ཞལ་འདེབས་ཧིན་སྒོར་ ༤༨༧༣༤༣༢༥ ཙམ་འབྱོར་འདུག་ཟེར།

ཡུལ་ཤུལ་ས་ཡོམ་ཐད་བོད་ཕྱི་ལོགས་ནས་ཞལ་འདེབས་འབྱོར་བ་སྡོམ་ཧིན་སྒོར་ ༤༨༧༣༤༣༢༥ ཙམ་བྱུང་ཡོད་པ་དང་། དེ་དག་ལས་རྒྱ་སྒོར་ ༥༧༢༩༦༨༩ ཙམ་བོད་ནང་བཏང་ཡོད་ཅིང་། ད་ལྟ་ལྷག་ཡོད་པ་ཧིན་སྒོར་ ༣༢༠༡༨༦༧ ཙམ་ཡོད་ཟེར།

འདི་གར་གནས་ཚུལ་འབྱོར་བ་ལྟར་ན། རྒྱ་གར་དང་ཕྱི་རྒྱལ་ཁག་ཏུ་གནས་སྡོད་ཕ་ཡུལ་ཁམས་ཡུལ་ཤུལ་ནས་ཡིན་པའི་མི་སྣ་ ༡༩ ཙམ་ཞིག ཟླ་འདིའི་ཚེས་ ༡༣ ནས་ ༢༠ ཉིན་བར་གྱི་ཉིན་ ༨ རིང་། ངྷ་ས་བོད་ཀྱི་གསོལ་མགྲོན་ཁང་དུ་ཚོགས་འདུ་བསྐོངས་ཏེ། ༢༠༡༠ ལོའི་ཟླ་ ༤ ཚེས་ ༡༤ ཉིན་ཁམས་ཡུལ་ཤུལ་སྐྱེ་རྒུ་མདོར་ས་ཡོམ་བརྒྱབ་སྐབས། བཙན་བྱོལ་ནང་ནས་ཡུལ་ཤུལ་བ་སྐོར་ཞིག་གིས་༼༤།༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་༽ཞེས་པ་བཙུགས་ཏེ། འཛམ་གླིང་ཤར་ནུབ་ཀུན་གྱི་རྒྱ་ཆེའི་གཏོང་ཕོད་ཅན་རྣམས་ཀྱིས་ཞལ་འདེབས་བསྡུས་པའི་རྩིས་ཁྲའི་སྐོར་ལ་ཞིབ་འཇུག་གནང་ཡོད་པ་དང་། ཞིབ་འཇུག་གི་བརྒྱུད་རིམ་ཁྲོད་ས་ཡོམ་གདུང་སེལ་ཚོགས་ཆུང་གི་ཚོགས་མི་ཚོ་ཡང་མཉམ་ཞུགས་དྲི་བསྡུར་བརྒྱུད། མཐའ་མའི་རྩིས་ཁྲའི་གནས་སྟངས་སྐོར་ཡིག་ཐོག་ནས་འདི་གའི་གསར་ཁང་ལ་ཕུལ་འབྱོར་སོང་།  

ཡིག་ཐོག་གི་གནས་ཚུལ་ནང་འདི་ལྟར་བཀོད་འདུག ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་བོད་མདོ་ཁམས་སྐྱེ་རྒུ་མདོ་ལ་བོད་ཀྱི་ལོ་རྒྱུས་ཐོག་བྱུང་མྱོང་མེད་པའི་བསམ་ཡུལ་ལས་འདས་པའི་ས་ཡོམ་ཤུགས་ཆེན་རྒྱབ་པའི་རྐྱེན་ངན་གོད་ཆག་དབང་གིས་མི་གྲངས་ཁྲི་ཕྲག་བརྒལ་བར་རྐྱེན་འདས་དང་། རྨས་སྐྱོན་ཕོག་པ་གྲངས་ལས་འདས་པ་སོགས་མི་རྒྱུ་ཟོག་གསུམ་ལ་གནོད་སྐྱོན་ཚབས་ཆེན་བྱུང་སྐབས། ངྷ་སར་ཡུལ་ཤུལ་བ་འགའ་ཞིག་གིས་གསར་འཛུགས་བྱས་པའི་༼ ༤།༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ ༽ཞེས་པར་ལྷག་བསམ་དང་སྙིང་རྗེ་ལྡན་པའི་གཏོང་ཕོད་ཅན་གྱི་བོད་རིགས་གཙོ་བོར་གྱུར་བའི་འཛམ་གླིང་ཡུལ་གྲུ་གང་ས་ནས་དངུལ་འབོར་ཕོན་ཆེན་བྱུང་བ་རྣམས་ད་བར་ལོ་ངོ་གསུམ་ལྷག་ལ་ཚོགས་ཆུང་གིས་བོད་ནང་འཐུས་མི་ ༤ ཕེབས་ཐུབ་པ་མ་ཟད། སྔ་ཕྱིའི་ལས་དོན་མཐའ་དག་གང་འཚམ་སྒྲུབ་བཞིན་པའི་སྐབས་འདིར། སྤྱི་ཚོགས་ནང་གླེང་སློང་འདྲ་མིན་ཤུགས་ཆེན་བྱུང་དང་འབྱུང་བཞིན་པའི་རྐྱེན་གྱིས་རྒྱ་གར་དང་ཕྱི་རྒྱལ་ཁག་ནང་བཞུགས་པའི་ཡུལ་ཤུལ་བ་གནས་སྡོད་ས་གནས་མང་པོ་ནས་འཐུས་མི་ཁག་ཅིག་ངྷ་སར་ཆེད་བཅར་གྱིས་ཉིན་ ༨ རིང་ས་ཡོམ་གོད་ཆག་ཆེད་ཞལ་འདེབས་བྱུང་བ་དང་། བོད་ནང་དངོས་སུ་གཏོང་ཕྱོགས་སྐོར་སོགས་ཀྱི་ཐད། ལས་དོན་ཅི་བྱས་སོགས་ལ་ཉམས་ཞིབ་བྱས་ཡོད།

དོན་ཚན་དང་པོ། རོགས་དངུལ་བྱུང་བ་དང་སོང་བའི་སྐོར་ལ། རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ནས་བྱུང་བ་རགས་རྩིས་བྱས་པའི་སྡོམ་ཧིན་སྒོར་ ༤༨༧༣༤༣༢༥ (རྒྱ་སྒོར་ལ་བཀུག་ན་ ༦༦༧༥༩༣༥) ཙམ་ཡོད་པ་ལས་བོད་ནང་དངོས་སུ་གཏོང་ཐུབ་པ་རྒྱ་སྒོར་ ༥༧༢༩༦༨༩ ཙམ་ཡིན།

དོན་ཚན་གཉིས་པ།  གོད་ཆག་ཕོག་ཡུལ་ས་གནས་སུ་རོགས་དངུལ་གཏོང་ཕྱོགས་སྐོར་ལ། རྒྱ་སྒོར་ ༥༠༣༥༡༠༤ ཙམ་གནོད་འཚེ་ཕོག་ཡུལ་ས་ཁུལ་ཁག་ལ་བཏང་ཡོད་ཀྱང་། དེའི་ནང་ནས་རོགས་དངུལ་དང་ཅ་དངོས་སྤྲད་ཡོད་ཟེར་བ་འགའ་ཞིག་ལ། བྱུང་འཛིན་དང་ཁུངས་ཁ་གསལ་མེད་པར་ལྷག་འདུག གོད་ཆགས་ཚབས་ཆེན་མ་ཕོག་པའི་ས་ཁུལ་ཁྲི་འདུ་རྫོང་ཁོངས་སྡོམ་འདར་ཞིང་འབྲོག་སྡེ་ཁག་གཅིག་ལ་ཧིན་སྒོར་ ༣༦༥༩༨༥༥ (རྒྱ་སྒོར་ ༥༠༡༣༥༠) དང་། ནང་ཆེན་ས་ཁུལ་ཁག་གཅིག་ལ་ཧིན་སྒོར་ ༡༠༧༨༤༦༥ (རྒྱ་སྒོར་ ༡༤༧༧༣༥)། ཁྲི་འདུ་ཁ་སྔོན་གྲོང་སྡེ་མི་ཞིག་གིས་རྒྱུད་ནས་ཉམས་ཐག་ཁག་གཅིག་ལ་ཧིན་སྒོར་ ༧༣༠༠༠ (རྒྱ་སྒོར་ ༡༠༠༠༠)། དྭ་ཕྲུག་སློབ་གྲྭ་ཡིན་ཟེར་བ་ཞིག་ལ་ཧིན་སྒོར་ ༢༤༠༩༠༠ (རྒྱ་སྒོར་ ༣༣༠༠༠) ། གཞན། རྒྱ་སྒོར་ ༡༩༥༠༠༠༠ ལྷག་གོད་ཆགས་ཕོག་ཡུལ་མི་མང་ལ་མགྱོགས་མྱུར་སྤྲོད་བདེ་ཡོང་ཆེད་རྒྱ་སྒོར་ ༧༠༠༠༠ སྤྲད་ཡོད་ཟེར་བ་ལས་གསལ་ཁ་མ་བྱུང་།

དོན་ཚན་གསུམ་པ། རགས་རྩིས་བྱས་པའི་བྱུང་སོང་ལྷག་མ་ཧིན་སྒོར་ ༣༢༠༡༨༦༧ ཙམ་ཡོད། གོང་གསལ་གནས་ཚུལ་ཁག་ལ་ང་ཚོའི་འཐུས་མི་རྣམས་ཀྱིས་ད་དུང་ཞིབ་འཇུག་འཐིལ་ཕྱིན་མ་ཐུབ་ཀྱང་། མི་རིང་བར་ ༤།༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ནས་རྩིས་ཁྲ་གཙང་བཟོ་བྱེད་འཆར་འདུག་ན། སྐབས་དེར་རྩིས་ཞིབ་ཚོགས་ཆུང་ཟུར་འཛུགས་ཀྱིས་རོགས་དངུལ་ཁག་ལ་རྩིས་ཁྲ་ཞིབ་བཤེར་གནང་རོགས་ཞེས་འབོད་སྐུལ་ཞུ་བཞིན་ཡོད། ཅེས་ཡུལ་ཤུལ་བ་ས་གནས་འཐུས་མི་ཁག་ཅིག་ནས། ཞེས་སོགས་བཀོད་འདུག

འདི་གའི་གསར་ཁང་གིས་དེ་སྔོན། ཡུལ་ཤུལ་ས་ཡོམ་ཐད་མི་མང་གིས་ཞལ་འདེབས་གནང་བ་དང་། དངུལ་དེ་དག་ས་གནས་ལ་འབྱོར་ཡོད་མེད་ཐོག་ཐེངས་འགར་རྒྱུས་ལོན་བྱས་སྐབས། གདུང་སེལ་ཚོགས་ཆུང་གི་ཚོགས་མི་ཚོས་ངོ་སྤྲོད་གནང་བ་ལྟར་ན། ས་ཡོམ་ཐད་མི་མང་གི་ཞལ་འདེབས་འབྱོར་བའི་དངུལ་མང་ཆེ་བ་བོད་ནང་དངོས་སུ་གཏོང་ཐུབ་པ་བྱུང་ཡོད་པ་དང་། ད་ལྟ་དངུལ་གང་འཚམ་ཞིག་ལྷག་ཡོད་པ་ནི། ཕྱི་རྒྱལ་ཁག་ནས་ཞལ་འདེབས་ཕུལ་བ་དེ་དག་ཚུར་ལེན་རྒྱུར་དཀའ་ངལ་འཕྲད་ཀྱི་ཡོད་ཚུལ་བརྗོད་སོང་ལ། ཞལ་འདེབས་ཅི་ཙམ་འབྱོར་ཡོད་པའི་རྩིས་ཁྲ་དང་། བོད་ནང་གཏོང་ཕྱོགས་སོགས་ཀྱི་གནས་ཚུལ་ཆ་ཚང་བོད་མི་མང་སྤྱི་འཐུས་ལྷན་ཚོགས་ལ་སྙན་གསན་ཞུས་ཡོད་སྐོར་སོགས་བརྗོད་བྱུང་།

དེ་སྔ་བོད་མི་མང་སྤྱི་འཐུས་གྲོས་ཚོགས་ནང་འདིའི་སྐོར་ལ་གླེང་སློང་བྱུང་སྐབས། གྲོས་ཚོགས་ཚོགས་གཙོ་མཆོག་གིས་གནད་དོན་དེའི་སྐོར་ལ་སྤྱི་འཐུས་ཀྱིས་ཞིབ་འཇུག་བྱེད་ཀྱིན་ཡོད་པ་དང་། གདུང་སེལ་ཚོགས་ཆུང་གི་ཚོགས་མི་སྤྱི་འཐུས་རྒྱུན་ལས་ནང་སྐད་བཏང་སྟེ་སྐད་ཆ་བྱུང་ཡོད་སྐོར་སོགས་གསུངས་ཡོད།