ཟླ་འདིའི་ཚེས་ ༢༢ ཉིན་ནས་༧གོང་ས་མཆོག་གིས་ཨ་རིའི་མངའ་སྡེ་ཁག་གཉིས་ནང་ཆོས་ཕྱོགས་ཀྱི་མཛད་འཕྲིན་བསྐྱང་རྒྱུ་ཡིན་འདུག
དེ་རིང་ཕྱི་ཚེས་ ༡༧ ཉིན་གྱི་ཉིན་རྒྱབ་ཆུ་ཚོད་ ༡།༤༠ ཐོག ༧གོང་ས་མཆོག་བཞུགས་སྒར་ནས་ཆིབས་ཐོན་གནང་ཡོད་པ་དང་། ཟླ་འདིའི་ཚེས་ ༢༢ ཉིན་ནས་ ༢༥ བར་ཨ་རིའི་མངའ་སྡེ་ཁ་ལེ་ཧྥོ་ནི་ཡའི་གྲོང་ཁྱེར་སེན་ཧྥི་རན་སི་ཀོར་མི་མང་ལ་བདེ་སྐྱིད་བསྐྲུན་ཐབས་ཞེས་པའི་བརྗོད་གཞིའི་ཐོག་བཀའ་སློབ་དང་། བྷེར་ཁ་ལེ་གྲོང་ཁྱེར་དུ་འཚེ་མེད་ཞི་བ་དང་དུས་རབས་ཉེར་གཅིག་པའི་སྙིང་རྗེའི་ནུས་སྟོབས་ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་འདུག
ཕྱི་ཟླ་ ༣ ཚེས་ ༡ ཉིན་གྱི་ཞོགས་པར་ཨ་རིའི་མངའ་སྡེ་མི་ནི་སོ་ཊའི་ (Minnesota) མི་ནི་ཡ་ཕོ་ལི་སི་ (Minneapolis) གྲོང་ཁྱེར་ཚོགས་ཁང་དུ་ཚོགས་གཏན་འཁེལ་བའི་ནོར་སྦེལ་ཞི་བདེའི་གཟེངས་རྟགས་ཀྱི་གླེང་སྟེགས་ཐེངས་ ༢༦ པའི་ཐོག་བཀའ་སློབ་གནང་རྒྱུ་ཡིན་པ་དང་། ཚེས་ ༢ ཉིན་གྱི་ཞོགས་པར་མི་ནི་སོ་ཊ་བོད་མིའི་ཐེབས་རྩ་ཚོགས་པས་ཇི་ལྟར་གསོལ་བ་བཏབ་པ་ལྟར། མི་ནི་སོ་ཊའི་ཨོ་གྷོ་སི་བྷར་གྷ་མཐོ་སློབ་ཏུ་བོད་ཀྱི་ལོ་གསར་དུས་སྟོན་མཛད་སྒོར་ཆིབས་བསྒྱུར་གནང་རྒྱུ། ཉིན་དེའི་ཕྱི་དྲོར་སན་ཊི་ཕོལ་ (St. Paul) གྲོང་ཁྱེར་གྱི་མཱ་ཁཱ་ལེ་སི་ཊར་མཐོ་སློབ་ (Macalester College) ཏུ། བདེ་སྐྱིད་དང་ཆོག་ཤེས། བདག་ཉིད་ཀྱི་ངོ་བོ་ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་འདུག
ཕྱི་ཚེས་ ༧ ཉིན་ཨ་རིའི་རྒྱལ་ས་ཝ་ཤིན་ཊོན་དུ་མི་མང་ལ་ཆོས་ལས་འདས་པའི་གོ་ལ་སྤྱི་ཡོངས་ཀྱི་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་པ་དང་། ཕྱི་ཟླ་ ༣ ཚེས་ ༡༦ ཉིན་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་སྐྱེས་རབས་སོ་བཞི་པའི་གསུང་ཆོས་བསྩལ་རྒྱུ་ཡིན་འདུག
གསར་འགོད་པ། པདྨ་མཚོ།
