དེ་
རིང་ཤི་རི་ལན་ཁར་དབྱིན་ཇིས་བཙན་བཟུང་བྱས་མྱོང་མཁན་རྒྱལ་ཁབ་ཁག་གི་ཚོགས་འདུ་ཞིག་ཚོགས་པ་དང་འབྲེལ་ཤི་རི་ལན་ཁ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་ཁ་རྡུང་བཏང་།
དེ་རིང་སྔོན་མ་དབྱིན་ཇིའི་བཙན་འོག་ཏུ་ཚུད་མྱོང་བའི་མནའ་མཐུན་རྒྱལ་ཁབ་ཁག་ (Common Wealth Nation )གི་ཚོགས་འདུ་ཐེངས་ ༢༣ པ་དེ་ཤི་རི་ལན་ཁའི་རྒྱལ་སར་ཉིན་གསུམ་རིང་བསྐྱང་མགོ་ཚུགས་ཡོད་ཅིང་། ཚོགས་འདུ་དེར་རྒྱ་གར་དང་དབྱིན་ཡུལ། ཁེ་ན་ཌ། ཨོ་སི་ཊོ་ལི་ཡ། པ་ཀི་སི་ཐན་སོགས་རྒྱལ་ཁབ་ ༥༣ གྱི་སྐུ་ཚབ་མཉམ་ཞུགས་བྱས་ཡོད་འདུག ཚོགས་འདུའི་དབུ་འབྱེད་ཀྱི་སྐུ་མགྲོན་གཙོ་བོ་དབྱིན་ལན་གྱི་རྒྱལ་སྲས་ཅལ་(Charles) ཡིན་པ་དང་། ཚོགས་འདུ་གཙོ་སྐྱོང་གནང་མཁན་ཤི་རི་ལན་ཁའི་སྲིད་འཛིན་མ་ཧིན་ཏ་ར་ཇེ་པག་སི་ ( Mahinda Rajapaksa) ཡིན་འདུག
ཚོགས་འདུ་དེའི་ནང་ད་ལྟ་འཛམ་གླིང་ཐོག་འཕྲད་བཞིན་པའི་དཀའ་ངལ་ཁག་གཙོ་བོར་བཟུང་སྟེ་འཛམ་གླིང་ཞི་བདེ་དང་སྲུང་སྐྱོབ། དམངས་གཙོ། རྒྱལ་ཁབ་འཛིན་སྐྱོང་བྱེད་སྟངས། རྒྱུན་གནས་འཕེལ་རྒྱས། བུ་ལོན་སྟངས་འཛིན། ཤེས་ཡོན། ཁོར་ཡུག་སྲུང་སྐྱོབ། ཕོ་མོ་འདྲ་མཉམ། འཕྲོད་བསྟེན། འགྲོ་བ་མིའི་ཐོབ་ཐང་། བརྡ་འཕྲིན་ཚན་རྩལ། ཁྲིམས་ལུགས། དེ་བཞིན་རྒྱལ་ཁབ་ཕན་ཚུན་བར་ཚོང་འབྲེལ་བྱེད་ཕྱོགས་སོགས་གྱི་ཐོག་གྲོས་བསྡུར་གནང་འཆར་ཡོད་འདུག
རྒྱ་གར་གྱི་སྲིད་བློན་མན་མོ་ཧན་སིན་དང་ཁེ་ན་ཌའི་སྲིད་བློན་སེ་ཀྲི་ཕིན་ (Stephen Harper) ལགས། མོ་རི་ཤི་ཡ་ཡི་སྲིད་བློན་ཎ་འོན་ ( Navin Ramgoolam) སོགས་ཚོགས་འདུ་དེར་མཉམ་ཞུགས་གནང་མེད་ཅིང་། དེའི་ཐད་ཆབ་སྲིད་དབྱེ་ཞིབ་པ་ཚོས། ད་ལྟའི་ཤི་རི་ལན་ཁའི་སྲིད་འཛིན་གྱིས་ ༢༠༠༩ ལོར་འདས་པའི་ལོ་མང་རིང་ཤི་རི་ལན་ཁའི་ནང་འཚོ་སྡོད་བྱེད་བཞིན་པའི་ཏ་མིལ་མི་རིགས་མཐར་སྐྲོད་གཏོང་ཆེད། དྲག་ཆས་དམག་མི་ཕོན་ཆེ་བཏང་སྟེ་ཏ་མིལ་མི་མང་ཁྲི་ ༤ ཙམ་དམར་གསོད་དང་། གྲངས་ཉུང་མི་རིགས་ཁག་ལ་འགྲོ་བ་མིའི་ཐོབ་ཐང་སྤྲད་མེད་པ་སོགས་ལ་བརྟེན་ཏེ་ཐེངས་འདིར་རྒྱ་གར་གྱི་སྲིད་བློན་ཚོགས་ཞུགས་གནང་མེད་སྐོར་བརྗོད་འདུག
དེ་བཞིན། ཁེ་ན་ཌའི་སྲིད་བློན་སེ་ཀྲི་ཕིན་དང་མོ་རི་ཤི་ཡ་ཡི་སྲིད་བློན་ཎ་འོན་གཉིས་ཚོགས་འདུར་ཞུགས་མེད་པའི་ཐད། ཤི་རི་ལན་ཁའི་གཞུང་གིས་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་ལ་བརྩི་སྲུང་བྱེད་ཀྱི་མེད་པ་མ་ཟད། ཆེས་མཐོའི་ཁྲིམས་ཁང་གི་ཁྲིམས་ཞིབ་པ་ཆེན་མོ་དང་གསར་འགོད་པ་མང་པོ་གནས་དབྱུང་བཏང་བ། ད་དུང་བུད་མེད་ལ་བཙན་གཡེམ་སོགས་མི་སྤྱོད་ལས་འདས་པའི་གནས་ཚུལ་སྣ་ཚོགས་བྱུང་དང་འབྱུང་བཞིན་ཡོད་སྟབས་ཚོགས་འདུའི་ནང་ཆ་ཤས་བླངས་མེད་ཚུལ་བརྗོད་འདུག
དབྱིན་ལན་གྱི་སྲིད་བློན་ཌ་ཝུ་ཀྲི་ཀམ་རོན་ནས་ཀྱང་། ཤི་རི་ལན་ཁ་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་དང་། ཉེས་མེད་མི་སེར་མང་པོར་མནར་གཅོད་གཏོང་གི་ཡོད་པ་ནི་ཆེས་ཐབས་རྡུགས་ཡིན་ཚུལ་དང་། ཚབས་ཆེའི་གནད་དོན་དེ་རིགས་ལ་ཞིབ་འཇུག་ཡག་པོ་བྱེད་དགོས་པའི་གླེང་སློང་བྱས་ཡོད་འདུག འོན་ཀྱང་། ཤི་རི་ལན་ཁ་གཞུང་གིས་སྲིད་བློན་ཌ་ཝུ་ཀྲི་ཡིས་ཉེས་མེད་ཉེས་འཛུགས་བྱས་པ་ཞིག་ལས་དོན་དངོས་མིན་ཚུལ་དང་འབྲེལ་དབྱིན་ལན་ནི་བཙན་རྒྱལ་རིང་ལུགས་ཀྱི་རྒྱལ་ཁབ་ཅིག་ཡིན་སྐོར་ལན་འདེབས་བྱས་འདུག ད་ལྟ་མནའ་འབྲེལ་རྒྱལ་ཁབ་ཀྱི་ཚོགས་འདུ་དེར་ལྟ་བ་དང་ལངས་ཕྱོགས་མཐུན་མིན་དབང་གིས་ཤོག་ཁག་གཉིས་ཆགས་བཞིན་ཡོད་འདུག
མནའ་མཐུན་རྒྱལ་ཁབ་མཐུན་ཚོགས་(Common Wealth Nation ) ཞེས་པ་དེ་ནི། དམག་ཆེན་གཉིས་པའི་གོང་དབྱིན་ཇི་བཙན་རྒྱལ་རིང་ལུགས་འོག་ཡོད་པའི་རྒྱལ་ཁབ་ཁག་གིས་ཆེད་འཛུགས་བྱས་པའི་བདེན་སྐྱོང་བདེ་ཚོགས་ཤིག་ཡིན་པ་དང་། མཐུན་ཚོགས་འདིས་ད་བར་ཚོགས་འདུ་ཐེངས་ ༢༣ ཙམ་འཚོགས་ཡོད་འདུག
