འཛམ་གླིང་འཁྲུག་ཆེན་ཐེངས་དང་པོ་དང་ཐེངས་གཉིས་པས་གསལ་བར་བསྟན་ཡོད་པ་ལྟར། དུས་རབས་ཉི་ཤུའི་སྟོད་ནི་འཛམ་གླིང་རང་བཞིན་གྱིས་མི་ཕན་ཚུན་གསོད་རེས་གཏུབ་རེས་བྱས་པའི་དུས་རབས་ཤིག་ཏུ་གྱུར་ཡོད་པ་དང་། སྨད་ནི་འགྲོ་བ་མིའི་རིགས་“སུའུ་ལེན”་ཞེས་བའི་གུང་ཁྲན་རིང་ལུགས་རྒྱལ་ཁབ་དང་ཇི་ལྟར་ཁ་གཏད་དགོས་པའི་གནད་དོན་ཞིག་ལ་གདོང་ལེན་བྱེད་དགོས་པའི་དུས་རབས་ཤིག་ཏུ་གྱུར་ཡོད།
མཐར་གཏུགས་ནས་བཤད་ན། དེ་ནི་འགྲོ་བ་མིའི་རིགས་“རྒྱ་ནག”་ཅེས་འཛམ་གླིང་ན་ཆེས་ཆེ་བའི་གུང་ཁྲན་རིང་ལུགས་རྒྱལ་ཁབ་དང་ཇི་ལྟར་ཁ་གཏད་དགོས་པའི་གནད་དོན་ཞིག་ལ་ཐུག་ཡོད། རྒྱུ་མཚན་ནི། རྒྱ་ནག་གིས་སུའུ་ལེན་གྱི་སྐྱེས་བ་བླངས་ཏེ་མུ་མཐུད་དུ་རང་དབང་དང་དམངས་གཙོ། ཁྲིམས་ལུགས་དབང་བསྒྱུར། བདེན་དོན། འདྲ་མཉམ་སོགས་འཇིག་རྟེན་ཀུན་ཁྱབ་ཀྱི་ལྟ་གྲུབ་ལ་གཏོར་བརླག་ཚབས་ཆེན་བཏང་དང་གཏོང་བཞིན་ཡོད་པའི་རྐྱེན་གྱིས་ཡིན།
འདས་ལོ་ཕྱི་ཟླ་ ༣ པའི་ཚེས་ ༡༧ ཉིན། རྒྱ་ནག་གི་སྲིད་སྐྱོང་གསར་བ་ཞི་ཅིན་ཕིན་གྱིས་སྐབས་བཅུ་གཉིས་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་མཇུག་སྒྲིལ་མཛད་སྒོའི་གཏམ་བཤད་ནང་“རྒྱ་ནག་གི་རྨི་ལམ”་མངོན་འགྱུར་བྱེད་དགོས་པ་ནན་བརྗོད་བྱས་ཡོད། རྒྱ་ནག་གི་རྨི་ལམ་ཞེས་པ་ནི་རྒྱ་ནག་གཞུང་གིས་ཁྱབ་བསྒྲགས་བྱེད་བཞིན་པའི་“ཀྲུང་ཧྭ་མི་རིགས་ཀྱི་རླབས་ཆེ་བའི་སླར་གསོ”་ཞེས་པ་དེ་རེད་ལ། དེའི་བྱེ་བྲག་གི་ནང་དོན་ནི་“ཁེ་ཕན་གྱི་སྲོག་རྩ”་ཡིན་པར་བྱས་ཡོད་པའི་བོད་དང་ཡུ་གུར་གྱི་བདག་དབང་བརྟན་སྲུང་དང་། ༢༠༤༩ ལོ་སྟེ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་འཁོར་ ༡༠༠ ལོན་པའི་དུས་དྲན་ཉིན་མོའི་བར་དུ་ཐེ་ཝན་གཅིག་གྱུར་དང་། ཤར་ཞི་ན་རྒྱ་མཚོ་དང་ལྷོ་ཞི་ན་རྒྱ་མཚོའི་མཚོ་ཐོག་དང་མཁའ་དབྱིངས་ཀྱི་མངའ་ཁོངས་རྒྱ་ཆེར་བཏང་སྟེ་“རྒྱ་མཚོའི་རྒྱལ་ཁབ”་ཀྱི་མིང་ཐོག་ནས་རྒྱ་མཚོ་ཆེན་པོར་དབང་བསྒྱུར་བྱེད་རྒྱུ་དེ་ཡིན་པར་འདོད། དེའི་ཆེད་དུ་ཞི་ཅིན་ཕིན་གྱིས་“གཡུལ་ལས་རྣམ་པར་རྒྱལ་ཐུབ་པའི་སྟོབས་ཆེན་དམག་གི་དཔུང་སྡེ་འཛུགས་སྐྲུན་བྱེད་དགོས”་ཞེས་དམག་དང་དྲག་ཆས་ཉེན་རྟོགས་པར་བཀའ་གནང་ཡོད། ཟླ་ ༡༡ པའི་ཚེས་ ༢༣ ཉིན། རྒྱ་ནག་གིས་ཉི་ཧོང་གི་ཨོ་ཁེ་ན་བ་རྫོང་དང་སན་ཁ་ཁུའུ་གླིང་ཕྲན་གྱི་མཁའ་དབྱིངས་སུ་“མཁའ་མཚམས་ཉེན་འགོག་ངོས་འཛིན་ར་བ”ཞིག་གསར་བཟོ་གཏན་འབེབས་བྱས་པ་དེ་ཡང་རྨི་ལམ་དེའི་མངོན་འགྱུར་དང་འབྲེལ་བའི་ལས་འགུལ་གྱི་གོམ་པ་དང་པོ་དེ་རེད་ཅེས་བཤད་ཆོག
སྤྱིར་ཡིན་ན་དམངས་གཙོའི་རྒྱལ་ཁབ་ཚང་མས་དཔུང་བ་མཉམ་གཤིབ་དང་མ་གྲོས་གཅིག་མཐུན་གྱིས་རྒྱལ་སྤྱིའི་རྒྱུན་ཤེས་དང་འགལ་བའི་རྒྱ་ནག་གི་བྱ་སྤྱོད་དེ་བཀག་འགོག་བྱེད་དགོས་པར་ཆགས་ཡོད། ཡིན་ནའང་། ཉི་ཧོང་གཞུང་གིས་རྒྱ་ནག་གཞུང་ལ་མཁའ་མཚམས་ཉེན་འགོག་ངོས་འཛིན་ར་བ་དེ་ངེས་པར་དུ་“ཕྱིར་འཐེན”་བྱེད་དགོས་པའི་རེ་བ་འདོན་བཞིན་པའི་སྐབས་དེར། ཨ་རི་གཞུང་གིས་“རྒྱ་ནག་གི་མཁའ་མཚམས་ཉེན་འགོག་ངོས་འཛིན་ར་བར་འཕུར་སྐྱོད་བྱེད་སྐབས། རྒྱ་ནག་གི་ཁྲིམས་ལ་བརྩི་འཇོག་བྱེད་རོགས་གནང” ཞེས་ཨ་རིའི་མཁའ་ལམ་འགྲུལ་སྐྱེལ་གནམ་གྲུ་ལས་ཁུངས་ཁག་ལ་རེ་བ་བཏོན་ཏེ་རྒྱལ་སྤྱིའི་སྤྱི་ཚོགས་ལ་རྒྱ་ནག་གི་བྱ་སྤྱོད་དེར་ཁས་ལེན་ཡོད་པའི་བརྡ་ལོག་ཅིག་སྤྲད་ཡོད། དེ་དང་འདྲ་བར་ལས་དབང་གི་ཞགས་ཐག་གཅིག་གིས་སྦྲེལ་ཡོད་ཅེས་ཀྱང་ཟེར་ཆོག་པའི་ཐེ་ཝན་གཞུང་དང་ལྷོ་ཀོ་རེ་ཡ་གཞུང་གིས་ཀྱང་ཉི་ཧོང་དང་མཉམ་འབྲེལ་གྱི་རྣམ་འགྱུར་གང་ཡང་བསྟན་མེད། དེ་ལ་ཁག་མི་འདུག དཔལ་འབྱོར་གྱི་འབྲེལ་བའི་ཐོག་འཛམ་གླིང་གི་རྒྱལ་ཁབ་སོ་སོས་རྒྱ་ནག་ལ་བཟུང་ཡོད་པའི་ལྟ་བ་མི་མཐུན་ཁ་ཁ་ཡིན་པས། རྗེས་ཕྱོགས་སུའང་རྒྱ་ནག་གི་ཁྲིམས་འགལ་ལུགས་འགལ་གྱི་བྱ་སྤྱོད་དང་འབྲེལ་བའི་སྐོར་ལ། དམངས་གཙོའི་རྒྱལ་ཁབ་ཡིན་ཡང་མཛུབ་མོ་ལྔ་བོ་ཁུ་ཚུར་བྱེད་པའི་ངེས་པ་མེད།
འོན་ཀྱང་། ཐེངས་འདིའི་རྒྱ་ནག་གི་བྱ་སྤྱོད་ལ་མཚོན་ན། དེ་ནི་ཉི་ཧོང་གི་མཚོ་ཐོག་དང་མཁའ་དབྱིངས་ཀྱི་མངའ་ཁོངས་དང་རྒྱལ་འབངས་ཀྱི་བདེ་འཇགས་ལ་ཐད་ཀར་འབྲེལ་བ་ཆགས་ཡོད་པར་བརྟེན། ཐོག་མར་ཉི་ཧོང་རང་ཉིད་ཀྱིས་སྣེ་ཁྲིད་དེ་རྒྱ་ནག་གཞུང་ལ་རྒྱལ་སྤྱིའི་རྒྱུན་ཤེས་ངོས་ལེན་བྱེད་དུ་འཇུག་དགོས། གལ་ཏེ་དེ་ལྟར་བྱེད་མ་ཐུབ་ན་རྒྱ་ནག་གི་གོམ་པ་གཉིས་པ་དེ་ར་བ་དེའི་ནང་གི་དམག་དོན་བྱ་འགུལ་གྱི་རྒྱུན་ལྡན་ཅན་དུ་འགྱུར་སྲིད་ལ། ལྷོ་ཞི་ན་རྒྱ་མཚོ་དང་ཐེ་ཝན་མཚོ་འགག ཡང་ན། འཕགས་བོད་ས་མཚམས་སུའང་མིག་གི་སྤྱོད་ཡུལ་དུ་འགྱུར་སྲིད།
ཉི་ཧོང་དང་རྒྱ་ནག་ནི་དམངས་གཙོ་རིང་ལུགས་དང་སྒེར་གཅོད་རིང་ལུགས་ཀྱི་འབྲེལ་བས་གྲུབ་ཡོད་པར་བརྟེན། རྒྱ་ནག་དང་འགྲོག་སྐབས་དེ་གཉིས་བར་གྱི་རྟེན་འབྱུང་གི་འབྲེལ་བར་ངོས་འཛིན་ཁ་ཚང་ཞིག་བྱེད་རྒྱུ་ནི་གལ་ཆེན་པོ་ཆགས་ཡོད། དམངས་གཙོ་རིང་ལུགས་ཀྱི་ངོ་བོ་ནི་ཕན་ཚུན་མཐུན་འབྲེལ་བྱེད་པ་དང་ཕན་ཚུན་བསྡུ་ལེན་བྱེད་པ། ཕན་ཚུན་ཁས་ལེན་བྱེད་པ་ཞིག་དང་། སྒེར་གཅོད་རིང་ལུགས་ཀྱི་ངོ་བོ་ནི་དེ་ལས་ལྡོག་སྟེ་ཕན་ཚུན་ཁ་བྲལ་གཏོང་བ་དང་ཕན་ཚུན་ཕྱིར་འཕུད་གཏོང་བ། ཕན་ཚུན་དགག་པར་བྱེད་པ་ཞིག་ཡིན། དེ་ལྟར་ཕན་ཚུན་ངོ་བོ་མི་མཐུན་པའི་དམངས་གཙོ་རིང་ལུགས་དང་སྒེར་གཅོད་རིང་ལུགས་གཉིས་མཐའ་གཉིས་སུ་འགལ་བར་གནས་ཡོད་པར་བརྟེན། སྔ་མའི་སྟོབས་ཤུགས་དེ་མར་འགྲིབ་ན་ཕྱི་མའི་སྟོབས་ཤུགས་དེ་ཡར་འཕེལ་བར་བྱེད་ལ། ཕྱི་མའི་སྟོབས་ཤུགས་དེ་མར་འགྲིབ་ན་སྔ་མའི་སྟོབས་ཤུགས་དེ་ཡར་འཕེལ་བར་བྱེད། དེ་འདྲའི་འགྱུར་ལྡོག་གི་གོ་རིམ་ཁྲོད་སྔ་མར་མཚོན་ན་དེའི་དྲང་ཕྱོགས་འགྱུར་ལྡོག་གི་ཁ་ཕྱོགས་ནི་ཕྱི་མ་དེ་སྔོན་ལ་འགྲིབ་པར་བྱེད་དགོས་པ་དེ་ཡིན་པ་དང་། ཕྱི་མར་མཚོན་ན་དེའི་དྲང་ཕྱོགས་ཀྱི་འགྱུར་ལྡོག་གི་ཁ་ཕྱོགས་ནི་སྔ་མ་དེ་སྔོན་ལ་འགྲིབ་པར་བྱེད་དགོས་པ་དེ་ཡིན། འོན་ཀྱང་། དེ་གཉིས་ལས་དམངས་གཙོ་རིང་ལུགས་ཀྱིས་འཛམ་གླིང་ཀུན་མཐུན་གྱི་རང་གཤིས་ཤིག་བཟུང་ཡོད་པར་བརྟེན། དེ་ལ་རྒྱལ་ཁ་ཐོབ་པའི་གོ་སྐབས་མང་།
དེར་བརྟེན། ཉི་ཧོང་གིས་དམངས་གཙོ་རིང་ལུགས་ཀྱི་ལྟ་གྲུབ་གཞིར་བཟུང་སྟེ་རང་གི་མངའ་ཁོངས་ཀྱི་བདག་དབང་བརྟན་སྲུང་བྱ་རྒྱུའི་ཆོད་སེམས་གསལ་བོར་བྱས་ཐོག རྒྱ་ནག་ལ་མཁའ་མཚམས་ཉེན་འགོག་ངོས་འཛིན་ར་བ་དེའི་“ཕྱིར་འཐེན”་མིན་པར་དེའི་ཁྱབ་ཁོངས་ལ་“འགྱུར་ལྡོག”་གཏོང་དགོས་པའི་གནོན་ཤུགས་སྤྲད་ན་དེ་ནི་གནས་ལུགས་དང་མཐུན་པ་ཞིག་རེད་བསམ།།
ད་ལྟའི་རྒྱ་ནག་ལ་འཛམ་གླིང་ནས་ཁ་གཏད་གཅོག་དགོས་ན། དམངས་གཙོ་དང་འགྲོ་བ་མིའི་ཐོབ་ཐང་གི་གནད་དོན་ལ་ལག་གཡར་གྱིས་ཆབ་སྲིད་དང་དམག་དོན་ཟུང་སྦྲེལ་གྱིས་རྒོལ་ལན་སྤྲད་དགོས་ལ། དེ་ལས་ཀྱང་གལ་ཆེ་བ་ཞིག་ནི་དཔལ་འབྱོར་ཐོག་ཚོང་འབྲེལ་བཀག་སྡོམ་དང་རྒྱ་ནག་གི་ཅ་དངོས་ལ་ངོ་རྒོལ་བྱ་རྒྱུ་ནི་ཕྱོགས་ཀུན་ནས་ཐབས་བྱུས་བཟང་ཤོས་སམ་འོས་འཚམ་དུ་མཐོང་། དེ་མིན་འདི་ལྟར་རྒྱ་ནག་དམངས་གཙོ་ཅན་དུ་འགྱུར་རྒྱུར་རེ་སྒུག་བྱ་རྒྱུ་ལས་ཨ་རི་གཙོ་བོ་གྱུར་པའི་ནུས་ཕྱོགས་རྒྱལ་ཁབ་ཁག་དང་། ཉི་ཧོང་དང་རྒྱ་གར་གཙོས་ཤར་ཕྱོགས་ཀྱི་རྒྱལ་ཁབ་རྣམས་གདོང་ཐུག་ཁ་གཏད་དུ་ལང་འདོད་མེད་པ་དང་ལང་མི་ནུས་པར་ཅི་བྱ་གཏོལ་མེད་དུ་གྱུར་ནས་ཡོད་པར་སེམས།
གནས་ཚང་ལགས།
བཀྲིས་བདེ་ལེགས། བསམ་ཚུལ་གསུངས་པར་ཐུགས་རྗེ་ཆེ། ཉི་ཧོང་སྐད་ཀྱི་ལམ་ནས་ཡང་བྲིས་ཡོད།
ད་ཡག་པོ་འདུག ཡུལ་ཆུ་འཐུང་ན་ཡུལ་དེའི་བདེ་སྡུག་ལ་དོ་ཁུར་བྱེད་དགོས་པ་དང་བྱེད་འོས་པ་ནི་གསལ་བོ་རེད། དེ་བས། རྩོམ་པ་པོ་ལགས་ཀྱིས་ཉི་ཧོང་སྐད་ཡིག་ནང་རྩོམ་འདི་སྤེལ་འོས་ཤིང་། དེ་མཚུངས་སུ་ཁ་སྣོན་ཡང་རེ་འགའ་འདུག དཔེར་ན། ན་ནིང་རྒྱ་དམར་གཞུང་གིས་ཧྥི་ལི་པེན་གྱི་ལག་པ་ནས་གླིང་ཕྲན་ཞིག་འཕྲོག་ཐུབ་ཡོད་པ་དེའི་བྱེད་ཐབས་ལ་ཞིབ་འཇུག་གནང་ནས་ཁ་གཏད་གཅོག་ཚུལ་བཙལ་དགོས། ད་དུང་ཉི་ཧོང་གིས་རྒྱ་དམར་གཞུང་ལ་ཁ་གཏད་གཅོག་སྐབས། དམར་གཞུང་གི་ལག་ཆར་འགྱུར་ཉེན་ཆེ་བ་ཁག་ལ་གཡོལ་ནས་རྒྱ་ནག་ནང་ཁུལ་གྱི་དཀའ་རྙོག་གམ། མང་ཚོགས་ཀྱི་དཀའ་ངལ་རིགས་ཐེར་འདོན་གྱིས་རང་ཉིད་ཀྱི་མངའ་ཁོངས་སྲུང་བར་འབད་འོས་པའང་གསལ་བོ་རེད། དེ་མིན་བོད་དང་ཡུ་གུར་གྱིས་ནམ་ཡང་ཉི་ཧོང་ལ་རྒྱབ་བསྐྱོར་ཡོད་པ་གསལ་བོར་འགོད་འོས།
དུས་རབས་ཉེར་གཅིག་པའི་དཀའ་ངལ་གཞན་ཞིག་ནི་འཛམ་གླིང་སྟེང་གི་ཚོང་བ། སྲིད་དོན་པ། ཆོས་པ། ཤེས་ཡོན་པ་ཕལ་ཆེ་བ་རྒྱ་དམར་གཞུང་གི་དངུལ་དངོས་ཀྱི་བཟུང་དམག་ཏུ་གྱུར་ཡོད་པས། འདིའང་ཉི་ཧོང་ཙམ་མ་ཟད་མིའི་རིགས་སྤྱི་ནས་ཤེས་ངགོས་པ་ཞིག་རེད།