ལོ་རྒྱུས་ལ་ཕྱི་མིག་ཅིག་བལྟས་དུས་སྔོན་ཆད་རང་ཅག་ཆོས་ལྡན་ཞིང་འདི་བོད་བཙན་པོའི་རྒྱལ་རབས་རིམ་བྱོན་གྱིས་སྒྲུང་ལྡེའུ་བོན་གསུམ་གྱི་ཆབ་དཔལ་རིག་གནས་འཕེལ་པའི་མི་རིགས་ཤིག་རེད། ཕྱིས་སུ་བཙན་པོའི་རྒྱལ་རྒྱུད་ཀྱི་དུས་རབས་ལ་རྫོགས་ཚིག་བཀོད་པ་ནས་བོད་སིལ་བུར་འཐོར་བའི་ལོ་རྒྱུས་ཡང་བ་བྱུང་བ་ནས་བོད་ཀྱི་མཐའ་དབུས་ཀུན་ལ་ཆབ་སྲིད་ཀྱི་དབང་བསྒྱུར་པའི་སྐལ་བཟང་དེ་མ་བྱུང་བ་རེད།
རྒྱལ་མཆོག་ན་རིམ་གྱིས་ལེགས་བཅོས་རིམ་པའི་ཐུགས་དཀྱིལ་ཡངས་པའི་ཆོས་ཕྱོགས་ཀྱི་བོད་སྟོད་སྨད་བར་གསུམ་གོང་བུ་གཅིག་ཏུ་སྒྲིལ་ཡོད་མོད་ཆབ་སྲིད་ཀྱིས་གཅིག་གྱུར་ཞིག་མ་བྱུང་པ་མ་ཟད་དུས་ལ་བབས་པའི་སྲིད་ཇུས་ཤིག་ལག་ལེན་བསྟར་མ་ཐུབ་པར་མཐའ་མར་བོད་ས་ཡོངས་རྫོགས་རྒྱ་འོག་ཏུ་ཚུད་པའི་ལོ་རྒྱུས་ཀྱི་ཕམ་ཉེས་ཆེན་པོ་བྱུང་། བོད་འབངས་གཞིས་བྱེས་གཉིས་སུ་གྱེས་ནས་དཀའ་སྡུག་གི་ལོ་རྒྱུས་ཀྱག་ཀྱོག་མཚམས་ཏེ་ཕྱི་ལོ་ ༡༩༦༠ ལོར་དམངས་གཙོའི་ལམ་ལུགས་ཕྱག་བསྟར་གནང་མགོ་བརྩམས་ཤིང་། སྐབས་དེར་༧གོང་ས་སྐྱབས་མགོན་ཆེན་པོས་གལ་ཆེའི་བཀའ་སློབ་ཕེབས་དགོངས་སུ། 1 “ ཕྱིན་ཆད་ང་ཚོ་བོད་མི་རིགས་དང་ཆོས། སྐད་ཡིག་གི་ཤན་ཕྱེ་བའི་དར་མདོ། ཨ་མདོ་ཚུན་གྱི་བོད་རིགས་ཡོངས་རྫོགས་གཅིག་གྱུར་ཐོགཐོབ་ཐང་དང་དབང་ཆ་འདྲ་མཉམ་ཡོད་པའི་སྤྱིའི་གཞུང་ཞིག་དགོས་པ་བཅས་ལ་དམིགས་ནས་འཐུས་མི་བསྡུས་པ་ལས་འཕྲལ་སེལ་རྒྱ་གར་ནང་ཡོད་པའི་བོད་མི་ཉུང་ཤས་ཀྱི་འཐུས་མི་ལྟ་བུ་མིན” ཞེས་དང་། ཡང་། “ལས་དོན་ཐུབ་ངེས་ཀྱི་བསམ་ཚུལ་གང་ཡོད་འཛེམ་ཟོན་དང་། འཇིགས་ཞུམ་མེད་པར་ཤོད་དགོས། འཛེམ་ཟོན་དང་འཇིགས་ཞུམ་བྱེད་དགོས་ས་སུ་ཡང་མེད། ཁྱེད་ཚོ་བོད་ཆོལ་གསུམ་གྱི་རྒྱ་ཆེའི་མི་དམངས་ཀྱི་ཚབ་བྱེད་ཐུབ་བའི་ཆོལ་ཁ་གསུམ་ཁོངས་བཙན་བྱོལ་མི་དམངས་ནས་འདེམས་སྒྲུག་བྱས་པའི་ཐོག ལས་སྨོན་དབང་གིས་བོད་མིའི་འགོར་སླེབས་པ་ངས་ཐག་བཅད་པའི་མི་ཤ་སྟག་རེད། དེ་ཡིན་ན་སྤྱིར་བཏང་མི་དམངས་ནང་ཁུལ། གཞུང་ཞབས།གལ་སྲིད་ངའི་ཐོག་ནས་ནོར་འཁྲུལ་བྱུང་ན་ཡང་ཁྱོད་ཚོས་ང་ལ་ལས་དོན་འདིར་ནོར་འཁྲུལ་འདི་ལྟ་བུ་བྱུང་འདུག་ཅེས་གསལ་པོ་བཤད་ན། ངོས་ནས་དགའ་པོའི་ངང་ནས་ཉན་འཇོག་གིས་ནོར་འཁྲུལ་སྐྱོན་སེལ་བྱེད་དགོས་པ་ལས། ང་རྒྱལ་བ་རིན་པོ་ཆེ་ཡིན་ཟེར་ནས་མཐོན་པོ་ཁྲི་དང་། བཙན་པོའི་བཀའ་ཡི་ལས་ལོག་བྱེད་འོས་པ་མིན་ལ་བྱེད་ཀྱི་ཡང་མ་རེད། གལ་སྲིད་བྱས་ན་ང་རང་ནོར་བ་རེད ” ཅེས་གསུངས་ཡོད།
ཡང་༧གོང་ས་མཆོག་གིས་ཁྲིམས་བཟོ་ལྷན་ཁང་འདི་བཞིན་མགོ་བཙུགས་སྟངས་ཐད་གསུངས་དོན། 2 “ ༧གོང་ས་མཆོག་ནས་བཙན་བྱོལ་ནང་གི་རང་དབང་ཞེས་པའི་དབྱིན་དེབ་ནང་བཀའ་ཕེབས་གསལ་ ༡༩༦༠ ནང་ངོས་ནས་སྲིད་གཞུང་གི་འཛིན་སྐྱོང་བཅོས་བསྒྱུར་བྱེད་པའི་དོན་གཉེར་བ་དང་ཆབས་ཅིག་བཀའ་ཤག་དང་མི་གཞན་ཁག་ཅིག་དང་མཉམ་རུབ་ཀྱི་སྒོ་ནས་འཐུས་སྒོ་ཚང་པའི་དམངས་གཙོའི་ལམ་ལུགས་སུ་སྐྱོད་པའི་ལས་རིམ་དཀའ་ཚེགས་དང་ལྡན་པ་དེ་ཐོག་མར་མགོ་འཛུགས་ལྟ་བུར། ལོ་འདིའི་ཟླ་ ༩ ཚེས་ ༢ ཉིན་བོད་མི་དམངས་སྤྱི་འཐུས་ལྷན་ཚོགས་དེ་གསར་འཛུགས་བྱས་ཤིང་ཆེས་མཐོའི་ཁྲིམས་བཟོ་ལྷན་ཚོགས་ཀྱི་སྒྲིག་འཛུགས་དེ་ནི་བོད་ཆོལ་ཁ་གསུམ་སྟེ་དབུས་གཙང་དང་ཨ་མདོ། ཁམས་བཅས་ཀྱི་མངའ་ཁུལ་ནས་སོ་སོའི་འདོད་མོས་ལྟར་རང་དབང་གི་འོས་ཤོག་འཕེན་པ་ལ་བརྟེན་ནས་འདེམས་ཐོན་བྱུང་བ་ཞེ་གཅིག་ཡིན། ད་རུང་བོད་ཀྱི་ཆོས་བརྒྱུད་ཆེན་པོ་ཁག་གི་འཐུས་མི་རྣམས་ཀྱང་དེའི་ནང་ཚུད་ཡོད་པར་མ་ཟད། རྗེས་སུ་བོན་པོའི་འཐུས་མིའང་འཚུད་ཐབས་བྱས་ཡོད། ལྷན་ཚོགས་དེར་བོད་མི་དམངས་སྤྱི་འཐུས་ལྷན་ཁང་ཞེས་མཚན་གསོལ་ཐོགགྲོས་ཚོགས་ཁང་ལྟ་བུའི་ལས་ཁུར་འགན་ལེན་བྱེད་མུས་དང་སྤྱི་འཐུས་ལྷན་ཁང་དེས་སྤྱི་དོན་གལ་ཆེའི་ཐོག་བཀའ་ཤག་དང་ལྷན་ཁང་ཁག་གི་དྲུང་ཆེ་ཚོ་དང་མཉམ་དུ་ཟླ་རེར་ཆེས་མཐོའི་རྒྱུན་ལས་ཚོགས་འདུ་ཞེས་ཚོགས་འདུ་རེ་འཚོགས་བཞིན་ཡོད། དམིགས་བསལ་གྱི་དུས་སྐབས་སུ་བོད་གཞུང་ཆེ་མཐོའི་རྒྱུན་ལས་ཚོགས་འདུ་ཞེས་བཀའ་ཤག་དང་ལྷན་ཁང་ཁག་གི་དྲུང་ཆེ་བཅས་ལྷན་འཛོམས་འཕར་མ་གནང་སྲོལ་ཡོད་ཅིང་། དེའི་སྐབས་བཀའ་བློན་རྣམ་པ་དང་དྲུང་ཆེ་ཚོས་དགོངས་འཆར་བཏོན་ཚད་ཀྱང་ཐག་གཅོད་སྤྱི་འཐུས་མང་མོས་ཀྱིས་འགྲོ་དགོས། སྤྱི་འཐུས་ལྷན་ཁང་གི་འཐུས་མི་རྣམས་ནས་ལས་དོན་གང་ཡིན་ཐོག་འོས་ཤོག་འཕངས་ཏེ་ཐག་གཅོད་དང་ལག་བསྟར་བྱེད་ཀྱི་ཡོད་པ་རེད ” ཅེས་སྤྱི་སྨན་བཀའ་སློབ་ལམ་སྟོན་ཕ་མས་བུ་ལ་བགོས་བ་བཞིན་ཕྱི་ལོ་ ༡༩༦༠ ལོ་ཟླ་ ༩ ཚེས་ ༢ ཉིན་བོད་གཞུང་དམངས་གཙོའི་ལམ་ལུགས་ཐོག་མ་དབུ་བརྙེས་བ་རེད།
༧གོང་ས་མཆོག་གཙོས་བའི་སྐབས་དེའི་ལྷག་དཀར་གཞུང་དྲང་གི་མཛད་གཙོ་རྣམ་པས་སྐུ་ངལ་ལ་མ་འཛེམ་བར་ཕྱི་ནང་གི་འགལ་རྐྱེན་གང་མང་ཞིག་ལ་གདོང་གཏད་ནས་རིམ་པའི་ཚགས་ཚུད་དང་དོན་སྙིང་ཆེ་བའི་དམངས་གཙོའི་ལམ་སྲོལ་འདི་ལག་བསྟར་རྒྱུན་འཁྱོངས་གནང་། ཕྱི་ལོ་ ༡༩༩༡ ལོའི་སྐབས་བཅུ་གཅིག་པ་ནས་བོད་མི་དམངས་སྤྱི་འཐུས་ཀྱི་མི་འགྲོ་ཇེ་མང་ལ་བཏང་སྟེ་ཆོལ་ཁུངས་རེ་ནས་འཐུས་མི་བཅུ་རེ་དང་ཆོས་རྒྱུད་རེ་ནས་འཐུས་མི་གཉིས་རེ། སྐབས་གཉིས་པ་ནས་༧གོང་ས་མཆོག་གིས་ཡེ་ཤེས་དབྱངས་དཔྱད་ཀྱིས་འཐུས་མི་གཉིས་གསུམ་རེ་བསྐོ་སྲོལ་ཡོད་པ་བཞིན་ཁྱོན་སྤྱི་འཐུས་མི་གྲངས་ཞེ་གསུམ་བྱུང་ཡོད་ལ་ལས་དོན་བྱེད་ཕྱོགས་སོགས་སྔོན་ལས་ཡར་རྒྱས་དང་ཚགས་ཚུད་བྱུང་ཡོད་པ་སྨོས་མེད་ཐོག སྐབས་བཅུ་གསུམ་པ་ནས་ཐད་བསྐོས་སྤྱི་འཐུས་རྣམ་རིམ་བཞིན་མ་དགོས་པའི་ཐོག་བོད་མི་འདུས་སྡོད་ཅུང་ཆེ་བའི་ཕྱིའི་རྒྱལ་ཁབ་ཁག་ནས་འཐུས་མི་དགོས་གལ་ཆེ་བར་གཟིགས་ཏེ་བྱང་ཨ་མེ་རི་ཁ་ནས་སྤྱི་འཐུས་གཉིས་དང་ཡུ་རབ་ཁུལ་ནས་སྤྱི་འཐུས་གཅིག་བཅས་སྤྱི་འཐུས་གསུམ་ས་གནས་དེ་གའི་ཆོས་ལུགས་དང་ཆོལ་ཁུངས་རིས་མེད་བོད་རིགས་མི་མང་གིས་འདེམས་བསྐོ་བྱས་ཏེ། རང་དབང་གི་རྒྱལ་ཁབ་ཁག་ན་གནས་བཞུགས་བོད་མི་ཡོངས་ལ་ཁྱབ་པའི་དམངས་གཙོའི་སྒྲིག་འཛུགས་ཤིག་ལ་མངོན་འགྱུར་བྱུང་ཡོད་པ་བཅས་བོད་མི་དམངས་སྤྱི་འཐུས་ལྷན་ཚོགས་འདི་བཞིན་ལོ་རེར་ཐེངས་གཉིས་རེར་ལྷན་ཚོགས་གནང་མུས་དང་མཚམས་རེར་དམིགས་བསལ་འཚོགས་འདུ་འཕར་མ་ལྷན་ཚོགས་གནང་སྲོལ་ཡང་པ་ཡོད་རེད།
དམངས་གཙོའི་ལམ་ལུགས་ཤིག་ལ་མཚོན་ན་ཐོག་མ་ཁྲིམས་བཟོ་ལྷན་ཁང་ངམ་སྤྱི་འཐུས་ལྷན་ཚོགས་འདི་ཆགས་ཡོད། དམངས་གཙོའི་ཀ་བ་གསུམ་ཚང་བའི་སྒྲིག་འཛུགས་ཤིག་དང་སྲིད་གཞུང་གང་ཞིག་ལ་ད་གཟོད་དམངས་གཙོའི་རྒྱལ་ཁབ་བམ་སྒྲིག་འཛུགས་ཟེར་གྱི་ཡོད། འདི་ལ་སྲིད་འཛིན་ལམ་ལུགས་དང་སྲིད་བློན་ལམ་ལུགས་གཉིས་སུ་དབྱེ་ལ་སྟངས་འཛིན་བྱེད་མཁན་གཙོ་བོ་ཁྲིམས་བཟོ་ལྷན་ཁང་ཆགས་ཡོད་པ་རེད། ཁྲིམས་བཟོ་ལྷན་ཁང་ནས་གཏན་ལ་ཕབས་པའི་ཁྲིམས་དང་ལོ་རེའི་རྒྱལ་ཁབ་ཀྱི་གཏོང་སྒོ་སོགས་སྤྱི་འཐུས་ཀྱི་གསུམ་ཆའི་གཉིས་ཀྱི་མོས་མཐུན་རྒྱབ་སྐྱོར་འོག་བཀའ་འཁྲོལ་ཐོབ་དགོས་པ་ཞིག་ཆགས་ཡོད། སྤྱི་འཐུས་ལྷན་ཚོགས་ཀྱི་གཏན་འབེབས་ལ་ནོར་འཛོལ་དང་འཐུས་ཤོར་བྱུང་བ་ཡིན་ན་འཛིན་སྐྱོང་བཀའ་ཤག་གི་ལས་དོན་སྤྱི་ལ་དོ་ཕོག་འགྲོ་ཡི་ཡོད་པས་ཀ་བ་འདི་དཀྱིལ་སྙིང་ཡིན་པས་རྒྱུ་མཚན་ཀྱང་དེ་རེད།
དང་པོ། བོད་མི་གཙང་མ་ཡིན་དགོས་པ་སྟེ་བོད་མིའི་ངོས་འཛིན་ཡོད་པའི་དཔང་རྟགས་ཡིག་ཆ་ཁོངས་འཕེར་ལ་ཚད་འཛིན་བྱེད་ངེས་རེད། གཉིས་པ། རིག་འཚོ་མ་ཟིན་པ་མ་ཡིན་པ་དང་བུ་ལོན་སྒྲུབ་འཇལ་མ་ཐུབ་པ་སོགས་ཁྲིམས་ཐོག་ཉེ་འགེལ་གླེང་རྙོག་མེད་མཁན་ཞིག་ཡིན་དགོས་པ། གསུམ་པ། ལས་ཐོག་འཛིན་སྐྱོང་ལས་བྱེད་དམ་གཞུང་ཞབས་མ་ཡིན་པ་བཅས་འོས་བསྡུ་ལས་ཁུངས་ཀྱིས་གཏན་འབེབས་བྱས་པའི་འོས་ཆོས་རེད། བཞི་བ། སྤྱི་འཐུས་ནི་ལྷག་དཀར་གཞུང་དྲང་དང་། ལས་དོན་གང་བསྒྲུབ་དྲང་བདེན་ཟོལ་མེད་ཀྱི་སྤྱི་འགན་གཙུག་འཛིན་ཐུབ་མཁན་ངེས་པར་དུ་ཡིན་དགོས།
སྤྱི་འཐུས་ཀྱི་འོས་འགན་གཙོ་བོ་འཛིན་སྐྱོང་བཀའ་ཤག་གི་ལས་དོན་སྤྱི་དང་བྱེ་བྲག་ལ་དུས་རྒྱུན་ཐུགས་སྣང་མཁྱེན་རྟོགས་ཡོད་དགོས་པ་དང་གཅིག་གནས་ས་ཐོག་གི་མི་མང་གི་གནས་སྟངས་ལ་ཐུགས་ཁུར་དང་གཟིགས་རྟོགས་བྱེད་རྒྱུ་དང་གཉིས། ཆོལ་ཁ་དང་ཆོས་རྒྱུད་དབྱེ་བ་མེད་པར་བོད་མི་མང་སྤྱི་ལ་ཁྱབ་པའི་སྤྱི་མི་སྤྱོད་བཟང་མིག་དཔེར་འོས་པ་ཞིག་ཡིན་དགོས་པ་དང་གསུམ། འོས་འགན་འདི་དག་བསྲུང་བའི་སྤྱི་འཐུས་ཤིག་ཡིན་ན་སྤྱི་འཐུས་སྤྱིའི་ཆེ་མཐོང་དང་སྒེར་གྱི་ཆེ་མཐོང་ཀྱང་སྨོས་མེད་ཅིག་རེད། བོད་ཀྱི་གནད་དོན་དེ་རྒྱ་བོད་ཀྱི་གནད་དོན་ཞིག་ཆགས་ཡོད་དུས་རྒྱ་བོད་ཀྱི་ཆབ་སྲིད་གོ་རྟོགས་ཡོད་པ་ཞིག་དང་རྒྱལ་སྤྱིའི་སྲིད་དོན་འགྱུར་བར་གཟིགས་རྒྱ་ཡངས་པ། རང་རེའི་ཆབ་སྲིད་ཀྱི་ལངས་ཕྱོགས་ལ་ངེས་ཤེས་གཏིང་ཟབ་པོ་ཡོད་དགོས་པ་དང་བཞི།
འོས་མི་ངོ་སྤྲོད་བྱེད་སྟངས་ཏེ་ཚོགས་པ་དང་མི་སྒེར་བཅས་ནས་དམངས་གཙོའི་ཀ་བ་བཞི་བར་གྲགས་པའི་བརྒྱུད་ལམ་ཁག་དང་མཉམ་འབྲེལ་གྱིས་ཁྲིམས་དང་སྒྲིག་གཞི་ལ་མ་འགལ་བ་ཞིག་བྱེད་པ་ལས། རང་ཉིད་ཀྱི་དགའ་ཁ་འཁྱེར་ཕྱོགས་བྱས་པའི་སྤྱི་བར་གནོད་པ་ལས་ཕན་པ་མེད། སྤྱི་ལ་གནོད་ཡོང་དུས་རང་ལའང་དེ་མཚུངས་གནོད་བསྐྱལ་ཡོད་པ་མཐོང་ཆོས་རེད། དཔེར་ན། འདི་ག་ས་གནས་གྲོས་ཚོགས་དང་ས་གནས་མགོ་འཛིན་སོགས་འོས་བསྡུ་ཆུང་ཚགས་ཀྱི་འོས་བསྡུའི་སྐབས། མི་མངོན་ས་ནས་འོས་མི་འགའ་རེ་ཤོག་ཆུང་དུ་ཕབས་ནས་སུས་བཀྲམས་འདིས་གདམས་མེད་པར་ཐོན་ཡོང་བ་དེས་ང་ཚོའི་མི་དམངས་ཀྱི་སེམས་ཁམས་དང་། དམངས་གཙོའི་དགོངས་པ་དང་མི་མཐུན་པ་མ་ཟད་མི་མང་གི་སྤྱི་བལྟ་མི་འཛེས་པ་ཡོང་གི་ཡོད། དེའང་ལས་ཐོག་འཐུས་མི་ཁ་ཤས་ཀྱི་ཆབ་སྲིད་འཁྲབ་སྟོན་ཙམ་ལས་བློ་གཟུ་བོར་བསམ་ན་མང་ཚོགས་ལ་མགོ་སྐོར་གཏོང་གི་ཡོད་པ་གསལ་པོ་རེད། ལུང་ཚན་དང་དགའ་ཕྱོགས་བསྒྲིགས་པའི་འོས་བསྡུ་དེས་འཐུས་མི་ཚད་ལྡན་ཞིག་ཕེབས་ཐུབ་ཀྱི་མེད། མི་འགའ་རེ་ལོ་ཉི་ཤུ་ལྷག་ལ་ཞབས་སྟེགས་བཅད་བསྡད་པ་ལས་སྤྱི་པའི་ལས་དོན་ལ་ཡར་རྒྱས་ཀྱི་རྣམ་པ་ཏིལ་འབྲུ་ཙམ་སྟོན་རྒྱུ་མེད་པ་དང་ས་འཐུས་ཁག་ཅིག་གིས་རང་གི་མིང་ཚད་ལྡན་ཞིག་འབྲི་མི་ཤེས་མཁན་ཡང་ཡོད་པ་རེད། ས་གནས་གྲོས་ཚོགས་ནི་ས་གནས་མགོ་འཛིན་ལས་ཁུངས་ལ་སྟངས་འཛིན་བྱེད་མཁན་གྱི་ས་གནས་ས་ཐོག་གི་འཐུས་མི་ཞིག་ཡིན་དུས་དབུས་གྲོས་ཚོགས་ལམ་ལུགས་དེ་ས་གནས་ཁག་ནའང་ཡོད་པ་ཞིག་རེད།
ད་ལྟ་མདོ་སྨད་ཀྱི་བར་མའི་འོས་བསྡུའི་ས་མིག་གཅིག་ལ་འོས་མི་མང་པོ་ཞིག་གིས་འཚང་ཁ་བརྒྱབ་ནས་ཡོང་དུས་ཕྱོགས་གཅིག་ནས་ཡར་རྒྱས་དང་ཕྱོགས་གཞན་ཞིག་ནས་གཟབ་ནན་བྱེད་དགོས་པ་ཞིག་ཏུ་མཐོང་གི་འདུག སུ་ཞིག་གིས་གདོང་ལྤགས་མཐུག་པོས་ཧམ་བཤད་བྱེད་པ་དང་སུ་ཞིག་ནི་ཤེས་འཇོན་གཉིས་ལྡན་གྱི་འོས་མི་ཚད་ལྡན་ཡིན་པ་སོགས་ལེགས་ཉེས་དབྱེ་འབྱེད་གང་ལེགས་བྱེད་པ་ལས། ལུང་ཚན་གཅིག་པ་དང་དགའ་ཉེ་ཡིན་པ་ཙམ་དུ་བདམས་པ་ཡིན་དམངས་གཙོའི་སྒྲིག་སྲོལ་དང་མཐུན་གྱི་མེད་ལ་སྤྱི་འགན་མ་ཁུར་བའི་རྣམ་པ་གསལ་པོ་རེད།
དེའང་མདོ་སྨད་ཀྱི་ལངས་ཕྱོགས་སྤྱི་དང་ཡང་དགོས་མདོ་སྨད་ཀྱི་ལས་དོན་ཆེ་ཕྲ་གང་ལ་དོ་ཁུར་བྱེད་མྱོང་ཡོད་མེད་ལས་ཀྱང་སྤྱི་འཐུས་ལ་འོས་མིན་གསལ་པོ་རེད། ད་ལྟ་མདོ་སྨད་ཀྱི་ལས་ཐོག་སྤྱི་འཐུས་ཚོ་དང་གཤིབ་བསྡུར་གྱིས་གང་ཞིག་ན་སྟོང་ཆ་ཡོད་པ་དེ་ལ་དམིགས་ནས་ཡོང་རྒྱུ་ཡིན་པའི་སྤྱི་འཐུས་དེས་ཁ་གསབ་ཐུབ་པ་བྱུང་ན་གོ་སྐབས་འདི་ཆུད་ཟོས་སུ་མ་སོང་བ་རེད། འོན་ཀྱང་དེ་ལས་ལྡོག་ན་མི་ས་མིག་ཅིག་ཁ་སྐོང་བྱས་པ་ཙམ་ལས་གཞན་རིན་ཐང་མེད་སོང་བ་རེད། ད་ལྟ་མདོ་སྨད་མི་མང་གིས་རང་དོན་རང་གཅེས་བྱས་ཏེ་འོས་འཕེན་པ་དང་སེམས་ཁུར་ཡིད་གཟབ་གྱིས་འོས་བླུགས་པ་ཡིན་ན་བོད་བསྟན་སྲིད་ལ་དང་རྒྱལ་བའི་དགོངས་གཞི་ཡང་བསྒྲུབ་པ་རེད། འོས་ཤོག་གཅིག་གིས་ཁྱད་པར་ཆེན་པོ་ཡོད་པ་མཐོང་ཆོས་བཞིན་མུད་པ་ཡན་གྱིས་རྩ་དོན་བཤད་པ་དང་རྒྱལ་བ་རིན་པོ་ཆེ་ཞེས་ལག་པ་ཐོད་པར་བཞག་པ་ཙམ་གྱིས་དགོངས་གཞི་བསྒྲུབ་རྒྱུ་ཁག་པོ་རེད།
མཇུག་བསྡུ་བ།
འུ་ཚོའི་ཁོར་ཡུག་ན་སྲིད་དོན་ལ་དེ་ཙམ་དོ་སྣང་མི་བྱེད་པ་མ་ཟད་འདོད་པ་མེད་པའི་འདུ་ཤེས་འཛིན་མཁན་མང་པོ་འདུག རང་གི་དོན་དག་ལ་འཕྲད་དུས་ད་གཟོད་སྐད་ངན་འབྱིན་པ་ལས་དུས་རྒྱུན་དོ་སྣང་མེད་པ་འདི་་དམངས་གཙོའི་སྒྲིག་འཛུགས་ཤིག་གི་མི་མང་གི་འགན་ཁུར་སྟངས་ཤིག་མིན་པར་དེ་ལས་ལྡོག་པའི་བྱ་སྤྱོད་ཅིག་རེད། འགན་འཁྲི་དང་ཐོབ་ཐང་འདྲ་མཉམ་དུ་སྤྱོད་མ་ཐུབ་ཚེ་དམངས་གཙོ་ཚད་ལྡན་ཞིག་ལོངས་སུ་སྤྱོད་ཐུབ་ཀྱི་མེད། དེའང་གཞུང་དམངས་གཉིས་ཕན་ཚུན་མཉམ་རུབ་ཀྱིས་སྤྱི་ཚོགས་ཀྱི་རིག་གནས་སྤྱི་དང་བྱེ་བྲག་དམངས་གཙོའི་ཤེས་བྱ་གོང་མཐོར་གཏོང་བར་འབད་བརྩོན་བྱེད་དགོས།
1. མཛད་རྣམ་སྙིང་རྗེས་རོལ་མཚོ། རྩོམ་སྒྲིག་གནང་བའི་གླེགས་བམ་བདུན་པའི་ཤོག་ངོས་ ༩༠ ན་གསལ།
2. མཛད་རྣམ་སྙིང་རྗེས་རོལ་མཚོ། རྩོམ་སྒྲིག་གནང་བའི་གླེགས་བམ་བདུན་པའི་ཤོག་ངོས་ ༩༦ ན་གསལ།
