གཟའ་ཉི་མའི་ཉིན་ནས་བཟུང་ཨོ་སི་ཊོ་ལི་ཡ་དང་སུད་སི་གནས་སྡོད་བོད་མི་ཚོས་བློ་བཟང་དཀོན་མཆོག་ལགས་དང་། སྒྲོལ་མ་སྐྱབས་གཉིས་ཀྱི་ཆེད་སྲོག་སྐྱོབ་རེ་སྐུལ་གྱི་ལས་འགུལ་སྤེལ་ཡོད་འདུག
ཟླ་འདིའི་ཕྱི་ཚེས་ ༨ ཉིན་ཨོ་སི་ཊོ་ལི་ཡའི་རྒྱལ་ས་སི་ཌི་ནེའི་ (Sydney) གྲོང་ཁྱེར་གྱི་ཌི་ཝེ་རུ། མདོ་སྨད་སྤྱི་འཐུས་སྒྲོལ་དཀར་སྐྱབས་ལགས་དང་། ཨོ་གླིང་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་དགོ་ཚང་ནེ་རྒན། ནེའུ་ཁེ་སི་ཊེལ་ (Newcastle) བོད་རིགས་ཚོགས་གཙོ་མདའ་བཞིའི་ཕུན་ཚོགས་རྒྱ་མཚོ། སི་ཌེ་ནེ་བོད་རིགས་ཚོགས་པའི་དྲུང་ཆེ་ཡ་ལོ་ངག་དབང་ཆོས་འཕེལ། རིག་གཞུང་འགན་འཛིན་ཕུར་བུ་ཚེ་རིང། སི་ཌི་ནེ་བོད་ཀྱི་གཞོན་ནུའི་ཚོགས་གཙོ་བརྩོན་འགྲུས་འོད་ཟེར་བཅས་ཀྱིས། རྒྱ་ནག་གཞུང་གིས་བོད་ནང་མ་ཉེས་ཁག་གཡོག་གིས་སྡུག་སྦྱོང་མནར་གཅོད་གཏོང་བཞིན་པའི་བོད་མི་སྤྱི་དང་། དམིགས་བསལ་སྲོག་ཁྲིམས་ཀྱི་ཁྲིམས་ཐག་བཅད་ཡོད་པའི་གྲྭ་བློ་བཟང་དཀོན་མཆོག་ལགས་དང་། མི་སྐྱ་སྒྲོལ་མ་སྐྱབས་གཉིས་ལ་ཉེས་མེད་ཉེས་འགེལ་གྱིས་སྲོག་ཁྲིམས་བཅད་པའི་ཐད། རྒྱལ་སྤྱིའི་སྤྱི་ཚོགས་ལ་བོད་མི་ཁོང་གཉིས་ཀྱི་ཚེ་སྲོག་སྐྱོབ་དགོས་པའི་རེ་འབོད་ཀྱི་མཚན་རྟགས་བསྡུ་རུབ་དང་བོད་དོན་དྲིལ་བསྒྲགས་ཀྱི་ཡིག་ཆ་འགྲེམས་སྤེལ་སོགས་བྱས་ཡོད་འདུག
ཁ་སང་ཕྱི་ཚེས་ ༩ ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་འཚོག་བཞིན་པའི་སྐབས་དང་སྟབས་བསྟུན་ཏེ། སུད་སི་ཡོད་པའི་བོད་ཀྱི་མི་རབས་གསར་བའི་མཐུན་ཚོགས་ཀྱི་གོ་སྒྲིག་འོག བོད་མི་ ༥༠ ལྷག་ཇི་ནེ་ཝ་མཉམ་འབྲེལ་རྒྱལ་ཚོགས་མདུན་དུ་འཛོམས་ཏེ། རྒྱ་ནག་གཞུང་གིས་གྲྭ་བློ་བཟང་དཀོན་མཆོག་དང་། མི་སྐྱ་སྒྲོལ་མ་སྐྱབས་གཉིས་དྲང་བདེན་མིན་པའི་ཁྲིམས་ཐག་བཅད་པར་ངོ་རྒོལ་དང་། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་བོད་ཀྱི་འགྲོ་བ་མིའི་ཐོབ་ཐང་སྤྱི་དང་། དམིགས་བསལ་བོད་མི་ཁོང་གཉིས་ལ་རྒྱལ་སྤྱིའི་ཁྲིམས་དང་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ཀྱི་དགོངས་དོན་དང་མི་མཐུན་པའི་ཁྲིམས་ཆད་བཏང་བར། ལྷན་ཚོགས་ཀྱི་ངོས་ནས་དྲང་བདེན་གྱིས་ལན་འདེབས་བྱེད་དགོས་པ་དང་། ཉེས་མེད་བོད་མི་གཉིས་ཀྱི་ཚེ་སྲོག་སྐྱོབ་དགོས་པའི་འབོད་སྐུལ་གནང་ཡོད་འདུག
ལས་འགུལ་ཐོག་སུད་སི་དང་ལིཀ་ཏེན་སིཊ་ཡན་བོད་རིགས་མི་མང་གི་སྐུ་ཚབ་ངག་དབང་ཆོས་གྲགས་ལགས་ཀྱིས། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུའི་གནས་སྟངས་ངོ་སྤྲོད་བཀའ་སློབ་དང་། བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་དཔའ་བོ་ལགས་དང་། ཚོགས་གཞོན་མཁར་འཕགས་ལགས་བཅས་ཀྱི་ཐེངས་འདིའི་ལས་འགུལ་དང་འབྲེལ་བའི་གཏམ་བཤད་བཅས་གནང་ཡོད་པ་མ་ཟད། 
ཕྱི་ཚེས་ ༩ ནས་ ༢༧ བར་ཚོགས་བཞིན་པའི་རྒྱལ་ཚོགས་འགྲོ་བ་མིའི་ཐོབ་ཐང་གི་ཚོགས་འདུའི་ཐོག གོང་གསལ་ཚོགས་པ་ཁག་གིས་དང་པོ། རྒྱ་གཞུང་གིས་བོད་ས་བཙན་བཟུང་བྱས་པ་ནས་བོད་མི་ས་ཡ་གཅིག་ལྷག་དམར་གསོད་དང་། བོད་མིའི་ཆོས་དང་རིག་གཞུང་། ཁོར་ཡུག་བཅས་གཏོར་བཅོམ་བཏང་དང་གཏོང་བཞིན་པར་རྒྱལ་ཚོགས་ཀྱིས་གནོན་ཤུགས་སྤྲོད་རྒྱུ། གཉིས་པ། བོད་ནང་རང་ལུས་མེར་སྲེག་གནང་མཁན་བརྒྱ་དང་ཉི་ཤུ་ལྷག་བྱུང་བར་དྲང་བདེན་གྱི་ཉམས་ཞིབ་བྱ་རྒྱུ། གསུམ་པ། རང་ལུས་མེར་བསྲེཊ་ཀྱི་དོན་རྐྱེན་དང་འབྲེལ་ནས་གྲྭ་བློ་བཟང་དཀོན་མཆོག་དང་སྒྲོལ་མ་སྐྱབས་གཉིས་སྲོག་ཁྲིམས་བཅད་ཡོད་པ་མཚོན། རྒྱལ་གཅེས་དཔའ་བོ་དཔའ་མོ་རྣམས་ཀྱི་ནང་མིར་སུན་བཙེར་མནར་གཅོད་གཏོང་བཞིན་པར་གླེང་སློང་བྱ་དགོས་པའི་སྐོར་བཅས་དགོས་འདུན་དོན་ཚན་གསུམ་ཡོད་པའི་སྙན་ཞུ་ཞིག མཉམ་འབྲེལ་རྒྱལ་ཚོགས་ཆེས་མཐོའི་འགྲོ་བ་མིའི་ཐོབ་ཐང་ལས་ཁུངས་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཨེ་ཤ་ཡའི་སྡེ་ཚན་བཅས་སུ་ཕུལ་ཡོད་པ་མ་ཟད། དགོས་འདུན་དོན་ཚན་དེ་དག་དང་བོད་གནས་ཡིག་ཆ་ ༡༠༠༠ ལྷག་པར་བསྐྲུན་འགྲེམས་སྤེལ་བྱས་ཡོད་འདུག
དྲ་གྲོགས་ལགས་ཁྱེད་ཀྱིས་བཤད་པ་ཅིའི་མ་བདེན། གཞུང་མང་གཉིས་ཀྱི་ཐོག་ནས་ཤ་ཚ་དགོས་གཏུག་གི་ལས་འགུལ་སྣ་མང་སྤེལ་དགོས་ངེས་རེད། གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གིས་ཀྱང་ལས་འགུལ་དོན་ཕན་ལྡན་པ་ཞིག་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་གི་གནད་ཡོད་མི་སྣ་ཚོར་ད་ལྟའི་བོད་ནང་གི་གནས་བབ་དང་ཉེས་མེད་སྲོག་འཁྲིམས་བཅད་ཡོད་པའི་བོད་མི་དག་གང་མགྱོག་སྐྱོབ་ཐབས་བྱ་དགོས།
གཞུང་སྒེར་གྱི་ཆབ་སྲིད་རྣོ་ངར་ཚང་མ་འདི་འདྲའི་ལས་འགུལ་ནང་ལ་གཅིག་ཏུ་སྤུངས་དགོས་མི་འདུག་གམ། ལགས།