ཕྱི་ཟླ་ ༣ པའི་ཚེས་ ༡༡ ཉིན་༧གོང་ས་མཆོག་གངས་སྐྱིད་དུ་ཆིབས་བསྒྱུར་གྱིས་སྤྱི་འཐུས་ལྷན་ཁང་གི་ཚོགས་ཁང་གསར་པ་དབུ་འབྱེད་གནང་རྒྱུ་ཡིན་པ་དང་། ཚེས་ ༡༡ ཉིན་ནས་བཟུང་གྲོས་ཚོགས་ཚོགས་དུས་བདུན་པ་དབུ་འཛུགས་གནང་འཆར་ཡོད་འདུག
ཕྱི་ལོ་ ༢༠༡༢ ལོའི་ཟླ་ ༤ བ་ནས་བཟུང་བོད་མི་མང་སྤྱི་འཐུས་ལྷན་ཁང་གི་གྲོས་ཚོགས་ཚོགས་ཁང་དང་ལས་ཁུངས་གསར་རྒྱག་ཉམས་བཟོའི་ལས་དོན་མགོ་འཛུཊ་གནང་ཡོད་པ་ལྟར། ༢༠༡༣ ལོའི་ཟླ་ ༡༢ ནས་གསར་རྒྱག་ཉམས་བཟོའི་ལས་གཞི་ཡོངས་སུ་གྲུབ་ཏེ་འདི་ལོའི་ཕྱི་ཟླ་ ༣ ཚེས་ ༡༡ ཉིན་༧གོང་ས་མཆོག་གངས་ཅན་སྐྱིད་གཤོངས་དུ་ཆིབས་བསྒྱུར་གྱིས་སྤྱི་འཐུས་ལྷན་ཚོགས་ཀྱི་ལས་ཁུངས་དབུ་འབྱེད་རབ་གནས་གནང་རྒྱུ་ཡིན་པ་དང་། ཚེས་ ༡༡ ནས་ ༢༢ བར་སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་གྲོས་ཚོགས་ཚོགས་ཁང་གསར་པའི་ནང་འཚོགས་རྒྱུ་ཡིན་འདུག
འདིའི་ཐད་གསར་འགོད་པས་ཚོགས་དྲུང་སྟོབས་རྒྱལ་ལགས་སུ་བཅར་འདྲི་ཞུས་པར། ཁོང་གིས་དེ་སྔོན་སྤྱི་འཐུས་ལྷན་ཁང་དང་ལས་ཁུངས་ཁག་མང་པོ་མཉམ་སྡོད་བྱས་པ་དང་། གྲོས་ཚོགས་ཚོགས་ཁང་དང་ལས་ཁུངས་ཁག་གི་ཕྱོགས་གང་སར་སེར་ཀ་ཤོར། ཐིགས་ཆུ་འཛགས་པ་དང་བརླན་གཤེར་ཆེ་བ། རྩིག་པའི་ཟུར་གང་སར་གས་ཁ་ཤོར་བ་སོགས་ལ་བརྟེན་ཏེ། ཐོག་མར་ཁང་པའི་སྒང་གི་ལས་ཁུངས་ཁག་བསྐྱར་གསོ་བྱེད་རྩིས་བྱས་ཀྱང་། ཨར་ལས་ཆེད་མཁས་པ་སྐད་བཏང་སྟེ་བརྟག་དཔྱད་སྐབས་ཁང་པ་སྟེང་འོག་གཉིས་ཀ་ཉམས་གསོ་བྱ་དགོས་ཚུལ་བརྗོད་པ་ལྟར། ༢༠༡༢ ལོའི་ཕྱི་ཟླ་ ༤ བ་ནས་བཟུང་ལས་ཀ་མགོ་འཛུགས་བྱས་ཏེ་ ༢༠༡༣ ལོའི་ཕྱི་ཟླ་ ༡༢ པའི་ནང་མང་ཆེ་བ་ལེགས་འགྲུབ་བྱུང་ཡོད་སྐོར་དང་། ཚོགས་ཁང་གསར་པ་འདིའི་སྟེང་འོག་བར་གསུམ་གྱི་སྤྱིའི་འགྲོ་སོང་ཧིན་སྒོར་འབུམ་ ༢༦༠ ལྷག་ཕྱིན་ཡོད་པ་དང་། འཛུགས་བསྐྲུན་འགྲོ་སོང་མ་དངུལ་ཡོངས་རྫོགས་དབུས་བོད་མིའི་སྒྲིག་འཛུགས་ཀྱི་སྔོན་རྩིས་ནས་བཀའ་འཁྲོལ་ཞུས་པ་ཡིན་སྐོར་བརྗོད་བྱུང་།
ཚོགས་དྲུང་ལགས་ཀྱིས་ངོ་སྤྲོད་གནང་བ་ལྟར་ན། ཐེངས་འདིར་སྤྱི་འཐུས་ལྷན་ཁང་གིས་གསར་རྒྱག་བྱས་པའི་ཐོག་བརྩེགས་གསུམ་པའི་ནང་གྲོས་ཚོགས་ཚོགས་ཁང་དང་། མཇལ་འཕྲད་ཁང་། རྒྱུན་ལས་ཀྱི་ལས་ཁུངས་ལྔ་བཅས་དང་། ཐོག་བརྩེགས་གཉིས་པའི་ནང་རྒྱུན་ལས་ཚོགས་ཁང་དང་དཔེ་མཛོད་ཁང་། ཚོགས་གཙོ། ཚོགས་གཞོན། རྒྱུན་ལས་ཀྱི་ལས་ཁུངས་བཞི། ཚོགས་དྲུང། སྒེར་དྲུང་། ཡིག་འབྲེལ་ཁང་། སྣེ་ལེན་ཁང་བཅས་ཡོད་འདུག འོག་མར་དྲུང་འཕར་གྱི་ལས་ཁུངས་དང་། ལས་བྱེད་སྤྱི་ཡོངས་ཀྱི་ལས་ཁུངས་ཆེ་བ་གཅིག ཚོགས་ཆུང་ཚོགས་སའི་ཚོགས་ཁང་གཉིས། དེབ་མཛོད་ཁང་གཅིག ཅ་དངོས་འཇོག་སའི་མཛོད་ཁང་གཅིག་བཅས་ཡོད་འདུག་ལ། གྲོས་ཚོགས་ཚོགས་ཁང་རྙིང་པ་དང་མི་འདྲ་བར། ཁོད་ཡངས་ཤིང་ཁམས་གཙང་པ། གྲོས་ཚོགས་སྐབས་ཟུར་ཉན་པ་དང་གསར་འགོད་པ་བཅས་ཀྱི་བཞུགས་ཡུལ་རྒྱ་ཆེ་པ་བཅས་ཡིན་སྐོར་བརྗོད་སོང་།
ད་རེབ་གྲོས་ཚོགས་ཀྱི་ལས་རིམ་སྐོར་དྲིས་པར་ཁོང་གིས། “གྲོས་ཚོགས་ལས་རིམ་དེ་འཆར་ཅན་ལྟར་བོད་མིའི་སྒྲིག་འཛུཊ་ལས་ཁུངས་མ་ལག་དང་བཅས་པའི་ལོ་འཁོར་སྔོན་རྩིས་གཏན་འབེབས་གནང་གི་རེད། དེ་མིན་ཆབ་སྲིད་ཀྱི་ཐོག་ནས་ད་ལྟའི་བོད་ནང་གི་ཛ་དྲག་གནས་སྟངས་ལ་གཞིགས་ཏེ་བགྲོ་གླེང་ཡོང་གི་རེད་བསམ་གྱི་འདུག བཅའ་ཁྲིམས་དང་སྒྲིག་གཞི་བསྐྱར་བཅོས། བཀའ་ཤག་གི་གསལ་བཤད། གཞུང་འབྲེལ་གྲོས་ཆོད་གྲོས་འཆར། གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་གྲོས་འཆར་སོགས་རེད” ཅེས་བརྗོད་བྱུང་།
རྟེན་འབྲེལ་ཞུ།
གངས་ཅན་སྐྱིད་གཞུང་གི་ཐོག་ཁང་གཟི་བརྗིད་ཆེ་ཤོས་དེ་གྲོས་ཚོགས་ཁང་ཆགས་འདུག ཕྱིའི་གནས་ཁང་མཛེས་པ་ཙམ་གྱིས་གོ་མི་ཆོད་པས། དེའི་ནང་གི་སྤྱི་འཐུས་ཚོའི་ཤེས་འཇོན་ཡར་རྒྱས་བཏང་སྟེ་དོན་གྱི་འབྲས་བུ་འབྱིན་དགོས་སོ།།