མེས་དཔོན་གཙུག་ལག་དཔེ་སྟོན་སློབ་གྲྭས་འདས་པའི་ལོ་བདུན་ལྷག་གི་རིང་བཙན་བྱོལ་བོད་མིའི་ཤེས་ཡོན་སྲིད་བྱུས་ལག་བསྟར་བྱས་ཏེ། ད་ལོའི་ཕྱི་ཟླ་ ༣ པའི་ནང་སློབ་ཕྲུག་ ༢༤ རྒྱ་གར་རྒྱལ་ཡོངས་ཡིག་རྒྱུགས་ནང་འཛུལ་ཞུགས་བྱེད་འཆར་ཡོད་འདུག
ཕྱི་ལོ་ ༢༠༠༤ ལོར་བོད་མི་མང་སྤྱི་འཐུས་ལྷན་ཚོཊ་ཀྱིས་བཙན་བྱོལ་བོད་མིའི་ཤེས་ཡོན་སྲིད་བྱུས་གཏན་འབེབས་བྱས་རྗེས། ༢༠༠༥ ལོའི་ཕྱི་ཟླ་ ༡༠ ཚེས་ ༡༠ ཉིན་ངྷ་རམ་ས་ལར་མེས་དཔོན་གཙུག་ལག་དཔེ་སྟོན་སློབ་གྲྭ་གསར་འཛུགས་བྱས་ཡོད་ཅིང་། སྐབས་དེར་སྤྱི་ཚོགས་ནང་གླེང་སློང་སྣ་ཚོགས་བྱུང་བ་དང་། ངྷ་སའི་གཡས་གཡོན་དུ་ཕ་མ་རེ་ཟུང་ལས་དཔེ་སྟོན་སློབ་གྲྭར་སློབ་འཇུག་བྱེད་མཁན་མེད་སྟབས། ཕྱོགས་མཐའི་གཞིས་ཆགས་ཁག་ཏུ་གསལ་བསྒྲགས་སྤེལ་ཏེ་ཐོག་མར་ངྷ་རམ་ས་ལ་རང་གི་ཕྲུ་གུ་གཉིས་ཚུད་པའི་སློབ་ཕྲུག་ ༧༠ ཙམ་སློབ་འཇུག་བྱས་ཏེ་སློབ་སྦྱོང་སྤྲད་ཡོད་པ་དང་། དེ་ལྟར་གོམ་པ་རིམ་འཛེགས་ཀྱིས་ ༢༠༡༤ ཕྱི་ཟླ་ ༣ པའི་ནང་འཛིན་རིམ་བཅུ་བའི་སློབ་མ་ ༢༤ ཙམ་རྒྱ་གར་རྒྱལ་ཡོངས་ཡིག་རྒྱུགས་ནང་ཞུགས་རྒྱུ་ཡིན་པ་དང་། དེ་ནི་མེས་དཔོན་གཙུག་སློབ་དཔེ་སྟོན་སློབ་གྲྭའི་འཛིན་རིམ་བཅུ་བའི་མཐར་ཕྱིན་དང་པོ་ཡིན་འདུག
འདིའི་ཐད་སམ་བྷོ་ཊ་སྤྱི་ཁྱབ་ཡིག་ཚང་གི་འགན་འཛིན་ཀརྨ་ཆུང་བདག་ལགས་སུ་བཅར་འདྲི་བྱས་པར་ཁོང་གིས། དཔེ་སྟོན་སློབ་གྲྭར་ཐོག་མར་སློབ་མ་བསྡུ་སྐབས་ཕ་མ་མང་པོ་ཞིག་གིས་ཕྲུ་གུ་མངགས་གཏོང་མ་བྱས་པར་ངོས་ལེན་མེད་པའི་རྣམ་འགྱུར་བསྟན་ཡོད་ཀྱང་། འདས་པའི་ལོ་བདུན་ལྷག་གི་རིང་ཤེས་ཡོན་སྲིད་བྱུས་ཀྱི་དམིགས་ཡུལ་གཞིར་བཟུང་འབད་བརྩོན་བྱས་ཏེ། ཕྲུ་གུ་ཚོར་རང་གི་རིག་གཞུང་དང་གོམས་གཤིས་རྒྱུད་འཛིན་གྱི་ཐག་པའི་སྣེ་མི་ཀློད་མཁན་ཞིག་དང་། ཕྱིའི་རིག་གནས་ཀྱི་གསར་གཏོད་ཡོངས་སུ་རྫོགས་པ་ལ་དོན་གཉེར་བྱེད་མཁན་ཞིག་སྐྱེད་སྲིང་བྱས་ཡོད་སྐོར་བརྗོད་བྱུང་།
ཁོང་ལ་མཐར་ཕྱིན་གྲབས་ཡོད་པའི་འཛིན་རིམ་བཅུ་བའི་སློབ་ཕྲུག་དེ་དག་འཛིན་རིམ་བཅུ་གཅིག་བཅུ་གཉིས་གང་དུ་གཏོང་འཆར་ཡོད་མེད་དྲིས་པར། “ང་ཚོའི་སློབ་ཕྲུག་ཚོས་སྔོན་འགྲོ་ནས་འཛིན་རིམ་གསུམ་བའི་བར་བོད་ཡིག་རྐྱང་པའི་ཐོག་སློབ་སྦྱོང་དང་། འཛིན་རིམ་བཞི་བ་ནས་དབྱིན་ཇི་མགོ་འཛུཊ། འཛིན་རིམ་དགུ་བ་ནས་སློབ་ཚན་ཚང་མ་དབྱིན་ཡིག་ནང་སློབ་ཁྲིད་བྱས་ཏེ། ད་ལོའི་ཕྱི་ཟླ་ ༣ པར་སློབ་ཕྲུག་ ༢༤ རྒྱ་གར་རྒྱལ་ཡོངས་ཀྱི་འཛིན་རིམ་བཅུ་བའི་ཡིག་རྒྱུགས་ནང་ཞུགས་ཀྱི་ཡོད་པ་རེད། ཁོང་ཚོ་འཛིན་རིམ་བཅུ་པ་ཐོན་རྗེས་ཀྱི་ཟླ་གསུམ་རེའི་མཚམས་སུ་སློབ་སྤྱི་དང་དགེ་རྒན་རེ་མོས་ཀྱིས་སྐོར་སྐྱོད་བྱས་ཏེ་ཁོང་ཚོའི་གནས་སྟངས་ལ་རྟོག་ཞིབ་བྱེད་འཆར་ཡོད། མཐོ་སློབ་གང་དུ་འགྲོ་མིན་ཕྲུ་གུ་སོ་སོར་རག་ལས་ཡོད་རེད། ཚན་རིག་དང་ཚོང་ལས་ལྟ་བུར་མཚོན་ན་རྒྱ་གར་མཐོ་སློབ་ཁག་ཏུ་འགྲོ་དགོས་སྟབས། ང་ཚོས་ཚོཊ་ཆེན་སོཊ་ཀྱི་ལམ་ནས་མཐོ་སློབ་ཁག་དང་འབྲེལ་བ་བྱ་འཆར་ཡོད། མ་འོངས་པར་སློབ་ཕྲུག་ཚོར་འདི་ནས་ཐོན་རྗེས་མཐོ་སློབ་བར་དང་། ཐ་ན་འཆང་ས་བརྒྱབ་ཚར་བའི་རྗེས་སུ་ཕྲུ་གུ་བཙས་པའི་བར་མི་གང་འདྲ་ཆགས་མིན་བལྟ་ཐུབ་ན་བསམ་གྱི་ཡོད། རྒྱུ་མཚན་ཁོང་ཚོ་ང་ཚོའི་སློབ་ཕྲུག་ཐོག་མ་དང་ཤེས་ཡོན་སྲིད་བྱུས་ལག་བསྟར་བྱས་རྗེས་ཀྱི་ཕོ་ཉ་དང་པོ་ཆགས་ཡོད་པ་རེད། ” ཅེས་བརྗོད་བྱུང་།
ཡང་ཁོང་ལ་དཔེ་སྟོན་སློབ་གྲྭར་འཛིན་རིམ་བཅུ་གཅིག་བཅུ་གཉིས་འཛུགས་མ་ཐུབ་པའི་རྒྱུ་རྐྱེན་དྲིས་པར་ཁོང་གིས། “ཉེ་སྔོན་བོད་ནས་ཡོང་མཁན་ཉུང་དུ་ཕྱིན་སྟབས་དཔེ་སྟོན་དང་གསོག་སྒར་སློབ་གྲྭ་ཟླ་བསྒྲིལ་གཏོང་རྒྱུའི་འཆར་གཞི་བཏང་སྟེ། གསོག་སྒར་དང་སྣེ་ལེན་ཁང་བར་གྱི་ས་ཆར་བལྟས་ཡོད་ཀྱང་། བཙན་བྱོལ་བོད་མིའི་སློབ་གྲྭ་ ༧༨ ལྷག་ཡོད་པ་དེ་དག་ནང་ཕྲུ་གུ་ཉུང་དུ་ཕྱིན་ཏེ་སློབ་གྲྭ་སྟོང་པ་ཆགས་ཉེན་ཡོད་པ་དང་། ལྷག་པར་དུ་བོད་སློབ་འཛིན་ཚོགས་ཀྱི་སློབ་གྲྭ་ ༢༩ ནང་ཕྲུ་གུ་ཧ་ཅང་ཉུང་དུ་འགྲོ་བཞིན་པའི་སྐབས་འདིར་ས་ཆ་ཉོས་ཏེ་ཁང་པ་བརྒྱབ་ན་དོན་མེད་དངུལ་འཕྲོ་བརླག་ཆགས་ཀྱི་འདུག བོད་སློབ་འཛིན་ཚོགས་ཚང་མ་ང་ཚོར་རྩིས་སྤྲད་རྗེས་སློབ་གྲྭ་ཁ་ཤས་ཟླ་སྒྲིལ་གཏོང་དགོས་པ་ཆགས་ཀྱི་ཡོད་སྟབས། སྐབས་དེར་དཔེ་སྟོན་སློབ་གྲྭ་འདི་སློབ་གྲྭ་གཞན་ཞིག་གི་ནང་སྤོ་ཐུབ་ཀྱི་རེད་བསམ་གྱི་ཡོད།” ཅེས་བརྗོད་སོང་།
དཔེ་སྟོན་སློབ་གྲྭའི་སློབ་སྤྱི་བསྟན་འཛིན་རྡོ་རྗེས་ལགས་སུ་ད་ཆར་དགེ་སློབ་ག་ཚོད་ཡོད་མེད་དང་། མཐར་ཕྱིན་སློབ་མ་གོ་སྒྲིག་གི་ཐད་འཆར་གཞི་གང་འདྲ་ཡོད་མེད་དྲིས་པར་ཁོང་གིས། “ ད་ལྟའི་ཆར་མེས་དཔོན་སྟེང་ཤོད་གཉིས་ལ་སློབ་མ་ ༢༢༥ དང་། དགེ་ལས་ ༤༥ ཡོད། འདི་ལོ་ང་ཚོའི་སློབ་ཕྲུག་ ༢༤ ཙམ་འཐོན་བཞིན་ཡོད་པ་རེད། ང་ཚོའི་ངོས་ནས་ཁོང་ཚོ་ཙམ་མིན་པར་འཛིན་རིམ་ ༦ ནས་ ༡༠ བར་གྱི་སློབ་ཕྲུག་ཚང་མར་ཤེས་རིག་ལས་ཁུངས་ཀྱི་མ་འོངས་མདུན་ལམ་སློབ་སྟོན་པ་གདན་ཞུ་གནང་སྟེ་སློབ་ཚན་བྱེ་བྲག་པ་འདེམས་སྟངས་སོགས་ཀྱི་ཐོག་ཐེངས་གསུམ་ལ་ལམ་སྟོན་གནང་བཅུག་པ་ཡིན། ཉེ་ཆར་ང་ཁོང་ཚོ་དང་ཐུག་ཏེ་སྐད་ཆ་འདྲི་སྐབས། ཁོང་ཚོའི་ཁྲོད་ཀྱི་མི་ ༡༠ ཡིས་སྒྱུ་རྩལ་རིག་གནས་འདེམས་རྒྱུ་དང་ཕྲུ་གུ་ ༧ ཚན་རིག ཕྲུ་གུ་ ༤ ཝ་ཎ་མཐོ་སློབ། ཕྲུ་གུ་ ༣ ཚོང་ལས་སྡེ་ཚན་བཅས་གཏན་འཁེལ་བྱས་འདུག ཁོང་ཚོ་འཛིན་རིམ་བཅུ་བ་ཐོན་རྗེས་སུ་ཡང་ང་ཚོས་མུ་མཐུད་འབྲེལ་བ་གནང་སྟེ་ལམ་སྟོན་ཞུ་འཆར་ཡོད། ” ཅེས་བརྗོད་བྱུང་།
བོད་ཡིག་དགེ་རྒན་བློ་བཟང་ཚེ་རིང་ལགས་སུ་འཛིན་རིམ་བཅུ་བ་འཐོན་མཁན་ཚོའི་མ་འོངས་པར་བོད་ཡིག་ཐོག་དགོངས་ཚུལ་གང་འདྲ་ཡོད་མེད་དྲིས་པར་ཁོང་གིས། “ང་རང་གི་བསམ་པར། ད་སྔ་འཛིན་རིམ་བརྒྱད་པ་བར་གྱི་བསླབ་གཞི་ཁག་འགྱུར་བ་བཏང་ཡོད་པ་ལྟར། མ་འོངས་པར་དེའི་ཡན་གྱི་བོད་ཡིག་གི་བསླབ་གཞིར་འགྱུར་བ་བཏང་སྟེ། དབྱིན་ཇིའི་བསླབ་གཞི་ལྟར་སྤྱི་ཚོགས་འཚོ་བ་དང་ཐག་ཉེ་བ་བཟོ་རྒྱུ་དང་། སྤྱི་ཚོགས་ཀྱི་ལག་ལེན་དང་མཚམས་སྦྱོར་རྒྱུ། ཁོར་ཡུག་རྒྱ་ཆེ་རུ་གཏོང་རྒྱུ། དགེ་རྒན་གྱི་ངོས་ནས་ཀྱང་སློབ་ཁྲིད་བྱེད་ཐབས་ལ་འགྱུར་བ་གཏོང་རྒྱུ་སོགས་གལ་ཆེན་པོ་རེད།” ཅེས་བརྗོད་བྱུང་།
མཇུག་ཏུ་སློབ་ཕྲུག་ཁག་ཅིག་ལ་མ་འོངས་འཆར་གཞི་ཐད་བཅར་འདྲི་བྱས་པར་ན་ག་བསྟན་འཛིན་ཁྲི་ལྡེ་ཡིས། “ ངས་ཐོག་མར་དཔེ་སྟོན་སློབ་གྲྭའི་ནང་བོད་ཡིག་རང་གི་ཐོག་འཛིན་རིམ་བཞི་བའི་བར་སློབ་སྦྱོང་བྱས་ཏེ་བོད་ཡིག་ལ་ཡག་པོ་ཆགས་སོང་། རྗེས་སུ་དབྱིན་ཇི་མགོ་ནས་སློབ་སྦྱོང་བྱས་ཏེ་འཛིན་རིམ་དྲུག་པ་བདུན་པར་སླེབས་སྐབས། སློབ་གྲྭ་གཞན་དང་འགྲན་བསྡུར་བྱེད་སྐབས་ཏག་ཏག་འགྲོ་ཐུབ་ཀྱི་འདུག་ལ། ང་རང་གི་ནང་དུ་སློབ་གྲྭ་གཞན་གྱི་སློབ་ཕྲུག་ཡོད་པ་ཁོང་ཚོ་དང་བསྡུར་ན་ང་རང་ཡག་པོ་འདུག ང་འཛིན་རིམ་བཅུ་གཅིག་བཅུ་གཉིས་མ་སུ་རིར་འགྲོ་དགོས་བསམ་ཡོད། མ་སུ་རིར་བོད་ཡིག་ཡག་པོ་མེད་ཀྱང་། སོ་སོའི་ངོས་ནས་ཚགས་པར་དང་སྒྲུང་དེབ་དེ་འདྲ་བཀླགས་ཏེ་བོད་ཡིག་ཐོག་མུ་མཐུད་ཤུགས་རྒྱག་དགོས་བསམ་ཡོད” ཅེས་དང་། སློབ་མ་བསྟན་འཛིན་སྣང་སྐྱིད་ཀྱིས། “ང་རང་གི་བསམ་པར་བོད་ཡིག་ཡག་ཤོས་དེ་ང་ཚོའི་སློབ་གྲྭ་རེད་བསམ་ཡོད། དེང་སྐབས་ང་དང་ན་ཚོད་གཅིག་པའི་ཁྲོད་ནས་བོད་ཡིག་ཤོས་ང་རང་ཆགས་འདུག མ་འོངས་པར་ངས་ཚན་རིག་ཐོག་སློབ་སྦྱོང་བྱ་འཆར་ཡོད།”ཅེས་བརྗོད་བྱུང་།
གསར་འགོད་པ། དོན་གོ
དཔེ་སྟོན་སློབ་གྲྭར་བསྐྱོད་མྱོང་མེད་ཀྱང་། དཔེ་སྟོན་སློབ་གྲྭའི་སློབ་མས་སྟོན་པའི་ཟླ་རེའི་ཚགས་ཤོག་ཐེངས་འགའ་རེ་བལྟས་མྱོང་། ཁོང་ཚོའི་རྩོམ་རྩལ་སློབ་གྲྭ་གཞན་གྱི་སློབ་མ་དང་བསྡུར་ན་ཧ་ཅང་གི་ཡག་གི།
འཛིན་སྐྱོང་གིས་ཁྱབ་ཁོངས་སློབ་གྲྭ་ཁག་སོ་སོར་ཤེས་ཡོན་སྲིད་བྱུས་ལམ་སྟོན་ཡག་པོ་ཞིག་གནང་དགོས། ཕ་མ་སོ་སོ་ལའང་སློབ་སྟོན་བྱ་དགོས།
སྤྱིར་བཏང་ཡག་པོ་འདུག ཤེས་ཡོན་སྲིད་བྱུས་ཐོག་འབད་བརྩོན་གནང་བ་དེ་བོད་པའི་འཕྲལ་ཕུགས་གཉིས་ཀར་ཁེ་ཕན་ཆེན་པོ་ཡོད་པ་ཞིག་རེད། ཡིན་ནའང་ཁ་ནས་བཤད་པ་ཙམ་མིན་པར་དོན་དངོས་ཀྱི་ཐོག་ནས་དཔེ་སྟོན་སློབ་གྲྭ་གཙོས་པའི་ཤེས་ཡོན་སྲིད་བྱུས་ལག་བསྟར་བྱེད་ཡུལ་སློབ་གྲྭ་ཁག་ཏུ་སྒང་གི་འཛིན་སྐྱོང་དང་འོག་གི་དགེ་རྒན་རྣམ་པ་གང་ཅིའི་ཐད་བཀོད་སྒྲིག་ལམ་སྟོན་དང་། མཐུན་རྐྱེན་ཡག་པོ་སྦྱོར་རྒྱུ་ཧ་ཅང་གལ་ཆེན་པོ་རེད། གོ་ཐོས་ལྟར་ན་ད་ལྟ་གསལ་བོ་ཤེས་མ་སོང་སྟེ་ལོ་གཅིག་གཉིས་གོང་ལ་དཔེ་སྟོན་སློབ་གྲྭའི་འཛིན་སྐྱོང་ནང་སྡོད་མཁན་ཚོ་ཤེས་ཡོན་སྲིད་བྱུས་ཐོག་དགའ་མོས་དང་ཡིད་ཆེས་ཞེ་དྲག་མེད་པ་དང་། ཁོ་རང་ཚོ་ཡང་བོད་ཡིག་བོད་སྐད་ཐོག་ཆུ་ཚད་ཡག་པོ་མེད་མཁན་དེ་འདྲ་ཡིན་པ་ཞིག་གོ་སོང་། དེ་གཏན་ནས་འགྲིག་གི་ཡོད་པ་མ་རེད།
མུ་མཐུད་དུ་འགྲོ་བ་གལ་ཆེ་མཐོང་།