ཁྲིན་ལ་ ༢༠༡༣ ལོའི་རང་དབང་གཟེངས་རྟཊ་ཐོབ།

ཟླ་འདིའི་ཕྱི་ཚེས་ ༢༣ ཉིན་རྒྱ་ནག་གི་སྤྱི་མང་ཐོབ་ཐང་རྩོད་ལེན་པ་ཁྲིན་ཀང་ཁྲུན་ལ་ཨ་རིའི་འགྲོ་བ་མིའི་ཐོབ་ཐང་ཚོགས་པ་ཞིག་གིས་ ༢༠༡༣ ལོའི་རང་དབང་གཟེངས་རྟགས་ཕུལ་ཡོད་འདུག

ཟླ་འདིའི་ཕྱི་ཚེས་ ༢༣ ཉིན་གྱི་དགོང་མོར་ཨ་རིའི་རྒྱལ་ས་ཝ་ཤིང་ཊོན་གྱི་གསར་འགྱུར་དངོས་མང་བཤམ་སྟོན་ཁང་དུ། ཨ་རིའི་གཞུང་འབྲེལ་མ་ཡིན་པའི་འགྲོ་བ་མིའི་ཐོབ་ཐང་ཚོགས་པ་ཞིག་གིས། ཡུན་རིང་རྒྱ་ནག་གི་དབུལ་ཕོངས་ཞིང་བ་མི་མང་དང་བུད་མེད་སོགས་ཀྱི་ཐོབ་ཐང་རྩོད་ལེན་པ་མིག་གཉིས་ལོང་བ་པ་ཁྲིན་ཀང་ཁྲུན་ལ་ ༢༠༡༣ ལོའི་རང་དབང་གཟེངས་རྟགས་ཕུལ་ཡོད་པ་དང་། དེ་བཞིན། ཨ་རིའི་གྲོས་ཚོགས་ཀྱི་དམངས་གཙོ་ཚོགས་པའི་འཐུས་མི་བྷེན་ཇེ་མིན་ཁཱར་ཌན་ (Benjamin – Cardin)དང་ཇེམ་མེཀ་གྷ་ཧྥི་(Jim – McGuffey )། སྤྱི་མཐུན་ཚོགས་པའི་འཐུས་མི་ཇོན་མེཀ་ཁཱན་(John McCain)དང་ལྕམ་རོ་སི་ལི་ཊི་ནེན་(Ros-Lehtinen)བཅས་ཀྱིས། ༢༠༠༩ ལོར་འདས་གྲོངས་སུ་གྱུར་བའི་རཱ་ཤི་ཡའི་ཁྲིམས་རྩོད་པ་སིར་གྷི་མཱ་ནའི་སི་ཀི་(Sergei Magnitsky )ཡི་གནད་དོན་ཐད་གྲོས་ཚོགས་ནང་དབུ་ཁྲིད་ཀྱི་ནུས་པ་ངེས་ཅན་ཐོན་པའི་ཆེད་བསྟོད་དུ་གཟེངས་རྟགས་དེ་ཕུལ་ཡོད་འདུག

སྐབས་དེར་ཁྲིན་ཀང་ཁྲུན་གྱིས་གཟེངས་རྟགས་དེ་དང་སྔོན་ཆད་ཀྱི་གྲུབ་འབྲས་ཀྱིས་ཁོ་བོའི་འདས་ཟིན་པ་ཞིག་གསལ་བཤད་བྱེད་ཀྱི་ཡོད་ལ། ཆེས་གལ་ཆེ་བ་ནི་མ་འོངས་པར་ཅི་ཞིག་བསྒྲུབ་རྒྱུ་དེ་ཡིན་ལ། ད་ལྟའང་རྒྱ་ནག་ནང་མི་ཧ་ཅང་མང་པོ་ཞིག་གིས་དབང་ཆ་གཅིག་སྡུད་པའི་བརྙས་བཅོས་དང་བཙན་གནོན་མྱོང་བཞིན་ཡོད་པ་ལྟར། ཉེ་བའི་ཆར་རྒྱ་རིགས་དམངས་གཙོ་དོན་གཉེར་བ་ཚའོ་སུན་ལི་དང་ཀོ་ཧྥེ་ཤོང་། ཀོ་ཀྲི་ཧྲིན། ཐང་ཅེ་ཐེན་སོགས་ཀྱིས་འགྲོ་བ་མིའི་གཞི་རྩའི་ཐོབ་ཐང་རྩོད་ལེན་བྱས་རྐྱེན་འཛིན་བཟུང་བཀག་ཉར་བྱས་ཡོད། ཡིན་ནའང་། དེང་སྐབས་རྒྱ་ནག་ནང་མི་མང་གི་སོ་སོའི་ཁེ་དབང་སྲུང་སྐྱོབ་ཀྱི་འདུ་ཤེས་མངོན་གསལ་གྱིས་ཤུགས་དྲག་ཏུ་འགྱུར་བཞིན་ཡོད་པ་མ་ཟད། རིམ་གྱིས་དབང་ཆ་གཅིག་སྡུད་པའི་འཇིགས་སྐུལ་ལས་རྣམ་པར་རྒྱལ་གྱི་ཡོད་སྐོར་བརྗོད་འདུག

གསར་འགོད་པ། པདྨ་མཚོ།