རྒྱབ་སྐྱོར་ཚོགས་པས་ཉིན ༨ རིང་ཡུལ་ཤུལ་ས་ཡོམ་གདུང་སེལ་ཚོགས་ཆུང་གི་རོགས་སྐྱོབ་སྤྲད་སྟངས་ཐད་ཉམས་ཞིབ་བྱས་འབྲས་དོན་ཚན་གསུམ་ཅན་གྱི་གསར་འགོད་གསལ་བསྒྲགས་ནང་། གསལ་བཤད་བྱེད་སྟངས་ཐད་མི་མང་ནང་བློ་དྭོགས་སླེབས་སྲིད་པའི་གནད་དོན་ཞིག་ལ་གསལ་ཁ་ཞུ་རྒྱུ་ཡིན།
དོན་ཚན་གཉིས་པའི་ནང་། གནོད་འཚེ་ཕོགས་པའི་ས་ཁུལ་ཁག་ལ་བཏང་ཡོད་ཀྱང་དེའི་ནང་རོགས་དངུལ་དང་ཅ་དངོས་སྤྲད་ཡོད་ཟེར་བ་འགའ་ཞིག་ལ་བྱུང་འཛིན་དང་ཁུངས་ལྡན་ཁ་གསལ་མེད་པ་ལྷག་ཡོད་ཟེར་བའི་ཐད་ལ་གསལ་བཤད།
༡༽ ཅ་དངོས་རོགས་སྐྱོབས་སྤྲད་པའི་ཁུངས་ཇ་འཁོར་དྲུག་༣༦༥ རེ་རེའི་མ་གནས་རྒྱ་སྒོར་༦༥ དང་། འབྲས་སྤྱི་རྒྱ་༢༥ ཅན་གྱི་རྩ་ཁུག་༣༥༠ རེ་རེའི་མ་གནས་རྒྱ་སྒོར་༡༧༤ བཅས་གོང་ཁག་གཉིས་ཀྱི་ཅ་དངོས་ཉོས་འཛིན་ཚོགས་ཆུང་དུ་རག་མེད་ཀྱང་ཅ་དངོས་དེ་དག་མི་མང་ནང་འགོ་སྤྲོད་བྱས་ཏེ་མི་རེ་རེའི་ལག་ཏུ་སྤྲད་པའི་བརྙན་འཕྲིན་དང་མི་མང་སོ་སོར་རག་བྱུང་བའི་འཛུབ་ཐེལ་རྒྱབ་པའི་ཡིག་ཆ་དང་ང་ཚོའི་འབྲེལ་མཐུད་པ་ལ་ཐུགས་རྗེ་ཆེ་ཟེར་ཏེ་ཁ་བཏགས་གཡོག་སའི་བརྙན་འཕྲིན་ཡོད་ཀྱང་། དང་ཐོག་ཚོང་ཁང་ནས་ཅ་དངོས་ཉོས་པའི་བྱུང་འཛིན་རག་མེད་སྟབས་ཁ་གསལ་མེད་པའི་ཁོངས་སུ་བཞག་སོང་།
སྲིན་བལ་ཉལ་ཆས ༤༠༠ རེ་རེའི་མ་གནས་རྒྱ་སྒོར་༢༧༠ ཅན་གྱི་བྱུང་འཛིན་ཐོག་ཚོང་ཁང་གི་ཐེལ་རྩེ་འཁོད་མི་འདུག་ཟེར། ཉལ་ཆས་མི་མང་ནང་བགོ་སྤྲོད་བྱས་ཏེ་ཁྱིམ་ཚང་སོ་སོར་སྐལ་ཐོབ་འཁྱེར་བཞིན་པའི་བརྙན་འཕྲིན་དང་དོ་བདག་སོ་སོའི་རག་བྱུང་ཟེར་བའི་བྱུང་འཛིན་དང་མི་མང་ཚོས་ཐུགས་རྗེ་ཆེ་ཟེར་ཏེ་ང་ཚོའི་འབྲེལ་མཐུད་པར་ཁ་བཏགས་གཡོག་སའི་བརྙན་འཕྲིན་ཡོད་ཀྱང་ཅ་དངོས་ཉོས་འཛིན་ཐོག་ཚོང་ཁང་གི་ཐེལ་རྩེ་མེད་པའི་རྒྱུ་མཚན་ལ་ཁ་གཡར་ཏེ་ཁ་གསལ་མེད་པའི་ཁོངས་སུ་བཞག་སོང་།
༢༽ ཁྲི་འདུ་ཁ་སྔོན་གྲོང་སྡེའི་མི་ཞིག་རྒྱུད་ཉམས་ཐག་ཁག་ཅིག་ལ་རྒྱ་སྒོར་༡༠༠༠༠ སྤྲད་ཡོད་ཟེར་བའི་ཐད་གསལ་བཤད། ཚོགས་ཆུང་གི་མིང་གཞུང་ནང་འགོད་ནོར་གྱི་ཁྲི་འདུ་དགོན་པ་ཞིག་ལ་རྒྱ་སྒོར་༡༠༠༠༠ ཐམ་པ་སྤྲད་ཡོད་པ་འཁོད་འདུག བྱུང་འཛིན་ནང་མཁར་སྔོན་གྲོང་ཚོ་འཁོད་སྟབས། མིང་ཏག་ཏག་འཐུན་མིན་གྱི་ཁ་གསལ་མེད་པའི་ཁོངས་སུ་བཞག་སོང་།
༣༽ ཡང་རྒྱ་སྒོར་༡༩༥༠༠༠༠ལྷག་གོད་ཆགས་ཕོག་ཡུལ་མི་མང་ལ་མགྱོགས་མྱུར་སྤྲོད་བདེ་ཆེད་རྒྱ་སྒོར་ ༧༠༠༠༠ སྤྲོད་ཡོད་ཟེར་བ་ལས་ཁ་གསལ་མ་བྱུང་ཟེར་བའི་ཐད་གསལ་བཤད།
རྒྱ་ནག་གཞུང་གི་རྒྱུད་ནས་ཆོག་མཆན་ཐོབ་པའི་རོགས་དངུལ་ཁྲི་༡༩༥ ལྷག་ཙམ་དེ་ལོ་གཉིས་ལྷག་འགོར་བའི་རྗེས་སུའང་མི་མང་ལག་ཏུ་སྨིན་མ་ཐུབ་པའི་ཁར་ཟིང་ལིང་དངུལ་ཁང་ནས་རོགས་དངུལ་ཡུལ་ཤུལ་དུ་མ་བཏང་བར་རྒྱུང་རིང་འགོར་སྟབས་འབྲེལ་ཡོད་དཔོན་རིགས་ཁག་ཅིག་ལ་ལས་གཞི་དེ་མགྱོགས་མྱུར་ངང་འགྲུབ་ཆེད་ཚོགས་ཆུང་སྤྱི་མོས་ཐོག་རྔན་པ་སྤྲད་སྟབས་བྱུང་འཛིན་རག་རེ་མེད་པར་ཤེས་ཚོད་ལ་འབྲེལ་བཤད་ཞིབ་ཁྲ་དགོས་གལ་མ་མཐོང་།
༤༽ དྭ་ཕྲུག་སློབ་གྲྭ་ཟེར་བའི་ཞིག་ལ་རྒྱ་སྒོར་༣༣༠༠༠ ཐད་ལ་གསལ་བཤད། དྭ་ཕྲུག་སློབ་གྲ་དེའི་འགན་འཛིན་ག་གེ་མོ་སྔོན་མ་གྲྭ་པ་ཡིན་པ་ད་ཆ་བླ་མ་ཡིན་ཟེར་གྱི་ཡོད་རེད། མི་དེ་ཚད་ལྡན་ཞིག་མ་རེད་ཟེར་བའི་ཐད་ལ་ཚོགས་ཆུང་ངོས་ནས་མི་ཚད་ལྡན་ཡིན་མིན་ལ་འབྲེལ་བ་སྤུ་ཙམ་མེད། ༢༠༡༠ ལོར་ས་ཡོམ་གོད་ཆག་སྐབས་ཕ་མ་འདས་གྲོང་ཕྱིན་པའི་དྭ་ཕྲུག་བརྒྱ་ལྷག་ལ་བལྟ་རྟོགས་བྱེད་ཀྱི་ཡོད་སྟབས་ཚོགས་ཆུང་ངོས་ནས་ཕྲུ་གུ་རྣམས་ལ་གྱོན་ཆས་སྟོད་གོས་རེ་རེ་སྤྲད་པའི་པར་རིས་དང་ཉོས་འཛིན་ཁག་གསལ་པོ་ཡོད་ཀྱང་འགན་འཛིན་ག་གེ་མོ་མི་ཚད་ལྡན་ཡིན་མིན་ལ་ཐུག་སྟེ་ཁ་གསལ་མེད་པའི་ཁོངས་སུ་བཞག་སོང་།
རྒྱབ་སྐྱོར་ཚོགས་པའི་ནང་སྒ་པ་རྐྱང་པ་ལས་ཡུལ་ཤུལ་ཆ་ཚང་ངོ་ཚབ་མཚོན་ཐུབ་མེད་སྟབས། ནང་ཆེན་དང་སྡོམ་མདའ་གཉིས་ལ་སྤྲད་པ་དེ་འགྲིག་མེད་པ་དང་འོས་ཤིང་འཚམས་པ་མིན་པའི་ཐག་གཅོད་བྱས་ཡོད། ནང་ཆེན་དང་སྡོམ་མདའ་གཉིས་ལ་རོགས་སྐྱོབ་སྤྲད་པ་དེ་འགྲིག་ཡོད་མེད་ས་ཁུལ་དེ་གཉིས་ཀྱི་མི་སྣས་གསལ་བཤད་དགོས་གལ་མཐོང་།
མཐའ་དོན་ཚོགས་ཆུང་ངོས་ནས་བློ་ཕམ་ཆེན་པོའི་ཐོག་གསལ་བཤད་ཞུ་འདོད་པ་ཞིག་ལ། ད་ཐེང་ས་ཁུལ་འདྲ་མིན་ནས་སྒ་བ་མི་གྲངས་ ༡༩ ཅན་ཞིག་རྒྱབ་སྐྱོར་ཚོགས་པ་ཟེར་བའི་མིང་ཐོག་ནས་རྡ་རམ་ས་ལ་ཡུལ་ཤུལ་ས་ཡོམ་གདུང་སེལ་ཚོགས་ཆུང་དུ་བཅར་སྐབས། ཚོགས་ཆུང་གི་གནད་དོན་ཁག་མིག་སྟོན་མ་བྱས་གོང་འགན་འཁུར་དགོས་པའི་དམ་འབུལ་ཡིག་ཆ་ལ་འགན་འཁུར་ཐུབ་པའི་ས་རྟགས་བཀོད་ཡོད། རྒྱབ་སྐྱོར་ཚོགས་པའི་ཉིན་བརྒྱད་རིང་ཞིབ་འཇུག་བྱས་ཏེ། འཇུག་བསྡོམས་གསར་འགོད་གསལ་བསྒྲགས་ནང་། དོན་ཚན་གཉིས་པའི་ནང་ཁ་གསལ་མེད་པའི་གནད་དོན་ཁག་ཅིག་ལས་བརྒྱ་ཆ་དགུ་བཅུ་གོ་གྲངས་ཡག་པོ་བྱུང་འདུག་ཟེར་ཏེ་སྐད་གསང་མཐོན་པོའི་ཐོག་ནས་གསུང་པའི་ཚིག་དུམ་ཙམ་ཡང་མ་བཀོད་པར་མ་ཟད། དམ་འབུལ་ཡིག་ཆའི་འབྲུ་དོན་ལ་འགལ་ཏེ་དོན་གནད་ཁག་ཅིག་དམར་རྗེན་དུ་ཕུད་པ་དེ་ལ་བློ་ཕམ་ཆེན་པོ་ཡོད། ད་ཐེངས་རྒྱབ་སྐྱོར་ཚོགས་པའི་གསར་འགོད་གསལ་བསྒྲགས་ནང་གསལ་བཤད་བྱེད་སྟངས་ཐད་མི་མང་པོའི་གོ་བ་མི་འདྲ་བ་ལེན་གྱི་ཡོད་སྟབས། ཁ་གསལ་མེད་པའི་དོན་གནད་ཁག་ཅིག་ལ་གསལ་བཤད་དུ།
ཡུལ་ཤུལ་ས་ཡོམ་གདུང་སེལ་ཚོགས་ཆུང་ཐུན་མོང་ནས།
ཕྱི་ལོ་༢༠༡༣ ཟླ ༩ ཚེས ༢༥ ལ།
