གཟའ་མིག་དམར་ཉིན་རྒྱ་གར་གྱི་སྲིད་བློན་རྒྱ་ནག་ཏུ་བསྐྱོད་དེ་རྒྱལ་ཁབ་གཉིས་བར་གྱི་ས་མཚམས་རྩོད་རྙོག་གཙོས་པའི་གནད་དོན་ཁག་ཅིག་གི་ཐོག་གྲོས་བསྡུར་བྱས་ཡོད་འདུག
ཁ་སང་ཕྱི་ཚེས་ ༢༢ ཉིན། རྒྱ་གར་གྱི་སྲིད་བློན་མན་མོ་ཧན་སིན་(Manmohan Singh)མཆོག་རྒྱ་ནག་ནང་གཞུང་འབྲེལ་གཟིགས་སྐོར་གནང་ཡོད་པ་དང་། ཐེངས་འདིར་ཁོང་དང་ལྷན་དུ་རྒྱ་གར་གཞུང་གི་ཆབ་སྲིད་དང་དཔལ་འབྱོར། ཚན་རྩལ་བཅས་ཀྱི་མི་སྣ་ལས་གྲུབ་པའི་སྐུ་ཚབ་ཚོགས་ཆུང་དེ་རྒྱ་ནག་གི་རྒྱལ་ས་པེ་ཅིན་དུ་འབྱོར་ཏེ། རྒྱ་ནག་གི་སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་སོགས་དང་མཇལ་འཕྲད་ཀྱིས་རྒྱ་དཀར་ནག་གཉིས་གྱི་དཔལ་འབྱོར་འབྲེལ་ལམ་གཙོས་རྒྱལ ཁབ་གཉིས་ཀྱི་ས་མཚམས་རྩོད་རྙོག་དང་། རྒྱ་གར་ཁོངས་གཏོགས་ཨ་རུ་ནཱ་ཅལ་མངའ་སྡེའི་མི་སེར་ལ་ཐོངས་མཆན་སྤྲོད་ཕྱོགས། བོད་ནང་གི་གཙང་པོ་ཆེན་པོ་བཞིའི་ཆུ་རྒྱུན་མཉམ་སྤྱོད་བྱེད་ཕྱོགས། པ་ཀི་སི་ཐན་འོག་གི་ཀ་ཤི་མུར་ཁུལ་དུ་རྒྱ་ནག་གིས་མ་རྩ་འཛུགས་འཇོག་གི་ལས་འཆར་སོགས་ལ་ཉིན་གཉིས་རིང་གྲོས་མོལ་བྱས་ཡོད་འདུག
དེ་རིང་སྔ་དྲོར་རྒྱ་གར་སྲིད་བློན་མན་མོ་ཧན་སིན་དང་རྒྱ་ནག་སྲིད་བློན་ལི་ཁེ་ཆང་གཉིས་ཀྱིས་རྒྱ་ནག་མི་དམངས་ཚོགས་ཁང་དུ། རྒྱལ་ཁབ་གཉིས་ཀྱིས་ས་མཚམས་སྲུང་སྐྱོབ་ཀྱི་མཉམ་ལས་གྲོས་ཆོད་(BDCA)ཅེས་པར་མིང་རྟགས་བཀོད་ཡོད་ཅིང་། དེའི་ནང་རྒྱལ་ཁབ་གཉིས་ཀྱི་ས་མཚམས་སྲུང་སྐྱོབ་དམག་མི་ཕན་ཚུན་བར་ཚོགས་འདུ་སྐོང་རྒྱུ་དང་། ས་མཚམས་སུ་རྩ་ཆེའི་སེམས་ཅན་གྱི་ནག་ཚོང་རིགས་རྩ་མེད་བཟོ་རྒྱུར་མཉམ་ལས་བྱ་རྒྱུ་ཡིན་སོགས་བཀོད་ཡོད་འདུག་ཀྱང་། རྒྱ་ནག་གིས་རྒྱ་གར་ཨ་རུ་ནཱ་ཅལ་གྱི་མི་སེར་ལ་ཐོངས་མཆན་སྤྲོད་མིན་ཐོག་ཐག་གཅོད་གྲོས་ཆོད་གང་ཡང་བྱུང་མི་འདུག རྒྱ་གར་ཨ་རུ་ནཱ་ཅལ་གྱི་མི་རྒྱ་ནག་ནང་བསྐྱོད་སྐབས། རྒྱ་གཞུང་གིས་ཨ་རུ་ན་ཅལ་ནི་རྒྱ་ནག་གི་མངའ་ཁུལ་ཞིག་ཡིན་ཟེར་བའི་སྲིད་བྱུས་འོག་ཕྱི་མིའི་ཐོངས་མཆན་སྤྲོད་ཀྱི་མེད།
ཐེངས་འདིའི་ས་མཚམས་སྲུང་སྐྱོབ་ཀྱི་མཉམ་ལས་གྲོས་ཆོད་སྐབས། སྲིད་བློན་ལི་ཁེ་ཆང་གིས་རྒྱ་དཀར་ནག་གཉིས་ནི་ཡུན་རིང་ལོ་རྒྱུས་ལྡན་པའི་མིའི་དཔལ་ཡོན་དར་སྔ་ཤོས་ཀྱི་རྒྱལ་ཁབ་གཉིས་ཡིན་སྟབས། ས་མཚམས་རྩོད་རྙོག་གིས་རྒྱལ་ཁབ་གཉིས་ཀྱི་ཐུན་མོང་གི་མངོན་འདོད་དེ་དཔལ་འབྱོར་འཕེལ་རྒྱས་ཀྱི་ཁེ་ཕན་ལ་དོ་ཕོག་མི་འགྲོ་བ་མ་ཟད། ཕྱོགས་གཉིས་ཀྱིས་མཐའ་མཚམས་ལ་བརྟན་བརླིང་དང་ཞི་བདེ་ཡོང་བར་སྲུང་སྐྱོབ་བྱ་རྒྱུར་མོས་མཐུན་བྱུང་ཡོད་ཅེས་བརྗོད་འདུག སྲིད་བློན་མན་མོ་ཧན་སི་སིན་གྱིས་ཀྱང་ས་མཚམས་ཀྱི་བརྟན་བརླིང་དང་ཞི་བདེ་ནི་རྒྱལ་ཁབ་གཉིས་ཀྱི་ཕྱི་སྲིད་འབྲེལ་ལམ་འཕེལ་རྒྱས་འགྲོ་བའི་རྨང་གཞི་ཡིན་སྟབས། ཁོང་དང་སྲིད་བློན་ལི་ཁེ་ཆང་གཉིས་ཀྱིས་ས་མཚམས་སྐོར་ལ་གྲོས་མོལ་ཐག་གཅོད་ཡག་པོ་བྱུང་སོང་ཞེས་གསར་འགོད་པར་བརྗོད་འདུག
ཐེངས་འདིའི་རྒྱལ་ཁབ་གཉིས་ཀྱི་དབུ་ཁྲིད་ཐུག་འཕྲད་ཐད་རྒྱ་གར་གསར་ལམ་ཁག་ཏུ། རྒྱ་དཀར་ནག་གཉིས་ཀྱི་མགོ་ཁྲིད་ཕན་ཚུན་བར་དོགས་པ་ཡོད་པ་དང་། བསམ་བློའི་ནང་ཕན་ཚུན་ལ་ཡིད་ཆེས་མེད་སྟབས། དོན་དངོས་ཐོག་ས་མཚམས་བརྟན་བརླིང་དང་ཞི་བདེ་དོན་འཁྱོལ་ཡོང་ཐུབ་ཁག་པོ་ཡིན་པ་དང་། རྒྱ་ནག་གིས་པ་ཀི་སི་ཐན་དང་བལ་གཉིས་ནང་དཔལ་འབྱོར་རོགས་རམ་གྱི་ལས་འཆར་ཁག་ཕྱིར་འཐེན་བྱེད་མི་སྲིད་པ་དང་། ལྷག་པར་དུ་རྒྱ་ནག་གིས་ཐོན་ཁུངས་བོད་ནས་ཡིན་པའི་གཙང་བོ་ཆེན་པོ་བཞིའི་ཐོག་གློག་ཤུགས་དང་ཆུ་མཛོད་རྒྱག་རྒྱུའི་ལས་འཆར་དེ་ཕྱིར་འཐེན་བྱས་ཏེ། ཧི་མ་ལ་ཡའི་གཙང་བོ་མཉམ་སྤྱོད་བྱེད་རྒྱུ་ཤིན་ཏུ་དཀའ་ཚུལ་སོགས་བརྗོད་འདུག རྒྱ་ནག་གི་གསར་ལམ་ཁག་ཏུ། རྒྱ་དཀར་ནག་གཉིས་ནི་ལོ་རྒྱུས་ལྡན་པའི་ཁྱིམ་མཚེས་རྒྱལ་ཁབ་གལ་ཆེན་ཞིག་ཡིན་སྟབས། ཕན་ཚུན་བར་དཔལ་འབྱོར་འཕེལ་རྒྱས་ཕྱོགས་སུ་མཉམ་ལས་མཐུན་སྒྲིལ་དགོས་པ་མ་ཟད། སྲིད་བློན་མན་མོ་ཧན་སིན་ནི་རྒྱ་གར་གྱི་དཔལ་འབྱོར་གྱི་ཡབ་ཆེན་ཡིན་པའི་བསྔགས་བརྗོད་བྱས་འདུག
ཐེངས་འདིར་རྒྱ་ནག་གཞུང་གིས་རྒྱ་གར་སྲིད་བློན་མན་མོ་ཧན་སིན་གྱི་གཞུང་འབྲེལ་གཟིགས་སྐོར་དང་བསྟུན་ཏེ། ༼ རྒྱབ་ཤ་དཀར་པོ ༽ ཞེས་པའི་དཔེ་དེབ་ཅིག་འགྲེམས་སྤེལ་བྱས་ཡོད་པ་དང་། དེབ་དེའི་ནང་༸གོང་ས་མཆོག་དང་བཙན་བྱོལ་བོད་མིས་རྒྱ་གར་གྱི་ས་ཐོག་ཏུ། རྒྱ་ནག་མེས་རྒྱལ་ཆེན་མོ་ཁ་བྲལ་གཏོང་བའི་ལས་འགུལ་སྤེལ་གྱི་ཡོད་པ་དང་། ད་ལྟ་བོད་ཀྱི་ས་ཁུལ་ཡོངས་རྫོགས་ཀྱི་དཔལ་འབྱོར་འཕེལ་རྒྱས་དང་འཛུགས་སྐྲུན་གང་ལེགས་ཡོད་སྐོར། ཕྱི་ཟླ་ ༡༠ ཚེས་ ༡༡ ཉིན་སི་པན་གྱིས་ཁྲིམས་ཁང་ཞིག་གིས་རྒྱ་ནག་གི་སྲིད་འཛིན་ཟུར་བ་ཧུའུ་ཅིན་ཐའོ་ (Hu Jintao) ༢༠༠༨ ལོའི་ཞི་རྒོལ་ཆེན་མོའི་སྐབས་བོད་རིགས་དམར་གསོད་རྩ་མེད་བཏང་བའི་ནག་ཉེས་ཁྲིམས་གཅོད་གནང་བ་དེར་སྐྱོན་བརྗོད་བྱས་པ་སོགས་བཀོད་ཡོད་འདུག
གསར་འགོད་པ། ལྷ་སྐྱབས་རྒྱལ།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
ཚེ་རིང་རྣམ་རྒྱལ་ལགས། རྒྱའི་མིང་ཚིག་བསྡུས་ཏེ་辛格་ཞེས་པ་བོད་སྐད་དུ་སྒྲ་སྒྱུར་བྱས་ཚེ་ཞྭིན་ཀི་འམ། ཞིང་ཀི་རུ་འབོད་པ་ཡིན་ངེས་ཀྱང་། ང་ནི་ཁམས་ཀྱི་འབྲོག་པ་ཞིག་ཡིན་པ་དང་རྒྱ་སྐད་མི་ཤེས་པའི་གནས་སྟངས་གཉིས་ཀ་ཡོད་མོད། ཨམ་སྐད་དང་འབྲོག་པའི་སྐད་གདངས་ལ་རྒྱ་སྐད་ནི། དེ་ཙམ་འཚམས་པོ་མེད་པའི་སྐད་ཆ་ཐོས་མྱོང་། ངས་ཉན་པའི་གསར་འགྱུར་དེའང་མཚོ་སྔོན་གྱི་བོད་སྐད་གསར་འགྱུར་རེད། ང་འབྲོག་པ་ཞིག་ཡིན་པ་དང་མཚོ་སྔོན་གྱི་གསར་འགོད་པའང་འབྲོག་པ་ཞིག་ཡིན་ངེས། དེའི་སྟབས་ཀྱིས་ཞྭིན་ཀིའམ་ཞིང་ཀི་ལ་སེངྒེ་ཞེས་པའི་སྒྲ་དེ་བཤད་འགྱུར་དང་ཐོས་འགྱུར་དུ་སོང་བ་ཞིག་ཡིན་སྲིད། མ་གཞི་ནས་རྒྱའི་ཚིག་བསྡུ་འདི་ (Singh ) བེད་སྤྱོན་བཏང་བའི་ཚོད་ཡིན་སྲིད་ནའང་སྒྲ་འདི་ཚིག་བསྡུའི་ཏེ་བེད་སྤྱོད་བྱས་ཚེ། ཕལ་ཆེར་དབྱིན་སྐད་རང་གི་སྐད་གདངས་བྱེད་ནའང་སེངྒེ་ཞེས་པ་ཞིག་ཡོང་སྲིད། ཕྱོགས་གཅིག་ནས་རྒྱའི་ལྕེ་རྩེས་ནུས་པས་མ་འདེང་བ་དང་འབྲོག་པའི་སྐད་སྒྲ་འཕར་ཚད་ཆེ་བའི་དབང་གིས་ཡིན་པ་ལྟབུ་རེད་འདུག ཧེ་ཧེ་་་་་་་་་་ཚེ་རྒྱལ་ལགས། གསལ་བཤད་གནང་བར་ཐུགས་རྗེ་ཆེ།
གླང་དར་མ་ལགས། རྒྱ་གར་ནག་གཉིས་གྲོགས་པོ་ཆགས་ན་བོད་པས་མྱང་དགོས་དོན་ཅི།
སེར་སྨད་བློ་དགའ་ལགས། དེ་ཁྱོད་ཀྱིས་དོ་སྣང་སྤྲད་དེ་དམིགས་བསལ་ཞིག་ཐོས་པ་དང་མཐོང་བ་གང་ཡང་མ་རེད། ཁྱོད་ཀྱིས་རྒྱ་ཡིག་མི་ཤེས་པའི་སྒང་ལ་རྒྱ་སྐད་ཀྱང་མ་གོ་བའི་རྟགས་རེད། རྒྱ་སྐད་ནང་སྲིད་བློན་མན་མོ་ཧན་སིན་མཆོག་གི་མཚན་ལ་曼莫汉·辛格 ་ཞེས་ཟེར་གྱི་ཡོད་པ་རེད། དེ་ལ་རྒྱ་ནག་གིས་ཚིག་བསྡུས་ཏེ་辛格་ཞེས་འབོད་པ་རེད། དེ་བོད་སྐད་ནང་སྒྲ་སྒྱུར་བྱས་ན་ཞྭིན་ཀི་འམ། ཞིང་ཀི་རུ་འབོད་པ་རེད། ད་གསལ་བོ་ཤེས་སོང་ངམ་་་་་་་་ཧ་ཧ་ཧ་་་་་་་་་་་་་་་་་་་་་ཨ།
རེད་རེད། དུས་བབ་ཀྱི་གསར་འགྱུར་བཀོད་པ་གཞིར་བཟུང་རེད། ཡིན་ཡང་། མདང་དགོང་ངས་དེའི་སྐོར་གྱི་གསར་འགྱུར་ལ་བལྟས་པ་ཡིན། སྐབས་དེ་དུས་ཡ་མཚན་པ་ཞིག་ལ། རྒྱ་ནག་གིས་གཞུང་འབྲེལ་གསར་འགོད་པས་རྒྱ་གར་གྱི་སྲིད་བློན་མན་མོ་ཧན་སིན་ཞེས་པའི་ཚིག་གཅིག་ཀྱང་ཐོན་གྱི་མི་འདུག བོད་སྐད་ནང་ ༼ རྒྱ་གར་གྱི་སེངྒེ་ ༽ ཞེས་པའི་ཚིག་དེ་རྐྱང་རྐྱང་བེད་སྤྱོད་བྱས་སོང་། དེའི་སྐོར་གསར་འགོད་པར་ཐུགས་སྣང་འདྲ་བྱུང་ཨེ་ཡོད་ན་་་་་་་་་་་་་་་་་་་ཧེ་ཧེ་ཧེ་་་་་་་་་་་་་ཨ་
རྒྱ་དཀར་ནག་གཉིས་གྲོགས་པོ་ནང་ཚགས་ཆགས་བཞིན་འདུག་ག ད་བཙན་བྱོལ་བོད་མི་ཚོས་མྱོང་ཡ་རེ་ཞག