འཁུར་ན་མི་ཡང་རྡོ་ལས་ལྕི་བའི་སེམས།།
ཤོར་ན་མི་སྐྱིད་འདབས་ལས་སྙི་བའི་སེམས།།
སྟོན་ན་འདོད་པའི་བུ་མོ་གཟུགས་མཛེས་མ།།
ཁྱེད་ལ་གཏད་ཉིན་བརྗེད་དུ་མ་འཇུག་རོགས།།
འགྲོག་ཡུན་ཐུང་བའི་དུས་ཚིགས་དེ་ཡི་རིང་།།
ཕན་ཚུན་གཅིག་ལ་གཅིག་འཁྱུད་ལུས་པོ་གཉིས།།
ཚ་དྲོད་མེ་བཞིན་འབར་བའི་མཚན་མོ་དེར།།
སྐྱིད་པའི་སྣང་བ་ནམ་མཁའི་སྐར་ལས་མཐོ།།
རླུང་བུ་བསིལ་མོ་སྒེའུ་ཁུངས་བརྒྱུད་དེ་སླེབས།།
དུང་གི་ཟླ་བ་མུན་པའི་ཁྲོད་ནས་འཛུམ།།
སེམས་ཀྱི་སྐད་ཆ་ཕན་ཚུན་ངག་ལས་ཤོར།།
འཇིག་རྟེན་སྣང་བ་ཟེར་བ་དེ་འདྲ་རེད།།
སུས་ཀྱང་ཡིད་དུ་མེད་པའི་གློ་བུར་བ།།
དབྱར་ཁའི་མེ་ཏོག་ལྟ་བའི་མཛེས་པ་དེ།།
མི་འདོད་སད་ཀྱིས་འཁྱེར་བའི་དགུན་དུས་སུ།།
སེམས་པ་འཁྱག་པའི་གཟུར་བའི་ནངས་མོ་རེད།།
བྲིས་པའི་ཡི་གེ་དེ་ཡང་མེ་ལ་བསྲེག།
བཤད་པའི་སྙིང་གཏམ་དེ་ཡང་མི་ཁའི་གཏོར།།
འདྲིས་པའི་ཕྱི་ཐག་དེ་ཡང་སོ་སོར་གྱེས།།
ཞེན་ལོག་སྐྱེ་བའི་གཞི་མ་འདི་ལྟར་བྱུང་།།
དེ་ནས་བྲལ་བའི་རི་ལུང་ཕར་ཚུར་ན།།
གཟུགས་མེད་ན་ཚའི་བསླེང་བའི་དྲན་ཤིང་དེ།།
རྒས་ཀྱང་ཁོག་དུ་ལུས་པའི་ནད་རྙིང་འདི།།
སངས་པར་བྱེད་པའི་ལྷ་རྗེ་མེད་པར་སྐད།།
ཐག་རིང་རི་བོ་འདི་ཡི་ཕར་རྒྱབ་དུ།།
སྐུ་ལུས་བདེ་ཐང་ཡིན་པའི་རེ་སྨོན་དང་།།
བསམ་དོན་ཡིད་བཞིན་འགྲུབ་པའི་སྐྱབས་འཇུག་བཅས།།
དྲ་ཐོག་བཏགས་ཡིག་འབྲི་མཚམས་འདི་ནས་འཇོག།
དྲ་གྲོགས་ལགས། རེད་ཡ ངེད་ཅག་གིས་རང་རང་གིས་གང་ཤེས་པ་ཟེར་ན་འདྲ། དྲ་ཐོག་དུ་བཀོད་དེ་དྲ་གྲོགས་སྤུན་ཟླ་དག་དང་གླེང་མོལ་བྱེད་ཐུབ་པ་ཡིན་ན་དངོས་ནས་ཡག་པོ་འདུག རྗེས་ཕྱོགས་ཡང་ཡང་ཕེབས་ནས་གཏམ་གླེང་བྱེད་རྒྱུ་མ་བརྗེད།
གྲོགས་པོ་ལགས་་་རེད་རེད་་་ང་ཚོས་ཕན་ཚུན་བསམ་བློ་བརྗེ་རེས་བྱས་ན་ཡག་པོ་འདུག བདེ་མོ་རྗེས་མར་མཇལ
དྲ་གྲོགས་ཆུ་ཐིགས་སྔོན་མོ་ལགས། རེད་ལགས། ཉིད་ཀྱིས་གསུང་ལན་དེར་རྒྱབ་སྐྱོར་ཡོད་ལགས། ངས་དངོས་ནས་དྲང་གནས་ཀྱིས་རང་གི་ཐུབ་ཚོད་ཅིག་ཤུ་རེ་ལོས་བྱེད། ལྷག་པར་ཏུ་གྲོགས་པོ་ཁྱེད་ཅག་གིས་འཛུབ་སྟོན་སེམས་སུ་ལོས་འཛིན།
གྲོགས་པོ་ལགས་་་་ངས་ཁྱེད་ཀྱི་རྩོམ་ཡིག་《ང་དང་ཡིག་ནོར་》ཞེས་པ་དེ་བཀླགས་པ་ཡིན། ཡིན་ནའང་ངའི་རྩོམ་ཡིག་ནང་དུ་ཡིག་ནོར་ཡོད་་་་་་ཀློག་འདོད་མེད་ན་ཕྱིར་འཐེན་རྒྱབ་ཆོག་ཅེས་པ་ནི་མ་རངས་པའི་ཚིག་རེད། སྤྱིར་ཡིག་ནོར་རྦད་དེ་མེད་ས་ཞིག་ཁག་པོ་རེད། ཡིན་ནའང་ང་ཚོ་བོད་ཡིག་ལ་ཅུང་གོམས་འདྲིས་ཡོད་པས་འདི་ཙམ་ཞིག་བྱེད་དགོས་དོན་མེད། ཁྱེད་ལ་རྣམ་དབྱེ༼ཏུ༽སྤྱོད་ས་ཞིག་མི་འདུག་པ་དེ་ཁྱེད་ཀྱིས་ཉམས་འཇོག་མ་བྱས་པ་རེད། རྟག་པར་ཉམས་འཇོག་བྱས་ན་རིམ་པས་གོམས་ཡོང་། གྲོགས་པོ་དེ་འདྲ་ཨེ་རེད།
དྲ་གྲོགས་ཆུ་ཐིགས་སྔོན་མོ་ལགས། ཐུགས་རྗེ་ཆེ། ཁྱེད་རང་གིས་གསུང་བ་དེ་ལྟར་དུ་ཁས་ལེན་ལོས་བྱེད། དེའི་སྟབས་ཀྱིས་ང་རང་གིས་བསམ་བཞིན་དུ་འབྲི་བཞིན་མེད་ཀྱང་། ང་དང་ཡིག་ནོར་ཟེར་བའི་རྩོམ་ཡིག་ཐུང་ཐུང་ཀློག་རོགས་ཞུ།
http://www.amapakto.com/interviwe.html
གྲོགས་པོ་ལགས་་་་་ནམ་ཡིན་ཡང་ཡིག་ནོར་ལ་གཟབ་དགོས་པ་རེད། ཡིག་ནོརགྱིས་ཁེངས་པའི་རྩོམ་ཡིག་ཅི་ཙམ་བྲིས་ནའང་ཀློག་འདོད་མེད་པ་ལྟར་བུར་ཆགས་ཡོང། དེ་མིན་དངོས་གནས་གཞི་བདག་འདྲ་བོ་རེད། ཀི་གཅིག་འདེབས་སར་སླེབས་འདུག མྱུར་མགྱོགས་ལ་རྗེས་སུ་ཡི་རངས་ཡོད