དྲ་གྲོགས་མེ་ལགས། ཁྱེད་རང་གིས་ཤེས་ཡོན་པ་འཚོལ་བཞིན་པའི་བསྐོར་གྱི་གཏམ་གླེང་དེ་ནི་སྤྱིར་བཏང་བཤད་ན་དངོས་ནས་བདེན་ས་ཡང་མི་ཉུང་བ་ཞིག་འདུག་པ་མ་ཟད། ཞིབ་འཇུག་གི་མ་འདང་བས་སྐད་ཆ་ཡང་མང་བོ་ཞིག་ཞོར་ནས་མཐོང་དེ་འོང་དུས་སུ། ངས་རང་དབང་མེད་པར་ཁྱེད་རང་ལ་འོག་གི་སྐད་ཆ་འདི་དག་བཤད་འདོད་སྐྱེས་སོང་། ང་རང་གིས་བསམ་ཚུལ་ཙམ་ཞིག་བརྗོད་ན་སྤྱིར་ཤེས་ཡོན་པ་སྤྱི་ཚོགས་ཀྱི་གདེངས་འཇོག་ཐོབ་ཐུབ་མིན་དེ་ནི་ཤེས་ཡོན་པ་རང་ཉིད་ཀྱིས་རང་ཚུགས་ཐུབ་མིན་དང་རང་ཉིད་ལ་སྙིང་རུས་ཡོད་མེད་བཅས་ལ་རེག་ལས་ཡོད་པ་ཞིག་ལས་སྤྱི་ཚོགས་ཀྱི་ནག་ཉེས་ཤ་སྟག་ལ་དྲངས་ན་ནི་དེ་འདྲའི་རྒྱུ་མཚན་དང་ལྡན་པ་ཞིག་རེད་མི་འདུག དོན་དངོས་ཐོག་ཤེས་ཡོན་པར་སྤྱི་ཚོགས་ཀྱི་ཁྲོད་ནས་ཐོངས་ཆེན་བྱེད་དགོས་པ་ཞིག་ཆགས་དགོས་ན་ནི། དེ་ནི་ཤེས་ཡོན་པ་ཁོ་རང་གི་ནུས་པ་དང་འཇོན་ཐང་ལ་རེག་ལས་པ་ཞིག་ལས་གཞན་སྤྱི་ཚོགས་ཀྱི་ཁྲོད་ནས་ཤེས་ཡོན་པ་འགན་ལེན་དགོས་ཟེར་བ་དེ་ནི་དེ་འདྲའི་ཏག་ཏག་ཞིག་མ་རེད། ཤེས་ཡོན་པའི་སྤྱི་ཚོགས་ལ་འགན་ལེན་དགོས་ཟེར་ནས་བཤད་བཞིན་པའི་སྐད་ཆ་དེ་ནི་དངོས་ནས་དྲང་གནས་ཀྱི་བདེན་པ་མཐར་ཐུག་ཆགས་ཡོད་པ་རེད།
ཁྱེད་ཀྱིས་ཤེས་ཡོན་པ་འཚོལ་བཞིན་ཡོད་པ་བདེན་ན། ཁྱེད་རང་གིས་དྲ་གྲོགས་གླེན་པ་ལུག་ལ་ལན་དེ་འདྲ་ཞིག་བཏབ་པ་ནི་དངོས་ནས་མ་འོས་པར་སྙམ། ཁྱེད་རང་གིས་སྐད་ཆ་བཤད་དེ་གནས་ལུགས་ཡོད་མེད་ལ་བལྟས་དེ་ཤེས་ཡོན་པ་འཚོལ་བཞིན་ཡོད་དམ། ངོ་ཤེས་མིན་དང་རང་གི་སྣང་བ་འགྲོ་མིན་ལ་བལྟས་དེ་ཤེས་ཡོན་པ་འཚོལ་བཞིན་ཡོད། དེའི་ཐད་དུ་ཁྱེད་རང་གིས་འགན་ཞིག་ཡོད་པའི་སྐད་ཆ་བཤད་ཡོད་མེད་ལ་བསམ་བློ་ཞིབ་མི་ཞིག་བཏང་ནས་ད་གཟོད། ཤེས་ཡོན་པ་འཚོལ་བ་བདེན་པ་ཡིན་ན། ཤེས་ཡོན་པ་ཟེར་བའི་མི་དེའི་རིགས་ལ་ཡང་སྐད་ཆ་བཤད་ནས་ཕན་ཚུན་ལ་བསམ་ཤེས་བྱེད་ཐུབ་མིན་དང་མི་ཤེས་མཁན་དང་རང་གི་ལྟ་བ་མི་མཐུན་མཁན་རེད་ཟེར་ནས་གཡུགས་བཞག་པ་ཡིན་ན་ནི། ཁྱེད་རང་གི་འཚོལ་བཞིན་པའི་ཤེས་ཡོན་པ་དེ་འདྲ་ཞིག་གང་དུ་སོང་ཡང་རྙེད་རྒྱུ་ཡོད་མི་སྲིད་པ་རེད་ཅེས་བཤད་ན་འདོད་སོང་། གལ་ཏེ་ཤེས་དམན་ཅོལ་ཆུང་གི་གཏམ་དུ་བསམ་ན་ནི་རང་གི་འདོད་པ་བྱོས། ཡིན་ཡང་། ང་རང་གིས་ཁྱེད་ཉིད་ལ་སེམས་བསམ་པའི་སྐད་ཆ་ཞིག་བཤད་པ་ལས་ཟུར་ཟ་དང་འཕྱ་དམོད་བྱས་པ་དེ་འདྲ་གང་ཡང་མ་ཡིན་པ་ཐུགས་ལ་འཛིན་རོགས་ཞུ།
