རེས་གཟའ་ཉི་མ་ཉིན་རྒྱ་ནག་ཧུའུ་ནན་ཞིང་ཆེན་ཁྲིན་ཀྲུའུ་གྲོང་ཁྱེར་དུ་རྒྱ་གཞུང་གིས་ཁང་ས་བཙན་འཕྲོག་བྱེད་ཀྱིན་པར་ངོ་རྒོལ་བྱས་ཏེ་ཧི་མིན་ཆིན་ཟེར་བ་ཞིག་གིས་རང་ལུས་མེར་བསྲེགས་བཏང་འདུག
གཟའ་ཉི་མའི་ཉིན། རྒྱ་ནག་ཧུའུ་ནན་ཞིང་ཆེན་ཁྲིན་ཀྲུའུ་གྲོང་ཁྱེར་པེ་ལོའུ་ཐཱང་གྲོང་བརྡལ་གྱི་མགོ་ཁྲིད་དང་གྲོང་ཁྱེར་དོ་དམ་མི་སྣ། དེ་བཞིན་ཉེན་རྟོག་པ་སོགས་མི་གྲངས་ ༡༠༠ ལྷག་ཀྲུའུ་ཅང་ཆོ་གྲོང་ཚོར་ཡོང་སྟེ་བཙན་དབང་གིས་མི་མང་གི་སྡོད་ཁང་བཅུ་གྲངས་ཤིག་གཏོར་ཡོད་པ་དང་། སྐབས་དེར་གྲོང་མི་རང་ལོ་ ༤༢ ཡིན་པ་ཧི་མིན་ཆིན་གྱིས་རང་ལུས་ལ་རླངས་སྣུམ་བླུགས་ཏེ། ཁང་ས་བཙན་འཕྲོག་མཚམས་འཇོག་མ་བྱས་ཚེ་རང་ལུས་མེར་བསྲེགས་གཏོང་རྒྱུ་ཡིན་ལུགས་བརྗོད་ཡོད་ཀྱང་། སྲིད་གཞུང་གི་ལས་བྱེད་ཚོས་ཡ་ལན་གང་ཡང་མ་བྱས་སྟབས་ཁོས་རང་ལུས་མེར་བསྲེགས་བཏང་ཡོད་འདུག
ཧི་མིན་ཆིན་གྱི་ཚ་བོ་ཧི་ཡན་ཀྲུའུ་ཡིས་གསར་འགོད་པ་ཚོར་བརྗོད་དོན། “ ཧི་མིན་ཆིན་གྱི་གཟུགས་པོའི་བརྒྱ་ཆ་ ༦༠ ནས་ ༧༠ ཙམ་མེས་ཚིག་ཡོད་པས་མྱུར་སྐྱོབ་བྱེད་བཞིན་ཡོད་ཀྱང་། སྨན་པས་ཁོ་སྲོག་ཉེན་ལས་ཐར་རྒྱུ་དཀའ་མོ་ཡིན་ཚུལ་བརྗོད་སོང་། ཁོང་གིས་རང་ལུས་མེར་བསྲེགས་གཏོང་སྐབས་སྲིད་གཞུང་གི་ལས་བྱེད་ཚོས་ལྟད་མོ་བལྟས་ནས་བསྡད་སྟབས། ངས་ཡུལ་དངོས་ལ་པར་བརྒྱབ་པར་བརྟེན་ཉེན་རྟོག་པས་མངགས་གཏོང་ཁང་དུ་བཙན་འཁྲིད་བྱས་སོང་།”ཞེས་བརྗོད་འདུག
ཧི་མིན་ཆིན་ཚང་གི་ཁང་པའི་རྒྱ་ཁྱོན་ལ་རྨིད་གྲུ་བཞི་མ་ ༦༠༠ ལྷག་ཡོད་པ་དང་། ༢༠༠༨ ལོ་ནས་ས་གནས་སྲིད་གཞུང་གིས་རྒྱ་སྒོར་ཁྲི་ ༤༠ སྐྱིན་ཚབ་ཏུ་སྤྲད་དེ་ཁང་པ་གཏོར་རྒྱུ་ཡིན་ལུགས་ཀྱི་བརྡ་ཐོ་འབྱོར་ཡོད་ཀྱང་། ཁྲིན་ཀྲུའུ་གྲོང་ཁྱེར་གྱི་ཁང་སའི་རིན་གོང་ལྟར་ན་སྐྱིན་ཚབ་དེས་ལྔ་ཆའི་གཅིག་ཙམ་ལས་ཟིན་གྱི་མེད་སྟབས། ཧི་མིན་ཆིན་བཟའ་མི་གཉིས་ཀྱིས་སྲིད་གཞུང་གི་གཏན་འབེབས་དེར་མོས་མཐུན་བྱས་མེད།
བོད་རང་དབང་ཆེད་མེར་བསྲེག་པ་དང་རྒྱ་ནག་པ་རྒྱུ་ནོར་ཆེད་མེར་བསྲེག་པ་གཉིས་ནི་རྩ་བའི་མ་འདྲ་ས་རེད། ཡིན་ནའི། ཐུག་ས་དེ་རང་དབང་མེད་པར་ཐུག་ཡོད་པ་རེད། དེ་བས་རྒྱ་དམར་འོག་ཏུ་དཔལ་འབྱོར་གྱི་ཁེ་བཟང་ལེན་ཐུབ་པར་བསམ་བློ་གཏོང་མཁན་ཚོ་ནོར་ཚར་བ་རེད། དེ་ལས་རྒྱ་མི་ལ་གདུང་སེམས་མཉམ་བསྐྱེད་བྱེད་འོས་པ་རེད།
http://www.youtube.com/watch?v=PyVg7U-3Rng
རྒྱ་ནག་ནང་གི་རང་སྲེག་གི་དོན་རྐྱེན་གཞན་འདི་རིགས་ང་ཚོས་གསལ་བོ་ཧ་གོ་དགོས་པ་ཞིག་རེད། ཚང་མས་འདི་རིགས་ལ་གཟིགས་རོགས།
གདུང་སེམས་མཉམ་སྐྱེད་ཞུ། རྒྱ་ནང་ན་འདི་རིགས་ཧ་ཅང་མང་རབས་འདུག མི་དམངས་ངེས་པར་རྒྱལ་ངེས།