འགྲོ་བ་མིའི་ཐོབ་ཐང་ལྟེ་གནས་ཁང་གིས་ ༢༠༡༣ ལོའི་བོད་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་གྱི་སྙན་ཐོ་ཞིག་དང་རྒྱ་ནག་གི་ངལ་རྩོལ་བསྒྱུར་བཀོད་ལམ་ལུགས་སྐོར་གྱི་དམིགས་བསལ་དཔེ་དེབ་གཅིག་བཅས་འདོན་སྤེལ་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་། གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། བོད་ཀྱི་འགྲོ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། བོད་དབྱིན་གཉིས་ཐོག་ ༢༠༡༣ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་སྙན་ཐོ་ཞིག་དང་། རྒྱ་ནག་གི་ངལ་རྩོལ་བསྒྱུར་བཀོད་ལམ་ལུགས་སྐོར་གྱི་དཔེ་དེབ་ཅིག་བཅས་འདོན་སྤེལ་གྱི་གསར་འགོད་གསལ་བསྒྲགས་ཤིག་སྤེལ་སོང་། གསར་འགོད་ལྷན་ཚོགས་ཐོག་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་དང་ཉམས་ཞིབ་པ་བསྟན་འཛིན་ཉིན་བྱེད་ལགས། ཨ་རི་ནས་ཡིན་པའི་ཁྲིམས་ལུགས་ཆེད་མཁས་པ་ཇོན་གྷོ་ཊི་ཌེ་ (John Gaudette)ལགས་བཅས་ཀྱིས་ངོ་སྤྲོད་གཏམ་བཤད་གནང་སོང་།
བོད་ནང་གི་འགྲོ་བ་མིའི་ཐོབ་ཐང་སྐོར་ལ་ཚེ་རིང་མཚོ་མོ་ལགས་ཀྱིས། ད་ལོའི་ཕྱི་ཟླ་ ༡༡ པ་ནས་ང་ཚོས་ཉམས་ཞིབ་བྱས་ཏེ་སྙན་ཐོ་འདི་འབྲི་མགོ་བརྩམས་ཡོད་ཀྱང་། ཕྱི་ཟླ་ ༡༢ ཀྱི་ཟླ་མཇུག་ལ་མཚོ་སྔོན་ཞིང་ཆེན་ནང་གི་བོད་མི་འགར་བཅར་འདྲི་བྱས་པ་བརྒྱུད། ༢༠༡༢ ལོར་ང་ཚོས་ཧ་མ་གོ་བའི་གནས་ཚུལ་ཁག་ཅིག་དང་། ༢༠༡༣ ལོར་བོད་ནང་རྒྱ་ནག་གཞུང་གིས་དྲག་གནོན་བྱེད་སྟངས་ག་འདྲ་ཡོད་མེད་ཀྱི་གནས་ཚུལ་གསར་བ་མང་པོ་ཞིག་འབྱོར་ཡོད་སྟབས་བསྐྱར་དུ་ཞིབ་འཇུག་བྱས་ཏེ་ཁ་སྣོན་བྱས་པ་ཡིན། དེ་དག་མཚོ་སྔོན་ས་ཁུལ་ནས་ཡིན་པའི་མིང་བརྗོད་འདོད་མེད་པའི་ངོ་ཤེས་ཤིག་བརྒྱུད་དེ་རག་པ་ཡིན། ཁོང་མ་ད་ལྟ་ཁེ་ན་ཌའི་གཙུག་ལག་སློབ་གྲྭ་ཞིག་གི་དགེ་རྒན་ཆེན་མོ་རེད། ཁོང་མོ་བོད་ནང་དང་རྒྱ་ནག་ནང་ཐེངས་མང་པོར་ཕྱིན་ཏེ་གནས་ཚུལ་དངོས་ལ་ཉམས་ཞིབ་དང་བཅར་འདྲི་བྱས་ཏེ་ཡོང་བ་དེ་འདྲ་རེད། ༢༠༡༣ ལོར་རྒྱ་གཞུང་གིས་འཛིན་བཟུང་བྱས་པའི་བོད་མི་གྲངས་ ༡༡༩ ཙམ་ང་ཚོའི་སྙན་ཐོའི་ནང་བཀོད་ཡོད། ཅེས་བརྗོད་སོང་།
ཁོ་མོས་མུ་མཐུད་དུ། སྙན་ཐོ་དེའི་ནང་ཁེ་ཎ་ཌའི་གྷི་ལོ་ཧྥི་( university of Guelph)གཙུག་ལག་སློབ་གྲྭའི་ནང་འགྲོ་བ་མིའི་ཐོབ་ཐང་སྐོར་ལ་སློབ་གཉེར་བྱེད་མཁན་སློབ་ཕྲུག་ཚོས་བོད་ནང་གི་འགྲོ་བ་མིའི་ཐོབ་ཐང་ཐོག་ཉམས་ཞིབ་བྱས་པའི་རྩོམ་ཡིག་གཉིས་བཀོད་ཡོད། གཞན་ཁོང་ཚོས་ཉམས་ཞིབ་བྱས་པའི་རྩོམ་ཡིག་ཁག་ཅིག་ཡོད་ཀྱང་རིམ་པས་བོད་ཡིག་དང་རྒྱ་ཡིག་སོགས་སུ་བསྒྱུར་ཏེ་ལྟེ་གནས་ཁང་གི་དྲ་ཚིགས་སྟེང་འགོད་རྒྱུ་ཡིན། ཞེས་སོགས་བརྗོད་སོང་།
དེ་རྗེས་ཉམས་ཞིབ་པ་བསྟན་འཛིན་ཉིན་བྱེད་ལགས་ཀྱིས་བོད་ནང་གི་རང་ལུས་མེར་བསྲེགས་སྐོར་ལ། ༢༠༠༨ ལོ་ནས་བཟུང་བོད་ནང་རང་ལུས་མེར་བསྲེགས་གནས་ཚུལ་བྱུང་སྟེ། གྲངས་ཚད་མཐོ་པོར་སླེབ་དུས་སྲིད་སྐྱོང་མཆོག་གཙོས་བླ་ཆེན་དག་གིས་རང་སྲེག་མ་གནང་རོགས་ཞེས་འབོད་སྐུལ་ཞུས་ཡོད་ཀྱང་། ༢༠༡༣ ལོའི་ནང་བོད་མི་ ༢༧ ཙམ་གྱིས་རང་ལུས་མེར་བསྲེགས་གནང་ཡོད། ན་ནིང་དང་ད་ལོའི་རང་ལུས་མེར་བསྲེགས་གཉིས་བར་ཞིབ་བསྡུར་བྱེད་སྐབས་ཁྱད་པར་ཁ་ཤས་མཐོང་སོང་། ན་ནིང་ལྟ་བུ་ཡིན་ན། བོད་ཀྱི་བླ་ཆེན་བཟོད་པ་རིན་པོ་ཆེ་དང་ཤེས་ཡོན་ཅན་རྩོམ་པ་པོ་སོགས་ཀྱིས་མེར་བསྲེགས་གནང་ཡོད་ཀྱང་། ད་ལོར་ཤེས་ཡོན་ཚད་མཐོ་བོ་ཡོད་མཁན་དེ་འདྲ་མེད་ཀྱང་སྤྱི་ཚོགས་ཀྱི་རིམ་པ་འདྲ་མིན་ནས་འདུག རྒྱ་ནག་གི་གནས་བབ་དང་སློབ་གྲྭའི་འོག་ནས་འཚར་ལོངས་བྱེད་མཁན་ལོ་གཞོན་ན་ཆུང་གཉིས་ཀྱིས་རང་ལུས་མེར་བསྲེགས་གནང་ཡོད་སྟབས། རྒྱ་ནག་གིས་བོད་ནང་དེང་རབས་འཛུགས་སྐྲུན་བྱས་ཚུལ་དང་རང་དབང་ཡོད་ཚུལ་ཕྱི་བསྒྲགས་བྱེད་ཀྱི་ཡོད་པ་དེ་དག་བདེན་པ་མིན་པའི་ར་སྤྲོད་གསལ་བོ་བྱས་ཡོད་པ་རེད། ཅེས་བརྗོད་སོང་།
ཚེ་རིང་མཚོ་མོ་ལགས་ཀྱིས་རྒྱ་ནག་གི་ངལ་རྩོལ་བསྒྱུར་བཀོད་སྐོར་བརྗོད་དོན། རྒྱ་གཞུང་གིས་ངལ་རྩོལ་བསྒྱུར་བཀོད་ལམ་ལུགས་ལག་བསྟར་བྱས་ཏེ་ལོ་ ༥༠ ལྷག་འགྲོ་བཞིན་ཡོད་ཅིང་། ལམ་ལུགས་དེས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་གི་ཡོད་པར་རྒྱལ་སྤྱིའི་ཐོག་ནས་ངོ་འཛིན་གཅིག་གྱུར་བྱུང་ཡོད་ཀྱང་། ངལ་རྩོལ་བསྒྱུར་བཀོད་ཟེར་བ་དེའི་འོག་ཏུ་རྒྱ་རིགས་མི་མང་གིས་སྡུག་བསྔལ་མྱོང་གི་ཡོད་པ་ལས། བོད་དང་གྲངས་ཉུང་མི་རིགས་གཞན་དག་གིས་མནར་གཅོད་མྱངས་དང་མྱོང་གི་ཡོད་པའི་གནས་ཚུལ་གཅིག་ཀྱང་མཐོང་རྒྱུ་མི་འདུག ད་རུང་མི་ཁ་ཤས་གོ་ནོར་ཐེབས་ཏེ་ངལ་རྩོལ་བསྒྱུར་བཀོད་ལམ་ལུགས་ཟེར་བ་རྒྱ་ནག་ནང་མ་གཏོགས་བོད་དང་ཞིན་ཅང་གཉིས་ནང་མེད་པའི་སྐད་ཆའང་ཤོད་ཀྱི་འདུག དེ་རྩ་བ་ཉིད་ནས་མ་རེད། ང་ཚོས་ངལ་རྩོལ་བསྒྱུར་བཀོད་སྐོར་ཀྱི་སྙན་ཐོ་འདོན་དགོས་པའི་རྒྱུ་མཚན་གཙོ་བོ་གཅིག་དེའི་སྐོར་ལ་གསལ་བཤད་བྱེད་ཆེད་ཡིན། བོད་མི་ཚོས་ངལ་རྩོལ་བསྒྱུར་བཀོད་འོག་དཀའ་སྡུག་མྱངས་པའི་ལོ་རྒྱུས་དང་། ངལ་རྩོལ་བསྒྱུར་བཀོད་འོག་ཐར་རྗེས་ལུས་སེམས་གཉིས་ཀྱི་ད་ལྟའི་གནས་སྟངས་བཅས་ཀྱི་སྐོར་ཞིབ་མོར་བཀོད་ཡོད། ཅེས་བརྗོད་སོང་།
ཁྲིམས་ལུགས་ཆེད་མཁས་པ་ཇོན་གྷོ་ཊི་ཌེ་ལགས་ཀྱིས་རྒྱ་ནག་གི་ངལ་རྩོལ་བསྒྱུར་བཀོད་སྐོར་ལ། རྒྱ་ནག་གཞུང་གིས་སྔར་ལོའི་ཕྱི་ཟླ་ ༡༢ པའི་ཚེས་ ༢༨ ཉིན་ངལ་རྩོལ་བསྒྱུར་བཀོད་ཟེར་བ་དེ་ནི་ཁྲིམས་འགལ་ཐོག་མི་ལ་ཉེས་ཆད་དང་མནར་སྤྱོད་གཏོང་གི་ཡོད་པར་ངོས་འཛིན་ཐོག་ལམ་ལུགས་དེ་རྩ་མེད་བཟོ་རྒྱུ་ཡིན་པའི་ཐག་གཅོད་བྱས་ཡོད་ཀྱང་། མིང་བསྒྱུར་ཙམ་བྱས་ཏེ་མུ་མཐུད་ཁྲིམས་འགལ་ཐོག་ངལ་རྩོལ་བསྒྱུར་བཀོད་ལམ་ལུགས་ལག་བསྟར་བྱེད་སྲིད་པར་མང་པོ་ཞིག་གིས་སེམས་འཚབ་བྱེད་ཀྱི་ཡོད། གང་ཡིན་ཟེར་ན། རིག་གནས་གསར་བརྗེའི་སྔོན་ཙམ་ལ་ངལ་རྩོལ་བསྒྱུར་བཀོད་རྩ་མེད་བཟོ་བར་འབད་བརྩོན་བྱས་ཡོད་ཀྱང་། རིག་གསར་མཇུག་སྒྲིལ་རྗེས་ཡང་བསྐྱར་རྒྱ་ནག་གི་ཉེན་རྟོག་པར་དབང་ཆ་ཆེ་ཤོས་སྤྲད་ཡོད། གནམ་བདེ་སྒོ་མོ་ཆེའི་ཐང་ཆེན་གྱི་དམར་གསོད་དོན་རྐྱེན་བྱུང་རྗེས། རྒྱལ་སྤྱིའི་ཐོག་ནས་རྒྱ་ནག་ལ་སྐྱོན་བརྗོད་དང་གནོན་ཤུགས་མང་པོ་སྤྲད་པ་དེར་རྒྱ་ནག་གིས་ཀྱང་ཁས་ལེན་བྱས་ཡོད་ནའང་རྗེས་སུ་འགྱུར་བ་གང་ཡང་བཏང་མེད། ཅེས་སོགས་བརྗོད་སོང་།
གསར་འགོད་པ། ལྷ་སྐྱབས་རྒྱལ།
བསྟན་འཛིན་བཀྲ་ཤིས་ལགས། ཁྱོད་ཀྱིས་བལྟས་ན་ཞིབ་འཇུག་གི་སྙན་ཐོ་ཚད་ལྡན་ཞིག་ཇི་ལྟར་བྱས་ཏེ་སྤེལ་དགོས་སམ། འགྲོ་བ་མིའི་ཐོབ་ཐང་ཚང་གི་ཕྱི་ལོ་ ༢༠༡༣ ལོའི་དབྱིན་ཡིག་ཐོག་འཁོད་པའི་ལོ་འཁོར་སྙན་ཐོ་དེ་ཕྲན་ནས་བལྟ་ཀློག་བྱ་རྒྱུ་བྱུང་བས་འདིར་བརྗོད་རྒྱུར། ཉམས་ཞིབ་ལྟེ་གནས་འདི་ཉིད་རང་དབང་གི་སྒོ་ནས་ཉམས་ཞིབ་བྱེད་ཐུབ་པའི་ཁོར་ཡུག་དང་ཆ་རྐྱེན་མེད་པའི་གནས་སྟངས་དེ་ང་ཚོས་ངོས་འཛིན་གསལ་པོ་ཡོད་པའི་ཐོག་ནས་བཤད་ན། ད་ལན་གྱི་ཉམས་ཞིབ་འདི་ཧ་ཅང་གྲུབ་འབྲས་ཚད་མཐོ་ཞིག་རེད་སྙམ། དེའི་རྒྱུ་མཚན་ནི། དང་པོ། ཉམས་ཞིབ་བྱ་གཞིའི་རྩ་བའི་གནད་དོན་ཁག་ངོས་འཛིན་གནང་སྟངས་དེ་ཧ་ཅང་ཡང་དག་རེད། དེ་ནི་གཙོ་བོ་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་གཏན་ལ་ཕབ་པའི་ཁྲིམས་ལུགས་དང་དེར་རྒྱ་གཞུང་ནས་ཁས་ལེན་ས་རྟགས་བརྒྱབས་རིགས་གཞིར་བཟུང་བྱས་པས་འདི་ནི་ཐབས་བྱུས་ཡང་དག་ཤིག་རེད།
གཉིས་པ། ཉམས་ཞིབ་བྱ་ཡུལ་ཡང་དག་རེད། དེའི་རྒྱུ་མཚན་ནི་ཉམས་ཞིབ་པ་དག་བོད་ཕྱི་ནང་གཉིས་ཀ་དང་དེ་བཞིན་རང་རིགས་དང་གཞན་རིགས་ཟུང་འབྲེལ་གྱི་སྒོ་ནས་བྱས་པས་རེད།
གསུམ་པ། ཉམས་ཞིབ་པའི་ཆ་རྐྱེན་གྱི་སྐོར་དེ་ཡང་ཤིན་ཏུ་འོས་འཚམས་རེད། དེ་ཡང་ཡིན་ཏེ་དེ་དག་ཕལ་མོ་ཆེ་འབྲེལ་ཡོད་ཕྱི་ནང་གི་ཁྲིམས་ལུགས་དང་། འགྲོ་བ་མིའི་ཐོབ་ཐང་གི་སྐོར། དེ་བཞིན་འབྲེལ་ཡོད་ལོ་རྒྱུས་དང་སྤྱི་ཚོགས་གནས་བབ་ལ་རྒྱུས་མངའ་གཏིང་ཟབ་དང་གང་ལེགས་ཡོད་མཁན་རྐྱང་རྐྱང་རེད་ལ། དེ་བཞིན་བོད་དུ་འཚོ་སྡོད་བྱེད་མཁན་གྱི་མི་དམངས་དཀྱུས་མ་དག་གི་སེམས་གཏམ་ཡང་ཡོད་པས་རེད། རྒྱུ་རྐྱེན་དེ་དག་གཙོ་བཟུང་ལ་བརྟེན་ནས་ཕྲན་ནས་ཉམས་ཞིབ་ཀྱི་སྙན་ཐོ་འདི་ཉིད་ཤིན་ཏུ་རིན་ཐང་ཆེ་བ་ཞིག་ཏུ་ངོས་འཛིན་བྱ་འོས་སྙམ། བཟང་པོ་ལ་བསྟོད་པ་དང་ཡི་རངས་དགོས་ལ། ངན་པ་ལ་སྨད་པ་དང་གདོང་ལེན་བྱ་རྒྱུ་ནི་སྤྱིར་འགྲོ་བ་མིའི་ཐུན་མིན་ཁྱད་ཆོས་ཡིན་ལ། ཁྱད་པར་ད་ལྟའི་ང་ཚོའི་གནས་བབ་ལ་ཁ་ཡོད་ལག་ཡོད་ཀྱིས་དགོས་མཁོ་ཡོད་པའི་གནད་འགག་ཅིག་ཡིན་པར་སེམས་སོ།།
འགྲོ་བ་མིའི་ཐོབ་ཐང་ཚང་གི་སྙན་ཐོ་ལ་ལྟ་ཡིན། ཞིབ་འཇུག་སྙན་ཐོ་ཞིག་ལ་འདྲ་བོ་མི་འདུག་རྙན་རྩོམ་དུས་དེབ་འདྲ་བོ་ཞིག་རེད། དེའི་ནང་དུ་ཉིས་སྟོང་བཅུ་གསུམ་ལོའི་ཟླ་བ་རེ་རེ་བཞིན་བོད་ཆོལ་ཁ་གསུམ་གྱི་ས་གནས་རེ་རེའི་གནས་སྟངས་ལ་ཞིབ་འཇུག་བྱས་པའི་གནས་ཚུལ་འདི་དང་དེ་རེད་ཟེར་བ་གང་ཡང་མི་འདུག བོད་པ་དང་ཕྱི་རྒྱལ་བ་ཁག་ཅིག་གིས་རྩོམ་སྒྲིག་བྱས་པའི་རྩོམ་ཡིག་ཁ་ཤས་དང་སྔོན་མའི་ཡིག་ཆ་ཁ་ཤས་ཤིག་བླུགས་འདུག
ཕྱི་ལོ་ ༢༠༡༣ ལོའི་བོད་ནང་གི་འགྲོ་བ་མིའི་ཐོབ་ཐང་གི་སྙན་ཐོ་དང་། རྒྱ་ནག་ངལ་རྩོལ་བསྒྱུར་བཀོད་ལམ་ལུགས་ཀྱི་སྐོར་གོ་ལོ་ཐོས་ལོ་ཙམ་གྱིས་ཕྱོགས་བསྡུས་དང་མཁོ་སྒྲུག་བྱས་པ་ཙམ་མ་ཡིན་པར། ཆེད་གཉེར་ཞིབ་འཇུག་བྱས་ཏེ་ད་ཆར་འབྲས་བུར་སྨིན་པར་འགན་འཛིན་གཙོས་འབྲེལ་ཡོད་ལས་བྱེད་ཡོངས་ལ་སྙིང་ནས་བསྔགས་བརྗོད་དང་རྗེས་སུ་ཡི་རངས་ཞུ་རྒྱུ་ཡིན། ཆེད་དེབ་འདི་གཉིས་ཀྱིས་བོད་ཀྱི་རྩ་དོན་ཐོག་དངོས་ཤུགས་དང་འཕྲལ་ཕུགས་གང་ཐད་ནས་གལ་འགངས་ཆེ་ལ་དོན་སྙིང་ལྡན་པའི་ངོ་བོར་འགྱུར་ངེས་ཡིན།
གངས་ཅན་སྐྱིད་གཤོངས་ན་སྒོ་རྒྱག་དགོས་པའི་གཞུང་འབྲེལ་ལས་ཁུངས་ཕན་ཐོགས་མེད་པ་གཉིས་དང་གཞུང་འབྲེལ་མ་ཡིན་པའི་ལས་ཁུངས་ཕན་ཐོགས་མེད་པ་གཉིས་ཡོད། གཞུང་གི་ལས་ཁུངས་གཉིས་ནི་འཆར་འགོད་ལས་ཁུངས་དང་ཆོས་དོན་ལས་ཁུངས་གཉིས་ཡིན་པ་དང་། གཞུང་འབྲེལ་མ་ཡིན་པའི་ལས་ཁུངས་གཉིས་ནི་འགྲོ་བ་མིའི་ཐོབ་ཐང་ལས་ཁུངས་དང་རྩོད་ཉོག་འདུམ་སྒྲིག་ལས་ཁུངས་གཉིས་ཡིན་ཟེར་བའི་བཤད་སྲོལ་ཡོད།
སྤྱིར་བཏང་རྒྱལ་ཁབ་ཅིག་ལ་མཚོན་ན་གོང་གསལ་ལས་ཁུངས་ཚང་མ་གལ་གནད་ཆེན་པོ་དང་ནུས་པ་འཐོན་མཁན་གྱི་ལས་ཁུངས་གཙོ་བོ་ཞེ་གཅིག་ཡིན་ནའང་ང་ཚོའི་བཙན་བྱོལ་བོད་པའི་ལས་ཁུངས་དེ་དག་གིས་བོད་པའི་སྤྱི་ཚོགས་ལ་ནུས་པ་གང་ཡང་འཐོན་ཐུབ་ཀྱིན་མེད། དཔེར་ན་གཞུང་གི་ལྷན་ཁང་གཙོ་བོའི་གྲས་ཆོས་དོན་ལས་ཁུངས་ལྟ་བུར་མཚོན་ན་མང་ཚོགས་ནང་ཞབས་ལྡན་ལྷན་ཁང་ཞེས་འབོད་སྲོལ་ཡོད། དེ་བཞིན་དུ་འཆར་འགོད་ལྷན་ཁང་ཟེར་བ་དེས་ཀྱང་རྒྱལ་ཁབ་ཀྱི་ལོ་ལྔ་དང་བཅུའི་འཆར་གཞི་རླབས་ཆེན་དེ་འདྲ་སྒྲིག་ཐུབ་པ་ཕར་ཞོགས་མིང་ཙམ་ལས་ད་བར་འཆར་འགོད་ལས་ཁུངས་ཀྱིས་འཆར་གཞི་བཟོས་ཏེ་མ་དངུལ་འདི་ཙམ་ཞིག་བླངས་ཡོད་པ་རེད་ཟེར་བ་ཞིག་བཤད་རྒྱུ་རྐང་གཅིག་ཀྱང་མེད། དེ་ནས་འགྲོ་བ་མིའི་ཐོབ་ཐང་ལས་ཁུངས་ལ་མཚོན་ན་ཡང་རྒྱལ་ཁབ་ཅིག་ཏུ་མ་ཚད་རྒྱལ་སྤྱིའི་ཐོག་ནས་ཀྱང་ལས་ཁུངས་གལ་ཆེན་པོ་དང་རྒྱལ་ཁབ་དང་མི་རིགས་ཆོས་ལུགས་བཅས་ཀྱི་ས་མཚམས་མེད་པའི་ལས་ཁུངས་ཤིག་ཏུ་རྩི་བཞིན་ཡོད་ཀྱང་། བོད་པའི་གངས་ཅན་སྐྱིད་གཤོངས་ཀྱི་འགྲོ་བ་མིའི་ཐོབ་ཐང་ལས་ཁུངས་ཀྱིས་གསར་འགྱུར་བརྒྱུད་ལམ་ཁག་གི་གནས་ཚུལ་ཚང་མ་བསྡུ་རུག་བྱས་ཏེ་ཡང་བསྐྱར་ཁོ་རང་ཚང་གི་ཡིན་མདོག་མདོག་གིས་ཁྱབ་བསྒྲགས་བྱེད་པ་དེ་མ་གཏོགས་བོད་ནང་གི་འགྲོ་བ་མིའི་ཐོབ་ཐང་གི་དཀའ་ངལ་ཐོག་ལ་ཕན་ཐོགས་པོ་འདི་བྱུང་ཟེར་ནས་ཚིག་གཅིག་ཀྱང་ཧ་ལམ་བགྲང་རྒྱུ་ཡདོ་པ་མ་རེད། རྩོད་ཉོག་འདུམ་སྒྲིག་ལས་ཁུངས་ཟེར་བ་དེའི་ལོ་གཅིག་རེ་ནང་ལ་ཟ་སྦྱོང་ཐེངས་གཅིག་རེ་དང་ཚོགས་འདུ་ཐེངས་གཅིག་རེ་ཚོགས་པའི་གནས་ཚུལ་ཞིག་བོད་པའི་གསར་འགྱུར་བརྒྱུད་ལམ་ཁག་ཏུ་ཕྲན་ཙམ་ཡོང་གི་རེད། དེ་མ་གཏོགས་ལས་ཀ་འདི་ཡིན་ཟེར་བ་རྐང་གཅིག་ཀྱང་ཞིག་སྟོན་རྒྱུ་ཡོད་པ་མ་རེད། རྡ་རམ་ས་ལ་རུ་རྒྱ་གར་ཡུལ་མི་དང་བོད་པ་བཙན་བྱོལ་བའི་བར་རྙོག་གྲ་མང་པོ་བྱུང་ཡོད་པ་རེད་དེ་དག་ལ་འདུམ་སྒྲིག་ཐུབ་རྒྱུ་ཕར་ཞོག་བོད་པའི་སྤྱི་ཚོགས་ནང་གི་མི་ཚང་གཅིག་གི་རྩོད་རྙོག་འདུམ་སྒྲིག་བྱས་པ་ཡང་ཧ་ལམ་གོ་རྒྱུ་ཚོར་རྒྱུ་ཡོད་པ་མ་རེད།
འགྲོ་བ་མིའི་ཐོབ་ཐང་ཁང་གི་ཚགས་པར་དང་ལོ་སྔོན་མ་དག་སྙན་ཐོ་ཁ་ཤས་མཐོང་སོང་། དེ་དག་གི་ནང་གི་གང་བྱུང་མང་བྱུང་འདུག བོད་ནང་གི་བཙོན་པ་གློད་གྲོལ་བཏང་སྟེ་ལོ་གཅིག་གཉིས་ཕྱིན་ཚར་པ་དེ་འདྲ་ཡང་རྒྱ་མའི་བཙོན་ཁང་དུ་ཡོད་པ་དང་རེ་ཟུང་ལ་ཁྲིམས་ཐག་བཅད་པའི་ལོ་གྲངས་སོགས་ཀྱང་ཡར་མར་འཁྲུག་པ་མང་པོ་མཐོང་སོང་།