་བཤད་མི་ཤེས་པའམ་ཡག་པོ་བཤད་མི་ཤེས་པའི་ནུབ་ཕྱོགས་ཡུལ་གྲུ་ཁག་གི་བོད་ཕྲུག་ཚོར། ཐོག་མ་ནས་སློབ་ཁྲིད་ཀྱི་དམིགས་ཚད་དེ་འབྲི་ཀློག་གཉིས་ཀྱི་སྒང་ལ་བཞག་སྟེ་སློབ་ཁྲིད་བྱས་ན། འབྲི་ཀློག་གཉིས་ཡག་པོ་མི་ཤེས་པ་མ་ཟད། བོད་སྐད་ཉན་བཤད་ཀྱང་མི་ཐུབ་པ་ཆགས་ཉེན་ཡོད།
༢) སློབ་ཁྲིད་ཀྱི་ཐབས་ལམ།
བོད་ཕྲུག་ཚོར་རང་གི་ཕ་སྐད་སློབ་ཁྲིད་བྱེད་སྟངས་ཐད། ཕ་སྐད་དེ་སྐད་ཡིག་དང་པོའི་ཚུལ་དུ་སློབ་པའམ། སྐད་ཡིག་གཉིས་པའི་ཚུལ་དུ་སློབ་པ་བཅས་ཐབས་ལམ་གཙོ་བོ་གཉིས་ཡོད། ནུབ་ཕྱོགས་ཡུལ་ཁག་ཏུ། ཐབས་ལམ་དེ་གཉིས་ལས་གང་ཞིག་འཛིན་དགོས་མིན་ཐད་ངོས་འཛིན་གསལ་པོ་མེད་སྟབས། བསླབ་ཡུལ་དང་སློབ་མཁན་གཉིས་ཀར་དཀའ་ངལ་འཕྲད་བཞིན་ཡོད། སྤྱིར་བཏང་རྒྱ་བལ་བོད་གསུམ་གང་རུང་དུ་བོད་ཀྱི་སྐད་ཡིག་སློབ་སྦྱོང་བྱས་ཏེ་ནུབ་ཕྱོགས་ཡུལ་ཁག་ཏུ་སླེབས་པའི་བོད་ཕྲུག་ཕུད། དེ་མིན་ནུབ་ཕྱོགས་ཡུལ་ཁག་གི་བོད་ཕྲུག་ཚོར། རང་གི་ཕ་སྐད་དེ་སྐད་ཡིག་དང་པོའི་ཚུལ་དུ་སློབ་ཁྲིད་བྱེད་པ་ལས། སྐད་ཡིག་གཉིས་པའི་ཚུལ་དུ་སློབ་ཁྲིད་བྱས་ན་ནུས་པ་ཆེ་བ་ཐོན་ཐུབ།
༣) དགེ་རྒན་དང་སློབ་དེབ།
བོད་ཀྱི་སྐད་ཡིག་དེ། སྐད་ཡིག་གཉིས་པའི་ཚུལ་དུ་སློབ་དགོས་ན། བསླབ་གཞིའི་སློབ་དེབ་སྒྲིག་སྟངས་དང་། དེ་ཉིད་སློབ་ཁྲིད་བྱེད་ཚུལ་གཉིས་ནི་གལ་འགངས་ཆེ་ཤོས་ཡིན་རུང་། ད་ལྟ་རང་སྐད་སྐད་ཡིག་གཉིས་པའི་ཚུལ་དུ་སློབ་ཁྲིད་བྱེད་སྟངས་ཀྱི་སློབ་དེབ་ཚད་ལྡན་གཅིག་ཀྱང་མེད་ལ། དགེ་རྒན་ཚོར་ཡང་སྐད་ཡིག་གཉིས་པའི་ཚུལ་དུ་སློབ་ཁྲིད་བྱེད་སྟངས་ཀྱི་སྦྱོང་བརྡར་ཐོབ་མེད།
༤) སྐད་ཡིག་མ་ཡིན་པའི་སློབ་ཚན།
ནུབ་ཕྱོགས་ཡུལ་ཁག་མང་པོའི་བོད་རིགས་སྤྱི་མཐུན་ཚོགས་པ་ཚོས། བོད་ཀྱི་སྐད་ཡིག་གི་འཛིན་གྲྭར་དོ་སྣང་བྱེད་པ་ལས། དེ་མིན་གྱི་ལས་རིམ་ཁག་ལ་དོ་སྣང་དེ་ཙམ་བྱེད་ཀྱི་མེད། ཕྲན་གྱི་བསམ་པར་གཟའ་མཇུག་གི་འདུ་འཛོམས་དེར། སྐད་ཡིག་སློབ་སྦྱོང་ཙམ་མ་ཡིན་པར། ད་དུང་བོད་ཀྱི་ཞབས་གཞས་རོལ་དབྱངས་དང་། ཞལ་འདོན། རྩེད་མོ་སོགས་བྱེད་སྒོ་སྣ་འཛོམས་བཀོད་སྒྲིག་བྱས་ཏེ། བོད་ཕྲུག་ནང་ཁུལ་ཕན་ཚུན་ངོ་ཤེས་དང་འབྲེལ་གཏུགས་ཀྱི་གོ་སྐབས་བསྐྲུན་དགོས་པར་མ་ཟད། བོད་ཀྱི་རིག་གཞུང་གི་ཁོར་ཡུག་ཅིག་གི་ནང་རྩ་ཆེའི་གཟའ་མཇུག་དེ་སྤྲོ་སྣང་ངང་སྐྱེལ་དུ་འཇུག་དགོས་པ་གལ་ཆེན་པོ་རེད་སྙམ།
༥) སྒྲིག་འཛུགས་ཀྱི་ལམ་སྟོན།
ནུབ་ཕྱོགས་ཡུལ་ཁག་མང་ཆེ་བའི་བོད་མིའི་སྤྱི་ཚོགས་ནང་། གཟའ་མཇུག་ཏུ་བོད་ཀྱི་སྐད་ཡིག་གི་འཛིན་གྲྭ་གཉེར་གྱི་ཡོད་ཀྱང་། དེ་དག་ས་གནས་སོ་སོས་གཉེར་བ་ཞིག་ལས། དབུས་བོད་མིའི་སྒྲིག་འཛུགས་ཀྱིས་ལམ་སྟོན་དང་བཀོད་འདོམས་འོག་གཉེར་བ་ཞིག་མ་རེད། དགེ་རྒན་མང་ཆེ་བར་མཚོན་ནའང་། བོད་ཀྱི་སྐད་ཡིག་གི་བྱང་ཚད་དང་ཉམས་མྱོང་ཡོད་པ་ཚོས། དང་བས་ཀུན་ནས་བླངས་ཏེ་སློབ་ཁྲིད་བྱེད་པ་ལས་གླ་ཕོགས་ཕུལ་ཏེ་བསྐོ་བཞག་བྱས་པ་མ་རེད། ས་གནས་ནས་རང་འགུལ་གྱིས་སྤེལ་བའི་འཛིན་གྲྭ་དེ་ཚོར་དགེ་མཚན་ཧ་ཅང་ཆེན་པོ་ཡོད་རུང་། འཛིན་གྲྭ་དེ་ཚོར་སྤྱོད་པའི་སློབ་དེབ་དང་སློབ་ཐབས། སྐད་ཡིག་མ་ཡིན་པའི་སློབ་ཚན་གཞན་དག་བཀོད་སྒྲིག་བྱེད་སྟངས་བཅས་པར། ཐེག་པ་རིམ་འཛེགས་ཀྱི་གོ་རིམ་མེད་པ་དང་། དངོས་ཡོད་གནས་ཚུལ་དང་མི་འཚམས་པ། དམིགས་ཚད་ངེས་གསལ་མེད་པ་སོགས་ཀྱི་ཞན་ཆ་སྣ་ཚོགས་ཡོད་པ་གོང་དུ་ཞུས་པ་ལྟར་ཡིན། དེར་བརྟེན། ད་ཆ་ས་གནས་ཀྱིས་གཉེར་བའི་ལས་དོན་འདིས་ཕན་ནུས་སྔར་ལྷག་ཐོན་ཆེད། དབུས་བོད་མིའི་སྒྲིག་འཛུགས་ཀྱི་ངོས་ནས་ཕྱོགས་ཡོངས་ཀྱི་གནས་ཚུལ་ལ་དཔྱད་ཞིབ་ཀྱིས་ལམ་སྟོན་དང་རྒྱབ་སྐྱོར་གནང་དགོས་པའི་དུས་ལ་ཐུག་འདུག། །།
བསྔགས་བརྗོད་ཡོད། དཔྱད་བརྗོད་འདི་འདྲ་དགོས་གཏུག་གི་ཕན་པ་ཅན་རེད་བསམ་མོ།།
སྐད་གཉིས་སྨྲ་བའི་ལོ་ཙཱ་བ་ཆེན་མོ་ཆུང་ཚེ་རིང་ལགས་ཀྱི་རྩོམ་ཡིག་ཁག་རེ་རེ་བཞིན་ཞིབ་ཚགས་ཀྱིས་ཀློག་གི་ཡོད། ཡིན་ནའང་བརྗོད་བྱའི་ཐད་ནས་མོས་མཐུན་བྱེད་ཐུབ་དང་མ་ཐུབ་ཡོང་གི་འདུག གོང་གི་རྩོམ་ཡིག་དེ་ལས་ཀྱང་སྒང་གི་ནུབ་ཕྱོགས་ཀྱི་བོད་ཕྲུག་ཚོས་བོད་ཡིག་བོད་སྐད་སློབ་སྐབས། འབྲི་ཀློག་ཉན་བཤད་བཞི་ལས་ཉན་བཤད་གཙོ་བོར་འཛིན་དགོས་ཀྱི་འདུག་ཟེར་བ་དེར་བསམ་ཚུལ་ཞུ་ཐུབ་མ་སོང་། ཡིན་ནའང་འོག་ཏུ་བོད་པའི་སྐད་ཡིག་དེ་སྐད་ཡིག་གཉིས་པའི་ཚུལ་དུ་སྦྱོང་དགོས་ཀྱི་འདུག་ཟེར་བ་དེ་ཕལ་ཆེར་ནུབ་ཕྱོགས་ཀྱི་བོད་པའི་ཕྲུ་གུ་བོད་སྐད་མགོ་འཚོས་ལ་མ་འཚོས་ལ་ཚང་མར་རང་བཞིན་གྱིས་སློབ་སྟངས་དེ་སྤྱོད་ཀྱི་ཡོད་པ་རེད་སྙམ། གང་ཡིན་ཟེར་ན་རྩ་བའི་སྐད་ཡིག་གང་ཞིག་བསླབ་དགོས་ན་སོ་སོའི་རྒྱུན་སྤྱོད་སྐད་དེ་བརྒྱུད་དེ་སྐད་ཡིག་གཉིས་པ་དེ་བསླབ་དགོས་པ་རེད་མ་གཏོགས་ཕ་རོལ་བོའི་དྲན་ངོས་ལ་འཇོག་སྟངས་ཡོད་པ་མ་རེད།
ཆུང་ཚེ་རིང་ལགས་ཀྱིས་དཔྱད་ཞིབ་གནང་བ་ཧ་ཅང་ཞིབ་ཚགས་དང་གོ་རིམ་ལྡན་པ་ཞིག་རེད། ཡིན་ནའང་བསྟན་དོན་གྱི་ཐད་ནས་ནུབ་ཕྱོགས་ཡུལ་ཁག་གི་བོད་ཕྲུག་ཚོར་བོད་པའི་སྐད་ཡིག་འཁྲིད་ཐབས་སྐོར་ལ་ཉན་བཤད་དང་། འབྲི་ཀློག་གཉིས་ལས་ཉན་བཤད་གཙོ་བོར་འཛིན་དགོས་ཀྱི་འདུག་ཟེར་བ་དེར་མོས་མཐུན་བྱེད་ཐུབ་མ་སོང་། གང་ཡིན་ཟེར་ན། བོད་སྐད་ཉན་བཤད་གོམས་ལོབས་སུ་འགྲོ་རྒྱུར་དུས་ཚོད་དང་ཁོར་ཡུག་ངེས་ཅན་ཞིག་དགོས་ཀྱི་ཡོད།
ཉན་བཤད་ཐབས་ཆག་ཅིག་ཤེས་པ་ཙམ་གྱིས་བེད་སྤྱོད་ཀྱི་རིན་ཐང་མི་ལྡན་པ་མ་ཟད། མུ་མཐུད་ཡར་རྒྱས་འགྲོ་རྒྱུར་ཡང་དཀའ་ལས་ཁག་པོ་ཆགས་ཡོད། གང་ཡིན་ཟེར་ན་ཁོར་ཡུག་གི་ཆ་ནས་དུས་རྒྱུན་ཨམ་ཆོག་ནང་བོད་སྐད་བཤད་མཁན་དང་། ལས་ཀ་བྱེད་ས་དང་ཡར་མར་འགྲོ་སའི་ཉིན་རེའི་འཚོ་བའི་ནང་བོད་སྐད་བཤད་ས་ཧ་ཅང་དཀོན་པོ་ཆགས་ཡོད་སྟབས། སྐད་ཡིག་གང་ཞིག་ཡིན་རུང་དེར་སློབ་སྦྱོང་ཡར་རྒྱས་སུ་འགྲོ་བར་ཁོར་ཡུག་ལ་འབྲེལ་བ་ཆེན་པོ་ཡོད་པ་དང་། ལྷག་པར་དུ་སྐད་དེ་ལ་ཁོར་ཡུག་བཟང་བོ་ཞིག་མེད་ན་སྐད་ཉན་བཤད་ཡག་པོ་ཞིག་ཡོང་རྒྱུ་ཕལ་ཆེར་མི་སྲིད་པ་ལྟ་བུ་རེད།
དེ་བས་འབྲི་ཀློག་ཕྲན་ཙམ་བསླབ་ཐུབ་པ་ཡིན་ན། ཁོར་ཡུག་གི་ཐོག་ནས་ཉིན་ལྟར་ཕར་བཤད་ས་དང་ཚུར་ཉན་ས་མ་རེག་ཀྱང་། རང་སྐྱོང་ལ་བརྟེན་ཏེ་ཡར་རྒྱས་ཚད་ངེས་ཅན་གཏོང་ཐུབ་པ་མ་ཟད། བོད་རིགས་དང་བོད་པའི་རྩ་དོན་ཐོག་དོ་སྣང་ཡོད་མཁན་ཞིག་ཡིན་ཚེ་བོད་ཡིག་ཕྲན་ཙམ་འབྲི་ཀློག་ཤེས་པ་དེར་བེད་སྤྱོད་ཀྱི་རིན་ཐང་ཡང་ཆེན་པོ་ལྡན་པ་མ་ཟད། བོད་པར་ལར་ཞེན་དང་སོ་སོར་སློབ་སྦྱོང་གི་བརྩོན་པ་ཡོད་ན་རང་སྦྱོང་ལ་བརྟེན་ཏེ་ཡར་རྒྱས་སུ་རིམ་པས་གཏོང་ཐུབ་པ་ཞིག་རེད།
རྩ་བའི་བོད་པ་ཚོས་རྒྱ་ཡིག་དང་དབྱིན་ཡིག ཧིན་རྡུ་སོགས་ལ་སློབ་སྦྱོང་བྱས་པའི་གནས་སྟངས་དང་ཁྱོན་ནས་མི་འདྲ། གང་ཡིན་ཟེར་ན། རྒྱ་གར་དང་ནུབ་ཕྱོགས་ཡུལ་ཁག་ནང་གི་བོད་མི་ཚོས་དབྱིན་ཡིག་སྦྱང་སྐབས་ཏན་ཏན་ཐོག་མ་ཉན་བཤད་དེ་གལ་ཆེན་པོ་ཆགས་ཀྱི་ཡོད་པ་རེད། དེ་གཅིག་ནས་སོ་སོའི་ལས་ཀ་དང་དགོས་མཁོའི་ཐད་ནས་གལ་ཆེན་པོ་ཆགས་ཀྱི་ཡོད་པ་རེད་ལ། གཉིས་ནས་ཁོར་ཡུག་གི་ཆ་ནས་ཕར་བཤད་དང་དང་ཚུར་ཉན་ས་ཚང་མ་དབྱིན་སྐད་ཡིན་དུས་ཡར་རྒྱས་འགྲོ་རྒྱུ་ཅུང་སླ་བོ་ཡོད་པ་རེད། འབྲི་ཀློག་སྔོན་ལ་སྦྱང་པ་ཡིན་ན་རྩ་བའི་ཡག་པོ་ཡོད་ཀྱང་ཡར་རྒྱས་ཀྱི་འགྲོས་ཧ་ཅང་དལ་མོ་ཆགས་ཀི་རེད།
༣) དགེ་རྒན་དང་སློབ་དེབ།
བོད་ཀྱི་སྐད་ཡིག་དེ། སྐད་ཡིག་གཉིས་པའི་ཚུལ་དུ་སློབ་དགོས་ན། བསླབ་གཞིའི་སློབ་དེབ་སྒྲིག་སྟངས་དང་། དེ་ཉིད་སློབ་ཁྲིད་བྱེད་ཚུལ་གཉིས་ནི་གལ་འགངས་ཆེ་ཤོས་ཡིན་རུང་། ད་ལྟ་རང་སྐད་སྐད་ཡིག་གཉིས་པའི་ཚུལ་དུ་སློབ་ཁྲིད་བྱེད་སྟངས་ཀྱི་སློབ་དེབ་ཚད་ལྡན་གཅིག་ཀྱང་མེད་ལ། དགེ་རྒན་ཚོར་ཡང་སྐད་ཡིག་གཉིས་པའི་ཚུལ་དུ་སློབ་ཁྲིད་བྱེད་སྟངས་ཀྱི་སྦྱོང་བརྡར་ཐོབ་མེད། ་་་་་