བཀའ་བློན་ཁྲི་བ། བཀའ་བློན་ཁྲི་བ། ལག་ཐོག་ཚད་དང་སྐད་ཆ་བཤད་ཤེས་མཁན་གྱི་བོད་མི་དག་གིས་བདུན་ཕྲག་འདི་དག་གི་རིང་དུ་བཀའ་བློན་ཁྲི་བའི་སྐོར་དང་༧གོང་ས་མཆོག་བགྲེས་ཡོལ་དུ་ཕེབས་མིན་གྱི་སྐོར་རྐྱང་རྐྱང་གླེང་གི་འདུག དེ་བས་ཀྱང་ཤུགས་ཆེན་པོའི་གླེང་གཞི་ནི་བཀའ་ཁྲི་གསར་བའི་སྐོར་རེད། དེ་ལ་འདོད་ཀྱང་རུང་མི་འདོད་ཀྱང་རེད། ཉིན་གཉིས་ཀྱི་རྗེས་སུ་བཀའ་བློན་འོས་མི་གསུམ་ལས་གཅིག་ང་ཚོའི་མིག་གི་མདུན་དུ་ང་ཚོ་བོད་མི་བྱེས་པ་ཚང་གི་སྲིད་ཁྲིའི་སྟེང་་དུ་སླེབས་རྒྱུ་རེད།
ད་ནི་ང་ཚོས་བརྒྱ་བཤད་ཀྱང་སྟོང་བཤད་ཀྱང་། མི་གསུམ་ལས་གཅིག་ཡོང་རྒྱུར་ང་ཚོས་འགོག་དགོས་དོན་མེད་ལ། བཟང་ངན་ཡག་བཙོག་མང་བོ་ཞིག་ཀྱང་གླེང་ཀྱང་དེ་བས་མི་ཕན། ད་ནི་ང་ཚོས་གང་ཞིག་གླེང་དགོས་པ་དེ་ནི་ང་ཚོས་ཁོང་ཚོ་གསུམ་ལས་སུ་ཞིག་བོད་བྱེས་ཀྱི་བཀའ་བློན་ཁྲི་བའི་སྲིད་སྟེགས་སྟེང་དུ་སླེབས་པ་ཡིན་ན། དེ་ཡིས་བོད་ཕྱི་ནང་གཉིས་ལས་བོད་ནང་གི་ད་ལྟའི་གནས་བབ་ཛ་དྲགས་ལ་བསམ་བློ་ཞིབ་མོ་བཏང་ནས། བོད་ནང་གི་བོད་རྒྱ་ཆེ་མི་དམངས་རྒྱ་ཁོངས་སུ་བསྡོད་འདོད་ཡོད་མེད་དེ་ཤེས་དགོས་ཀྱི་ཡོད་པར་སྐུལ་འདེད་གཏོང་དགོས་པ་ཡིན་ལ། བྱེས་སུ་ཡོད་པའི་བོད་མི་བཙན་བྱོལ་བ་དག་གིས་གཉིད་མ་སད་ཀྱི་བཙན་བྱོལ་བའི་རང་གཟུགས་དེ་ལས་བཙན་བྱོལ་བ་ངོ་མ་ཞིག་ཆགས་པར་ཕྱོགས་ངོས་གང་ཐད་ནས་འབད་བརྩོན་བྱེད་རྒྱུར་སྐུལ་འདེད་ཤུགས་ཆེན་གཏོང་དགོས་པ་ཡིན།
དེ་བས་ཀྱང་གལ་ཆེ་བ་ཞིག་ཡོད་པ་དེ་ནི་བཀའ་ཁྲི་གསུམ་ལས་སུ་ཞིག་བཀའ་བློན་ཁྲི་བར་སླེབས་པ་ཡིན་ན། དེ་ཡི་རང་གི་མཛད་དུས་མ་རྫོགས་བར་དུ་རང་ཉིད་ནི་བོད་རྒྱ་ཆེ་གཞིས་ལུས་མི་དམངས་ཀྱི་མགྲིན་ཚབ་པ་ཞིག་དང་བྱེས་བཙན་བྱོལ་བོད་མིའི་ཆབ་སྲིད་ཀྱི་དབུ་ཁྲིད་ཅིག་ཡིན་པར་སེམས་སུ་བརྟན་པོར་གཉར་ནས་ཉིན་མཚན་དབྱེར་མེད་དུ་བོད་དོན་དུ་རྒྱལ་ཁབ་གཞན་གྱི་མི་སེར་ལས་དགོངས་པ་ཞུ་དགོས་ཐུག་ཀྱང་ཞུ་དགོས་པ་མ་ཟད། ལས་འགན་གང་ཞིག་བྱེད་པ་ལ་བཙན་བྱོལ་བོད་མིའི་ལག་དེབ་སེར་བོའི་སྟེང་ནས་བྱེད་དགོས་ཀྱི་ཡོད་པ་ཡིན།
བཙན་བྱོལ་བ་ཞིག་གི་དབུ་ཁྲིད་དང་བོད་རྒྱ་ཆེ་གཞིས་ལུས་མི་མང་གི་མགྲིན་ཚབ་པ་བྱེད་པར། བོད་ཀྱི་སྐད་ཡིག་གི་ཆུ་ཚད་ཀྱང་མི་དམན་པ་དགོས་པ་མ་ཟད། བོད་གཞིས་ལུས་གཉིས་ཀྱི་འདོད་དོན་ཡང་རྟོགས་ཐུབ་པར་ག་དུས་ཡིན་ཡང་གྲྭ་སྒྲིག་ཨང་གསར་དགོས་ཀྱི་ཡོད་པ་ཡིན། བོད་ཀྱི་གནད་དོན་ནི་བོད་མི་རིགས་ཤིག་རྒྱལ་ཁབ་ཅིག་གི་ངོ་བོར་གནས་རྒྱུའམ། ཡང་ན། གཞན་གྱི་མངའ་ཁོངས་སུ་བསྡོད་རྒྱུ་དེ་གཉིས་ཀྱི་བར་མཚམས་འདིར། ཕྱོགས་དེ་གཉིས་ལ་གང་བོད་རྒྱ་ཆེ་མི་དམངས་ཀྱི་རེ་འདོད་ངོ་མ་དེ་ཡིན་མིན་རྩར་གཅོད་གཏིང་གནད་བྱེད་པའི་ལས་འགན་དེ་ནི་ཉིན་གཉིས་ཀྱི་རྗེས་སུ་སླེབས་སྲིད་པའི་བཀའ་བློན་ཁྲི་བ་དེ་ལ་འགན་ཡོད་པ་ཡིན།
འཛམ་གླིང་ཡུལ་གྲུ་གཞན་དག་ལ་འབྲེལ་བ་དགོས་པ་བཤད་མ་དགོས་པ་ཡིན་ཡང་། རང་དོན་བྱེད་པ་ལ་རང་གི་འགན་འཁུར་བ་ཡིན་དུས། བོད་དོན་བྱེད་པ་ལ་བོད་མིས་འགན་གཙོ་བོ་འཁུར་ནས་ལག་ལེན་དངོས་ཀྱི་སྟེང་ནས་ར་སྤྲོད་མ་བྱས་པ་ཡིན་ན། ཁ་སྙན་པོ་བཤད་པའི་འཛམ་གླིང་གི་སྲིད་དོན་པ་དག་གིས་ག་དུས་ཡིན་ཡང་བོད་དོན་དུ་སྐད་ཆ་སྙན་པོ་རེ་བཤད་པར་དཀའ་ངལ་གང་ཡང་མེད་ལ། དེ་ལ་རྒྱ་ནག་སྲིད་གཞུང་གིས་ཀྱང་ཨ་ལན་སྟེར་མི་དགོས་པ་གསལ་བོ་ཤེས་ཀྱི་ཡོད་པ་དེ་ཡང་བཀའ་བློན་ཁྲི་བ་གསར་བའི་སེམས་བསམ་པའི་གཏིང་ནས་ངེས་ཟིན་ཐོབ་དགོས་ཀྱི་ཡོད།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
ངའི་ཟིན་བྲིས་ནང་དུ་ངའི་ཟིན་བྲིས་ཞེས་པ་མི་འདུག་རྒྱུ་མཚན་གང་ཡིན་ན།
བདེན་པ་རེད། བཀའ་བློན་སུ་འཐོབ་ནའང་ཉིན་མཚན་དུས་དྲུག་ཏུ་ལྷོད་ཡངས་གཏན་ནས་བྱེད་མི་རུང་བར་བོད་ཀྱི་འཐབ་རྩོད་ཁོ་ནར་འབད་དགོས་ལ། དེ་ཡང་འཐེན་ཞིག་དང་། ལྷོད་ཅིག་ངེས་པར་དུ་དགོས།
ད་ག་རང་རེད། དེ་ལས་ཀྱང་གལ་ཆེ་བ་ཞིག་ལ་འོས་མི་ཁོང་གསུམ་ལས་སུ་ལ་འོས་ཐོབ་སྟེ་བཀའ་བློན་ཁྲི་པའི་ཞབས་སྟེགས་སུ་ཕེབས་ཀྱང་། བོད་རྒྱ་ཆེའི་མི་མང་གིས་མང་གཙོའི་རིང་ལུགས་ཀྱི་ཚུལ་ཁྲིམས་ལྟར་བསམ་པ་རྣམ་དག་གིས་དབུ་ཁྲིད་དུ་བཀུར་དགོས་པ་རེད།
དྲ་གྲོགས་ལགས་ངོ་མ་བསམ་ཚུལ་ཡག་པོ་ཞེ་དྲག་རེད།
བོད་རང་ལ་ཤ་ཞེན་ཅན་ཞིག་གི་རེ་འདོད་ངོ་མ་ཡིན་པས་མུ་མཐུད་དུ་རྒྱབ་སྐྱོར་ཞུ་ངེས་ཡིན།