དེ་རིང་ཨ་རིའི་སྲིད་འཛིན་གཞོན་པ་ཇོར་བྷ་ཌན་རྒྱ་གར་ནང་འབྱོར་ཏེ་རྒྱ་གར་གྱི་སྲིད་བློན་དང་ཐུག་འཕྲད་ཀྱིས་རྒྱལ་ཁབ་གཉིས་བར་གྱི་ཚོང་འབྲེལ་དང་བདེ་སྲུང་སོཊ་ལ་གྲོས་བསྡུར་བྱེད་བཞིན་ཡོད་འདུག
དེ་རིང་ཕྱི་ཚེས་ ༢༢ ཉིན་གྱི་སྔ་དྲོར་ཨ་རིའི་སྲིད་འཛིན་གཞོན་པ་ཇོར་བྷ་ཌན་ ( Joe Biden) ལགས། རྒྱ་གར་གྱི་རྒྱལ་ས་ལྡི་ལིར་གཞུང་འབྲེལ་གཟིགས་སྐོར་དུ་འབྱོར་ཏེ་རྒྱ་གར་གྱི་སྲིད་བློན་མན་མོ་ཧན་སེན་མཆོག་དང་མཇལ་འཕྲད་ཀྱིས། རྒྱལ་ཁབ་གཉིས་བར་གྱི་དཔལ་འབྱོར་དང་སྲིད་དོན་འབྲེལ་ལམ་ཇེ་ཟབ་དུ་གཏོང་ཕྱོགས་སྐོར་ལ་གྲོས་མོལ་གནང་ཡོད་པ་དང་། སང་ཉིན་རྒྱལ་ཁབ་གཉིས་ཀྱི་ནུས་ཁུངས་དང་བདེ་སྲུང་འབྲེལ་ལམ། ཨེ་ཤ་ཡའི་མངའ་ཁུལ་གྱི་བདེ་སྲུང་མཉམ་ལས། གནམ་གཤིས་འགྱུར་ལྡོག་ལ་ཁ་གཏོད་བཅོག་ཐབས་བཅས་ཀྱི་སྐོར་ལ་གྲོས་མོལ་བྱ་རྒྱུ་ཡིན་འདུག
ཚེས་ ༢༤ དང་ ༢༥ བཅས་ཉིན་གཉིས་རིང་གྲོང་ཁྱེར་བྷིམ་བྷེ་( Mumbai) ནང་ཕེབས་ཏེ། རྒྱ་གར་གྱི་ཚོང་ལས་སྡེ་ཚན་ཁག་གི་མི་སྣར་ཐུག་འཕྲད་དང་དུས་རབས་ ༢༡ ནང་ཨ་རི་དང་རྒྱ་གར་གཉིས་ཀྱི་ཚོང་འབྲེལ་སྐོར་ལ་གཏམ་བཤད་སྤེལ་འཆར་ཡོད་འདུག
ཐེངས་འདིར་རྒྱལ་ཁབ་གཉིས་བར་ཨ་སྒོར་ཐེར་འབུམ་ ༡༠༠ ཙམ་གྱི་ཚོང་འབྲེལ་གན་རྒྱ་འཇོག་འཆར་ཡོད་ཀྱང་། ཨ་རིའི་གཞུང་གིས་རྒྱ་གར་ནང་མ་འོངས་པར་མཉམ་ལས་སྡེ་ཚན་མང་པོ་ཞིག་འཛུགས་ཐུབ་མིན་ཐོག་སེམས་ཁྲལ་བྱེད་བཞིན་ཡོད་འདུག དེ་སྔོན་སྲིད་འཛིན་བྷུ་ཤུའི་སྐབས་རྒྱལ་ཁབ་གཉིས་བར་ཉིང་རྡུལ་ཚོང་ལས་མགོ་ཚུགས་པར། ཨ་རིའི་གྲོས་ཚོགས་དང་རྡུལ་མཚོན་ལས་སྣོན་བྱེད་མཁན་རྒྱལ་ཁབ་ཁག་གིས་རྒྱབ་སྐྱོར་བྱས་ཡོད་ཀྱང་། རྒྱ་གར་གྲོས་ཚོགས་ཀྱིས་གྲོས་གཞི་དེར་རྒྱབ་སྐྱོར་ཐོབ་མེད་སྟབས་ཕྱིས་སུ་ལག་བསྟར་བྱེད་ཐུབ་མེད་པར་ལྷག་ཡོད།
ཨ་རིའི་དམག་དཔུང་གིས་ཨབ་གྷན་གཞུང་འཛིན་ཋ་ལེ་བྷན་( Taliban) ཚོགས་པ་མགོ་རྟིང་སློག་ཡོད་པ་དང་། ཨ་རིའི་དམག་དཔུང་ཨབ་གྷན་ནས་ཕྱིར་འཐེན་བྱས་ན་རྒྱ་གར་གཞུང་གིས་ཋ་ལེ་བྷན་ཚོགས་པའི་ཤུགས་རྐྱེན་ཨབ་གྷན་ནང་བསྐྱར་ལོག་རྒྱག་སྲིད་པའི་སེམས་ཁྲལ་བྱེད་ཀྱིན་ཡོད། ཋ་ལེ་བྷན་མགོ་རྟིང་སློག་རྗེས་རྒྱ་གར་གཞུང་གིས་ཨ་སྒོར་ཐེར་འབུམ་ ༢ ལྷག་ཨབ་གྷན་གཞུང་གསར་བར་རོགས་སྐྱོར་གནང་ཡོད་ཀྱང་། པ་ཀི་སི་ཐན་གཞུང་གིས་ཋ་ལེ་བྷན་ཚོགས་པ་བེད་སྦྱོད་བཏང་སྟེ་རྒྱ་གར་བདེ་སྲུང་ལ་འཇིགས་སྐུལ་བྱེད་སྲིད་པའི་དོགས་པ་བྱེད་བཞིན་ཡོད།
དེ་རིང་རྒྱ་གར་དུས་བབ་གསར་ཁང་གིས་ཨ་རིའི་སྲིད་འཛིན་གཞོན་པ་རྒྱ་གར་ལ་གཟིགས་སྐོར་དུ་མ་འབྱོར་སྔོན་དུ་བཅར་འདྲི་ཞིག་གི་ལན་དུ། “ རྒྱ་གར་གཞུང་གིས་ཨབ་གྷན་ནང་གི་སྤྱི་ཚོགས་བདེ་འཇགས་དང་དཔལ་འབྱོར་ཡར་རྒྱས་སོགས་ལ་རོགས་སྐྱོར་གནང་བ་དེར་ཨ་རིའི་གཞུང་གིས་མངོན་སུམ་འཛེམ་མེད་ཐོག་རྒྱབ་སྐྱོར་བྱེད་རྒྱུ་ཡིན་”ཞེས་བརྗོད་འདུག
ཁོང་གི་ཐེངས་འདིའི་གཟིགས་སྐོར་ནི་ལོ་ངོ་ ༣༠ ཨ་རིའི་སྲིད་གཞོན་པ་རྒྱ་གར་ནང་ཕེབས་པ་ཐོག་མ་དེ་ཆགས་ཡོད་འདུག རྒྱ་གར་གྱི་ལས་རིམ་གྲུབ་རྗེས་ཕྱི་ཚེས་ ༢༥ ཉིན་སིན་གྷ་པོར་བསྐྱོད་འཆར་ཡོད་པ་དང་། དེར་ཤར་ལྷོ་ཨེ་ཤ་ཡའི་མཚོ་གླིང་རྩོད་རྙོག་སྐོར་གྱི་གྲོས་མོལ་ཞིག་ཏུ་ཞུགས་རྒྱུ་ཡིན་འདུག
