རེས་གཟའ་ལྷག་པ་ཉིན་གྱི་དགོང་མོར་ན་གོར་མོ་མེ་འཁོར་འབབ་ཚིཊ་སུ་མེ་འཁོར་གཉིས་གདོང་ཐུག་བརྒྱབ་སྟེ། མི་ ༥༠ ལྷག་ལ་རྨས་སྐྱོན་དང་མི་ ༡ རྐྱེན་འདས་སུ་གྱུར་ཡོད་འདུག
ཟླ་འདིའི་ཕྱི་ཚེས་ ༢༣ ཉིན་གྱི་དགོང་མོའི་རྒྱ་ནག་གི་ཆུ་ཚོད་ ༨ དང་སྐར་མ་ ༡༠ ཙམ་ལ། ན་གོར་མོ་མེ་འཁོར་འབབ་ཚིགས་སུ་ཟི་ལིང་གྲོང་ཁྱེར་ནས་ཡོང་བའི་མེ་འཁོར་ཨང་ ༧༥༨༡ ཅན་དང་། ན་གོར་མོའི་ཤར་རྒྱུད་མཚོ་བོད་ལྕགས་ལམ་བཟོ་སྐྲུན་ཁང་གི་མེ་འཁོར་སྟོང་པ་ཞིག་གདོང་ཐུག་བརྒྱབ་སྟེ། མི་ ༥༠ ལྷག་ལ་རྨས་སྐྱོན་ཕོག་ཡོད་པ་ལས། མི་ ༤ རྨས་སྐྱོན་ལྕི་མོ་ཕོག་ཡོད་པ་དང་མི་ ༡ རྐྱེན་འདས་སུ་ཕྱིན་ཡོད་འདུག
དོན་རྐྱེན་བྱུང་རྗེས་གོང་རིམ་གྱི་བཀའ་བཀོད་ལྟར། ཡུལ་དངོས་སུ་ཉེན་རྟོག་པ་ ༡༧༠ དང་དྲག་ཆས་ཉེན་རྟོག་པ་ ༡༢༠། སྨན་གཡོག་མི་སྣ་ ༡༠༠ ལྷག མྱུར་སྐྱོབ་རླངས་འཁོར་ ༦། དེ་མིན་གྱི་རླངས་འཁོར ༡༠༠ ལྷག་འབྱོར་ཏེ་མྱུར་སྐྱོབ་དང་ཡུལ་དངོས་གཙང་བཟོ་བྱས་ཡོད་འདུག
རྒྱ་གཞུང་གིས་ཕྱི་ལོ་ ༢༠༠༦ ཟླ་ ༧ ཚེས་ ༡ ཉིན་གོང་གསལ་ལྕགས་ལམ་དེ་ཡོངས་སུ་སྒོ་འབྱེད་ཀྱིས་ཕྱི་ཚེས་ ༢ ཉིན་གྱི་ཞོགས་པར་མཚོ་བོད་ལྕགས་ལམ་གྱི་མེ་འཁོར་ཐེངས་དང་པོ་བོད་ཀྱི་རྒྱལ་ས་ལྷ་ས་རུ་འབྱོར་ཡོད་པ་དང་། ན་གོར་མོ་མེ་འཁོར་འབབ་ཚིགས་ནི་མཚོ་བོད་ལྕགས་ལམ་ཟེར་བའི་འབབ་ཚིགས་ཨང་གཉིས་པ་ཡིན་ལ། ཕྱི་ལོ ༡༩༧༩ ལོར་རྒྱ་མཚོའི་ངོས་ལས་མཐོ་ཚད་རྨིའུ་ ༢༨༢༩ ཡོད་པའི་ན་གོར་མོ་གྲོང་ཁྱེར་དུ་གསར་འཛུགས་བྱས་ཡོད་འདུག
