དང་པོ ༽ སྐབས་ ༡༧ པའི་ (BA) མཐོ་རིམ་རིག་གནས་རབ་འབྱམས་པའི་སློབ་མ་གསར་བསྡུ།
༡༽ གཞི་རིམ་འཛིན་གྲྭ་བཅུ་གཉིས་སློབ་ཐོན་ཟིན་པའི་ལག་འཁྱེར་ཡོད་པའི་ ༼འདི་ག་མཐོ་སློབ་ཀྱི་སྙན་ཞུའི་འབུལ་ཚེས་སྔོན་ལ་འདི་ལོའི་ལག་ཁྱེར་རག་མེད་ཚེ་སློབ་སྤྱིས་འཛིན་གྲྭ་བཅུ་གཉིས་ཐོན་པའི་ངོས་སྦྱོར་ཡི་གེས་འཐུས་ཀྱང་རྗེས་སུ་མཐོ་སློབ་ལ་དངོས་སུ་ཞུགས་སྐབས་ངེས་པར་དུ་མཉམ་ཁྱེར་དགོས།༽ སློབ་མ་རྣམས་ཚུད་རྒྱུགས་ལམ་ནས་མཐོ་རིམ་རིག་གནས་འཛིན་གྲྭར་སློབ་འཇུག་བྱ་རྒྱུ་ཡིན། ས་རཱ་མཐོ་སློབ་ཏུ་སློབ་སྦྱོང་བྱེད་པ་དང་ལྷན་དུ་རྒྱ་གར་མཐོ་སློབ་ལ་(correspondence Course) ཡིག་འགྲུལ་སློབ་སྦྱོང་གི་མཐུན་འགྱུར་ཡང་ཞུ་བཞིན་ཡོད།
༢༽ གཞི་རིམ་འཛིན་གྲྭ་བཅུ་གཉིས་ཀྱི་ལག་འཁྱེར་ཡོད་མེད་ཀྱང་བོད་ཡིག་གི་ཤེས་ཚད་གང་འཚམ་ཡག་པོ་ཡོད་ཅིང། མཐོ་རིམ་རིག་གནས་སློབ་སྦྱོང་བྱེད་རྒྱུར་འདུན་པའང་ཤུགས་ཆེ་ཡོད་པའི་ན་གཞོན་རྣམས་ཀྱི་ཆེད་ཡིག་རྒྱུགས་ལམ་ནས་སྐབས་ ༡༧ པའི་མཐོ་རིམ་རིག་གནས་སློབ་མ་གསར་བསྡུ་བྱ་རྒྱུ་དང། རྒྱུགས་འཕྲོད་ཀྱང་ས་ར་མཐོ་སློབ་ལ་ཚུད་པ་དང་། རང་གི་ལས་ཀ་བྱེད་བཞིན་པའི་ངང་ནས་མཐོ་རིམ་སློབ་སྦྱོང་བྱེད་འདོད་པར་ (correspondence Course) ཡིག་འགྲུལ་ལམ་ནས་མཐོ་རིམ་སློབ་སྦྱོང་བྱེད་རྒྱུའི་གོ་སྐབས་ཡོད་པས། སྐབས་ ༡༧ པའི་མཐོ་རིམ་རིག་གནས་ཀྱི་ཚུད་རྒྱུགས་ལ་ཞུགས་བློ་ཡོད་པ་རྣམས་ཀྱིས་སྙན་ཞུ་ ༢༠༡༤།༣།༢༥ འགྱངས་མེད་གཤམ་གསལ་ཁ་བྱང་ཐོག་འབྲེལ་བ་ཡོང་བ་ཞུ།
༡༽ སྐྱེས་ལོ་སྐྱེས་ཚེས་ཁ་གསལ་ཡོད་པའི་རང་གི་ལོ་རྒྱུས་དང་ཕྱེད་པར་གཉིས།
༢༽ བོད་མིའི་དཔྱ་དངུལ་ལག་དེབ་དང་སྐྱབས་བཅོལ་ལག་དེབ་ཀྱི་འདྲ་བཤུས།
༣༽ རང་ཉིད་གང་དུ་སྡོད་སའི་ཁ་བྱང་དང། གློག་འཕྲིན་ཁ་བྱང། ཁ་པར་ཨང་བཅས་ཁ་གསལ་དགོས།
གཉིས་པ༽ སྐབས་དང་པོའི་གཙུག་ལག་རབ་འབྱམས་པའི་ (M.A) སློབ་མ་གསར་བསྡུ། ཚང་མས་དགོངས་མངའ་ལྟར་བོད་ཀྱི་རིག་གཞུང་སྤྱི་དང་ལྷག་པར་རིག་གནས་ཐོག་ད་དུང་ཡང་ཞན་ཆ་ཆེན་པོ་ཡོད་པ་ཙམ་དུ་མ་ཟད། རིགས་གཅིག་རྐང་འཛིན་གྱི་མི་སྣ་དེ་བས་ཉུང་བར་སོང་༧གོང་ས་༧མཆོག་དང་ཤེས་རིག་ལས་ཁུངས་ནས་ཀྱང་དེའི་ཐོག་འབོད་སྐུལ་དང་བཀའ་སློབ་ཇི་སྙེད་ཅིག་ཕེབས་ཡོད་ཀྱང། ད་དུང་ལས་གཞི་དེའི་ཐོག་སྟོང་ཆ་ཞིག་བཀང་ཐུབ་མེད་པས་འདི་ག་མཐོ་སློབ་ནས་དགོས་དམིགས་དེའི་ཆེད་དང། འབྱུང་འགྱུར་མི་རབས་གསར་པ་རྣམས་ཀྱིས་རང་གི་ཆོས་རིག་གང་ལའང་རྐང་ལེན་ཐུབ་པའི་མི་སྣ་སྐྱེད་སྲིང་བྱ་རྒྱུར་དམིགས་པ་ཞིག་ཡིན། ལོ་རྒྱུས་དང་རྩོམ་རིག་གཉིས་ཀྱི་ཐོག་ལ་གཙུག་ལག་རབ་འབྱམས་པའི་ཚུད་རྒྱུགས་ལ་ཞུགས་བློ་ཡོད་པ་རྣམས་ཀྱིས་འགེངས་ཤོག་ནང་ཇི་གསལ་ཆ་རྐྱེན་ཚང་བའི་ཐོག་མཐོ་སློབ་ཡིག་ཚང་ངམ་དྲ་རྒྱ་(www.ibdindia.org) བརྒྱུད་འགེངས་ཤོག་བླངས་ནས་ཆད་ལུས་མེད་པར་དག་གཙང་གིས་བསྐངས་ཏེ་ ༢༠༡༤ ཕྱི་ཟླ་ ༣ ཚེས་ ༣༠ ནང་ཚུད་དུ་གཤམ་གསལ་ཁ་བྱང་ཐོག་འབྲེལ་བ་ཡོང་བ་ཞུ། ༼ དཔལ་ལྡན་དགའ་ལྡན་ཕོ་བྲང་ཡིག་ཚང་ནས་ལོ་རྒྱུས་དང་རྩོམ་རིག་གི་སློབ་མ་དྲུག་ལ་སློབ་ཡོན་གསོལ་བསྩལ་སྐྱབས་འཇུག་གནང་བར་ཐུགས་རྗེ་ཆེ་ཞུ།༽
Miss. Tenzin Tsenyi, Coordinator.
College For Higher Tibetan Studies
P.O. Sarah Dharamsala-176215
Distt Kangra (H.P.) INDIA Mb.No 98578-15161
ས་རཱ་བོད་ཀྱི་མཐོ་སློབ་ཡིག་ཚང་ནས་ ༢༠༡༤ ཟླ་ ༢ ཚེས་ ༢༥ ཉིན།།
