དེ་རིང་དབུས་འོས་བསྡུ་ལས་ཁང་གིས་ཨ་ཚོགས་ཀླུ་མཁར་བྱམས་ལགས་དང་འབྲེལ་བའི་མདོ་སྨད་སྤྱི་འཐུས་བར་མའི་འོས་བསྡུའི་སྐོར་ལ་གསལ་བསྒྲགས་ཤིག་བསྐྱངས་འདུག
དབུས་འོས་བསྡུ་ལས་ཁང་གི་སྤེལ་བའི་གསལ་བསྒྲགས་དེའི་ནང་། སྐབས་ ༡༥ པའི་མདོ་སྨད་སྤྱི་འཐུས་ལས་ཐོག་ཀིརྟི་སྒྲོལ་དཀར་ལྷ་མོ་ལགས་སྤྱི་འཐུས་ལས་གནས་ནས་དགོངས་འཁྲོལ་ཟིན་སྐོར། དཔལ་ལྡན་སྤྱི་འཐུས་ཚོགས་གཙོ་སྦྲེལ་པོའི་མཚན་ཐོག་ཕྱི་ལོ་ ༢༠༡༣ ལོའི་ཟླ་ ༡༡ ཚེས་ ༡༧ འཁོད་བཀའ་ཡིག་ཕེབས་དོན་དུ། བཅའ་ཁྲིམས་དོན་ཚན་ ༥༧ ནང་གསེས་ ༢ པ་ནང་གསལ་ལྟར་ལག་བསྟར་གནང་དགོས་ཞེས་ཕེབས་ཐད། འོས་བསྡུ་སྒྲིག་གཞིའི་དོན་ཚན་ ༥༡ པའི་ནང་གསེས་ ༢ པའི་ནང་སྤྱི་འཐུས་དུས་ཡུན་ནང་ས་མིག་སྟོང་པ་ཐོན་ཚེ་བར་མའི་འོས་བསྡུ་མ་དགོས་པར་སྒུག་ཐོའི་གྲལ་མཚམས་གར་འཁེལ་ནས་ཚབ་གསར་འཇུག་རྒྱུའི་ཆེད། བརྒྱ་ཆ་ ༣༣ ཡན་ལོན་ཁོངས་ནས་འོས་ཐོབ་མང་རིམ་བཞིན་ཐོར་བཀོད་དེ་འོས་བསྡུའི་འགན་འཛིན་རྣམ་པ་གསུམ་དང་། ཟུར་དཔང་རྣམས་ཀྱི་མཚན་རྟགས་བཀོད་པ་འོས་བསྡུ་ལས་ཁང་དུ་ཉར་དགོས་པར་སོང་། སྐུ་ཉིད་བརྒྱ་ཆ་ ༣༣ མ་ལོན་སྟབས་མདོ་སྨད་སྤྱི་འཐུས་འོས་དམིགས་སྒུག་ཐོའི་ནང་མེད་པར་བརྟེན་བོད་མི་མང་སྤྱི་འཐུས་སྐབས་ ༡༥ པའི་གྲོས་ཚོགས་ཚོགས་དུས་ཐེངས་ ༢ པའི་ཐོག་ཁྲིམས་སྒྲིག་བསྐྱར་བཅོས་གཏན་འབེབས་གནང་ནས་བཅའ་ཁྲིམས་དོན་ཚན་ ༣༦ པའི་ནང་ཁྲིམས་ལུགས་བཟོ་འགོད་དང་། གཏན་འབེབས་བྱ་རྒྱུའི་དབང་ཆ་ཡོངས་རྫོགས་བོད་མི་མང་སྤྱི་འཐུས་ལྷན་ཚོགས་ལ་ཡོད་པ་དང་། ཁྲིམས་ལུགས་དེ་དག་ཁྲིམས་སུ་བཅའ་བ་ལ་སྲིད་སྐྱོང་མཆོག་གིས་ཆོག་མཆན་མིང་རྟགས་འགོད་དགོས། ཁྲིམས་སྒྲིག་བསྐྱར་བཅོས་གཏན་འབེབས་གནང་བ་དེར་སྲིད་སྐྱོང་མཆོག་གིས་ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༡༤ ཉིན་དངོས་སུ་མཚན་རྟགས་བཀོད་པ་དེ་ལག་བསྟར་བྱེད་དགོས་པས་ད་ལམ་མདོ་སྨད་སྤྱི་འཐུས་གཅིག་གི་བར་མའི་འོས་བསྡུ་ཁྲིམས་སྒྲིག་དགོངས་དོན་ལྟར་ལག་བསྟར་བྱེད་དགོས་པ་ཆགས་ཡོད། སྲིད་སྐྱོང་གིས་མཚན་རྟགས་བསྩལ་བའི་ཉིན་མོ་ནས་བཟུང་ལག་བསྟར་དགོས་པ་སོང་མཐའ་མའི་བསྐྱར་བཅོས་གཏན་འབེབས་ཇི་སོང་ལ་ཚད་འཛིན་ལག་བསྟར་ཞུ་དགོས་པ་དགོངས་འཇགས་ཅེས། དབུས་འོས་བསྡུ་ལས་ཁང་ནས་ཕྱི་ལོ་ ༢༠༡༤ ཟླ་ ༡ ཚེས་ ༣ ལ། ཞེས་འཁོད་འདུག
གསར་འགོད་པ། དོན་གོ
