ཁྲིན་བེའི་ཅེན་གྱིས་བརྩམས། ཆབ་ཆ་འབྲུག་བྷེ་ཡིས་བསྒྱུར།
བོད་ནི་ཀྲུང་ཧཱ་མི་དམངས་སྤྱི་མཐུན་རྒྱལ་ཁབ་ཀྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་ཞེས་པ་འདི་ནི་ཀྲུང་གོས་བོད་ཀྱི་གནད་དོན་ཐད་ཡང་ཡང་ནན་བརྗོད་བྱེད་བཞིན་པའི་ལངས་ཕྱོགས་ཤིག་རེད། ཡིན་ཡང་། ཀྲུང་གོས་བོད་ཐོག་འཛིན་པའི་སྲིད་ཇུས་མང་པོ་ཞིག་གིས་བོད་དེ་ཀྲུང་ཧཱ་མི་དམངས་སྤྱི་མཐུན་རྒྱལ་ཁབ་ཀྱིས་བཙན་བཟུང་བྱས་པའི་ས་ཁུལ་ཞིག་ཡིན་པ་སྟོན་གྱི་ཡོད།
ཀྲུང་གོས་བཙན་ཤུགས་ཀྱིས་བོད་པའི་དགོན་པ་དང་ཁྱིམ་ཚང་ཁག་ནང་ཀྲུང་གོའི་གཙོ་འཛིན་དག་གི་པར་སྒྲིག་བཤམ་བྱེད་དུ་བཅུག་པ་དེ་བོད་མི་ཚོའི་སྣང་བར་མ་སོང་པར་ངོ་རྒོལ་ཤུགས་ཆེན་བྱེད་ཀྱི་ཡོད་ཀྱང་། ཀྲུང་གོའི་སྲིད་གཞུང་ལ་དེས་ཀྱང་མ་ཆོག་པར། ད་དུང་ཡང་བཙན་ཤེད་ཀྱིས་བོད་པའི་ཁྱིམ་ཚང་ཁག་གི་ཁང་སྟེང་དུ་སྐར་ལྔའི་དར་དམར་འཛུགས་བཅུག་པ་སོགས་ནི། ཕྱོགས་གཅིག་གིས་ཕྱོགས་གཞན་དེའི་གཡུལ་ས་བཙན་བཟུང་བྱས་པ་དང་། རྒྱལ་ཁབ་གཅིག་གིས་རྒྱལ་ཁབ་གཞན་དེའི་གྲོང་ཁྱེར་བཙན་བཟུང་བྱེད་སྐབས། ད་གཟོད་བྱེད་སྟངས་འདི་དག་འབྱུང་གི་ཡོད། དེ་ནི་སྔོན་མ་ཉི་ཧོང་གིས་རྒྱ་ནག་ལ་བཙན་འཛུལ་བྱས་སྐབས། གྲོང་ཁྱེར་གཅིག་བཙན་བཟུང་བྱས་རྗེས་ཉི་ཧོང་གི་ཉི་མ་རྟགས་ཅན་ཀྱི་རྒྱལ་དར་བཙུགས་པ་དང་གཅིག་མཚུངས་རེད། གལ་སྲིད་བོད་དང་ཀྲུང་གོའི་ཞིང་ཆེན་གཞན་དག་འདྲ་མཉམ་ཡིན་ན། བཙན་ཤེད་ཀྱིས་བོད་པའི་གྲོང་ཁྱེར་ཁག་ཏུ་སྐར་ལྔའི་དར་དམར་འཛུགས་དགོས་དོན་མེད། བོད་དེ་ཀྲུང་གོའི་དབང་བསྒྱུར་འོག་དུས་རབས་ཕྱེད་ལྷག་འགྲོ་བཞིན་ཡོད་ཀྱང་། ཀྲུང་གོས་ད་དུང་སྔར་བཞིན་བཙན་བཟུང་བྱས་པའི་ས་ཁུལ་ཞིག་ལ་ལྟ་བཞིན་ཡོད།
བོད་མིར་མཚོན་ནས་བཤད་ན། དགོན་པ་དང་ཁྱིམ་ཚང་ཁག་ནང་བཙན་ཤེད་ཀྱིས་ཀྲུང་གོའི་གཙོ་འཛིན་དག་གི་པར་སྒྲིག་བཤམ་བྱེད་བཅུག་པ་དེས་ཁོ་ཚོའི་བསམ་བློའི་འཚོ་བར་བརྙས་བཅོས་ཆེན་པོ་ཐེབས་ཀྱི་ཡོད། ཀྲུང་གོའི་ཞིང་ཆེན་གཞན་དག་དང་གྲོང་ཁྱེར་ཁག རྒྱ་མིའི་དགོན་པ་དང་ཁྱིམ་ཚང་སོགས་སུ་གཙོ་འཛིན་དག་གི་པར་སྒྲིག་བཤམ་དགོས་པའི་ཐག་གཅོད་མེད་ཀྱང་། བོད་མི་ཚོས་ངེས་པར་དུ་པར་དང་རྒྱལ་དར་སྒྲིག་བཤམ་བྱེད་དགོས་བྱུང་པ་རེད། བྱེད་སྟངས་འདིར་བོད་མི་ཚོས་བཟོད་སྒོམ་བྱེད་ཐུབ་ཀྱི་མེད། བོད་མི་ཚོར་རང་ཉིད་ཀྱི་བསམ་བློའི་གཙོ་འཛིན་ཏཱ་ལའི་བླ་མ་ཡོད་པ་མ་ཟད། རང་ཉིད་ཀྱི་གངས་སེང་རྟགས་ཅན་གྱི་རྒྱལ་དར་ཡང་ཡོད། རྒྱལ་དར་དེ་ལ་མའོ་ཙི་ཏུང་གིས་ཆོག་མཆན་དང་ངོས་ལེན་ཐོབ་པ་ཞིག་རེད། དེང་སྐབས་གངས་སེང་རྟགས་ཅན་གྱི་རྒྱལ་དར་དེ་བོད་རང་བཙན་གྱི་མཚོན་རྟགས་ཤིག་ཏུ་རྩི་བཞིན་འདུག དེ་ནི་དོན་དངོས་དང་མི་མཐུན་པ་ཞིག་རེད། ཧོང་ཀོང་ལ་རང་ཉིད་ཀྱི་མེ་ཏོག་མཆིན་ཁ་རྟགས་ཅན་གྱི་དར་ཆ་ཡོད་ཆོག་ན། རིག་གནས་ལོ་རྒྱུས་གཅིག་གྱུར་མིན་པའི་བོད་མི་རིགས་ཀྱིས་རང་གི་སྲོལ་རྒྱུན་རྒྱལ་དར་བཙུགས་པ་རང་བཙན་མཚོན་རྟགས་སུ་ཇི་ལྟར་གྱུར་པ་རེད། བཙན་ཤེད་ཀྱིས་སྐར་ལྔའི་དར་དམར་བཙུགས་པ་ནི་མངོན་སུམ་འཛེམ་མེད་ཀྱིས་དམག་མིས་བཙན་བཟུང་བྱེད་པའི་གཡོ་ཐབས་ཤིག་རེད།
རྒྱལ་དར་འཛུགས་པའི་སྲིད་ཇུས་དེ་བོད་ཁུལ་དུ་ལག་བསྟར་བྱས་རྗེས། རྒྱལ་དར་ཡར་བསྒྲེངས་པ་དང་མར་ཕབ་པ་ནི། བཙན་བཟུང་དང་ངོ་རྒོལ་འཐབ་འཛིང་གི་གཡུལ་ས་ཞིག་ཏུ་གྱུར་ཡོད། ཉིན་མོར་ཀྲུང་གོའི་ལས་བྱེད་པ་ཚོས་བཙན་ཤུགས་ཀྱིས་བོད་མི་ཚོར་དར་དམར་ཡར་སྒྲེང་དུ་བཅུག་པ་དང་། མཚན་མོར་བོད་མི་ཚོས་དར་དམར་མར་ཕབ་ཀྱི་ཡོད། སྲིད་གཞུང་གི་འབྲེལ་ཡོད་ལས་ཁུངས་དག་གིས་ས་གནས་གྲོང་སྡེ་དང་གྲོང་ཁྱེར་གྱི་གཞི་རིམ་ཏང་གི་རྩ་འཛུགས་ཁག་ལ་རྒྱལ་དར་སྲུང་བྱ་ཡག་པོ་བྱེད་དགོས་པ་དང་། ད་དུང་ཁག་ཐེག་ཡི་གེ་འབྲིར་བཅུག་སྟེ་གཏན་འབེབས་བྱེད་དགོས་པའི་རེ་བ་འདོན་གྱི་ཡོད། འདི་ལྟ་བུའི་བྱེད་སྟངས་ནི། སྔོན་མ་ཉི་ཧོང་གིས་བཙན་བཟུང་བྱས་པའི་ཀྲུང་གོའི་ཞིང་དང་གྲོང་ཁྱེར་ཁག་ཏུ་དུད་ཁྱིམ་བསྟར་བསྒྲིགས་ལམ་ལུགས་བཙུགས་ཏེ་གྲོང་མི་ཚོར་ཁག་ཐེག་དང་། སྡོད་དམངས་ལ་ཉི་ཧོང་གི་སྲིད་དབང་རྫུན་མར་བློ་དཀར་སྟོན་དགོས་པའི་བཙན་བཀའ་བཏང་བ་དང་འདྲ་བོ་རེད། སྔར་ལོ་ནས་བཟུང་བོད་ཀྱི་ས་ཁུལ་ཁག་མང་པོར་རྒྱ་ནག་གི་རྒྱལ་དར་སྒྲེང་འཛུགས་བྱེད་དུ་བཅུག་པ་དང་། ལྷག་པར་དུ་བོད་ཁམས་དཀར་མཛེས་རྫོང་དང་བྲག་མགོ་སོགས་སུ་བོད་མི་ཚོས་ངོ་རྒོལ་ཤུགས་ཆེན་བྱས་སྟབས། ཀྲུང་གོའི་དམག་མི་དང་ཉེན་རྟོག་མི་སྣས་རྡུང་རྡེག་འཚབ་ཆེན་བཏང་དང་གཏོང་གི་ཡོད།
ཀྲུང་གོས་བོད་དབང་བསྒྱུར་བྱས་པའི་ལོ་ངོ་ལྔ་བཅུའི་རིང་བཙན་བཟུང་གི་སེམས་ཁམས་དུས་ནམ་ཡང་འདོར་མྱོང་ཡོད་པ་མ་རེད། འདི་ལྟ་བུའི་སེམས་ཁམས་དེ་འགྱུར་བ་མ་བཏང་ཚེ། ཀྲུང་གོས་བོད་ཐོག་འཛིན་པའི་སྲིད་ཇུས་ལ་འགྱུར་བ་འགྲོ་མི་སྲིད་ཅིང་། ད་དུང་བོད་དོན་ཐད་ཀྲུང་གོར་ནོར་འཁྲུལ་ཞིག་ཡོད་པ་ནི། བོད་ནང་གི་དཔལ་འབྱོར་ཡར་རྒྱས་བཏང་སྟེ་བོད་མིའི་འཚོ་བ་འཕེལ་རྒྱས་བྱུང་པ་ཡིན་ན་བོད་དོན་ཟེར་བ་དེ་རང་བཞིན་གྱིས་མེད་འགྲོ་བར་ངོས་འཛིན་བྱེད་ཀྱི་ཡོད་པ་དེ་རེད། ཀྲུང་གོའི་མིག་ནང་གི་འཚོ་བ་ནི་དངོས་པོའི་འཚོ་བ་ཙམ་རེད། བསམ་པའི་འཚོ་བ་ཡོངས་རྫོགས་རྨང་ནས་རྩ་མེད་བཏང་དང་གཏོང་གི་ཡོད། དངོས་པོའི་འཚོ་བར་སེམས་ཁྲལ་མེད་པ་ཡིན་ནའང་བསམ་པའི་འཚོ་བར་རེ་འདོད་ཤུགས་དྲག་ཡོད་པ་ཁོ་ཚོས་ཤེས་ཀྱི་མེད། ལྷག་པར་དུ་ཆོས་ལ་ཡིད་ཆེས་བྱེད་པའི་བོད་མི་རིགས་ཕལ་མོ་ཆེར་མཚོན་ན། ཁོང་ཚོའི་མིག་ནང་དུ་བསམ་པའི་འཚོ་བ་ནི་དངོས་པོའི་འཚོ་བ་ལས་ཀྱང་ཧ་ཅང་གལ་ཆེན་ཆགས་ཡོད། ཚེ་འདི་ལས་སྐྱེས་པ་ཕྱི་མའི་བདེ་སྐྱིད་ཆེད་དུ་སྨོན་ལམ་རྒྱག་གི་ཡོད།
ཀྲུང་གོས་བོད་ཁུལ་དུ་སྤྱི་ཁང་མང་པོ་འཛུགས་སྐྲུན་བྱས་ཏེ་བོད་མི་ཚོ་སྡོད་འཇུག་གི་ཡོད་པ་དེ་རྩ་བའི་ཆ་ནས་བྱ་བ་ཡག་པོ་ཞིག་རེད། ཡིན་ཡང་འདི་འདྲའི་བསྟར་བསྒྲིགས་ཀྱི་སྤྱི་ཁང་དེ་དག་བོད་མིའི་འཚོ་བ་སྐྱེལ་སྟངས་དང་འོས་འཚམས་མིན་པ་རྩ་བ་ནས་ཤེས་ཀྱི་མེད། ད་དུང་ཡང་སྤྱི་ཁང་གི་ཡང་སྟེང་དུ་སྐར་ལྔའི་དར་དམར་འཛུགས་པ་ནི་བོད་མི་ཚོའི་སྙིང་མགོར་གྲི་བཙུགས་པ་དང་གཅིག་མཚུངས་ཡིན། བོད་མི་ཚོ་སྦྲ་གུར་ནང་སྡོད་འདོད་བྱེད་པ་ལས་སྲིད་གཞུང་གི་སྤྱི་ཁང་ནང་སྡོད་རྒྱུར་འདོད་པ་མེད། བོད་མིའི་འཚོ་བ་ཡར་རྒྱས་བཏང་པ་ཡིན་ན་བོད་དོན་སེལ་འགྲོ་བར་བསམ་པ་དེ། ཚིག་སྙན་པོའི་ཐོག་ནས་བཤད་ན་མཛེས་སྡུག་གི་ནོར་འཁྲུལ་ཞིག་རེད་ལ། ཚིག་མི་སྙན་པའི་ཐོག་ནས་བཤད་ན་གླེན་ལྐུག་རྨོངས་འཐོམ་གྱི་བྱེད་ཐབས་ཤིག་རེད། ཀྲུང་གོས་བོད་མིའི་འཚོ་བ་ཡར་རྒྱས་བཏང་བ་ལྟ་ཞོག ཏག་ཏག་རྒྱུ་འབྱོར་ཅན་ཆེས་ཉུང་ངུ་ཤིག་ཕྱོགས་གཅིག་ཏུ་བསྡུས་པ་ཙམ་ལས། བོད་མི་མང་པོ་ཞིག་གི་འཚོ་བར་རང་ཉིད་ཀྱི་འདོད་པ་ཅི་བཞིན་ཡར་རྒྱས་གང་ཡང་ཕྱིན་མེད།
དོན་དངོས་སུ་བོད་ཀྱི་གནད་དོན་ཟེར་བ་དེ་རྙོག་འཛིང་ཅན་ཞིག་རྩ་བ་ནས་མ་རེད། ཧ་ཅང་ལས་སླ་བོའི་ཐོག་ནས་ཐག་གཅོད་ཐུབ་པ་ཞིག་རེད། བོད་མི་རང་ཉིད་ཀྱི་སྲོལ་རྒྱུན་འཚོ་བ་སྐྱེལ་སྟངས་ལྟར་བོད་མི་ཚོར་རང་འདོད་ཀྱིས་འཚོ་བ་སྐྱེལ་དུ་བཅུག་པ་ཡིན་ན་བོད་དོན་རང་བཞིན་གྱིས་འགྲིག་འགྲོ་བ་རེད། རོགས་སྐྱོར་འདི་དང་རོགས་རམ་དེ་སོགས་སྤྲོད་དགོས་དོན་མེད། བོད་མི་རང་ཉིད་ཀྱི་འཚོ་བ་སྐྱེལ་སྟངས་ལྟར་བཞག་པ་ཡིན་ན། མི་རིགས་ཀྱི་འགལ་ཟླ་མེད་ལ་རང་བཙན་ཀྱི་གནད་དོན་ཡང་ཡོད་པ་མ་རེད། བོད་ཀྱི་གནད་དོན་ཡོངས་རྫོགས་ཀྲུང་གོའི་དམག་མིའི་བཙན་བཟུང་སེམས་ཁམས་དེ་དང་འབྲེལ་བ་ཡོད་པ་ནི་ར་གསལ་བོ་འཕྲོད་ཐུབ་པ་ཞིག་རེད། ཀྲུང་གོས་བོད་ཀྱི་གནད་དོན་སེལ་དགོས་ན། ཐོག་མར་དམག་མིས་བོད་ས་བཙན་བཟུང་གི་སེམས་ཁམས་གཙང་ཕྱག་དང་། དེ་ནས་སྐར་ལྔའི་དར་དམར་མར་ཕབ་པ། དེ་དང་ཕྱོགས་མཚུངས་ཀྲུང་གོའི་གཙོ་འཛིན་དག་གི་པར་སོགས་ཕྱིར་བསྡུ་བྱ་རྒྱུ་དེ་རེད།
ག་རེ་ལབ་ཀི་ཡོད། དེ་ནི་དབུ་མའི་ལམ་གྱི་རྒྱབ་བསྐྱོར་མཚོན་བྱེད་མ་རེད་དམ།
སྤྱིར་ན་ཁྲིན་བེའི་ཅེན་གྱིས་བརྗོད་པའི་གནས་ཚུལ་ཁག་གཅིག་ལ་རང་ཉིད་གཏིང་ནས་འཐད་པ་མེད་མོད། ཁོང་གིས་གུང་ཁྲན་ཏང་གིས་བོད་པའི་ཁང་དགོན་སོགས་ཀྱི་སྟེང་དུ་སྐར་ལྔའི་རྒྱལ་དར་བཙན་བཙུགས་བྱེད་བཅུག་པ་དང་། དེ་བཞིན་ནང་དུ་གུང་ཁྲན་གཙོ་འཛིན་དག་གི་འདྲ་པར་བཙན་གྱིས་སྒྲིག་བཤམ་བྱེད་དུ་བཅུག་པའི་བྱ་སྤྱོད་དེ་དག་ནོར་འཛོལ་ཅན་གྱི་བྱེད་ཐབས་ཤིག་ཏུ་ངོས་འཛིན་བྱེད་པ་ནི་དོན་དངོས་རང་བཞིན་ཅན་གྱི་གནས་སྟངས་ཤིག་ཡིན་པར་གུས་ནས་ཀྱང་ངོས་འཛིན་བྱེད་བཞིན་ཡོད། དེས་ནས་གུང་ཁྲན་ཏང་གིས་ཅིའི་ཕྱིར་དེ་ལྟར་བྱེད་དུ་བཅུག་པ་ཡིན་ནམ།
སྤྱིར་ན་གུང་ཁྲན་ཏང་ནི་ལྷ་མེད་སྨྲ་བའི་བལྟ་གྲུབ་འཛིན་མཁན་ཞིག་ཡིན་པ་ཙམ་དུ་མ་ཟད། ལྷ་ཡོད་རིག་པའི་གཞུང་ལུགས་དང་དེ་ལས་བྱུང་བའི་སྤྱི་ཚོགས་དང་མི་གཤིས་ལ་རྒྱུས་མངའ་རྒྱུས་མངའ་མེད་པའམ་རྒྱུས་མངའ་གཏིང་ཟབ་མེད་པའི་དབང་གིས་ད་གཟོད་མིག་སྔའི་ནོར་འཛོལ་ཅན་གྱི་བྱ་སྤྱོད་དེ་དག་ཡང་ཡང་འབྱུང་བཞིན་ཡོད།
གཞན་ཡང་གུང་ཁྲན་ཏང་ནི་སེམས་གཙོ་སྨྲ་བའི་བལྟ་གྲུབ་ལས་དངོས་གཙོ་སྨྲ་བའི་བལྟ་གྲུབ་ཀྱི་རིག་པའི་གཞུང་ལུགས་ལ་ཡིད་རྟོན་དང་། ཆ་འཇོག ཉམས་ལེན་བྱེད་མཁན་ཞིག་ཡིན་པའི་ཆ་ནས་འཇིག་རྟེན་ཁམས་ཀྱི་ཡུལ་དང་ཡུལ་ཅན་ལས་གྲུབ་པའི་གནས་ལུགས་མཐའ་དག་མཐའ་གཅིག་ཏུ་དངོས་གཙོ་སྨྲ་བའི་རིག་པའི་གཞུང་ལུགས་ལ་བརྟེན་ཏེ་ཡང་དག་པའི་ཐག་གཅོད་བྱ་ནུས་པར་ངོས་འཛིན་གྱི་དབང་གིས་ནོར་འཁྲུལ་འདི་དག་བྱུང་དང་འབྱུང་མུས་ཡིན།
བོད་དོན་འབའ་ཞིག་གི་ཐོག་ནས་མདོར་ཙམ་བརྗོད་ཀྱང་། གུང་ཁྲན་ཏང་གིས་བོད་ཀྱི་གནད་དོན་ཐག་གཅོད་ལེགས་པོ་ཞིག་བྱ་དགོས་ཚེ། ཐོག་མ་བོད་ཀྱི་དཔལ་འབྱོར་གནས་བབ་ཐག་གཅོད་ལེགས་པོ་ཞིག་བྱ་དགོས་པར་ངོས་འཛིན་བྱེད་བཞིན་ཡོད་ལ་དེའི་དབང་གིས་བོད་ཀྱི་མཐའ་མའི་ཐག་གཅོད་ཀྱང་དཔལ་འབྱོར་བསྒྱུར་བཅོས་སྲིད་བྱུས་ཀྱིས་རང་བཞིན་གྱིས་ཐག་ཆོད་པར་ངོས་འཛིན་བྱེད་བཞིན་ཡོད། འོན་ཀྱང་དེ་ནི་བལྟ་བ་ཡང་དག་ཅིག་མ་ཡིན་ལ། ཐབས་བྱུས་བླ་མེད་ཅིག་དེ་བས་ཀྱང་མིན། ཕྲན་གྱི་བལྟས་ན་གུང་ཁྲན་ཏང་གིས་དོན་དམ་བོད་ཀྱི་གནད་དོན་ཐག་གཅོད་ལེགས་པོ་ཞིག་བྱ་དགོས་ཚེ། ཏིང་ཞོ་ཕིང་གིས་བརྗོད་པ་ལྟར་དམིགས་བསལ་གྱི་གནས་བབ་ལ་དམིགས་བསལ་གྱི་བྱ་ཐབས་སྤེལ་དགོས་པ་དེ་གཙོ་གནད་དུ་འཛིན་དགོས། འོན་ཀྱང་དེ་ཡང་སྐབས་བབ་འདིའི་གོ་དོན་ནི་གཞན་དང་གཞན་མིན་ཏེ། བོད་ལ་དངོས་གཙོ་སྨྲ་བའི་རིང་ལུགས་ཀྱི་བྱ་ཐབས་སྤེལ་དགོས་ལ། དེ་ལས་ཀྱང་སེམས་གཙོ་སྨྲ་བའི་རིང་ལུགས་ཀྱི་བྱ་ཐབས་གཟབ་ནན་གྱི་སྒོ་ནས་སྤེལ་དགོས། དེ་ལྟར་རྩ་བའི་བལྟ་གྲུབ་ཟུང་སྦྲེལ་གྱི་བྱ་ཐབས་ཚད་ལྡན་ཞིག་སྤྱོད་ཚེ་ད་གཟོད་བོད་ཀྱི་གནད་དོན་སྤྱི་ཡོངས་ཀྱི་ཆ་ནས་བརྟན་བརླིང་ཡོང་ཐུབ་ངེས་ཡིན། འདི་ནི་གུང་ཁྲན་ཏང་གིས་ད་ཡོད་དུག་ཟས་བཅོས་ཐབས་ལ་མཆོག་ཏུ་གྱུར་པའི་སྨན་ཉག་ཅིག་དེ་ཡིན་ལ། དེ་བས་ཀྱང་བོད་འབངས་འཕྲལ་ཕུག་གི་ལྕགས་བསྒྲོགས་ཀྱི་གནས་ལས་ཕྱོགས་ཡོངས་ནས་གྲོལ་ཐུབ་ཀྱི་བགྲོད་ལམ་ཉག་ཅིག་དེའང་ཡིན།
དེས་ན་བཀུར་འོས་དྲ་གྲོགས་ཚོའི་དགོངས་འཆར་ཇི་ལྟར་ཡིན་ནམ།