༧གོང་ས་མཆོག ཁྱེད་རང་ལ་སྐུ་ངལ་བཟོ་མཁན་སུ་རེད།
ཁྱེད་ཀྱིས་ད་དུང་སྐུ་ངལ་གསོ་བའི་གྲ་སྒྲིག་མི་བྱེད་པར
འགྲོ་དྲུག་སེམས་ཅན་དང་ ནང་དགོས་སུ་བོད་མི་དམངས་ཀྱི་ཆེད་དུ
ཉིན་མཚན་མེད་པར་སྐུ་ངལ་ཚད་མེད་མྱོང་ན་ཡང་
བསམ་ཤེས་མེད་པའི་ལས་ངན་ཁྱུ་གཅིག
ད་དུང་ ཁྱེད་ཀྱི་རྒྱབ་མདུན་གཉིས་སུ
ངོ་ཚ་དང་ཁྲེལ་གཞུང་མེད་པར
རང་རློམ་དང་ང་རྒྱལ་གྱིས་ཡར་བླངས་པའི་སྔ་གཞུག་དུ
ཉམ་ཆུང་བའི་བོད་པ་ང་
ཐག་རིང་རྣ་བའི་ཐོས་དུས སེམས་པ་གཏིང་ནས་སྐྱོ
བོད་པ་ཚང་གི་ཀླད་སྟོང་ཁ་ཤས་ཀྱིས
རང་རང་གི་གྲོད་ཁོག་རྒྱག་རྗེས་སུ
ཁྱེད་ཀྱིས བཀའ་དྲིན་མི་དྲན
ཁྱེད་ཀྱིས དགོང་གཞི་མི་ཤེས་པར
ཁ་སྟོང་ནང་གི་ཚིག་སྟོང་ལ་བདག་པོ་མི་བྱེད་པའི་ཅོལ་ཆུང་བ་འདི་ཚོས
དོན་དངོས་སུ་ཅི་ཡང་མ་ཤེས་པར་འུར་རྒྱག་པ
རྒྱང་རིང་ཡུལ་ནས་གོ་དུས སེམས་པ་གཏིང་ནས་སྡུག
བླ་མ་ལགས ཡིད་བཞིན་གྱི་ནོར་བུ
གདོང་དམར་གངས་ཅན་བོད་པ་ཚང་ལ
ཁྱེད་ཀྱིས་མ་གསུང་བ་གང་ཡང་ལུས་མེད
ཁྱེད་ཀྱིས་མ་སྒྲུབ་པ་ཅི་ཡང་ལྷག་མེད
ཁྱེད་ཀྱིས་མ་བསྟན་པའི་ལམ་ཁ་གཅིག་གྱང་སྐྱུར་མེད
ད་དུང་ གངས་ཅན་བོད་པ་ཚང་གི་ཆེད་དུ
ཁྱེད་ཀྱིས་སྐུ་ངལ་ཚད་མེད་མྱོང་བའི་རྣམ་ཐར
ལྷ་ཀླུ་མི་གསུམ འབྱུང་བོ་གདོན་འགེགས
གཟུགས་ཅན་དང་གཟུགས་མེད
སུ་གང་གིས་སྨྱུག་རྩེ་རུ་ལེན་དཀའ་དུས
ཁྱེད་ཀྱི་སྐུ་དྲིན་ཆ་ཤས་ཙམ་དྲན་ནས མིག་མཐའ་མཆི་མས་བཟུང་
དུས་བབ་དྲ་ཚིགས་སུ་བཀོད་པའི་རྩོམ་ཡིག་དང་བསམ་ཚུལ་ཁ་ཤས་བཀླགས་རྗེས།༡༢།༡༠།༠༨
