རྒྱ་གཞུང་གིས་ཀླུ་ཆུ་རྫོང་རྨོག་རུ་དགོན་དུ་གཙང་བཤེར་དག་ཐེར་བྱས་ཏེ་གྲུབ་འབྲས་ཡག་པོ་ཐོན་ཡོད་སྐོར་དོན་ཚན་ ༧ དང་མུ་མཐུད་རྒྱུན་འཁྱོངས་བྱེད་འཆར་གྱི་དོན་ཚན་ ༤ བཅས་བསྒྲགས་འདུག
ཁ་སང་ཀན་ལྷོ་ཀླུ་ཆུ་རྫོང་དྲིལ་བསྒྲགས་ལས་ཁུངས་ཀྱིས་གནས་ཚུལ་སྤེལ་བའི་ནང་། ཀླུ་ཆུ་རྫོང་ཨུ་ཡོན་ལྷན་ཁང་གི་བཀའ་བཀོད་ལྟར། སྔར་ལོའི་ཕྱི་ཟླ་ ༤ པ་ཙམ་ནས་ཀླུ་ཆུའི་རྨོག་རུ་དགོན་པར། ཁྲིམས་སྐྱོང་འདུ་ཤེས་ཇེ་དྲག་ཏུ་གཏོང་བའི་ལས་འགུལ་སྤེལ་ཏེ་གྲུབ་འབྲས་བླངས་ཡོད་སྐོར་དོན་ཚན་ ༧ བགྲང་ཡོད་པའི་ནང་། རང་སྲེག་ལ་ངོ་རྒོལ་བྱས་ཏེ་ཚེ་སྲོག་ལ་གཅེས་སྤྲས། དགོན་ནང་ལས་དོན་རུ་ཁག་ཆེད་གཏོང་གིས་དྲིལ་བསྒྲགས་སྤེལ་བ་དང་ལས་དོན་རུ་ཁག་གི་བྱ་བར་མཉམ་འབྲེལ་མི་བྱེད་མཁན་ལ་ཉེས་ཆད། དགོན་པའི་ཕྱི་ལ་སློབ་སྦྱོང་དང་ནད་དགོངས་སོགས་སུ་སྐྱོད་མཁན་ཚོར་རྗེས་འདེད་དང་ཞིབ་བཤེར་བྱས་པ་སོགས་བཀོད་འདུག
མུ་མཐུད་རྒྱུན་འཁྱོངས་བྱེད་དགོས་པའི་དོན་ཚན་ ༤ ཡོད་པའི་ནང་། དགོན་པ་ཕྱི་བཀག་ནང་སྡོམ་གྱིས་གྲྭ་བ་ཚོར་དུས་རྒྱུན་གྲངས་བཤེར་བྱས་ཏེ་སློབ་གསོ་སྤེལ་རྒྱུ་དང་། ཕྱི་མི་ནང་དུ་ཡོང་མཁན་ལ་ཞིབ་བཤེར་དང་མིང་ཐོ་འགོད་པ། གྲྭ་བ་ཚོའི་ལག་འཁྱེར་ཁ་པར་ཚང་མ་གཞུང་གིས་སྟངས་འཛིན་བྱས་ཏེ། གལ་སྲིད་ཁ་པར་གཏོང་དགོས་ཚེ་ཆོག་མཆན་ཞུ་དགོས་པ། དེ་བཞིན་གྲྭ་བ་ཚོའི་སྐད་འཕྲིན་དང་ཁེའུ་ཁེའུ་གླེང་མོལ་ལ་ཞིབ་བཤེར་བྱེད་རྒྱུ་སོགས་བཀོད་འདུག
སློབ་སྦྱོང་ཤུགས་གནོན་བྱས་ཏེ་གྲྭ་བའི་ཁྲིམས་སྐྱོང་འདུ་ཤེས་ཇེ་དྲག་ཏུ་གཏོང་དགོས་པའི་དོན་ཚན་ཁག་ནི། དང་པོ། དགོན་པའི་ལས་དོན་རུ་ཁག་གིས་ཁྲིམས་ལུགས་དྲིལ་བསྒྲགས་དང་དམངས་ཕན་སྲིད་བྱུས། རང་སྲེག་ལ་ངོ་རྒོལ་བྱས་ཏེ་ཚེ་སྲོག་ལ་གཅེས་སྤྲས་བྱེད་པའི་སློབ་གསོ་གཏིང་ཟབ་ཀྱིས་སྤེལ་བ་དང་ཆབས་ཅིག ཕྱི་ལོ་ ༢༠༡༣ ཟླ་ ༩ ཚེས་ ༩ ཉིན་བསང་ཆུ་དགོན་གྱི་བླ་མ་འཇམ་དབྱངས་རྒྱ་མཚོ་མཆོག་དང་ཨ་ལགས་ཟམ་ཚ་ཚང་རྣམ་གཉིས་རྨོག་རུ་དགོན་པར་ཆེད་དུ་གདན་འདྲེན་ཞུས་ཏེ། གྲྭ་བ་ཚོས་སོ་སོའི་དགོན་པར་བདག་སྐྱོང་དང་ཉེ་འཁོར་གྱི་གྲྭ་བར་ཐུགས་ཁུར་བྱས་ཏེ་བརྟན་བརླིང་མིན་པའི་བྱ་འགུལ་ནང་མཉམ་ཞུགས་མི་བྱེད་པ་དང་། ཧུར་ཐག་གིས་ཞང་གྲོང་སྡེ་དང་ཡང་ན་དགོན་པའི་སློབ་གསོའི་བྱ་བར་མཉམ་འབྲེལ་དགོས་པའི་ཐུགས་སྐུལ་གནང་ཡོད།
གཉིས་པ། གྲྭ་བའི་སློབ་སྦྱོང་གི་གྲུབ་འབྲས་ཐད་བྱ་དགའ་དང་ཉེས་ཆད་ཀྱི་ལམ་ལུགས་གཏན་འབེབས་བྱས་ཏེ། བློ་རྩེ་གཅིག་སྒྲིམ་གྱིས་ནང་ཆོས་ཉམས་ལེན་དང་སློབ་སྦྱོང་འབུར་ཐོན་གྱི་གྲྭ་བར་བྱ་དགའ་དང་། བསམ་བློ་གཅིག་གྱུར་མིན་པ་དང་སློབ་སྦྱོང་ལ་ནན་ཏན་མི་བྱེད་པ། ལས་དོན་རུ་ཁག་གི་བྱ་བར་མཉམ་འབྲེལ་མི་བྱེད་པའི་གྲྭ་བ་ཚོར་ཉེས་ཆད་བཅད། གསུམ་པ། ལས་དོན་རུ་ཁག་གིས་གྲྭ་བ་ཚོ་ཁག་བགོས་ཏེ་གྲྭ་པ་རེ་རེ་བཞིན་དྲིལ་བསྒྲགས་སློབ་གསོ་སྤེལ་བ། བཞི་པ། དུས་ཡུན་ངེས་མེད་ཀྱིས་དགོན་པའི་མཐོ་རིམ་གྲྭ་བཙུན་ཚོས་རྨོག་རུ་དང་ཏེན་ཐཱང (电塘)་དང་། ཆུ་རིས་(恰日)གསུམ་གྱི་གྲོང་མང་ལས་དོན་ཚོགས་ཆུང་ལ། ཉེ་འཁོར་གྱི་དད་ལྡན་མང་ཚོགས་ཚོར་དྲིལ་བསྒྲགས་སློབ་གསོ་སྤེལ་དུ་བཅུག་སྟེ་མི་མང་ ༥༠༠ ཙམ་གྱིས་ཆ་ཤས་བླངས། ལྔ་པ། རྒྱུན་ལྡན་གྱི་སློབ་སྦྱོང་ཕུད་ལས་དོན་རུ་ཁག་དང་ཡང་ན་ཞང་གྲོང་སྡེ་གཞན་དུ་སྤེལ་བའི་དྲིལ་བསྒྲགས་སློབ་གསོའི་བྱ་བར་ལྟ་སྐོར་བྱེད་དུ་བཅུག་པ། དྲུག་པ། དུས་ཡུན་ངེས་གཏན་གྱིས་བཞུགས་མོལ་ཚོགས་འདུ་བསྡུས་ཏེ་གྲྭ་བ་ནང་ཁུལ་དུ་གཙང་བཤེར་དག་ཐེར་བྱ་བའི་མྱོང་ཚོར་བརྗེ་རེས་བྱེད་པ། བདུན་པ། དགོན་པ་ཕྱི་རུ་སློབ་སྦྱོང་དང་ནད་དགོངས། ཡང་ན་བླ་བྲང་ནང་ཞབས་ཞུ་ཞུ་མཁན་གྱི་གྲྭ་བ་ཚོར་རྗེས་འདེད་ཞིབ་བཤེར་དང་སློབ་སྦྱོང་གི་ཡོ་ཆས་མཁོ་སྤྲོད། ཅེས་བཀོད་འདུག
དེ་བཞིན་དགོན་པ་དོ་དམ་ཤུགས་གནོན་བྱས་ཏེ་དགོན་པའི་འཆམ་མཐུན་བརྟན་འཇགས་སྲུང་སྐྱོབ་བྱེད་དགོས་པའི་སྐོར་དོན་ཚན་ ༤ བཀོད་པ་དག་ནི། དང་པོ། ཕྱི་བཀག་ནང་སྡོམ་གྱི་བྱེད་ཐབས་སྤྱད་ནས་དྲིལ་བསྒྲགས་སློབ་གསོ་སྤེལ་བ། གོམ་གང་མདུན་སྤོས་ཀྱིས་གྲྭ་བའི་དགོངས་ཞུའི་ལམ་ལུགས་ཇེ་དམ་དུ་བཏང་སྟེ་གང་འདོད་ཀྱིས་དགོན་པའི་ནང་འགྲོ་འོང་མི་ཆོག ཕྱི་ནས་ཡོང་མཁན་ཚོའི་མིང་ཐོ་འགོད་དང་། དྲིལ་བསྒྲགས་གཏམ་བཤད་ཚོགས་སྐབས་གྲྭ་བ་རེ་རེ་བཞིན་མིང་བཤེར་བྱེད་པ། གཉིས། དགོན་པ་ཡོངས་ཀྱི་གྲྭ་བ་ཚོའི་ལག་འཁྱེར་ཁ་པར་(Mobile)ཚང་མ་དོ་དམ་ཁང་གིས་གཅིག་གྱུར་གྱིས་དོ་དམ་བྱེད་པ། ཕྱི་ལོ་ ༢༠༡༣ ཟླ་ ༤ པ་ནས་བཟུང་གྲྭ་བ་ཚོའི་ལག་འཁྱེར་ཁ་པར་ཚང་མ་དོ་དམ་ཁང་གིས་བདག་ཉར་བྱས་ཡོད་པ་དང་། དོན་དག་ཡོད་ནས་ཁ་པར་གཏོང་དགོས་ཚེ་ངེས་པར་དུ་དོ་དམ་ཁང་གི་ཆོག་མཆན་ཐོབ་དགོས་པ་མ་ཟད། དོ་དམ་ཁང་གི་མི་སྣའི་ལྟ་སྐུལ་འོག་ཁ་པར་གཏོང་དགོས། དེ་བཞིན། དོ་དམ་ཁང་གིས་གྲྭ་བ་རེ་རེའི་སྐད་འཕྲིན་(Wechat)དང་ཁེའུ་ཁེའུ་(QQ)སོགས་ཀྱི་ཁ་བརྡའི་ནང་དོན་ལ་གཙང་བཤེར་བྱེད་པ།
གསུམ། ངལ་རྩོལ་དང་ངལ་གསོ་ཟུང་འབྲེལ་གྱིས་གྲྭ་བ་ཚོར་སྡོང་འཛུགས་ནགས་སྐྲུན་འོས་འགན་རྩ་འཛུགས་དང་། དགོན་པའི་ཁོར་ཡུག་ལ་གཙང་སྦྲ། ལུས་རྩལ་བྱ་འགུལ་སོགས་བྱ་འགུལ་རིགས་སྣ་མང་སྤེལ་བ། བཞི། གྲྭ་བ་དོ་དམ་ལ་ཤུགས་མནན་ཏེ་ལས་འགན་གཙང་ལེན་ལམ་ལུགས་ལག་བསྟར་བྱེད་པ། དགོན་པའི་དབུ་མཛད་དང་ཁྲི་བ། དགེ་བསྐོས། ཡོངས་འཛིན། དེ་བཞིན་དགོན་པ་དོ་དམ་ཁང་གི་མི་སྣ་བཅས་ཀྱིས་གཙོ་འགན་འཁུར་ཏེ། མཐོ་རིམ་གྲྭ་བཙུན་ཚོ་ཁག་བགོས་ཀྱིས་གྲྭ་བར་དོ་དམ་བྱས་ནས་གྲྭ་བ་ནང་ཁུལ་དུ་ཕན་ཚུན་ལྟ་སྐུལ་གྱི་དོ་དམ་སྒྲིག་སྲོལ་ཆགས་ཏུ་འཇུག་པ། ཅེས་བཀོད་འདུག
གསར་འགོད་པ། པདྨ་མཚོ།
