དཔལ་འབྱོར་སྲིད་ཇུས་ཐོག་བཅོས་བསྒྱུར་གཏོང་སྲིད།

རྒྱ་ནག་དམར་ཤོག་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་པེ་ཅིན་དུ་ཚོགས་བཞིན་ཡོད་ཅིང་ཐེངས་འདིར་རྒྱ་ནག་གི་དཔལ་འབྱོར་དང་སྤྱི་ཚོགས་སྐོར་ལ་བཅོས་བསྒྱུར་ཁག་ཅིག་གཏོང་འཆར་ཡོད་འདུག

ཟླ་འདིའི་ཚེས་ ༩ ཉིན་ནས་བཟུང་ཉིན་བཞིའི་རིང་རྒྱ་ནག་དམར་ཤོག་ཚོགས་པའི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་པེ་ཅིན་དུ་འཚོགས་བཞིན་ཡོད་པ་དང་། ཚོགས་འདུ་འདིའི་སྟེང་རྒྱ་ནག་ཁེ་ལས་དང་གཞུང་འཛིན་ཁེ་ལས། དེ་བཞིན་ཁང་པ་དེབ་སྐྱེལ་བྱེད་ཕྱོགས་བཅས་ཀྱི་སྲིད་ཇུས་སོགས་ལ་གྲོས་བསྡུར་ཐག་གཅོད་བྱེད་རྒྱུ་ཡིན་འདུག རྒྱ་ནག་དམར་ཤོག་ཚོགས་པའི་དཔོན་རིགས་མཐོ་གྲས་ (Yu Zhengsheng )ཞེས་པས་ཐེངས་འདིར་རྒྱ་ནག་གི་དཔལ་འབྱོར་དང་སྤྱི་ཚོགས་ཀྱི་གནད་དོན་ཐོག་སྔར་བྱུང་མ་མྱོང་བའི་བཅོས་བསྒྱུར་ཞིག་གཏོང་འཆར་ཡོད་ཅེས་བརྗོད་འདུག

རྒྱ་ནག་འཕེལ་རྒྱས་རྟོག་ཞིབ་ཚོགས་ཆུང་གིས་བརྗོད་པ་ལྟར་ན། ཐེངས་འདིར་གཞི་རྒྱ་ཆེ་བའི་གནད་དོན་གསུམ་དང་སྡེ་ཁག་བརྒྱད་ཀྱི་ཐོག་བཅོས་བསྒྱུར་བྱེད་འཆར་ཡོད་པ་དང་། དེའི་མིང་ལ་ ༣༨༣ འཆར་འགོད་བཅོས་བསྒྱུར་བྱེད་སྒོ་ཟེར་ཞིང་། འདིའི་ཐོག་ཁྲོམ་ར་གུ་ཡངས་དང་གསར་གཏོད། འགྲན་བསྡུར། དེ་བཞིན་རྒྱལ་ཁབ་ཀྱི་ཆབ་སྲིད་གནས་སྟངས་ཐད་ཕྱི་གསལ་ནང་གསལ་དགོས་པའི་སྐོར་གླེང་སློང་བྱེད་རྒྱུ་ཡིན་འདུག འོན་ཀྱང་རྒྱ་ནག་སྐོར་ལ་ཉམས་ཞིབ་བྱེད་མཁན་ཚོས་ཐེངས་འདིར་རྒྱ་ནག་གི་དཔལ་འབྱོར་དང་སྤྱི་ཚོགས་གནད་དོན་ཐོག་གྲོས་བསྡུར་ཐག་གཅོད་གནང་རྒྱུ་ལས་ཆབ་སྲིད་ཐོག་གླེང་སློང་བྱེད་འཆར་མེད་སྐོར་བརྗོད་འདུག

ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་ནི་རྒྱ་ནག་གི་མགོ་ཁྲིད་གསར་པས་ཆབ་སྲིད་འགན་དབང་འཁུར་རྗེས་ཀྱི་ཚོགས་འདུ་གལ་ཆེ་ཞིག་ཡིན་པ་དང་། དེ་སྔའི་རྒྱ་ནག་གི་མགོ་ཁྲིད་ཚོའི་ཚང་འཛོམས་གྲོས་ཚོགས་ཐེངས་གསུམ་པ་དག་གི་སྐབས་ལ་འཛུགས་སྐྲུན་འཕེལ་རྒྱས་ཐོག་འདུན་སྐྱོད་ཆེན་པོ་བྱུང་ཡོད་འདུག ཕྱི་ལོ་ ༡༩༧༨ ལོའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྐབས་ཏིན་ཞོ་ཕིན་གྱིས་དཔལ་འབྱོར་གུ་ཡངས་སྲིད་ཇུས་བཟུང་སྟེ་དཔལ་འབྱོར་ཡར་རྒྱས་ཆེན་པོ་བྱུང་ཡོད་པ་དང་། ༡༩༩༣ ལོར་ཀྲུག་རོང་ཅི་ཡིས་སྤྱི་ཚོགས་རིང་ལུགས་ཀྱི་དཔལ་འབྱོར་སྲིད་ཇུས་རྒྱུན་འཁྱོངས་བྱས་ཏེ་གཞུང་འཛིན་ཁེ་ལས་གཙོ་གྲས་ཁག་སྒོ་བརྒྱབ་སྟེ་སྒེར་གཉེར་ཁེ་ལས་མང་པོ་འཛུགས་སྐྲུན་བྱེད་པར་སྐུལ་འདེད་བྱས་ཡོད། འོན་ཀྱང་ཐེངས་འདིར་ཞི་ཅིན་ཕིན་གྱིས་སྣེ་འཁྲིད་པའི་རྒྱ་ནག་མི་རབས་གསར་པའི་མགོ་ཁྲིད་ཚོས་དཔལ་འབྱོར་གུ་ཡངས་སྲིད་ཇུས་དང་ཚོང་འབྲེལ། ལྐོག་ཟ་རུལ་སུངས་བཅས་ཀྱི་ཐད་རྡུང་རྡེག་གཏོང་རྒྱུ་ལས་ཆབ་སྲིད་ལམ་ལུགས་ཐོག་བསྒྱུར་བཅོས་གཏོང་འཆར་མེད་པའི་སྐོར་བརྒྱུད་ལམ་ཁག་ནང་ཐོན་འདུག

ཀྲུང་ཨུ་ཚང་འཛོམས་གྲོས་ཚོགས་ཞེས་པ་ནི། རྒྱ་ནག་གི་དམག་དོན་དང་དམར་ཤོག་ཚོགས་པའི་དཔོན་རིགས། དེ་བཞིན་གཞུང་གི་དཔོན་རིགས་མཐོ་གྲས་ ༣༧༦ ལས་གྲུབ་པ་ཞིག་ཡིན་པ་དང་།  ལོ་གཅིག་ལ་ཐེངས་གཅིག་གམ་གཉིས་འཛོམས་ཏེ་གནད་དོན་འདྲ་མིན་ཐོག་གླེང་སློང་དང་ཐག་གཅོད་བྱེད་ཀྱི་ཡོད་འདུག རྒྱ་ནག་གི་མི་རབས་གསར་པའི་མགོ་ཁྲིད་ཚོས་སྐྱོང་བཞིན་པའི་ཚང་འཛོམས་གྲོས་ཚོགས་ཐེངས་གསུམ་པའི་སྐབས། རྒྱ་ནག་གི་ས་གནས་འདྲ་མིན་ནང་མི་མང་གིས་ངོ་རྒོལ་སྐད་འབོད་བྱེད་ཀྱི་ཡོད་འདུག