རྒྱ་ནག་ལ་སྟོབས་འབྱོར་ཡོད་ཀྱང་ང་ཚོར་དྲང་བདེན་ཡོད་ཟེར།

དེ་རིང་བཞུགས་སྒར་ཉེ་འཁྲིས་ཤེས་རབ་དགའ་ཚལ་སློབ་གླིང་གི་དགེ་སློབ་ཡོངས་ཀྱིས་དྷ་ས་མེག་གྷན་བར་ངག་བཅད་གོམ་བགྲོད་ཅིག་གནང་སྟེ་བོད་ནང་གི་གནས་སྟངས་ལ་གདུང་སེམས་མཉམ་སྐྱེད་དང་རྒྱལ་སྤྱིའི་ཐོག་བོད་པར་རྒྱབ་སྐྱོར་ཡོང་བའི་ཞུ་འབོད་ཅིག་གནང་སོང་།  

དེ་རིང་སྔ་དྲོའི་ཆུ་ཚོད་ ༩།༣༠ ཐོག་ཤེས་རབ་དགའ་ཚལ་སློབ་གླིང་གི་དགེ་རྒན་དང་སློབ་མ་ ༢༦༠ ལྷག་གིས། བོད་ནང་གི་རྒྱལ་གཅེས་དཔའ་བོ་དཔའ་མོ་ཚོར་གདུང་སེམས་མཉམ་སྐྱེད་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་སོགས་སུ་བོད་ནང་གི་ཛ་དྲག་གནས་སྟངས་ལ་རྟོག་ཞིབ་དགོས་པའི་ཞུ་སྐུལ་ཆེད། སློབ་གྲྭ་ནས་དྷ་ས་མེག་གྷན་གཙུག་ལག་ཁང་གི་དཔའ་བོའི་དྲན་རྟེན་རྡོ་རིང་བར་ཟས་བཅད་ངག་བཅད་ཀྱི་གོམ་བགྲོད་ཅིག་གནང་ཡོད་པ་དང་། ཉིན་རྒྱབ་ཆུ་ཚོད་ ༡ ཡོལ་ཙམ་ལ་དཔའ་བོའི་རྡོ་རིང་མདུན་དུ་འདུ་འཛོམས་ཀྱིས། བོད་རྒྱ་དབྱིན་གསུམ་གྱི་ཐོག་ནས་བསྒྲགས་གཏམ་སྒྲོགས་སྦྱང་དང་གདུང་སེམས་མཉམ་སྐྱེད་ཀྱི་སྙན་ངག་གྱེར་འདོན་སོགས་བྱས་སོང་ལ། ཕྱི་དྲོར་མེག་གྷན་དུ་མར་མེའི་ཁྲོམ་སྐོར་ཞིག་ཀྱང་གནང་སོང་།  

བསྒྲགས་གཏམ་ནང་དུ།  “བོད་མི་ཞི་རྒོལ་བ་ཚོའི་མངོན་འདོད་ནི། ༧རྒྱལ་བ་རིན་པོ་ཆེ་གཙོས་ཡུལ་གྱར་སྤུན་ཟླ་ཚོ་ཕྱིར་རང་ཡུལ་དུ་ཕེབས་ཐུབ་པ་དང་། པཎ་ཆེན་རིན་པོ་ཆེས་མཚོན་བཙོན་དུ་ལུས་པའི་བོད་མི་ཡོངས་རྫོགས་བཙོན་གྲོལ་དགོས་པ། ཆོས་དད་རང་དབང་དང་སྨྲ་བརྗོད་རང་དབང་། ཆབ་དཔལ་རིག་གསུམ་གྱི་རང་དབང་དགོས་པ། བོད་ཡུལ་དུ་རྒྱ་རིགས་མང་པོ་གནས་སྤོར་བྱེད་ཀྱིན་ཡོད་པ་མཚམས་འཇོག གཏེར་ཁ་སྔོག་འདོན་དང་ནགས་ཚལ་གཅོད་གཏུབ་ཀྱི་མཚོན་པའི་ཁོར་ཡུག་གཏོར་བཤིག་མཚམས་འཇོག་དགོས་པ་སོགས་ཡིན་པ་ཁོང་ཚོའི་འབོད་ཚིག་གི་ཁྲོད་ནས་ཤེས་ཐུབ།  

འོན་ཀྱང་རྒྱ་གཞུང་གི་སྲིད་དབང་སྒེར་འཛིན་པ་ཚོས་ཁོ་ཚོར་བུ་ལོན་དང་ཡང་ན་བཟའ་འཁོན། གྲྭ་པ་ཚོར་༧གོང་ས་མཆོག་གཙོས་དབུས་བོད་མིའི་སྒྲིག་འཛུགས་ཀྱིས་ངན་སྐུལ་བྱས་ཡོད་སྐོར་སོགས་འཁྱོག་བརྗོད་དང་ལོག་བཤད་མང་དག་ཅིག་སྤེལ་ཏེ། ཁོང་ཚོས་སྲིད་དབང་སྒེར་འཛིན་བྱེད་བཞིན་པ་དེ་དམངས་སྒོར་དང་བཙན་གནོན་གྱིས་སྦས་སྐུང་དང་གསང་ཐབས་ཀྱིས་རྒྱལ་སྤྱིའི་ཐོག་སྐྱག་རྫུན་ཁོ་ན་ཤོད་བཞིན་ཡོད། ”ཅེས་བཀོད་འདུག  

བསྒྲགས་གཏམ་གྱི་མཇུག་ཏུ། “དེ་རིང་ང་ཚོས་ལས་འགུལ་འདི་བརྒྱུད་ནས་རྒྱ་གཞུང་ལ་སླར་ཡང་གསལ་འདེབས་ཞུ་རྒྱུ་ཞིག་ནི་གདུག་རྩུབ་ཆེ་བའི་བཙན་གནོན་གྱི་སྲིད་བྱུས་དེ་ཇི་སྲིད་བར་དུ་མཚམས་འཇོག་མི་བྱེད་པ་དེ་སྲིད་དུ་གཞིས་བྱེས་གཉིས་ཀྱི་ཞི་རྒོལ་དེ་མཚམས་འཇོག་མི་སྲིད་ལ། མཚམས་མ་བཞག་ན་དེ་སྲིད་དུ་རྒྱ་ནག་གི་གཟི་བརྗིད་དང་ལ་རྒྱ། མཚན་སྙན། རིག་སྟོབས་སོགས་ལ་སུས་ཀྱང་གདེང་འཇོག་དང་ཡིད་ཆེས་མི་བྱེད་པ་མ་ཟད། ཐ་ན་དུས་རབས་ཉེར་གཅིག་པའི་གཅན་གཟན་གཏུམ་པོ་རང་ལ་ངོས་འཛིན་བྱེད་བཞིན་པའི་མིང་ཆད་ངན་པ་དེ་ཉིད་བསྐལ་བའི་བར་དུ་གནས་ངེས་ཡིན། རྒྱུ་མཚནི་འཛམ་གླིང་སྟེང་གི་མི་ཕལ་མོ་ཆེ་དྲང་བདེན་དང་འཚེ་བ་མེད་པ། བྱམས་བརྩེའི་འོག་ན་བདེ་སྐྱིད་ཀྱི་འཚོ་གནས་རོལ་བཞིན་པས་སོ།། ”ཞེས་བཀོད་འདུག

གསར་འགོད་པས་སློབ་མ་ཞིག་ལ། དགེ་སློབ་ཚོས་གྱོན་གོས་ནག་པོ་དང་ཁ་རས་ནག་པོ་གྱོན་པ་དང་། ལག་ཏུ་ཨ་ལོང་གཅིག་སྦྲེལ་གྱི་ཐག་པ་བཟུང་བ་སོགས་ཀྱི་མཚོན་དོན་སྐོར་དྲིས་པར་ཁོང་གིས། “གྱོན་གོས་ནག་པོ་དང་ཁ་རས་ནག་པོ་ཡིས་ད་ལྟའི་བར་བོད་ཕྱི་ནང་གཉིས་ནས་རང་ལུས་མེར་བསྲེགས་བཏང་བའི་རྒྱལ་གཅེས་དཔའ་བོ་དཔའ་མོ་ ༡༢༤ ལ་མྱ་ངན་དང་། གཞིས་ལུས་བོད་མི་ཚོར་སྨྲ་བརྗོད་རང་དབང་སོགས་འགྲོ་བ་མིའི་ཐོབ་ཐང་གང་ཡང་མེད་པ་མཚོན་གྱི་ཡོད། དེ་བཞིན་ཨ་ལོང་སྦྲེལ་བའི་ཐག་པ་དེས་བོད་ཀྱི་རྩོམ་པ་པོ་དང་ཁོར་ཡུག་སྲུང་སྐྱོབ་པ་སོགས་ལ་རྒྱ་གཞུང་གིས་ཆབ་སྲིད་ཉེས་མིང་གཡོགས་ཏེ། གཅིག་རྗེས་གཉིས་མཐུད་དུ་བཙོན་ཁང་ལ་བཅུག་པའི་མཚོན་བྱེད་ཡིན” ཅེས་དང་།

ཁོས་མུ་མཐུད་དུ། ” ང་ཚོ་བོད་རིགས་སྤུན་ཚོ་ལྕགས་ཐག་གི་ཨ་ལོང་གཅིག་ཏུ་སྦྲེལ་བ་བཞིན་སྐྱིད་སྡུག་མཉམ་མྱོང་དང་རྡོག་རྩ་ཆིག་སྒྲིལ་མཚོན་གྱི་ཡོད། དེ་རིང་ང་ཚོས་རྒྱལ་སྤྱིའི་གཞུང་དང་ཚོགས་སྡེ་ཁག ལྷག་པར་དུ་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ལ། རྒྱ་ནག་ལ་སྟོབས་འབྱོར་ཡོད་ཀྱང་ང་ཚོར་དྲང་བདེན་ཡོད་སྟབས། རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ལ་དྲང་བདེན་དགོས་པ་རེད་དམ། དཔལ་འབྱོར་དགོས་པ་རེད་ཅེས་ཁ་ཡོད་ལག་ཡོད་ཀྱིས་བོད་ནང་གི་འགྲོ་བ་མིའི་ཐོབ་ཐང་ གི་གནས་བབ་ལ་རྟོག་ཞིབ་དགོས་པའི་ཞུ་སྐུལ་དང་། རྒྱལ་གཅེས་དཔའ་བོ་དཔའ་མོ་ཚོའི་མངོན་འདོད་ཁྱབ་བསྒྲགས། རྒྱ་དམར་གཞུང་གིས་བོད་ནང་གི་ཛ་དྲག་གནས་སྟངས་འདི་མཚམས་འཇོག་དང་གུ་ཡངས་ཀྱི་ཐག་གཅོད་ཅིག་ཡོང་ཆེད་དུ་ཡིན་”ཞེས་བརྗོད་སོང་།

གསར་འགོད་པ། པདྨ་མཚོ།