༄༅། གུས་བརྩི་འོས་པའི་བོད་དོན་རྒྱབ་སྐྱོར་གནང་མཁན་རྒྱ་རིགས་སྤྱི་དང་། བྱེ་བྲག་རྒྱ་ནག་ནང་ཡོད་པའི་རྒྱ་རིགས་སྤུན་ཟླ། ཁྱད་པར་ཤེས་ཡོན་ཅན་དང༌། སློབ་ཕྲུག་བཅས་ལ་ང་ཚོ་ཨ་རིའི་མངའ་སྡེ་མི་ནི་སུད་ཀྲར་གནས་འཁོད་བོད་མི་ཡོངས་ནས་ཕྱི་ལོ་གསར་པ་ཚེས་ལ་ཉེ་བའི་སྐབས་འདིར་མཛའ་བརྩེའི་འཚམས་འདྲི་ཞུ་རྒྱུ་ཡིན།
བོད་རྒྱའི་མི་རིགས་གཉིས་ས་བབས་ཀྱིས་ཁྱིམ་མཚེས་སུ་གནས་ཏེ། ལོ་སྟོང་ཕྲག་གཉིས་ཙམ་གྱི་ལོ་རྒྱུས་རིང་པོའི་ནང་སྐབས་རེ་གཉེན་སྒྲིག་མཆོད་ཡོན་བཟང་ཕྱོགས་ཀྱི་འབྲེལ་བ་དང༌། སྐབས་རེར་དམག་འཁྲུག་རྒྱག་རེས་བྱས་པ་སོགས་ཡོད། འབྱུང་འགྱུར་ཕན་ཚུན་ཡིད་ཆེས་ཀྱིས་འཆམ་མཐུན་གཅིག་ཏུ་གནས་ཐུབ་ན། རྒྱ་བོད་གཉིས་ཕན་ཡོང་རྒྱུའི་དགེ་མཚན་ཡོད་པ་ནི་སྨོས་མ་དགོས་པ་ཡིན། ༸གོང་ས་མཆོག་ནས་ལམ་སྟོན་མཛད་ཅིང་། གཞིས་བྱེས་བོད་མི་མང་ཚོགས་ཀྱིས་རྒྱབ་སྐྱོར་ཡོད་པའི་ད་ལྟའི་བོད་མིའི་སྲིད་བྱུས་དབུ་མའི་ལམ་གྱི་དགོངས་དོན་ཡང་གཙོ་བོ་བོད་རྒྱ་གཉིས་སྨན་གྱི་ཆེད་དུ་དམིགས་པ་ཞིག་ཡིན།
རྒྱ་བོད་མི་རིགས་བར་གྱི་དཀའ་ངལ་སེལ་རྒྱུར་གཡོལ་ཐབས་མེད་པའི་འགན་འཁྲི་དེ་རྒྱ་བོད་མི་རིགས་གཉིས་ཀར་ཡོད་པ་དང་། དེའི་ནང་ནས་ཤེས་ཡོན་ཅན་རྣམས་ལ་ཡོད་པ་ནི། དེ་སྔོན་རྒྱ་ནག་པེ་ཅིན་མཐོ་རིམ་སློབ་གྲྭའི་སློབ་དཔོན་ཆེན་མོ་ཏིང་ཙེ་ལེན་གྱིས་བོད་ཀྱི་འགྲོ་བ་མིའི་ཐོབ་ཐང་ལ་སེམས་ཁུར་བྱེད་རྒྱུ་དེ་ཤེས་ཡོན་ཅན་གྱི་འགན་འཁྲི་ཡིན་ཞེས་པའི་རྩོམ་ནང་ཤེས་ཡོན་ཏོག་ཙམ་ཡོད་པའི་ང་ཚོས་འདས་པའི་ལོ་བཞི་བཅུའི་ནང་བོད་མི་དམངས་ཀྱི་རང་ཉིད་ཀྱི་ཐོབ་ཐང་རྩོད་ལེན་བྱས་པར་རྒྱབ་སྐྱོར་དང་། རྒྱབ་སྐྱོར་བྱེད་རྒྱུའི་འགན་འཁྲིའི་འདུ་ཤེས་ཙམ་ཡང་སླེབས་མྱོང་མེད་པ་མ་ཟད། བོད་མི་ཚོས་མྱོང་བཞིན་པའི་དཀའ་སྡུག་དེ་དག་སྣང་མེད་དུ་བཞག་ཡོད། འོན་ཀྱང་ང་ཚོ་རྒྱ་ནག་མི་རིགས་གི་སྡུག་བསྔལ་ཉིན་མོར། བོད་ཀྱི་བསམ་པའི་གཙོ་འཛིན་ཏྭ་ལའི་བླ་མ་མཆོག་གི་དྲང་བདེན་གྱི་རྒྱབ་སྐྱོར་གནང་བའི་སྲུང་འཕྲིན་གནང་ཡོད། ཅེས་འཚོར་ཤུགས་བྱུང་བ་བསྟོད་པར་འོས་པ་རང་རེད།
ད་ཆ་བོད་དོན་ལ་རྒྱབ་སྐྱོར་དང་། གདུང་སེམས་མཉམ་སྐྱེད་གནང་མཁན་རྒྱ་རིགས་ཇེ་མང་དུ་འགྲོ་བཞིན་པ་དང་། ཁྱེད་རྣམ་པས་བོད་མིའི་གཉིས་ཕན་དབུ་མའི་ལམ་སྟེ། བོད་ཀྱི་ཐུང་མོང་མ་ཡིན་པའི་ཆོས་དང་རིག་གཞུང་སྲུང་སྐྱོབ་ཐུབ་ཆེད། བོད་མིར་མིང་དོན་མཚུངས་པའི་རང་སྐྱོང་བྱུང་བ་ཡིན་ན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བསྡད་འདོད་ཡོད་ཅེས། ལངས་ཕྱོགས་བཟུང་བ་དེ་ལ་རྒྱབ་སྐྱོར་གནང་སྟེ་བོད་ནང་ཡོད་པའི་བོད་མི་རྣམས་དཀའ་སྡུག་མྱོང་བཞིན་པའི་གནས་སྟངས་ལ་སེམས་འཁུར་གནང་བ་ང་ཚོ་ཨ་རིའི་མི་ནི་སུད་ཀྲར་གནས་འཁོད་བོད་རིགས་ཡོངས་ནས་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན།
ད་ལྟའི་བོད་ནང་གི་གནས་སྟངས་བཟང་ཕྱོགས་ཀྱི་འགྱུར་བ་ཡོང་རྒྱུ་ཕར་ཞོག ད་དུང་ཇེ་ཞན་ཇེ་སྡུག་ཏུ་སོང་སྟེ། བོད་མི་ ༡༢༢ ཙམ་རང་སྲེག་གི་ལམ་ནས་རྒྱ་ནག་གུང་བྲན་གཞུང་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་བྱས་ཡོད། ཡིན་ན་ཡང་རྒྱ་ནག་གུང་བྲན་གཞུང་གིས་བོད་མིའི་སྐད་སྒྲ་སྣང་མེད་དུ་བཏང་བ་མ་ཟད། ད་དུང་བོད་མི་རྣམས་ལ་ཁ་བྲལ་གྱི་ཉེས་མིང་བཏགས་པ་དང་། བོད་མིའི་འཐབ་རྩོད་ཀྱི་ངོ་བོ་དེ་རྒྱ་མི་རིགས་ལ་ཁ་གཏད་བྱེད་ཀྱི་ཡོད་འདྲའི་བདེན་པ་མིན་པའི་དྲིལ་བསྒྲགས་བྱེད་བཞིན་པའི་དུས་འདིར། ང་ཚོར་རྒྱ་རིགས་ཤེས་ཡོན་ཅན་གྱི་རྒྱབ་སྐྱོར་མུ་མཐུད་ནས་དགོས་རྒྱུ་དེ་ནི་ཧ་ཅང་གི་གལ་ཆེན་པོ་ཡིན་པ་དང་། ལྷག་པར་དུ་དངོས་ཡོད་གནས་ཚུལ་ཤིན་ཏུ་ཐོས་དཀའ་བའི་རྒྱ་རིགས་མི་མང་ཚོས་བོད་ཀྱི་གནས་ཚུལ་དངོས་ཤེས་པ་བཟོ་རྒྱུར་ཡང་ཁྱེད་རྣམ་པའི་རྒྱབ་སྐྱོར་ནི་ནུས་པ་ཆེ་ཤོས་ཆགས་ཡོད།
བོད་མི་ཚོས། རྒྱ་ནག་གཞུང་གིས་བོད་ལ་རྩ་ཁྲིམས་ནང་བཤད་པ་ལྟར། རང་སྐྱོང་མིང་དོན་མཚུངས་པ་ཞིག་སྤྲད་པ་ཡིན་ན། ང་ཚོས་རྒྱ་ནག་ནས་ཁ་བྲལ་འགྲོ་རྒྱུའི་འདོད་པ་མེད། རང་སྐྱོང་རྩོད་པའི་དགོས་དམིགས་གཙོ་བོ་ནི། བོད་མི་རིགས་ཙམ་མ་ཟད། འགྲོ་བ་མིའི་རིགས་སྤྱི་ལ་ཕན་ཐོགས་བྱེད་ཐུབ་པའི་བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་བྱེད་རྒྱུའི་ཆེད་དུ་ཡིན།
ཁྱེད་རྣམ་པས་མུ་མཐུད་ནས་ང་ཚོར་རྒྱབ་སྐྱོར་གནང་སྟེ། བོད་མི་ཚོའི་དགོས་འདུན་གཙོ་བོ་ག་རེ་ཡིན་པ་དང་། བོད་མིས་ཁ་བྲལ་བྱེད་ཀྱི་མེད་པ། བོད་མིས་རྒྱ་མི་རིགས་ལ་ངོ་རྒོལ་བྱེད་ཀྱི་མེད་པ་བཅས་ཀྱི་དངོས་ཡོད་བདེན་པའི་གནས་ཚུལ་རྣམས་རྒྱ་རིགས་མང་ཚོགས་ལ་ངོ་སྤྲོད་གནང་སྐྱོང་ཡོང་བའི་རེ་སྐུལ་ཞུ་རྒྱུ་དང་། ད་བར་ཁྱེད་རྣམ་པས་ང་ཚོར་རྒྱབ་སྐྱོར་གནང་བ་དང་། ལྷག་པར་དུ་རྒྱ་ནག་ནང་ཡོད་པའི་ཤེས་ཡོན་ཅན་ཚོས་སྙིང་སྟོབས་ཆེན་པོའི་སྒོ་ནས་ང་ཚོར་རྒྱབ་སྐྱོར་གནང་བར་གོ་སྐབས་འདི་ཐུགས་རྗེ་ཆེ་ཞུ་རྒྱུ་ཡིན།
ཨ་རིའི་མི་ནི་སུད་ཀྲ་གནས་འཁོད་བོད་རིགས་སྤྱི་མཐུན་ཚོགས་པའི་རྒྱུན་ལས་ཐུང་མོང་ནས་ ༢༠༡༣ ཕྱི་ཟླ་ ༡༢ ཚེས་ ༡ ལ།།
མཆན། ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་དྲུང་ཕར་ཀུན་དགའ་བཀྲ་ཤིས་ལགས་ཀྱིས་ངོ་སྤྲོད་གནང་བ་ལྟར་ན། གོང་བཀོད་ཞུ་ཡིག་འཕྲིན་དེ་ནི། ཨ་རིའི་མི་ནི་སུད་ཊའི་ས་གནས་བོད་རིགས་སྤྱི་མཐུན་ཚོགས་པས་བོད་དོན་ལ་ཐུགས་སྣང་དང་རྒྱབ་སྐྱོར་གནང་མཁན་རྒྱ་རིགས་ཡོངས་ལ་སྤྱི་ལོ་གསར་པ་ཤར་ལ་ཉེ་བའི་གོ་སྐབས་དང་བསྟུན་ཏེ་ཡོངས་བསྒྲགས་སུ་ཕུལ་བ་ཞིག་ཡིན་ཞིང་། ཞུ་ཡིག་དེ་རྒྱ་ཡིག་གི་དྲ་ཚིགས་ཁག་ཏུ་ཐོན་ཡོད་འདུག
དོན་དག་གཉིས་ཤེས་འོས་སྟེ། ༡ རྒྱ་ནག་གི་ཕྱི་སྡོད་ཤེས་ཡོན་ཚོའི་བརྒྱ་ཆའི་དགུ་བཅུ་ལྷག་རྒྱ་དམར་གཞུང་གི་རྩ་ཁྲིམས་འོག་འགྲོ་མཁན་མ་རེད། ༢ རྒྱ་ནག་མི་མང་ཡང་རྒྱ་དམར་གཞུང་གི་རྩ་ཁྲིམས་ལ་ཡི་ཐང་ཆད་ཡོད་པས། ཟམ་གདོང་ལུགས་ཀྱི་དབུ་མའི་ལམ་ཡང་བསྐྱར་སི་ཊ་སི་སྦག་གི་གསུང་བཤད་སྒང་ལོག་རན་ཡོག་རེད།
རྗེས་སུ་ཡི་རང་ཞུ། ངོ་མ་ཡིན་ན་གཞུང་ངོས་ནས་འདི་རིགས་སྤེལ་ན་ནུས་པ་ཆེན་པོ་ཐོན་ངེས་རེད། འོན་ཀྱང་་་་
རྒྱ་རིགས་གྲོགས་པོ་འགར་བཏང་ཡོད། གང་མྱུར་དྲ་ཐོག་ལ་འགོད་དགོས་ཟེར།
ཞེ་དྲག་ཡག་པོ་འདུག
༡ དབུ་མའི་ལམ་གྱི་སྲིད་བྱུས་ཉམས་ལེན་ཞུ་སྟངས་དངོས་གནས་དེ་འདི་རེད།
༢ རྒྱ་ནག་ཤེས་ཡོན་དང་མི་མང་ལ་བོད་དོན་སྙན་གསེང་ཞུ་རྒྱུ་ནི་མཉམ་འབྲེལ་རྒྱལ་ཚོགས་དང་ཡོ་རོབ་གྲོས་ཚོགས། ཨ་རིའི་གྲོས་ཚོགས་དང་གཞུང་ལས་ཀྱང་བོད་དོན་ཐད་གལ་ཆེན་དང། ནུས་པ་ཆེ་ཤོས་ཡིན།
༣ དབུ་མའི་ལམ་ནི་༸གོང་ས་མཆོག་དང་མགོ་ཁྲིད་ཁ་ཤས་ཤིག་ཁོ་ནའི་མིན་པར། བོད་མི་མང་གིས་འདི་ལྟར་དབུ་འོག་དཔུང་འདེགས་བྱས་ན། བཙན་བྱོལ་བའི་ལས་འགན་འགྲུབ་ཀྱི་ཡོད་པས་འདི་ལྟར་གནང་བ་དུས་དང་མཐུན་ལ། རྣམ་དཔྱོད་ལྡན་པ་ཡིན།
མི་ཁ་ཤས་ཀྱིས་ལོ་རྒྱུས་ནང་བྱུང་བའི་གནས་ཚུལ་རིགས་དེང་དུས་དང་བཙན་སྦྱར་བྱས་ནས། ཞེ་འཁོན་རྩོད་དགོས་པ་འདྲ་བའི་འཆལ་གཏམ་བཤད་པ་ནི་དོན་དངོས་སུ་འཐབ་རྩོད་ལ་ཤིན་ཏུ་རྨོངས་པས་རེད། ལོ་རྒྱུས་ནང་བཙན་དབང་གིས་འོག་ཕམ་ཏེ་ཁྲག་བཞུར་མྱོང་བའི་མི་རིགས་ཤིག་ཡིན་ནའང། དེས་དེ་རིང་སང་ཉིན་དང་མཐུན་པའི་ཚེ་སྲོག་ཅིག་འཚོལ་གྱི་ཡིན་ན། ངེས་པར་དུ་ཁྲག་གི་འགྲོ་གྲོན་དང་འཚེ་བའི་ལམ་སྤངས་དགོས་པ་མ་ཟད། རང་ཉིད་ཁོ་ན་ལས་མི་མཐོང་པའི་འུ་ཐུག་པའི་ཀུན་སྤྱོད་དང་བསམ་བློ་དེ་ཡང་དོར་དགོས། དེ་ལྟར་བྱས་ན་འཐབ་རྩོད་པ་སུ་ཡང་ཤི་མི་སྲིད། དེས་ན་ལྗང་གཞོན་ལྟ་བུའི་གླེན་རྨོངས་ཅན་གྱི་འཆལ་གཏམ་ལ་ཡ་མ་བྱས་པར་མུ་མཐུད་ནས་ལས་འགུལ་སྤེལ་རོགས། རྒྱའི་དར་ཆ་གནམ་མཁར་འཕྱར་ནས་དབུ་མའི་ལམ་ནས་རང་སྐྱོང་རྩོད་རོགས།།
མ་བཤད་ཐབས་མེད་ཀྱི་ཚིག་འགའ་འདིར་འགོད་དགོས་བྱུང་། དེ་ནི། ང་ཚོ་རང་དབང་དང་དམངས་གཙོའི་སྤྱི་ཚོགས་ཤིག་ཏུ་གནས་ཡོད་པས། མི་སུ་དང་སྒྲིག་འཛུགས་གང་འདྲ་ཞིག་ཡིན་ཡང་ལྟ་ཚུལ་མ་འདྲ་བ་དང་ལངས་ཕྱོགས་མ་འདྲ་བ་ཡོང་ཆོག་གིས་རེད་ལ། ཡོང་དགོས་པ་ཞིག་ཀྱང་རེད། དེར་སུས་ཀྱང་ནག་པོ་དང་འབུར་འཇོམས་བྱ་མི་རུང་། འོན་ཏེ། ང་ཚོས་ཤེས་དགོས་པ་ཞིག་ནི། བསམ་ཚུལ་གྱི་ངོ་བོར་ཅི་དྲན་བརྗོད་འོས་པའི་རིགས་ཤིག་དང་གནད་དོན་ཁག་ཅིག་གི་ཐད་ནས་ལོ་རྒྱུས་དང་རྩ་དོན། འབྱུང་འགྱུར། མཐའ་ན་རང་ཉིད་བཅས་ལ་འགན་འཁུར་དགོས་པ་ལས་ཚོར་སྣང་ཙམ་དང་གཞན་གྱི་རྗེས་སུ་འབྲེང་སྟེ། ལུག་ཁྱུ་ཆུར་བསྟར་པའི་ལས་སུ་ཞུགས་མི་རུང་། གོང་གི་ཡོངས་བསྒྲགས་ཡིག་ཆ་དང་འབྲེལ་གནད་དོན་འགའ་གླེང་རྒྱུ་ཡིན།
དང་པོ། ཨ་རིའི་མི་ནི་སུད་ཊའི་༼Minnesota༽བོད་རིགས་སྤྱི་མཐུན་ཚོགས་པའི་རྒྱུན་ལས་ཚོས། རང་ཉིད་ཀྱི་ཕ་མེས་སྤུན་ཟླ་དམར་གསོད་གཏོང་མཁན་དང་། རང་ཉིད་ཀྱི་༧དབུ་ཁྲིད་དང་གཞུང་། སོ་སོ་བཅས་སོ་སོར་བདག་པའི་ཕ་ཡུལ་དུ་གནས་མ་ཐུབ་པར་མི་ཡུལ་དུ་བྲོས་བྱོལ་ལ་བརྫངས་མཁན་གྱི་བཙན་འཛུལ་བར། འཆར་ལ་ཉེ་བའི་ལོ་གསར་པ་འཚམས་འདྲི་ཞུས་འདུག དེ་ལས་ཚབས་ཆེ་བའི་རྣམ་འགྱུར་ཞིག་ནི་དབུ་མའི་ལམ་ལ་སྐྱོར་བྱས་པར་ཁས་འཆེ་སྟེ་ཐུགས་རྗེ་ཆེ་ཞུས་འདུག ཀློག་པ་པོ་དང་བོད་མི་རྣམ་པ། ཐུགས་བསམ་རེ་བཞེད་དང་། བྱེད་སྟངས་འདི་ཅི་ཞིག་རེད།
ང་རང་ཉིད་ཀྱི་ལྟ་ཚུལ་ཡིན་ན། དབུ་མའི་ལམ་ལ་གྲུབ་འབྲས་གང་ཡང་ཐོབ་མེད་པར་ཐུགས་རྗེ་ཆེ་ཞུ་བའི་དུས་ལ་བབས་ཡོད་དམ། གྲུབ་འབྲས་ཐོན་རྒྱུ་ལས་རྒྱ་ནག་ཕྱོགས་ཀྱི་སྲིད་ཇུས་ཇེ་མཁྲེགས་སུ་འགྱུར་བཞིན་ཡོད། ད་དུང་། ང་ཚོས་རྒྱ་ནང་མི་མང་དང་ལྷག་པར་དུ་རྒྱ་རིགས་ཤེས་ཡོན་ཅན་ཚོར་འབྲེལ་བ་བྱེད་དགོས་པ། མ་འགྲིག་པ་དེ་གུང་ཁྲན་ཏང་ཡིན་པ་ལས་རྒྱ་ནག་མི་མང་མ་རེད་ཟེར་བ་སོགས་ཀྱི་ལྟ་ཚུལ་ཞིག་ང་ཚོའི་སྤྱི་ཚོགས་ནང་ཡོང་གི་ཡོད་རེད། དེ་ན་ངས་འདྲི་རྒྱུ་ཞིག་ལ། རྒྱུས་བོད་ལ་བཙན་འཛུལ་དབང་སྒྱུར་བྱས་ཕྱིན་བོད་མདོ་དབུས་ཁམས་གང་སར་ཕ་བུ་བསྡེབས་གསོད་དང་བུད་མེད་ཡུགས་སར་ཕུད་པ། ཕྲུ་གུ་དྭ་ཕྲུག་ཏུ་གྱུར་བ། དགོན་སྡེ་དང་ཕ་ཁྱིམ་གཏོར་བརླག་བཏང་པ། རྒྱུ་ནོར་བཙན་མཁྱེར་བྱས་པ་འདི་དག་ཐབས་ཆད་ཁྲོད་རྒྱ་ནག་མི་མང་དང་ཤེས་ཡོན་ཅན་དང་ཁོ་ཚོའི་མི་མེད་དམ། དེ་ཡོད་ན་ཕ་མེས་བུ་སྤུན་གསར་གསོད་གཏོང་མཁན་དང་ཕ་གཞིས་དྲོད་མོ་བཙན་འཕྲོག་བྱས་པར་ཐུགས་རྗེ་ཆེ་ཞུ་ཡི་ཡོད་པ་རེད་དམ། ད་དུང་དམངས་ཁྲོད་དུ་མི་རིགས་དབྱེ་འབྱེད་དང་བོད་རིག་མཐོང་ཆུང་བྱེད་མཁན། བོད་མིར་བཤུ་གཞོགས་གཏོང་མཁན་རིགས་རྒྱ་ནག་མི་མང་དང་ཤེས་ཡོན་འབྱོར་ལྡན་ཅན་ཚོ་ཡིན། ཡང་ཅིག་བཤད་ན། བོད་དུ་བོད་མི་ཚོས་རྒྱ་རྒོལ་གྱིས་རང་ལུས་མེ་རུ་སྒྲོན་པ་དང་རྒྱའི་རྒྱལ་དར་སྒྲེང་འཛུགས་བྱ་རྒྱུར་ཚེ་སྲོག་གིས་ཁ་གཏད་གཅོག་བཞིན་པའི་དུས་འདིར། བཙན་བྱོལ་དུ་རྒྱ་ནག་གི་རྒྱལ་དར་སྤོབས་ཉམས་ཀྱིས་ཁྱེར་ཏེ་ལས་འགུལ་སྤེལ་བ་དང་། ཕ་གསོད་ལག་དམར་ལ་འཚམས་འདྲི་དང་ཐུགས་རྗེ་ཆེ་ཞུ་ཀི་ཡོད་རེད།
གཉིས་པ། ང་ཚོས་རྒྱ་རིགས་ཤེས་ཡོན་ཅན་དང་མང་ཚོགས་ལ་འབྲེལ་བ་བཟུང་སྟེ་བོད་དོན་ཐག་གཅོད་ཐུབ་རྒྱུར་རེ་བ་འཛིན་པའི་ལྟ་ཚུལ་འདི་ནི་སྟོང་བསམ་ཁྲོད་ཀྱི་འཆར་ཡན་ཙམ་རེད། རྒྱ་ནག་གུང་ཁྲན་ཏང་ལ་ཁ་གཏད་གཅོག་མཁན་གྱི་རྒྱ་རིགས་ཤུགས་ཆེ་གྲོས་རྒྱ་རིགས་དམངས་གཙོ་དོན་གཉེར་བ་དང་ཆོས་འཁོར་སྒོམ་སྒྲུབ་པ་ཚོ་རེད། དེ་ཚོ་རྒྱ་ནག་གི་སྤྱིའི་མི་འབོར་གྱི་བརྒྱ་ཆ་གཅིག་ཟིན་གྱི་མེད། ཁོ་ཚོས་སོ་སོའི་འཐབ་རྩོད་སྒྲུབ་ཐུབ་ཀྱི་མེད་པར་ང་ཚོའི་རྩ་དོན་སེལ་རྒྱུའི་ནུས་སྟོབས་གང་དུ་ཡོད། ང་ཚོར་འབྲེལ་བ་བྱེད་མཁན་དང་ང་ཚོའི་སྙོབ་ཐུབ་སའི་རྒྱ་རིགས་མི་མང་དང་ཤེས་ཡོན་ཅན་ཟེར་པ་གོང་གི་ཤོག་ཁག་གཉིས་ཀྱི་ནང་གིས་ཆེ་ཉུང་ལ་གྲངས་ཀ་རྒྱག་ཐུབ་པ་ཙམ་རེད། ཆེ་ཉུང་ངུ་ཞིག་ཡིན་རུང་ཟུར་ནས་འབྲེལ་བཟུང་ན་མ་འོས་པ་མེད་ཀྱང་། དེ་ཙམ་གྱི་ཆེད་དུ་རང་ཚུགས་ཤོར། ལངས་ཤོར་བོར། བྱེད་སྟངས་དེ་ཚོ་དོན་དངོས་ཐོག་ད་ལྟའི་འཐབ་རྩོད་ཀྱི་སྤོབས་པ་ཉམས་བྱེད་དང་མ་འོངས་ལོ་རྒྱུས་ནང་བསུབ་ཐབས་མེད་པའི་ནོར་འཁྲུལ་གྱི་ནག་ཐུག་ཅིག་ཏུ་འགྱུར་ངེས་པས། དེང་ཕྱིན་ལས་དོན་གང་ཅིའི་ཐད་ཚང་མས་ཡིད་གཟབ་དང་དཔྱོད་ཤེས་ཡོད་པའི་ཐོག་འགུལ་སྐྱོད་རེ་གནང་སྐྱོང་ཡོད་པར་ཞུ།