སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ཉེར་གཉིས།

བློ་བཟང་གིས་སེམས་ནང་དུ། ད་འདི་གང་རེད། ཉེ་སྔོན་སངས་རྡོར་གྱིས་ང་རང་ལ་ནོར་བུ་བཟང་མོ་ངོ་སྤྲོད་བྱེད་ཅེས་བཤད་པ་རེད། དེ་རིང་འདི་ནས་ཐུག་པ་འདི་ཡང་ག་རེ་ཡིན་ནམ་སྙམ་ཞོར། སེམས་ནང་དུ་དོགས་པ་ཞིག་སྐྱེ་ཞོར་དུ་ནང་དུ་འཛུལ། བློ་བཟང་ནང་དུ་སླེབས་མ་ཐག ཉལ་ཁྲིའི་ཟུར་གཉིས་ན་གློག་བརྙན་ལ་ཅེར་ནས་ཡོད་པས་ནོར་བུ་བཟང་མོ་དང་མོའི་གྲོགས་མོ་གཉིས་ཀ་ཡར་བླངས་དེ། ཤོག ཤོག ཤོག་ཟེར་ནས་རང་རང་གི་ཐད་ནས་བློ་བཟང་ལ་བལྟ་བཞིན་ཡོད་ཀྱང་། བློ་བཟང་གིས་དམིགས་བསལ་གྱིས་ནོར་བུ་བཟང་མོ་ཕྱོགས་སུ་ཁ་གཏད་དེ་ཁྱེད་གཉིས་བསྡོད། ང་རང་འདིར་བསྡད་ན་འགྲིག་ཟེར་ནས་ཉལ་ཁྲིའི་འགྲམ་གྱི་རྐུབ་སྟེགས་སྟེང་དུ་བསྡད།

སྐར་ཆ་ཁ་ཤས་ཀྱི་རྗེས་སུ་ལྷ་མོ་ནང་དུ་འབྱོར་ནས། ད་དངོས་ནས་ཡག་པོ་འདུག བློ་བཟང་ང་ལ་རོགས་བྱོས་དང་ཉིན་གུང་ཁ་ལག་བཟོ་ཟེར་ནས་བཤད་དུས། ནོར་བུ་བཟང་མོས་ཨ་ཅེ་ལོ་ལོ། ཁོ་ད་ལྟ་རང་སླེབས་པ་རེད། ངལ་གསོ་རུ་བཅུགས་དང་། ངེད་གཉིས་ཀྱི་ཁྱེད་རང་ལ་རོགས་བྱེད་ཆོག་ཞེས་བར་དུ་བུད། བློ་བཟང་གི་གདོང་དུ་འཛུམ་ཞིག་བླངས་ཀྱིན། མི་སྐྱོན་མི་སྐྱོན་ངས་རོགས་བྱེད་ཆོག་ཟེར་ནས་བཤད་དུས། ལྷ་མོས་ཡ་དེ་ན་འགྲིག་གི ཁྱེད་གཉིས་སོང་དེ་ཁ་ལག་བཟོས་དང་། ང་རང་གིས་ངལ་གསོ་བྱེད་ཆོག་ཟེར་ནས་བློ་བཟང་གི་འགྲམ་གྱི་རྐུབ་སྟེགས་སྟེང་དུ་བཙོག

བློ་བཟང་ལ་རང་དབང་མེད་པར་ཐབ་ཚང་དུ་སོང་དུས། བློ་བཟང་གི་རྒྱབ་ལོག་དུ་ནོར་བུ་བཟང་མོ་ཡང་དེད་ནས་འོང་དུས། བློ་བཟང་གི་སེམས་ནང་དུ་དོགས་པ་ཞིག་ཡོད་སྟབས། ཅུང་ཙམ་བདེ་བོ་མེད་ཀྱང་མི་ཤེས་ཁུལ་བྱས་དེ་ནོར་བུ་བཟང་མོ་ཐབ་ཚང་དུ་འབྱོར་མ་ཐག ཡ་་ ད་འུ་གཉིས་ཀྱིས་ཉིན་གུང་ཁ་ལག་ཁ་རེ་བཟོ་ཞེས་དྲིས་དུས། ནོར་བུ་བཟང་མོས་ཨ་ཅེ་ཁ་ལག་ག་རེ་བཟོ་དགོས་པ་རེད་ཅེས་མོ་རང་གི་ཨ་ཅེ་ལྷ་མོ་ལ་དྲིས།

ལྷ་མོས་བརྙན་འཕྲིན་ལ་བལྟ་ཞོར་དུ། ཞོག་ཁོག་གི་ཚལ་ཞིག་དང་འབྲས་ཤིག་བཙོས་ན་མ་རེད་དམ། བདེ་གྲོལ་ཀྱང་ཡོང་ལ་ཡོད་པ་རེད། མི་དྲུག་བདུན་ཞིག་གི་གྲོད་ཁོག་བགྲང་བ་ཞིག་བཟོས་ཟེར་ནས་བཤད་དུས། བློ་བཟང་གིས་ཐད་ཀར་ཞོག་ཁོག་གི་འབག་པ་གཙང་མ་བཟོས་དེ་ཙོང་གཏུབ་ཞོར་དུ། ནོར་བུ་བཟང་མོ། ཁྱེད་རང་ག་དུས་སློབ་གྲྭ་ནས་ཕྱི་རུ་ཐོན་པ་ཡིན་ཞེས་དྲིས།

ནོར་བུ་བཟང་མོས་ཁ་སང་ཞེས་ལན་བཏབ། བློ་བཟང་གིས་དེས་ན་ཁྱེད་རང་བོད་ནང་ནས་སློབ་གྲྭར་འགྲོ་མྱོང་ཡོད་པ་རེད་མོད། འདི་ནས་ཡང་བསྐྱར་སློབ་གྲྭའི་གོ་སྐབས་རེག་པ་དེར་དམ་འཛིན་གྱིས་སློབ་སྤྱོང་བྱས་པ་ཡིན་ན་མ་རེད་དམ་ཞེས་དབུགས་ཐབ་སྒང་གི་ཚལ་ལང་ནང་དུ་ཞོག་ཁོག་དང་ཙོང་བླུགས་ཀྱིན་བཤད།

ནོར་བ་བཟང་མོས། རེད་རེད། གོ་སྐབས་འདི་འདྲ་རེག་རྒྱུ་དེ་ནི་དངོས་ནས་ལས་སླ་བོ་མ་རེད་མོད། འོན་ཀྱང་། ང་རང་ལ་སློབ་སྤྱོང་བྱེད་པའི་འདུན་པ་དེ་འདྲ་ཤུགས་ཆེན་པོ་མེད་པ་མ་ཟད། ཡི་གེ་ཡག་པོ་ཤེས་མཁན་ཞིག་ཀྱང་མ་རེད་ལ། སློབ་གྲྭའི་ནང་དུ་དེ་ལྟར་ཉིན་མ་འཕྲོ་བརླག་དུ་བཏང་ནས་བསྡད་པ་ཡིན་ན་ཡག་པོ་མི་འདུག་སྙམ་ནས་ཕྱི་རུ་བུད་པ་ཡིན་ཟེར་ཞོར་དུ། འབྲས་ཁྲུས་ཡོད་པ་དེ་དག་དབུགས་ཐབ་སྒང་དུ་བཞག་ནས་མེ་སྤར།

བདེ་གྲོལ་བློ་བཟང་དང་ནང་མི་ཚང་མ་ལྷན་དུ་ཁ་ལག་ཟ་གྲབས་བྱེད་ཀྱི་ཡོད་པའི་སྐབས་ཏག་ཏག་དེར་ནང་དུ་སླེབས་ནས། ཡ་བློ་བཟང་། འདིར་མ་ཡོང་བར་རྒྱུན་རིང་བོར་འགྲོ་སོང་། དེ་རིང་ངེད་ཚང་ལ་མགྲོན་པོ་གསར་བ་གཉིས་ཡོད་པ་ཤེས་ཡོད་པ་མིན་འགྲོ་ཟེར་ནས་ཀུ་རེ་རྩེད་ཞོར་དུ། ཁོ་རང་གི་རྒན་མོ་ལྷ་མོའི་འགྲམ་དུ་བསྡད།

བློ་བཟང་གིས་ཁ་སང་དེ་རིང་ང་རང་ལ་ལས་ཀ་མེད་སྟབས། དུས་ཚོད་ཀྱང་འགྲོ་ཡི་མི་འདུག དེ་ནས་འདི་རུ་ཡོང་བ་ཡིན། གཅིག་བྱས་ན་ཉིན་མ་ཁ་ཤས་ཤིག་གི་རྗེས་སུ་ང་རང་ཕྱོགས་གཞན་ཞིག་ལ་བུད་འགྲོ་ན་ཐང་། མ་སོང་སྔོན་དུ་ཁྱེད་གཉིས་ཡོད་སར་གཅིག་ཡོང་བ་ཡིན་ཟེར་ནས་ལན་འདེབས་ཞོར་དུ། མདུན་ཅོག་སྒང་གི་དཀར་ཡོལ་ཡར་བླངས་དེ་ཟ་མ་ཟ་མགོ་བཙུགས།

བདེ་གྲོལ་གྱིས་མི་གཅིག་པོ་ཕྱིར་སོང་ནས་ཅི་བྱེད། དོ་ནུབ་འདི་རུ་བསྡོད་དང་། ང་ཚོ་ལྷོད་ལྷོད་བྱས་དེ་འདུག ནོ་ནུབ་ཤོག་རྩེད་རྩེད་ནས་སུ་ཤོར་ན་དེ་ལ་ཆད་པ་གཅོད་རེ་བྱས་དེ་འདུག རྗེས་ཕྱོགས་ཁྱེད་རང་ཐག་རིང་ཞིག་དུ་བུད་སོང་ན། ཡུན་རིང་ཞིག་ཐུག་མིན་ཀྱང་མི་ཤེས་ཟེར་ནས་བཤད་འཕྲོ་མ་ལུས་གོང་དུ་ལྷ་མོས་ཀྱང་དེ་བྱོས་ཟེར་ནས་རྒྱབ་ནོན་ཞིག་བྱས།