བན་བོན་གཞུང་གི་འཇིག་རྟེན་ཆགས་རབས་གླེང་བ།

ཝྭ་ཎཱར་མཐོ་སློབ་ནས་བན་བོན་གཞུང་གི་འཇིག་ རྟེན་ཆགས་རབས་ཐོག་འབུམ་རམས་པ་ཐོན་མཁན་བུ་མོ་བཟང་མོ་ལགས་སུ་ད་ལོའི་དམངས་ གཙོའི་དུས་དྲན་ཉིན་སྲིད་སྐྱོང་གཟེངས་རྟགས་ཐོབ་པ་དང་བསྟུན་ཏེ། འདི་གའི་གསར་འགོད་པས་ཁོ་མོའི་ཆེད་སྦྱོང་དང་འབྲེལ་བའི་ཡིག་ཐོག་གི་བཅར་འདྲི་ཞུས་ཡོད།

        དྲི་བ། ཐོག་མར་ཁྱེད་རང་གི་སློབ་སྦྱོང་གི་བརྒྱུད་རིམ་སོཊ་ངོ་སྤྲོད་ཅིག་གནང་རོཊ།

        ལན། ང་རང་འཛིན་གྲྭ་དང་པོ་ནས་བརྒྱད་པའི་བར་བོན་གཞིས་ཉིན་སློབ་(C.S.T Dolanji)ཏུ་ཕྱིན་པ་དང་། དེའི་རྗེས་ཝྭ་ཎཱ་ཆེས་མཐོའི་གཙུག་ལག་སློབ་གཉེར་ཁང་དུ་འཛུལ་བཞུགས་བྱས་ཏེ་གནའ་བོའི་ཞང་བོད་རིག་གནས་དང་ནང་དོན་རིག་པ། རྒྱལ་རབས་ལོ་རྒྱུས།  དབྱིན་བོད་སྐད་ཡིག་བཅས་ཀྱི་ཐོག་སློབ་སྦྱོང་བྱས་ཏེ་ ༢༠༠༥ ལོར་བསྟན་བཅོས་ (Shastri) དང་། ༢༠༠༧ ལོར་སློབ་དཔོན་ (Acharya) ཐོན་པ་རེད། བོན་ཆོས་ཀྱི་གཞུང་ལུགས་ཐོག་མུ་མཐུད་སློབ་སྦྱོང་དང་ཞིབ་འཇུག་བྱས་ཏེ་ ༢༠༠༩ ལོར་ཁྱད་འཕགས་སློབ་དཔོན་ནམ་ (M.Phil) དང་། ༢༠༡༣ ལོར་རིག་པའི་ཆུ་གཏེར་རམ་(Ph.D)ཞེས་པའི་གནས་རིམ་ཐོན་པ་ཡིན། ཁྱད་འཕགས་སློབ་དཔོན་གྱི་ཆེད་རྩོམ་ནི་༼ བན་བོན་གཉིས་ཀྱི་བཙུན་མའི་སྡོམ་རྒྱུན་དང་འབྲེལ་བའི་དཔྱད་རྩོམ་མེ་ལོང་མ་(The lineage of Bhikshuni ordination in the Bon and Buddhist tradition of Tibet )༽ ཞེས་པ་དང་། རིག་པའི་ཆུ་གཏེར་སློབ་ཐོན་གྱི་ཆེད་རྩོམ་༼ བན་བོན་གཉིས་ཀྱི་འཇིག་རྟེན་ཆགས་རབས་ཀྱི་ལམ་ལུགས་དང་བརྒྱུད་སོགས་ལ་དཔྱད་པ༽ ཞེས་པ་བྲིས་ཡོད། གཞན། ང་རང་གིས་བོད་ཕྱི་ནང་གི་དུས་དེབ་དང་དྲ་རྒྱ་མང་པོའི་ཐོག་གཟི་གཡང་ཟེར་བའི་སྨྱུག་མིང་འོག་དཔྱད་རྩོམ་མང་པོ་ཞིག་སྤེལ་མྱོང་ཡོད་ལ། ༢༠༡༡ ལོར་བསྟུན་མར་ལོ་གཉིས་རིང་(Jawaharlal Nehru Memorial Fund)ཡི་(Scholarship for Doctorate study)གྱི་སློབ་ཡོན་གྱི་གོ་སྐབས་ཐོབ་སོང་།

        དྲི་བ། ཁྱེད་རང་བན་བོན་གཞུང་གི་འཇིག་རྟེན་ཆཊ་རབས་ཐོག་དོ་སྣང་ཇི་ལྟར་བསླེབས་པ་དང་ཆེད་སྦྱོང་གི་བརྒྱུད་རིམ་ཁྲོད་དཀའ་ངལ་ག་རེ་འཕྲད་སོང་།

        ལན། སྤྱིར་བཏང་བན་བོན་སྣོད་བཅུད་ཀྱི་འགྲེལ་ཚུལ་ཕན་ཚུན་དཔེ་བཤུས་བྱས་པ་རེད་ཅེས་པའི་གསུང་སྟངས་སྣ་ཚོགས་ཤིག་ཡོད་པ་རེད་ལ། དེ་ལྟར་གསུངས་པར་ཐུགས་ཁག་ཀྱང་མི་འདུག  ད་ལྟ་དངོས་སུ་མཇལ་རྒྱུ་ཡོད་པའི་བོན་གྱི་༼མཛོད་གཞུང་༽དང་།༼ཆོས་མངོན་པའི་གཞུང་༽ནང་། འཇིག་རྟེན་བསྟན་པའི་དུམ་ཚན་རྣམས་ཕན་ཚུན་ཁ་བསྒྲིགས་པ་ལྟར་ཡོད་སྟབས། དོགས་གཞི་བསླེབས་པ་ནི་རང་བཞིན་ཞིག་རེད། མཛོད་གཞུང་དེ་དག་གི་མཛད་པ་པོ་ཕན་ཚུན་བར་དངོས་ཤུགས་བརྒྱུད་གསུམ་ནས་འབྲེལ་ལམ་ཆགས་ཡོད་མེད་ལ་དཔྱད་ཞིབ་དགོས་པ་ཤིན་ཏུ་གལ་ཆེན་པོ་རེད་བསམ་གྱི་འདུག དཔྱད་ཞིབ་བྱེད་པར་མཛོད་གཞུང་གི་སློབ་དཔོན་དེ་དག་གི་བྱུང་རབས་དང་མཛོད་རྩོམ་ཚུལ་སོགས་ཀྱི་སྐོར་ལ་ཞིབ་ཚགས་པོས་འཚོལ་ཞིབ་གནང་དགོས་པ་དེ་བས་ཀྱང་གལ་ཆེན་པོ་རེད། སྤྱིར་ང་རང་གིས་བན་བོན་གཞུང་ནང་གསལ་བའི་འཇིག་རྟེན་ཆགས་རབས་བར་གྱི་དཔྱད་པ་གཏོང་སྐབས། གྲུབ་མཐའི་ཕྱོགས་ཞེན་གྱི་དབང་དུ་མ་སོང་བར་བློ་གཟུ་བོའི་ཐོག་ནས་དཔྱད་པ་བྱས་པའི་ཁུལ་ཡིན།  

        རྗེ་རྒྱལ་བ་མཉམ་མེད་ཆེན་པོས་༼རྣམ་འབྱེད་འཕྲུལ་གྱི་སྒྲོན་མེའི་རང་འགྲེལ་༽ལས། རང་ལྟ་ལ་མི་ཆགས། གཞན་ལྟ་ལ་མི་སྡང་བའི་སྒོ་ནས་གྲུབ་མཐའི་རྣམ་གཞག་འབྱེད་པ་ནི་ཤེས་རབ་བསྐྱེད་པའི་རྒྱུ་དང་། དག་སྣང་སྦྱོང་བའི་ཐབས་ཁྱད་པར་ཅན་ཡིན་པས་དམ་པའི་ལུགས་སུ་འདོད་དོ།། ཞེས་གསུངས་པ་ལྟར། སྔར་ནས་བན་བོན་གྱི་ཕྱི་སྣོད་ཆགས་ཚུལ་གྱི་སྐོར་ལ་བསམ་ཚུལ་སྣ་ཚོགས་པ་ཞིག་ཡོད་པ་འདི་དག བན་བོན་སོ་སོའི་གཞུང་ལུགས་དང་འབྲེལ་ནས་མ་རྟོགས་པ་དང་ལོག་པར་རྟོགས་པ། ཐེ་ཚོམ་གྱི་ཆ་རྣམས་བསལ་ཏེ་གཞུང་དེ་དག་གི་དགོངས་དོན་རྣམས་འགལ་མེད་དུ་རྟོགས་པ་སོགས་ཀྱི་ཆེད་དུ་ཡིན། ཞིབ་འཇུག་གི་བརྒྱུད་རིམ་ཁྲོད་དཀའ་ངལ་དམིགས་བསལ་གང་ཡང་འཕྲད་མ་སོང་།

        དྲི་བ། བན་བོན་གཞུང་གི་འཇིག་རྟེན་ཆགས་རབས་ལ་གསུང་ཚུལ་མི་འདྲ་བ་གང་དག་མཐོང་སོང་།

        ལན། བོན་གྱི་གཞུང་དུ་གྲོལ་ལམ་སེམས་ཕྱོགས་དང་བསྒྱུར་ལམ་སྔགས་སྤང་ལམ་མདོ་བཅས་ཀྱི་གཞུང་ཆེན་ཁག་སོ་སོའི་ཐུན་མོང་མ་ཡིན་པའི་འཇིག་རྟེན་ཆགས་རབས་ལ་བཤད་ཚུལ་མི་འདྲ་བ་ཡོད་པ་རེད། བོན་ལུགས་ཀྱི་འཇིག་རྟེན་ཆགས་རབས་ཀྱི་གླེང་ཕྱོགས་ལ།  ཕྲ་རྡུལ་ལས་བརྩམས་ཏེ་ཕྱི་སྣོད་ཀྱི་སྲིད་པ་རིམ་ཆགས་སུ་བྱུང་བའི་ལུགས་དང་། མངོན་རྫོགས་ཁྲི་ཁུགས་ཀྱི་ངད་པ་ལས་བྱུང་བའི་འཇིག་རྟེན་གྱི་བཀོད་པ་གྲུབ་པའི་ལུགས། གཞི་རྩལ་ཟུང་འཇུག་གི་རྩལ་ལས་ཕྱི་སྣོད་ཀྱི་སྣང་ཆ་གྲུབ་པའི་ལུགས་བཅས་ལུགས་མི་འདྲ་བ་གསུམ་དུ་བསྡུས་ཡོད། ལུགས་དང་པོའི་བཤད་སྲོལ་དེ་མདོ་ལུགས་ཀྱི་རྒྱུ་མཐུན་གྱི་རིམ་པ་དེ་རེད། ལུགས་གཉིས་པའི་བཤད་ཕྱོགས་དེ་སྔགས་ལུགས་ཀྱི་བྱེད་བྱས་ཀྱི་རིམ་པའི་ཁོངས་སུ་བསྡུ་བ་རེད། ལུགས་གསུམ་པ་དེ་སེམས་ཕྱོགས་ཀྱི་ཡེ་སྲིད་གཞི་དབྱིངས་ལས་འཕྲོས་པའི་གསུངས་སྲོལ་རྣལ་མ་ཞིག་རེད། མདོར་བསྡུས་ན་གོང་གི་སྡོམ་ཚིག་ཚན་པ་གསུམ་དེའི་ནང་དུ་མ་འདུས་པ་གང་ཡང་མེད་ཅེས་ཤོད་ཀྱི་ཡོད་པ་རེད། དུས་འཁོར་གཞུང་ལས། དུས་ཀྱི་སྟོང་པ་རྣམས་ལས་རླུང་དང་མེ་དང་ཆུ་དང་ས་དང་གླིང་དང་རི་དང་རྒྱ་མཚོ་རྣམས་དང་། ཉི་ཟླ་གཟའ་སྐར་གྱི་ཚོགས་དང་དྲང་སྲོང་ལྷ་དང་འབྱུང་པོ་ཀླུ་རྣམས་དང་། བྱོལ་སོང་སྐྱེ་གནས་རྣམ་བཞི་རྣམ་པ་སྣ་ཚོགས་ས་དང་ས་འོག་དག་ལ་མི་དང་དམྱལ་བ་དང་། ཆུ་ལས་ཚྭ་བྱུང་བ་བཞིན་དུ་སྒོ་ང་ལས་ཀྱང་ཡིན་ཏེ་སྟོང་པ་ལས་ནི་འབྱུང་བ་ཉིད་རྣམས་བསྐྱོད་པ་སོགས་གསུངས། དུས་འཁོར་གཞུང་ནས་བསྟན་པའི་རི་རབ་གླིང་ཕྲན་དག་གི་དབྱིབས་དང་བཀོད་པ་རྣམས་མངོན་པའི་གཞུང་ནང་བསྟན་པ་ལྟར་མ་ཡིན་པར། བོན་གྱི་སྣོད་བཅུད་ཀྱི་འཇིག་རྟེན་རྟོགས་ཚུལ་རྣམས་ཀྱི་བརྒྱུད་རིམ་དང་གཞུང་ལུགས་ནང་ཁུལ་གྱི་དགོངས་དོན་དག་ལ་ཐོས་བསམ་འཆད་འཁྲིད་དང་བླ་མའི་དགོངས་བཀྲོལ་སོགས་མེད་ན། བོན་གྱི་ཕྱི་སྣོད་འཇིག་རྟེན་ཆགས་ཚུལ་གྱི་རིམ་པ་རྣམས་ཤེས་རྒྱུ་ཧ་ཅང་དཀའ་ལས་ཁག་པོ་ཡོད་པ་རེད་སྙམ།

        དྲི་བ། བོན་ལུགས་ཀྱི་འཇིག་རྟེན་ཆགས་རབས་ཀྱི་ཡིག་ཆ་རྙིང་ཤོས་དག་ཏུ་འཇིག་རྟེན་ཆགས་རབས་ཐོག་བཞེད་པ་མི་མཐུན་པ་ཡོད་དམ།

        ལན། བོན་ལུགས་ཀྱི་འཇིག་རྟེན་ཆགས་རབས་ཀྱི་ཡིག་ཆ་རྙིང་ཤོས་༼ཁུ་བྱུག་རིག་པའི་མདོ།༽དང་༼མདོ་སྡེ་ཁོད་པོ་སྐལ་བཟང་པོད་སྟོད་ཀ་དུམ༽། ༼མདོ་གཟེར་མིག༽༼མདོ་གཡུང་དྲུང་ཀློང་རྒྱས།༽གཡུང་དྲུང་ལས་རྣམ་པར་དག་པའི་རྒྱུད།  ༼གོ་སྡེའི་བསྐལ་བཟང་འགྲོ་བ་འདྲེན་པའི་སྣོད། ༽ ༼དབལ་གསས་རྔམ་པ་དྲག་ཟློག་གི་རྒྱུད་སྟོང་རི་ཐོ་ཆེན།༽༼མདོ་དྲི་མེད་གཟི་བརྗིད།༽༼ སྣོད་རྟེན་འབྱུང་བ་ཆགས་འཇིག་གི་མདོ།༽༼བོན་ཉིད་ཀྱི་སྙིང་པོ་ཐུགས་རྗེ་ཉི་མ་དགུ་ཤར་གྱི་འབུམ། ༽ ༼སྲིད་པའི་མཛོད་ཕུགས། ༽སོགས་ལ་ལྟ་ཀློག་བྱས་པ་ཡིན། བོན་གྱི་མདོ་སྔགས་སེམས་གསུམ་ན་འཇིག་རྟེན་ཆགས་ཚུལ་གྱི་བཤད་པ་གཅིག་མཐུན་མ་རེད། སེམས་ཕྱོགས་ཀྱི་ལུགས་སུ་འཇིག་རྟེན་ཆགས་རབས་ནི་གཞི་རྩལ་རོལ་གསུམ་ཁོ་ནའི་དབང་དུ་བྱས་ཏེ་བཤད་པ་པ་དང་། རྒྱུ་མཐུན་པའི་བཤད་པ་ལྟར་ན། དཔྱད་པ་གྲུབ་པའི་ས་ཚུགས་ནི་ཕྱི་སྣོད་ཀྱི་འཇིག་རྟེན་འདི་ཉིད་ཉེ་རྒྱུ་ཕྱི་འབྱུང་བའི་རྡུལ་ཕྲན་དང་རིང་རྒྱུ་རིག་མེད་ཀྱི་ནམ་མཁའ་སྟོང་པ་རྐྱེན་སེམས་ཅན་སྤྱི་མཐུན་གྱི་ལས་དེ་ཙམ་ལ་གཏུགས་པ་ཡིན་ལ། ལུགས་འདིས་རིང་རྒྱུ་ནམ་མཁའ་ལ་གཏུགས་ཀྱང་ནམ་མཁའ་དེ་རིག་མེད་ཀྱི་ནམ་མཁའ་སྟོང་པ་འདི་མ་ཡིན་པའི་རིག་བཅས་ཀྱི་ནམ་མཁའ་སྟོང་པ་ལ་བཞེད་པ་རེད། ཕྱི་འབྱུང་བའི་རླུང་ལས་གཞན་པའི་རིག་པའི་རང་རླུང་བྱ་བའི་ཕྲ་མོའི་རླུང་གི་རྣམ་གཞག་འཆད་རྒྱུ་ཡོད་པ་དེ་ལ་གཏུགས་ཡོད་སྟབས། དཔྱད་པའི་ཕུ་ཐག་ཤིན་ཏུ་རིང་བོ་ཡིན་པ་དང་། བྱེད་བྱས་པོའི་བཤད་པ་ལྟར་ན། རྐྱེན་བདེར་གཤེགས་ཀྱི་ཞལ་གྱི་ངད་པ་ལས་བྱུང་བར་འདོད་པ་རེད། ལུགས་འདིས་བྱེད་པ་མེད་པར་རང་འབྱུང་རང་ཤར་གྱི་ཚུལ་དུ་བྱུང་བར་འདོད།  མདོར་ན་སེམས་ཕྱོགས་རྫོགས་པ་ཆེན་པོའི་ལུགས་ཀྱི་ཕྱི་སྣོད་འཇིག་རྟེན་གྱི་འབྱུང་ཁུངས་སུ་གྲགས་པའི་འཛིན་མེད་རང་བྱུང་གི་རིག་པ་དང་། སྣང་བ་ཆེན་པོ་གསུམ་དུ་གྲགས་པའི་རང་རྩལ་སྒྲ་འོད་ཟེར་གསུམ་དེ་དག་འབྱུང་བའི་རྡུལ་ཕྲན་དང་བྱེད་བྱས་ཀྱི་ངད་པ་ལ་མ་ལྟོས་པའི་ཡེ་སྲིད་འབའ་ཞིག་ཏུ་འདོད་པ་རེད།

        དྲི་བ། བན་བོན་གཞུང་གི་འཇིག་རྟེན་ཆགས་རབས་ལ་དེང་སང་ཚན་རིག་གི་བཤད་པ་དང་མཐུན་ཆ་དང་འགལ་ཆ་གང་དག་འདུག

        ལན། བན་བོན་དང་ཚན་རིག་པས་བཞེད་པ་ལྟར་གྱི་འཇིག་རྟེན་ཁམས་ཀྱི་བྱུང་རབས་སོགས་ཀྱི་འགྲེལ་ཚུལ་བར་མི་མཐུན་ཡང་། ཐུན་མོང་གི་ཆ་ནས་མཐུན་འགྱུར་གྱི་བཞེད་པའང་འགའ་ཞིག་ཡོད།  སྤྱིར་འཇིག་རྟེན་གྱི་ཐོག་མའི་འབྱུང་རྐྱེན་དང་དེའི་ལྐོག་འགྱུར་གྱི་གསང་བ་རྣམས་རྟོགས་རྒྱུ་དེ། བན་བོན་གཞུང་ལུགས་ནང་གསལ་བ་ལྟར་ན་ས་ཐོབ་ཀྱི་འཕགས་པ་ལས་སོ་སྐྱེས་རྟོགས་མི་ཐུབ་པར་གསུངས། ཁོན་ཏྲོམ་འགུལ་ཤུགས་རིག་པས་ཀྱང་། གཞི་རྩའི་གནས་རིམ་དུ་ཆ་རྡུལ་ཕྲ་མོས་གནས་སྟངས་ངེས་ཅན་ཞིག་གི་ནང་ཅི་ཞིག་བྱེད་པ་སྔོན་དཔག་འཁྲུལ་མེད་བྱེད་མི་ཐུབ་པར་བརྗོད།  དེའི་ཕྱིར་ཆ་རྡུལ་ཕྲ་མོའི་མངོན་ཚུལ་སྔོན་དཔག་བྱེད་པ་ནི་ངེས་མེད་ཀྱི་བྱེད་ཐབས་ཤིག་གི་ལམ་ནས་བྱེད་ཀྱི་ཡོད། གལ་ཏེ་འདི་འདྲ་ཡིན་ཚེ་རྩིས་ཐབས་ཀྱི་སྒྲིག་གཞི་ཇི་ལྟར་ནུས་སྟོབས་ཆེ་ཡང་།  ཆོས་ངེས་ཅན་ཞིག་གམ་བྱུང་བ་ཞིག་གི་ཐོག་མའི་གནས་སྟངས་སྐོར་གྱི་ང་ཚོའི་གོ་རྟོགས་དེ་ནམ་ཡང་ཆ་མི་ཚང་། དེ་བཞིན་ང་ཚོས་ཆོས་དེ་དག་གི་འབྱུང་འགྱུར་གྱི་འཕེལ་ཕྱོགས་ཀྱང་ཚོད་དཔག་ཆ་ཚང་བ་ཞིག་བྱེད་མི་ཐུབ། རབ་ཡིན་ན་ང་ཚོས་བདེན་སྲིད་པའི་ཚོད་དཔག་ཅིག་བྱེད་ཐུབ་ཀྱང་། འཇིག་རྟེན་འདི་ཡོངས་སུ་རྟོགས་རྒྱུ་ཕར་ཞོག་ཐ་ན་རྡུལ་ཕྲན་གཅིག་གི་རང་བཞིན་ཡང་ཆ་ཚང་བ་ཞིག་རྟོགས་མི་ཐུབ་ཅེས་བརྗོད་ཡོད། ཚན་རིག་པས་འཇིག་རྟེན་ཁམས་བྱེ་བྲག་པ་གང་ཞིག་ཡིན་རུང་དང་པོ་གྲུབ་པ་དང་རྒྱ་བསྐྱེད་ནས་མཐར་འཇིག་པའི་བརྒྱུད་རིམ་གྱི་དབང་དུ་འགྲོ་དགོས་པར་འདོད་པ་ལྟར།  བན་བོན་གྱི་མཛོད་གཞུང་དག་ལས་ཀྱང་འཇིག་རྟེན་བྱེ་བྲག་པ་ཞིག་གི་འཕེལ་འགྱུར་ནི། ཆགས་གནས་འཇིག་སྟོང་བཞིའི་དུས་རིམ་གྱི་སྒོ་ནས་འགྲོ་དགོས་པ་གཅིག་མཚུངས་ལྟར་སྣང་བ་དང་། བན་བོན་གྱི་གཞུང་ལུགས་དང་ཚན་རིག་པས་འཇིག་རྟེན་གྱི་ཁམས་གྲངས་ལས་འདས་པ་ཞིག་ཡོད་པའི་བཞེད་པའང་གཅིག་མཚུངས་ལྟ་བུ་ཡིན། དེ་ཡང་བན་བོན་གྱི་གཞུང་ལུགས་དག་ལས། འཇིག་རྟེན་གྱི་ཁམས་ལ་སྟོང་གསུམ་འཇིག་རྟེན་བྱེ་བ་ཕྲག་བརྒྱ་ཡོད་པར་གསུངས། ཚན་རིག་པས་ཀྱང་ང་ཚོའི་འཇིག་རྟེན་འདི་འཇིག་རྟེན་ཁམས་གྲངས་ལས་འདས་པའི་ནང་ཡོད་པའི་དགུ་ཚིགས་ཐེར་འབུམ་ཆེན་པོ་ ༥ ཡོད་པ་ལས་གཅིག་ཡིན་ཟེར་གྱི་ཡོད། དེ་བཞིན། འཇིག་རྟེན་ཁམས་ཀྱི་དབྱིབས་ལ་སྣ་ཚོགས་པ་ཡོད་པའི་བན་བོན་གྱི་གཞུང་ལུགས་དང་ཚན་རིག་པའི་བཞེད་པ་གཅིག་མཚུངས་ལྟ་བུ་རེད། བོན་གྱི་མཛོད་སྒྲ་འགྲེལ་གྱི་གཞུང་ནང་། ཆུ་རླུང་འཁྲུག་པའི་སའི་སྙིང་པོ་ལས་ཉི་མ་དང་ཟླ་བ་བྱུང་།  དེའི་འོད་ཟེར་འཐོར་བས་གཟའ་དང་སྐར་མ་སྐར་ཕྲན་འབྱུང་ངོ་།། དེས་ལོ་ཟླ་བརྩི་བའི་གྲངས་རྡོ་དང་། སྣང་སྲིད་གསལ་བའི་རྒྱན་དུ་འབྱུང་ངོ་།། ཞེས་གསུངས་པ་དེ་ཡང་ཚན་རིག་པས་ཧ་ལམ་ལོ་ངོ་དུང་ཕྱུར་ ༡༠༠ ལྷག་གི་སྔོན་དུ་ཆེས་གདོད་མའི་འཇིག་རྟེན་ཁམས་ནི། ཆེ་ཆུང་ཁབ་རྩེ་ཙམ་ལས་མེད་པའི་ཐིག་ལེ་ཞིག་ཡིན་ཞིང་། འདུས་ཚད་གཞལ་བར་དཀའ་བའི་ཐིག་ལེ་དེ་འབར་གད་དྲག་པོ་བྱུང་ནས་དུས་ཚོད་དང་།  བར་སྟོང་།  ནུས་ཚད་དང་དངོས་པོ་བཅས་བྱུང་བ་བཤད་པ་གཉིས་འདྲ་བོ་ཡོད། ཉི་ཟླ་སྐར་གསུམ་གྱི་མྱུར་ཚད་ཀྱང་གཅིག་མ་ཡིན་པར་མགྱོགས་དལ་ཡོད་པར་མཉམ་མེད་མཛོད་འགྲེལ་ལས། ཟླ་བ་ཆུ་ཤེལ་ལས་གྲུབ་པས་ལྕི། ཉི་མ་མེ་ཤེལ་ལས་གྲུབ་པས་ཡང་།  སྐར་མ་བོངས་ཆུང་བས་དང་རླུང་གཅིག་ལྷག་པས། ཉི་མ་ལས་ཀྱང་སྐར་མ་མགྱོགས་གསུངས་ཡོད།  ཚན་རིག་པས་ཀྱང་ཉི་མའི་རང་འཁོར་རྒྱག་པའི་འཁོར་ཡུན་ནི། སྤྱིར་ཉིན་ ༢༧ ཡིན་ཞེས་བཤད་པ་དེ་ཉི་མའི་དམར་ཐིག་ཁག་གི་འཁོར་ཡུན་ནི་ཉིན་ ༢༥ ཡིན་ལ། ཟླ་བའི་རང་འཁོར་རྒྱག་པའི་འཁོར་ཡུན་ནི། ཉིན་ ༢༧.༣༢༡༦༦༡ ཡིན་ལ་དེ་ནི་ཏག་ཏག་ཟླ་བ་སའི་གོ་ལར་སྤྱི་འཁོར་རྒྱག་པའི་འཁོར་ཡུན་རེད། ཉིན་ ༢༧ དང་ཆུ་ཚོད་ ༧ སྐར་མ་ ༤༣ སྐར་ཆ་ ༡༡.༤༧ ཡིན།  ཉི་ཟླ་སྐར་གསུམ་གྱིས་རང་འཁོར་རྒྱག་པའི་འཁོར་ཡུན་ལས་འཁོར་ཚད་ཆེས་མགྱོགས་པ་ནི་སྐར་མ་༼གཟའ་ལྷག་པ་ཕུད༽ཡིན་ལ་དེ་ནས་ཉི་མ།  དེའི་འཕྲོར་ཟླ་བ་ཡིན་ཟེར་གྱི་ཡོད།  བན་བོན་གྱི་མཛོད་གཞུང་ནང་ཉི་ཟླ་གཟའ་སྐར་ཐམས་ཅད་ཀྱང་རང་མཆིས་ཀྱི་རླུང་ལ་བརྟེན་ནས་སྐོར་བ་བྱེད་ཀྱི་ཡོད་པར་གསུངས་ཡོད།   དྲན་པའི་སྒྲ་འགྲེལ་ལས།  བར་སྣང་ཁམས་ལ་རླུང་ཚན་ཏིང་མི་གཏོང་འཛིན་པའི་རང་བཞིན་དང་། ནན་ཏིང་མ་བྱིང་འདེགས་པའི་དངོས་པོ་ཅན་ཡོད་པར་གསུངས་པའི་མི་གཏོང་འཛིན་པའི་རླུང་དང་།  ཚན་རིག་པས་ཉི་ཟླ་སྐར་གསུམ་རང་འཁོར་དང་སྤྱི་འཁོར་རྒྱག་པ་ནི་གཙོ་བོ་བར་སྣང་ཁམས་ལ་ཁབ་ལེན་ར་བ་ཞེས་པའི་བཤད་ཚུལ་དང་མཚུངས་ཆོས་མང་པོ་ཡོད། 

        དྲི་བ། བོན་གཞུང་ན་དམིགས་བསལ་བོད་ཡུལ་ཆགས་རབས་སྐོར་ལ་བཤད་པ་དེ་འདྲ་ཡོད་དམ།

        ལན། བོན་གཞུང་ན་འཛམ་བུ་གླིང་འདི་ལ་ཡུལ་ཆེན་ ༡༨ དང་།  ཡུལ་ཕྲན་ ༩༡ ། མཐའ་འཁོབ་ ༡༣༠༠ ཡོད་པར་གསུངས།  བོད་ཡུལ་འདི་གོང་གི་ཡུལ་ཆེན་བཅོ་བརྒྱད་ཀྱི་ནང་གསེས་ཤིག་རེད། བོད་ཡུལ་གྱི་ཆཊ་རབས་དམིཊ་བསལ་གྱིས་ཁ་གསལ་མེད་ཀྱང་འཛམ་བུའི་གླིང་ཆེན་གྱི་བྱུང་ཚུལ་སྤྱི་དང་འབྲེལ་ནས་གསུངས་ཡོད་པ་རེད་དྲན་གྱི་ཡོད།

        དྲི་བ། མ་འོངས་པར་ཁྱེད་རང་གི་ཆེད་སྦྱོང་དང་འབྲེལ་བའི་ཕྱག་ལས་ག་རེ་གནང་འཆར་ཡོད།

        ལན། སྤྱིར་ནང་དོན་རིག་པའི་གཞུང་ལུགས་ཁག་ལ་མུ་མཐུད་ཞིབ་འཇུག་བྱེད་དགོས་བསམ་ཡོད། འོན་ཀྱང་། ད་ལྟའི་ཆར་མཁས་དབང་དཔལ་ལྡན་ཚུལ་ཁྲིམས་ལགས་ཀྱིས་བྲིས་པའི་བསྟན་བཅོས་ཡིད་བཞིན་གཏེར་གྱི་མཛོད་ལས་༼རྩོམ་པའི་རྒྱན་འགྱུར་སྙན་ངག་རྒྱན་གསུམ་གྱི་རྣམ་བཤད་ནོར་བུའི་མེ་ལོང་དབྱངས་ཅན་སྙིང་གི་ཐིག་ལེ།༽ཞེས་པར་ཞུ་དག་དང་། བོན་གཞུང་སྲིད་པའི་མཛོད་ཕུགས་ནང་གི་༼ཞང་ཞུང་གི་ཐ་སྙད་དང་བོན་གྱི་བརྡ་རྙིང་ཁག་གི་གོ་དོན་དང་ངོ་སྤྲོད༽ཅེས་པའི་དེབ་ཆུང་ཞིག་དཔར་སྐྲུན་བྱེད་རྒྱུར་གྲ་སྒྲིག་བྱེད་ཀྱིན་ཡོད།

 གསར་འགོད་པ། པདྨ་མཚོ།

༼བོད་ཀྱི་དུས་བབ་ཚགས་པར་ལས་འདིར་བཀོད།༽