མགྲོན་བརྡ་གསལ་བསྒྲགས།
དེ་ཡང་འཕགས་མཆོག་ཕྱག་ན་པདྨོའི་འདུལ་ཞིང་བསིལ་ལྡན་ཁ་བའི་ལྗོངས་སུ་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཞེས་ཡོངས་སུ་གྲགས་པའི་ཡ་གྱལ་མདོ་ཁམས་སྤོ་འབོར་སྒང་གི་རི་རྒྱུད་དགེ་བཅུ་གཡང་གིས་ཕྱུག་པའི་གནས་མཆོག ཨོ་རྒྱན་ཆེན་པོས་ཁམས་ཀྱི་སྲིང་མོ་རྫོང་གསུམ་གཏེར་ཀ་འདིཿ མི་བཞག་འདོན་པའི་རྟགས་དེར་བསྟན་ནས་བྱུངཿཁམས་པ་ཉི་མ་གྲགས་ཀྱི་མིང་ཅན་འབྱུངཿཞེས་ལུང་བསྟན་གྱི་དུས་རྟགས་མངོན་དུ་ཕུང་ནས་ཉམས་སུ་ལེན་གནས་ཆགས་རི་ཉི་གྲགས་དགོན་སྲིང་མོ་རྫོང་དེ་ཕྱག་བཏབ། ༸གོང་ས་ལྔ་པ་ཆེན་པོས་དགོན་པའི་མཚན་ལ་སྲིང་རྫོང་འོད་གསལ་སྒྲུབ་སྡེ་ཨོ་རྒྱན་དམ་ཆོས་གླིང་ཞེས་གནང། མཚན་དོན་མཐུན་པའི་སྒྲུབ་པའི་སྡེ་ཆེན་པོ་ད་ལྟའི་བར་དུ་ཡང་གནས། དེང་གི་ཆར་རྒྱ་གར་འཕགས་པའི་ཡུལ་དུ་འཛམ་གླིང་ཞི་བདེའི་དད་དཔོན་༸གོང་ས་ལྷ་མའི་རྣམ་འདྲེན་གྱི་དགོངས་གཞི་དང་མཐུན་པར། ཉི་གྲངས་ཀྱི་ཆོས་རྒྱུད་འཛིན་པ་ཤར་སྤྲུལ་དམ་ཆོས་རྒྱ་མཚོས་ཉི་གྲགས་ཀྱི་བསྟན་པ་ཉག་ཕྲ་བའི་དུས་འདིར་ལྷག་བསམ་ཐུགས་བསྐྱེད་བཟང་པོའི་གོ་ཆ་བགོས་ནས་ལོ་མང་རིང་དཀའ་ཚེགས་ཁྱད་བསད་ཀྱི་ཕྱག་ལས་གནང་བའི་གྲུབ་དོན། རྒྱ་གར་བྱང་ཕྱོགས་ཧི་མ་ཅར་ཅོན་ཏ་ར་ལ། chauntra distt Mandia Himachal Pradesh ༸གོང་ས་བཅུ་བཞི་པ་ཆེན་པོས་ཟབ་གསང་ཆོས་འཁོར་གླིང་ཞེས་མཚན་གསོལ་དང་འབྲེལ་བའི་ཆགས་རི་ཉི་གྲགས་དགོན་རྟེན་དང་བརྟེན་པར་བཅས་པ་ལེགས་པར་གྲུབ་ནས། བོད་རྒྱལ་ལོ་ ༢༡༤༠ རབ་བྱུང་ ༡༧ ཆུ་སྦྲུལ་ལོའི་སྨིན་ཟླའི་ཚེས་བཅུ། སྤྱི་ལོ་ ༢༠༡༣ ཟླ་ ༡༢ ཚེས་ ༡༢ ཨོ་རྒྱན་སངས་རྒྱས་གཉིས་པ་བོད་དུ་ཐོག་མར་ཞབས་ཀྱིས་བཅག་པའི་དུས་ཚེས་གཟའ་སྐར་འཕྲོད་སྦྱོར་དགེ་ཞིང་བཀྲ་ཤིས་པའི་དུས་ཆེན་ཉིན་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་སྒོ་དབྱེ་བྱེད་གཏན་ཁེལ་བས། བསྟན་པ་ལ་ལྷག་བསམ་ཅན་གྱི་མི་རིགས་རྣམས་དང། སྤྲུལ་པའི་གཏེར་ཆེན་འདི་ཉིད་ལ་དངོས་ཤུགས་རྒྱུད་གསུམ་གྱི་འབྲེལ་ཐོག་ཉེ་བའི་ཆོས་གྲོགས་ཀུན་དུས་སྐབས་དེར་ངེས་ཕེབས་ཡོངས་བའི་རེ་སྨོན་བཅས།
ཟབ་གསང་ཆོས་འཁོར་གླིང་གི་སྒོ་འབྱེད་གོ་སྒྲིགས་ཚོགས་ཆུང་གིས་གུས་ཕུལ།
