སྨན་རྩིས་ཁང་གི་འགན་འཛིན་དང་དྲུང་ཆེ་འབྲེལ་མཐུད་པ་གསུམ་ཁྲིམས་གཏུག་བྱས་འདུག

ཉེ་ལམ་པ་ནི་པ་ཏི་སྤོས་བཟོ་སྡེ་ཚན་གྱི་འགན་འཛིན་རྟ་མགྲིན་ཚེ་རིང་ལགས་ཀྱིས་ངྷ་ས་དབུས་བོད་ཀྱི་སྨན་རྩིས་ཁང་གིས་ཁོང་ལ་མིང་ཤས་བཟོས་ཚུལ་བརྗོད་དེ། སྨན་རྩིས་འགན་འཛིན་དང་དྲུང་ཆེ། འབྲེལ་མཐུད་པ་གསུམ་ཁྲིམས་གཏུག་བྱས་མཐར། བྱང་ཕྱོགས་བོད་མིའི་ཁྲིམས་ཞིབ་ཁང་གིས་ཁོང་གསུམ་གྱི་གདམ་བྱ་འདེམས་བྱེད་ཀྱི་ཐོབ་དབང་མེད་པ་བཟོས་ཡོད་འདུག

འདི་ལོའི་ཕྱི་ཟླ་ ༥ བའི་ཚེས་ ༢༢ ཉིན་བོད་ཀྱི་སྨན་རྩིས་ཁང་གི་ཡན་ལག་པ་ནི་པ་ཏི་སྤོས་བཟོ་སྡེ་ཚན་གྱི་འགན་འཛིན་རྟ་མགྲིན་ཚེ་རིང་ལགས་ཀྱིས། རྒྱ་གར་བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་དུ། ངྷ་ས་དབུས་བོད་ཀྱི་སྨན་རྩིས་ཁང་གི་སྤྱི་ཁྱབ་དབུ་འཛིན་ཚེ་རིང་བཀྲ་ཤིས་ལགས་དང་། དྲུང་ཆེ་ཚེ་རིང་ཕུན་ཚོགས་ལགས། དམིགས་བསལ་ལས་རིགས་འབྲེལ་མཐུད་པ་བསྟན་འཛིན་རྡོ་རྗེ་ལགས་གསུམ་ཁྲིམས་གཏུག་བྱས་ཡོད་ཅིང་། དེའི་སྐོར་ལ་འདི་གའི་གསར་འགོད་པས་བཅར་འདྲི་བརྒྱུད་རྒྱུས་ལོན་བྱས་དོན་ལྟར་ན། ཕྱི་ལོ་ ༢༠༡༢ ཟླ་ ༡༡ པའི་ཚེས་ ༢༦ ཉིན་དབུས་སྨན་རྩིས་ཁང་སྤྱི་ཁྱབ་ཡིག་ཚང་ནས། ས་གནས་སྤོས་བཟོ་སྡེ་ཚན་ནས་རྩིས་ཁྲ་གཙང་མ་བྱུང་ཡོད་མེད་ཀྱི་གནད་དོན་ཞིག་གི་ཐོག  ལྡེ་ར་རྡུན་སྤོས་བཟོ་སྡེ་ཚན་གྱི་འགན་འཛིན་རྟ་མགྲིན་ཚེ་རིང་ལགས་དང་གསོག་གཉེར་བ་གཉིས་ལ་ཧིན་སྒོར་ ༢༠༠༠༠ ཀྱི་ཉེས་ཆད་དང་། གནས་རིམ་གཅིག་མར་ཕབ་སྟེ་མ་འོངས་པའི་ལོ་ལྔའི་རིང་གནས་རིམ་འཕར་མི་ཆོག་པའི་ཐག་གཅོད་དང་། རྩིས་པར་ཧིན་སྒོར་ ༡༠༠༠༠ བཅས་ཀྱི་ཉེས་ཆད་བཅད་ཡོད་སྟབས། འདི་ལོའི་ཕྱི་ཟླ་ ༥ ཚེས་ ༢༢ ཉིན་ས་གནས་སྤོས་བཟོ་སྡེ་ཚན་གྱི་འགན་འཛིན་རྟ་མགྲིན་ཚེ་རིང་ལགས་ཀྱིས། བྱང་ཕྱོགས་ས་གནས་བོད་མིའི་ཁྲིམས་ཞིབ་ཁང་དུ། ངྷ་ས་དབུས་སྨན་རྩིས་ཁང་གིས་ཁོང་ལ། ངན་པ་ལག་སྦྲེལ་གྱིས་གཞུང་གནོད་སྒེར་ཕན་རྩིས་ཁྲ་སྦས་སྐུང་རྫུན་བཟོ་གྲ་མ་སྒྲིག་པ་བྱས་པ་སོགས་ཀྱི་ཉེས་འཛུགས་བྱས་ཏེ་མིང་ཤས་བཟོས་ཡོད་ཚུལ་ཁྲིམས་གཏུག་བྱས་ཡོད་འདུག

ས་གནས་ཁྲིམས་ཞིབ་ཁང་གིས་གོང་གསལ་གྱོད་ཡ་ཞུ་སྦྱོར་བ་རྟ་མགྲིན་ཚེ་རིང་ལགས་ཀྱི་གྱོད་གཞི་དེར་ངོས་ལེན་གནང་སྟེ། གྱོད་ཡ་རྩོད་ལན་པ་ངྷ་ས་དབུས་སྨན་རྩིས་ཁང་གི་འགན་འཛིན་དང་དྲུང་ཆེ། དམིགས་བསལ་ལས་རིགས་འབྲེལ་མཐུད་པ་གསུམ་ལ་བརྡ་ཐོ་སྔ་ཕྱིར་ཐེངས་ ༤ ཙམ་བཏང་སྟེ་ས་གནས་ཁྲིམས་ཞིབ་ཁང་དུ་འབོད་འགུག་བྱས་ཀྱང་། གྱོད་ཡ་རྩོད་ལན་པ་གསུམ་གྱི་སྐུ་ཚབ་ཏུ་འབྲེལ་མཐུད་པ་མ་གཏོགས་འགན་འཛིན་དང་དྲུང་ཆེ་གཉིས་ངོ་བཅར་ཞུས་མེད་པ་དང་། སྤྱི་མང་གཏུག་བཤེར་འགྲོ་ལུགས་ཉམས་ལེན་བརྩི་བཀུར་མ་བྱས་པ་སོགས་ལ་བརྟེན། ཟླ་འདིའི་ཚེས་ ༡༥ ཉིན། ས་གནས་ཁྲིམས་ཞིབ་ཁང་གིས་ཁོང་གསུམ་ལ་གདམ་བྱ་འདེམས་བྱེད་ཀྱི་ཐོབ་དབང་མེད་པའི་ཐག་གཅོད་བཀའ་ཁྱབ་བཏང་ཡོད་འདུག

ཁྲིམས་ཞིབ་ཁང་གི་བཀའ་ཁྱབ་དེའི་ནང་བཀོད་པ་ལྟར་ན། གྱོད་ཡ་ཞུ་སྦྱོར་བ་རྟ་མགྲིན་ཚེ་རིང་ནས་ ༢༠༡༣ ཟླ་ ༥ ཚེས་ ༢༢ ཉིན་ཁྲིམས་གཏུག་བྱས་པའི་ཁ་མཆུ་ཨང་གསུམ་པ། ༢༠༡༣ གྱོད་གཞི་ངན་པ་ལག་སྦྲེལ་གྱི་གཞུང་གནོད་སྒེར་ཕན་རྩིས་ཁྲ་སྦས་སྐུང་གྲ་མ་སྒྲིག་པ་བྱེད་པ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢ པ་དང་། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དོན་ཚན་ ༧  པ་དང་ ༡༣ ། ༦༧ བཅས་ཀྱི་ཆ་རྐྱེན་འོག་ཁྲིམས་ཞིབ་བྱ་རྒྱུར་ངོས་ལེན་བྱས་ཏེ། ད་ལོའི་ཕྱི་ཟླ་ ༥ ཚེས་ ༢༤ ཉིན་བརྡ་ཐོ་དང་པོ་བཏང་སྟེ་ཁ་གཏད་གྱོད་ཡ་རྩོད་ལན་པ་བོད་ཀྱི་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་དང་དྲུང་ཆེ་ཚེ་རིང་ཕུན་ཚོགས་ལགས། དམིགས་བསལ་ལས་རིགས་འབྲེལ་མཐུད་པ་བསྟན་འཛིན་རྡོ་རྗེ་ལགས་གསུམ་ཕྱི་ཟླ་ ༦ ཚེས་ ༢༣ ཕྱི་དྲོའི་ཆུ་ཚོད་ ༦ པ་ནང་ཚུད། ས་གནས་ཁྲིམས་ཞིབ་ཁང་དུ་ཞུ་ལན་ཡིག་ཐོག་འབུལ་ཆེད་ངོ་བཅར་དགོས་ཚུལ་བཀོད་ཡོད་ཀྱང་། རྩོད་ལན་པ་གསུམ་ནས་བརྡ་ཐོ་ངོ་མ་རྩིས་ལེན་བྱས་ཡོད་ཀྱང་བརྡ་ཐོ་ངོ་བཤུས་ལ་དོ་བདག་ནས་བརྡ་འབྱོར་མིང་རྟཊ་མ་བཀོད་པར། ཟུར་དུ་བྱུང་འཛིན་ཞིག་ཁྲིམས་དྲུང་ལས་ཁུངས་སུ་ཕུལ་བ་དང་། དུས་བཀག་ནང་ངོ་བཅར་མ་ཞུས་པར་ཕྱི་ཟླ་ ༦ ཚེས་ ༢༤ ཉིན་བརྡ་ཐོ་དང་པོའི་དུས་བཀག་གི་ཉིན་མཐའ་མར་བསྟན་འཛིན་རྡོ་རྗེ་རྩོད་ལན་པ་གསུམ་གྱི་འཐུས་མིའི་ངོ་བོར་བཅར་བྱས་ཏེ། སྨན་རྩིས་ཁང་གི་སྤྱི་ཁྱབ་དབུ་འཛིན་གྱི་ཁོ་ནའི་ས་རྟགས་འཁོད་པའི་སྙན་ཞུ་ཞིག་ཕུལ་བ་ཙམ་ལས་གྱོད་ཡ་རྩོད་ལེན་པ་གསུམ་སོ་སོ་ནས་གྱོད་ཡ་མོས་མཐུན་ཆོད་ཡིག་ལ་མིང་རྟགས་བཀོད་མེད་པ་དང་ཞུ་ལན་སོགས་ཀྱི་དགོས་མཁོའི་ཡིག་ཆ་ཁག་ཀྱང་སྤྲད་ཡོད་མི་འདུག 

རྩོད་ལེན་པ་གསུམ་གྱིས་ཁ་མཆུ་གཏུག་ཡུལ་ཚོཊ་སྒེར་གང་ཡིན་ཁ་གསལ་དགོས་ལུཊ་བརྗོད་པ་ལྟར། གྱོད་ཡ་ཞུ་སྦྱོར་བས་ཞུ་རྩ་གསེད་བཀྲོལ་ཁ་གསལ་བཟོས་རྗེས་ས་གནས་ཁྲིམས་ཞིབ་ཁང་གིས་ཟླ་ ༧ ཚེས་ ༣ ཉིན་བརྡ་ཐོ་ཐེངས་གཉིས་པ་བཏང་སྟེ། བརྡ་ཐོ་འབྱོར་ནས་ཉིན་ ༢༠ ནང་ཚུད་ས་གནས་ཁྲིམས་ཞིབ་ཁང་དུ་ངོ་བཅར་གྱི་ཞུ་ལན་ཡིག་ཆ་ཁག་འབུལ་རྒྱུའི་གོ་སྐབས་སྤྲད་ཡོད་པ་དང་། ཟླ་ ༧ ཚེས་ ༢༥ ཉིན་བསྟན་འཛིན་རྡོ་རྗེ་གོང་མཚུངས་ལྟར་བཅར་ཡང་རྩོད་ལེན་པ་གསུམ་ནས་གྱོད་ཡ་མོས་མཐུན་ཆོད་ཡིག་དང་ལག་བསྟར་དམ་ཡིག་བཟོས་མེད་པ་དང་། ཟླ་ ༨ ཚེས་ ༣ ཉིན་བརྡ་ཐོ་ཐེངས་གསུམ་པ་བཏང་སྟེ། ཟླ་ ༨ ཚེས་ ༢༧ སྔ་དྲོའི་ཆུ་ཚོད་ ༡༡ ནང་ཚུད་ཞུ་ལན་ཡིག་ཆ་ཁག་འཐུས་གཙང་འབུལ་ཆེད་ངོ་བཅར་དགོས་པ་དང་། གལ་སྲིད་དེ་ལྟར་མ་བྱུང་ཚེ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༡༣ ནང་གསེས་ ༢ པ་དང་། སྤྱི་མང་གཏུག་བཤེར་གྱི་དོན་ཚན་ ༢༨ ནང་གསེས་༼ཁ༽ པའི་འབྲུ་དོན་འབྲེལ་བ་ཆགས་རྒྱུ་ཡིན་ཚུལ་བརྗོད་ཀྱང་། བསྟན་འཛིན་རྡོ་རྗེ་དུས་བཀག་ཉིན་མཐའ་མར་ངོ་བཅར་བྱས་ཀྱང་། རྩོད་ལན་པ་གསུམ་གྱིས་གྱོད་ཡ་མོས་མཐུན་ཆོད་ཡིག་ལ་མིང་རྟགས་དང་། ལག་བསྟར་དམ་ཡིག ཞུ་ལན་བཅས་གང་ཡང་སྒྲུབ་མེད་པའི་ཐོག ཁྲིམས་ཡིག་གི་ཆ་རྐྱེན་མ་ཚང་བའི་སྙན་ཞུ་ཞིག་ཕུལ་ཡོད་ཀྱང་། ས་གནས་ཁྲིམས་ཁང་གིས་སྙན་ཞུ་དེ་ཕྱིར་སློག་བྱས་ཏེ། ཉིན་དེའི་དགོང་དྲོའི་ཆུ་ཚོད་ ༦།༠༠ པའི་བར་གོ་སྐབས་སྤྲད་དེ། བརྡ་ཐོ་གསུམ་པའི་ནང་གསལ་ལག་བསྟར་དགོས་ལུགས་བརྗོད་ཀྱང་དེ་ལྟར་བྱུང་ཡོད་མི་འདུག  

ཟླ་ ༩ ཚེས་ ༥ དང་ ༧ ། ༩ བཅས་སུ་བརྡ་ཐོ་ཐེངས་བཞི་པ་སྟར་ཆཊ་སུ་བཏང་སྟེ། ཕྱི་ཟླ་ ༡༠ ཚེས་ ༨ སྔ་དྲོའི་ཆུ་ཚོད་ ༡༡ ནང་ཚུད། རྩོད་ལན་པ་ཉིད་དམ། ཁྲིམས་རྩོད་པ། ཁྲིམས་ལུཊ་ལྟར་གྱི་འཐུས་མི་བཅས་གང་རུང་ངོ་བཅར་ཞུ་དགོས་ཚུལ་བརྗོད་དེ། བརྡ་ཐོ་མཐའ་མ་དེར་བརྩི་བཀུར་ཉམས་ལེན་མ་བྱས་ཚེ་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དོན་ཚན་ ༢༨ འབྲུ་དོན་ལག་བསྟར་རྒྱུ་ཡིན་ཚུལ་བརྗོད་ཀྱང་། རྩོད་ལན་པ་གསུམ་གྱིས་བརྡ་ཐོ་རྩིས་ལེན་མ་བྱས་པ་དང་། བརྡ་ཐོའི་ནང་གསལ་གྱི་གཏན་འབེབས་དུས་ཚོད་ཉིན་ངོ་བཅར་མ་བྱས་སྟབས། ས་གནས་ཁྲིམས་ཞིབ་ཁང་གིས་གྱོད་ཡ་རྩོད་ལན་པ་གསུམ་གྱི་གདམ་བྱ་འདེམས་བྱེད་ཀྱི་ཐོབ་དབང་འཕྲོད་ཡོད་འདུག

མཐའ་མའི་བཀའ་ཁྱབ་ནང་བཀོད་དོན། “ གྱོད་ཡ་རྩོད་ལན་པ་གསུམ་ནས་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དོན་ཚན་ ༢༨ ནང་གསེས་༼ཀ༽པའི་ནང་གསལ་བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་གསུམ་པའི་ནང་གསེས་ ༢༽ པའི་དགོངས་དོན་བོད་ཀྱི་ཡུལ་མི་ཚང་མས་སྒྲུབ་དགོས་པའི་ལས་འགན་མ་སྒྲུབ་པ་ཕྱོགས་འགལ་བྱས་པ་དང་། ཁྲིམས་ཡིག་འདིའི་དོན་ཚན་བཅུ་གསུམ་པའི་ནང་གསེས་༼ཀ༽པའི་ནང་གསལ་གྱོད་ཡ་མོས་མཐུན་ཆོད་ཡིག་དང་ལག་བསྟར་དམ་ཡིག་མ་བཟོས་པ་རྩ་འགལ་སོང་བར་བརྟེན། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༢༨ ནང་གསེས༼ཁ༽ པའི་ནང་གསལ་ཆ་རྐྱེན་འོག་ཁ་གཏད་གྱོད་ཡ་རྩོད་ལན་པ་དང་པོ་བོད་ཀྱི་སྨན་རྩིས་ཁང་གི་སྤྱི་ཁྱབ་དབུ་འཛིན་ཚེ་རིང་བཀྲ་ཤིས་དང་། གྱོད་ཡ་རྩོད་ལན་པ་གཉིས་པ་བོད་ཀྱི་སྨན་རྩིས་ཁང་གི་དྲུང་ཆེ་ཚེ་རིང་ཕུན་ཚོགས། གྱོད་ཡ་རྩོད་ལན་པ་གསུམ་པ་བོད་ཀྱི་སྨན་རྩིས་ཁང་གི་དམིགས་བསལ་ལས་རིགས་འབྲེལ་མཐུད་པ་བསྟན་འཛིན་རྡོ་རྗེ་བཅས་ནས་བོད་ཀྱི་ཡུལ་མིའི་ལས་འགན་མ་བསྒྲུབས་པ་དེར་སྔར་བཤགས་ཕྱིས་འདོམས་མ་བྱས་པར། བཙན་བྱོལ་བོད་མིའི་སྤྱི་ཚོགས་ནང་འོས་བསྡུའི་རིགས་ཀྱི་གདམ་བྱ་འདེམས་བྱེད་ཀྱི་ཐོབ་དབང་མེད་པའི་ཐག་གཅོད་བྱས་པ་ཡིན་ན། དེ་དོན་འབྲེལ་ཡོད་ནས་ཕྱག་བཞེས་ལག་བསྟར་གནང་དགོས་རྒྱུ་བཅས་ཀྱི་བཀའ་ཁྱབ་ཏུ” ཞེས་བཀོད་འདུག 

བཀའ་ཁྱབ་ཡིག་ཆའི་ངོས་བཤུས་དེ་གྱོད་ཡ་རྩོད་ལན་པ་དང་ཞུ་སྦྱོར་བ། བོད་མིའི་སྒྲིག་འཛུགས་དབུས་འོས་བསྡུ་ལྷན་ཁང་། ཆེས་མཐོའི་ཁྲིམས་ཞིབ་ཁང་། སྤྱི་འཐུས་ལྷན་ཁང་། བཀའ་ཤག ངྷ་རམ་ས་ལ་དང་ལྡེ་ར་རྡུན་ས་གནས་འོས་བསྡུ་ལས་ཁང་དང་ས་གནས་མགོ་འཛིན། ས་གནས་འཐུས་མིའི་ཚོགས་འདུ་སོགས་ལ་ཕུལ་ཡོད་འདུག

གསར་འགོད་པ། དོན་གོ