དེ་རིང་བོད་མིའི་སྒྲིག་འཛུགས་ཀྱིས་འདས་པའི་ལོ་ངོ་བརྒྱད་དགུའི་གོང་གི་གནས་ཚུལ་ཞིག་ལ། སྤྱི་སྐལ་སྒེར་སྤྱོད་བྱེད་མཁན་དུ་ངོས་འཛིན་བྱས་ཡོད་པའི་གནས་ཚུལ་ཕྱིར་བསྒྲགས་བྱས་འདུག
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་རང་ཁོངས་ལས་བྱེད་སྐལ་བཟང་ཚེ་རིང་ཟེར་བ་ཞིག་ ༢༠༠༥ ལོ་དང་། ཕུན་ཚོགས་ཚེ་རིང་ཟེར་བ་ཞིག་ ༢༠༠༤ ལོ་བཅས་སོ་སོར། གཞུང་འབྲེལ་ཐོག་ཨ་རིར་བཏང་སྟེ་ཕྱིར་ལོག་རྗེས་ཉུང་མཐར་ལོ་གསུམ་རིང་ཕྱག་ལས་གནང་དགོས་པ་དང་། གལ་སྲིད་མ་གནང་ཚེས་སྐལ་བཟང་ཚེ་རིང་ལ་ཨ་སྒོར་ ༦༠༠༠ དང་། ཕུན་ཚོགས་ཚེ་རིང་ལ་ཨ་སྒོར་ ༥༠༠༠ བཅས་ཀྱི་གུན་གསབ་སྤྲོད་དགོས་པའི་གན་རྒྱ་བཞག་ཡོད་ཅིང་། ལས་བྱེད་དེ་གཉིས་དུས་ལྟར་ཕྱིར་ལོག་ཡོད་ཀྱང་ལོ་གསུམ་རིང་ཕྱག་ལས་མ་གནང་བར་དགོངས་པ་ཞུས་ཡོད་པ་མ་ཟད་གུན་གསབ་དངུལ་ཡང་སྤྲད་མེད་སྟབས། ཐེངས་འདིར་བོད་མིའི་སྒྲིག་འཛུགས་ཀྱིས་སྤྱི་སྐལ་སྒེར་སྤྱོད་བྱེད་མཁན་དུ་ངོས་འཛིན་གྱི་གསལ་བསྒྲགས་སྤེལ་འདུག
གསལ་བསྒྲགས་ནང་སྐལ་བཟང་ཚེ་རིང་གི་སྐོར་བཀོད་དོན། ༼ འཕྲོད་བསྟེན་ལས་ཁུངས་ཀྱི་གྲངས་ཐོ་ཕྱོགས་བསྡུའི་སྡེ་ཚན་གྱི་འགན་འཛིན་ཟུར་པ་རང་ཁོངས་ལས་བྱེད་སྐལ་བཟང་ཚེ་རིང་ལགས་ཕྱི་ལོ་ ༢༠༠༥ ཕྱི་ཟླ་ ༡༡ ནང་ཨ་རི་ཨི་ཌ་ལན་ཌའི་སི་ཀྲི་སི་རོགས་ཚོགས་འོག་ཨ་རིར་བདུན་གསུམ་རིང་གྲངས་ཐོ་ བསྡུ་ལེན་གྱི་སྦྱོང་བརྡར་ཆེད་བཏང་གཉིས་མོས་ཆོད་གན་གཞིར་བཟུང་སྦྱོང་བརྡར་ ཟིན་རྗེས་ཉུང་མཐར་ལོ་གསུམ་རིང་འདི་ལས་སུ་ལས་འཁུར་ཞུ་དགོས་པ་དང་། ཅི་སྟེ་མ་ཞུས་ཚེ་གོ་སྐབས་གནང་བའི་གུན་གསབ་དོད་ཨ་སྒོར་ ༦༠༠༠ འདི་ལས་སུ་སྒྲུབ་དགོས་གསལ་ཡོད། ཁོ་པ་ཨ་རི་ནས་ཕྱིར་ལོག་བྱུང་རྗེས་བདུན་གཅིག་ཙམ་ལས་འཁུར་རྗེས་ཐོབ་གསེང་ ཞུས་ཐོག་རང་མཚམས་ལས་བཅར་མ་ཞུས་སྟབས་ཆོད་གན་འབྲུ་དོན་ཨ་སྒོར་ ༦༠༠༠ ཡོང་བསྡད་སྐོར་རྩིས་ལོ་ ༢༠༠༥།༠༦ ནས་བཟུང་རྩིས་ཞིབ་སྙན་ཐོའི་ནང་ལོ་བསྟུད་མར་ཡོང་བསྡད་གསལ་བཞིན་པར་ཕན་སླད་ཁོ་ པའི་གསོག་དངུལ་སྒོར་ ༤༠༠༤༦།༠༠ གཅོག་འཐེན་ཞུས་འཕྲོས་དངུལ་ལྷག་ཕྱིར་བསྡུས་རྩིས་གཙང་ཡོང་སླད་ཨ་རི་སྐུ་ཚབ་ དོན་གཅོད་ལས་ཁུངས་དང་། རྡ་སར་གནས་འཁོད་ཁོ་པའི་ཁག་འཐེགས་ལྷག་པ་སྒྲོལ་མར་འབྲེལ་གཏུགས་ཀྱིས་སྔ་རྗེས་ བརྡ་དེད་ལན་མང་བྱས་ཀྱང་དོ་བདག་ནས་ཡ་ལན་ཙམ་མེད་སྟབས། ད་ཆ་དོ་བདག་སྐལ་བཟང་ཚེ་རིང་གིས་སྤྱི་སྐལ་བསམ་བཞིན་སྒྲུབ་འཇལ་ཞུ་འདོད་མེད་ པར་སྤྱི་སྐལ་སྒེར་སྤྱོད་བྱེད་མཁན་ཞིག་ཏུ་ངོས་འཛིན་ཞུས་པའི་གསལ་བསྒྲགས་སུ།༽ ཞེས་བཀོད་འདུག
གཉིས་པ། ཕུན་ཚོགས་ཚེ་རིང་སྐོར་བཀོད་དོན། ༼ འཕྲོད་བསྟེན་ལས་ཁུངས་ཀྱི་རང་ཁོངས་ལས་བྱེད་ཕུན་ཚོགས་ཚེ་རིང་ལགས་ཕྱི་ལོ་ ༢༠༠༤ ཟླ་ ༦ ནང་ཨ་རིར་ཟླ་གསུམ་རིང་སེམས་ནད་ལྟ་སྐྱོང་གི་ཟབ་སྦྱོང་ཆེད་བཏང་གིས་གཉིས་མོས་ ཆོད་གན་གཞིར་བཟུང་སྦྱོང་བརྡར་ཟིན་རྗེས་ཉུང་མཐར་ལོ་གསུམ་རིང་འདི་ལས་སུ་ལས་འཁུར་ཞུ་དགོས་པ་དང་། ཅི་སྟེ་མ་ཞུས་ཚེ་གོ་སྐབས་གནང་བའི་གུན་གསབ་དོད་ཨ་སྒོར་ ༥༠༠༠ འཛའ་འབབ་ཧིན་སྒོར་ ༢༢༥༠༠༠་༠༠ འདི་ལས་སུ་སྒྲུབ་དགོས་གསལ་ཡོད། ཁོ་པ་ཆོད་གན་གཞིར་བཟུང་ཨ་རི་ནས་ཕྱིར་འཁོར་གྱིས་ལོ་གཉིས་དང་ཟླ་བ་གཉིས་ཙམ་ ཞབས་ཞུས་རྗེས་ལོ་གསུམ་མ་གཙང་གོང་ཟླ་གཅིག་ཐོབ་གསེང་རྗེས་རང་མཚམས་ལས་བཅར་མ་ ཞུས་སྟབས་ཆོད་གན་འབྲུ་དོན་ཨ་སྒོར་ ༥༠༠༠ རྩིས་ལོ་ ༢༠༠༥།༠༦ ནས་བཟུང་རྩིས་ཞིབ་སྙན་ཐོའི་ནང་ལོ་བསྟུད་མར་ཡོང་བསྡད་གསལ་བཞིན་པར་ཕན་སླད་ཁོ་པའི་གསོག་དངུལ་དང་སྐྱེད་འབབ་བསྡོམས་སྒོར་ ༤༧༧༧༥།༧༧ གཅོག་འཐེན་ཞུས་འཕྲོས་དངུལ་ལྷག་ཕྱིར་བསྡུས་རྩིས་གཙང་ཡོང་སླད་ཨ་རི་སྐུ་ཚབ་དོན་གཅོད་ལས་ཁུངས་དང་། རྡ་སར་གནས་འཁོད་ཁོ་པའི་ཁག་འཐེགས་སྐུ་ཞབས་བློ་བཟང་ཡེ་ཤེས་ལགས་སུ་འབྲེལ་གཏུགས་ཀྱིས་སྔ་རྗེས་བརྡ་དེད་ལན་མང་བྱས་ཀྱང་དོ་བདག་ནས་ཡ་ལན་ཙམ་མེད་སྟབས། ད་ཆ་དོ་བདག་ཕུན་ཚོགས་ཚེ་རིང་གིས་སྤྱི་སྐལ་བསམ་བཞིན་སྒྲུབ་འཇལ་ཞུ་འདོད་མེད་པར་སྤྱི་སྐལ་སྒེར་སྤྱོད་བྱེད་མཁན་ཞིག་ཏུ་ངོས་འཛིན་མ་བྱས་ཐབས་མེད་བྱུང་བའི་གསལ་བསྒྲགས་སུ། ༽ ཞེས་བཀོད་འདུག
ད་ལན་མི་གཉིས་ནས་སྤྱི་རྒྱུ་སྒེར་ཟས་བྱས་པའི་གསལ་བསྒྲགས་གནང་བར་ཐུགས་རྗེ་ཆེ། ཡིན་ནའང་དབུས་གཙང་སྤྱི་འཐུས་ཟླ་བ་ཚེ་རིང་སོགས་ཁག་གཅིག་གིས་བོད་བཙན་བྱོལ་སྒྲིག་འཛུགས་ཀྱི་སྤྱི་རྒྱུ་བཟས་པ་ཡོངས་གྲགས་ཁྲིམས་མཐུན་གསལ་བསྒྲགས་ཟིན་པ་དེ་དག་གསལ་བསྒྲགས་ཡང་ཡང་དགོས་པ་ལས་མི་གནང་བའི་རྒྱུ་མཚན་ཅི་ཡིན་ན་?
གཞུང་གི་ལས་བྱེད་པ་ཞིག་གིས་ཨ་རིར་འགྲོ་རྒྱུ་འབྱུང་ན་གཞུང་རྒྱུ་དང་༸གོང་ས་མཆོག་སོགས་ལ་བརྩེ་མེད་བྱས་པ་ནི་ད་རེད་ཐེངས་དང་པོ་མ་རེད་ཨ་རིར་སློབ་སྦྱོང་བྱེད་པར་བཏང་བ་ནས་བཟུང་དེ་ལྟར་ཡིན་ནོ།
མི་ལ་ངོ་ཚ་མེད་ན་ཁྱི་ཡིན། ཁྱི་ལ་རྔ་མ་མེད་ན་འདྲེ་ཡིན།
སྤྱི་སྐལ་སྒེར་སྤྱོད་བྱེད་མཁན་དག་ནི་ཆོས་སྲིད་གང་གི་ཐད་ནས་གླེང་རུང་ཆེས་ཐ་ཤལ་བ་ཡིན་པས་སྤྱི་ཚོགས་ཀྱིས་དུས་ནམ་ཡང་ཁ་རྡུང་གཏོང་བར་འོས། འོན་ཀྱང་གནས་ཚུལ་འདི་ནི་ད་ལོ་བྱུང་བ་མིན་ལ་ན་ནིང་བྱུང་བའང་མིན་པར་ལོ་བརྒྱད་སྔོན་གྱི་གནས་ཚུལ་ཞིག་དེ་རིང་ལ་ཐུག་པའི་བར་དུ་འཕྲོད་བསྟེན་ལས་ཁུངས་ཀྱི་ཡིག་ཚགས་སུ་ཉར་དོན་ཅི་ཡིན་ནམ། ད་དུང་ཉར་བསྡད་པ་ག་ཚོད་ཡོད་དམ།
དེ་རིང་སྤོབས་པ་ཆེ་མདོག་གིས་སྤྱི་སྐལ་སྒེར་སྤྱོད་པ་རེད་ཅེས་ཕྱིར་བསྒྲགས་བྱས་པ་ཙམ་གྱིས་ཡོད་ཚད་མཇུག་རྫོགས་སོང་བ་མིན་པར་སྤྱི་སྐལ་སྒེར་སྤྱོད་པར་གོ་སྐབས་སྤྲོད་མཁན་དང་རྒྱབ་སྐྱོར་བྱེད་མཁན། ངན་སྤྱོད་དུས་ལྟར་ཐག་གཅོད་མ་བྱས་པར་སྙིང་རྗེ་ཆེ་མདོག་གིས་སྤྱི་སྐལ་སྒེར་སྤྱོད་པ་སྐྱག་ལང་ལ་གཏོང་མཁན་གྱི་ལས་ཀྱི་སྣེ་མོ་ལ་གཏོགས་པ་རྣམས་ཀྱི་བྱ་སྤྱོད་ལ་བཀའ་ཤག་གིས་ངེས་པར་དུ་དག་ཐེར་ནན་མོ་བྱ་དགོས་པར་འདོད། དེ་མིན་འུ་ཅག་གི་ཕྱི་གསལ་ནང་གསལ་གྱི་སྲིད་ཇུས་འདིའང་ནང་ནས་ལྟོས་ན་ཕྱི་མཐོང་རུང་ཕྱི་ནས་ལྟོས་ན་ནང་མི་མཐོང་བའི་སྲིད་ཇུས་ཤིག་ཏུ་འགྱུར་ཉེན་འདུག