གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། བཅུ།

ནང་མི་འདུ་འཛོམས་ཀྱི་ལས་དེ་ཚར་ནས་ང་རང་གིས་ནང་གི་ཅ་དངོས་དག་ཕར་འཇོག་ཚུར་འཇོག་བྱས་ནས་ཡུན་རིང་མ་སོང་བའི་སྐབས་དེ་འདྲ་ཞིག་ལ། མཛའ་མོས་ང་རང་ལ་བུ་མོ་ཁྲིད་དེ་ཕྱི་རོལ་དུ་འགྲོ་བར་སྐུལ་བ་ལྟར། ང་རང་གིས་ཀྱང་དྭང་དུ་བླངས་ནས་བུ་མོ་ཁྲིད་དེ་ཁང་བའི་འགྲམ་གྱི་སྐྱེད་ཚལ་ཞིག་ལ་སོང་ནས་ཆུ་ཚོད་གཉིས་རིང་དུ་བུ་མོ་དང་མཉམ་དུ་རྩེད་མོ་རྩེས་པ་ཡིན། ས་ཡང་རུབ་གྲབས་ཡོད་སྟབས། ང་རང་གིས་བུ་མོ་ཁྲིད་དེ་ཕྱིར་ནང་དུ་འབྱོར་དུས། མཛའ་མོའི་མ་རྒན་གྱིས་དགོང་ཟས་ཟ་བཞིན་འདུག་ལ། མོ་རང་གིས་ཁ་པར་ནང་དུ་མོ་རང་གིས་ཕ་རྒན་ལ་ཁ་བརྡ་བྱེད་ཀྱིན་འདུག

མཛའ་མོས་ཁ་པར་ནང་དུ་སྐད་ཆ་བཤད་ཞོར་དུ། ང་རང་ལ་ཁྱེད་ཀྱིས་བུ་མོ་ལ་དོར་མ་མི་གཡོགས་པར་གང་བྱེད། གནམ་གཤིས་གྲང་དུ་འགྲོ་འདུག ངས་མི་སྐྱོན་གི ཕྱི་རོལ་དེ་འདྲའི་གྲང་མོ་ཞིག་མ་རེད་ཅེས་བཤད་ཀྱང་། མོ་རང་གིས་མ་རྒན་གྱིས་ཀྱང་བུ་མོས་རྒྱབ་དུ་བླངས་ནས་གྲང་མོ་འདུག ང་རང་གིས་ད་ལྟ་རང་ནང་ལྭ་བརྗེ་བོ་བརྒྱབས་པ་ཡིན། བལྟས་དང་ཟེར། སྐབས་དེ་འདྲ་ཞིག་ལ་ངས་ཡར་མར་ལ་བལྟས་དུས། ནང་གི་སྒོ་དང་སྒེའུ་ཁུངས་ཚང་མ་ཕྱེ་ནས་བཞག་འདུག ངས་རེད། ནང་གི་སྒོ་དང་སྒེའུ་ཁུངས་ཚང་མ་ཕྱེ་ནས་བཞག་འདུག་པ་དེ་ཡིས་ལན་པ་རེད་ཅེས་བཤད། དེ་འདྲའི་སྐབས་དེར་མཛའ་མོས་བུ་མོ་ལ་མ་རྒན་གྱིས་སྡེར་མའི་ནང་གི་ཟ་མ་སྟེར་གྱི་འདུག

ངས་དེ་མཐོང་ནས། དེ་མ་སྤྲོད། ཟ་མ་ཕར་ཞོག་ན་བཟོས་ཟིན་པ་དེ་དག་ཚ་བོ་བཟོས་དེ་སྤྲད་ན་འགྲིག་གི་འདུག་ཞེས་བཤད་དུས། མོ་རང་གིས་མ་རྒན་གྱིས་དེ་མི་སྐྱོན་གི སྡེར་མའི་ནང་གི་འབྲས་མ་གཏོགས་ཤ་སྤྲོད་ཀྱི་མི་འདུག་ཟེར་བས། དེ་འདྲ་མིན་ཚུལ། ཤ་དང་འདྲེས་པའི་ཟ་མ་ནི་མ་སྤྲད་པར་རེ་སྐུལ་ཞུས་པ་དེར་བསམ་བློ་ཞིག་བཏང་ན་རེད་ཅེས་བཤད་དུས། མ་རྒན་མས་སྐད་ཤུགས་ཆེན་པོས་ཁྱེད་རང་གིས་བུ་མོའི་འགྲམ་ནས་ངེད་གཉིས་ལ་ཁ་རྩོད་མ་བརྒྱབས་པ་ཡིན་ན་ག་འདྲ་འདུག་ཟེར་ནས་བཤད་དུས་སུ། ངའི་སྙིང་ལ་ན་ཟུག་ཞིག་སྐྱེ་རུ་བཅུགས་སོང་། རང་གི་བུ་མོའི་རྒྱབ་དུ་བླངས་ནས་སྐད་ཆ་བཤད་པ་ལས། ང་རང་གི་བསམ་ཚུལ་དེར་དྭང་ལེན་ཙམ་ཡང་མི་བྱེད་པ་མ་ཟད། ང་རང་གིས་སྟེང་དུ་གཉིས་ཀ་ཤོར་སོང་། དེ་དུས་ངས་མ་རྒན་མ་ལ་ཁྱེད་རང་གིས་རང་གི་རྒན་པོ་ལ་རང་གིས་སྡེར་མའི་ནང་གི་ཤ་དང་ལྷན་དུ་འདྲིས་པའི་ཟ་མ་སྤྲོད་ཀྱི་ཡོད་དམ་ཞེས་བཤད།

མོ་རང་ཁྲོ་བཞིན་དུ་ང་རང་ཁྱེད་གཉིས་བར་གྱི་སྐད་ཆ་མི་དགོས། ང་རང་ཁ་རོག་གེར་འཇོག་རོགས་ཟེར་ནས་རྣམ་འགྱུར་ཆེས་སྡུག་པ་ཞིག་སྟོན་ཞོར་དུ། སྡེར་མ་འཁུར་ནས་ཁྱམས་རར་བུད་ཐལ། ང་རང་གིས་དེ་ནས་ཟ་མ་ཞིག་ཚ་བོ་བཟོས་དེ་མཛའ་མོ་ལ་སྤྲོད་ཞོར་དུ། དེ་རིང་ག་རེ་རེད། ཁྱེད་དང་མ་རྒན་གཉིས་ཀྱིས་ང་རང་ལ་རྣམ་འགྱུར་མི་ལེགས་པ་དང་སྐད་ཆ་རྩུབ་པོ་རྐྱང་བཤད་དོན་གང་རེད་དམ་ཞེས་བཤད་ནས་ང་རང་ཕྱི་ལ་འགྲོ་རྩིས་བྱས་དུས་སུ། མོ་རང་གིས་ངེད་གཉིས་ཀྱིས་ཁྱེད་རང་ལ་ཁ་རྩོད་བརྒྱབས་མེད། དེ་ནི་ཁྱེད་རང་གི་རྣམ་དོག་རེད་ཟེར་ནས་རྣམ་འགྱུར་ཅུང་འཇམ་དུ་ཕྱིན་སོང་།

ང་རང་ནི་གཞན་ཁྱིམ་དུ་ཡོད་པ་མ་ཟད། གཞན་ངོ་འཚོ་བའི་སྐབས་འདི་འདྲ་ཞིག་ལ། བདེན་པའི་སྐད་ཆ་ཙམ་ཡང་གཞན་དབང་མེད་པའི་གཞན་སྐད་ཀྱི་བརྡ་སྤྲོད་འདིས་ང་རང་ལ་སེམས་པ་ཅུང་སྐྱོ་རུ་བཅུགས་སོང་། དེ་ནས་ང་རང་གིས་སྐར་མ་ཁ་ཤས་རིང་དེར་སྒོ་ཕྱི་ལ་ཐོན་ནས་སྒོ་འགྲམ་གྱི་ནགས་ཚལ་དེ་ནས་ཐ་མག་རྐང་གཅིག་འཐེན་ཞོར་དུ། དངོས་ནས་ང་རང་གིས་འདི་ནས་འདི་ལྟར་བུ་མོ་དང་སྐྱེ་ལ་རན་པའི་བུ་དེ་གཉིས་ཀྱི་གདོང་ལ་བལྟས་དེ་གཞན་གྱི་གོམ་གཤིས་སྐྱུར་མོའི་འདིའི་འོག་ནས་མི་ཚེ་སྡུག་བསྒོམ་བྱེད་དགོས་པ་ཡིན་ནམ། དེ་ལྟར་བྱས་པ་དེ་ཡིས་མ་འོངས་པའི་མི་ཚེ་ནང་དུ་ང་རང་གི་རིགས་རྒྱུད་བུ་དང་བུ་མོ་འདི་གཉིས་ཀྱི་བོད་མི་རིགས་ཀྱི་ཆེད་དུ་ལས་ཀ་འདྲ་བྱེད་པར་ཕན་ཐོག་སྲིད་དམ་སྙམ་ཞོར། ཕྱིར་མཛའ་མོའི་མ་རྒན་གྱི་ཁང་བའི་ནང་དུ་འཛུལ་བ་ཡིན།

སེམས་ལྷོད་དུ་བཞག་ནས་ཕྱིར་ནང་དུ་འཛུལ་དུས་སུ། མོ་དང་བུ་མོ། མོ་རང་གི་མ་རྒན་གསུམ་གྱིས་ཁྱམས་ར་ན་ཟ་མ་ཟ་བཞིན་ཡོད་ཀྱང་། ང་རང་ལ་སུ་གང་གིས་ཟ་མ་ཟ་དགོས་སམ་ཟེར་ནས་སྐད་ཆ་ཙམ་ཡང་དྲིས་མ་སོང་ལ། བཟང་ངན་ཡག་སྡུག་གི་སྐད་ཆ་ཚིག་གཅིག་ཀྱང་བཤད་མཁན་བྱུང་མ་སོང་། དེ་ནས་ང་རང་ལ་ཟ་མ་ཟ་དགོས་སམ་ཞེས་དྲིས་པ་ཡིན་ན། ང་རང་གིས་ནང་མི་ཞིག་གི་ཚད་དུ་བཟུང་ནས་སེམས་པ་ཅུང་དགའ་ངེས་ཡིན་མོད། དེ་འདྲའི་སྐད་ཆ་གང་ཡང་མེད་དུས། ལྷག་དུ་ཁ་ལག་ཟ་འདོད་མེད་པའི་ཚོར་བ་ཞིག་ཡོད་ཀྱང་། རང་ཉིད་ཀྱི་གཟུགས་པོའི་གནས་སྟངས། འཚོ་གནས་ཀྱི་ཕྱོགས་སུ་བསམ་བློ་ཞིག་བཏང་དུས། རྒྱང་རིང་གི་དྲིན་ཆེན་མ་ལོས་ཀྱང་གཞན་ཁྱིམ་ནས་སྡིག་པོ་གཏོང་གི་མེད་ལ། དེ་འདྲ་བྱུང་ན། དངོས་ནས་ཁག་གི་རེད་ལ། ཁྱེད་རང་གིས་བཤད་ཚུལ་ལ་བལྟས་ན་ནང་མི་དེ་དག་ཁྱེད་རང་ལ་བཟང་རབས་རྒྱན་རབས་འདུག་པ་དེ་ཡིས་སེམས་བདེ་ནས་ཡོད། ཁ་ལག་ཡག་པོ་ཟ་དགོས་པ་རེད། ཁྱེད་རང་ནི་ཤ་མ་ཟས་པར་རྒྱུན་རིང་སོང་བའི་མི་ཞིག་ཡིན་དུས་ཟ་མ་ཡག་པོ་མ་ཟས་ན་གཟུགས་པོའི་འཁྱོག་གི་མ་རེད་ཟེར་བ་དེ་དྲན་ཞོར་དུ་ཐབ་ཚང་གི་ཕྱོགས་སུ་གོམ་པ་སྤོ་བར་བརྩམས་པ་ཡིན།

འདི་ནས་བཟུང་རང་གིས་གང་ཐུབ་ཅི་ཐུབ་ཀྱི་ཁ་མི་གྲགས་པའི་རང་ལུགས་དང་། རང་གི་འདོད་ཕྱོགས་ལ་བརྩོན་པའི་སྙིང་སྟོབས་ཤིག་ཀྱང་སླེབས་སོང་། ད་ལྟའི་བར་དུ་ཚུར་ལ་བཟང་བའི་སྐོར་ལ་བསམ་བློ་བཏང་ནས། ཐ་ན་རང་གིས་གང་འདོད་པ་དེ་ཡི་སྐོར་ནས་ཉིན་གཅིག་ལ་རང་གི་འདོད་པ་ལྟར་ཕྱི་ལ་ཐོན་པ་ནི་དངོས་ནས་མེད་པ་ནས་ཡོད་པ་ཙམ་ཡིན། ད་ནས་བཟུང་། རང་གིས་འདོད་ཕྱོགས་ཀྱི་དབང་ཚད་སྐོར་ལ་ཤུགས་ཆེན་པོ་བྱེད་རྒྱུར་སེམས་ཐག་ཞིག་གཅོད་ཞོར་དུ་ཟ་མ་ཚ་བོ་བཟོས་པ་དེ་དག་ལག་དུ་བཟུང་ནས་ཅོག་རྩེ་སྒང་དུ་བཞག་ནས། མགོ་སྒུར་ནས་རང་ཉིད་གཅིག་བུའི་ཟ་ཁུལ་བྱས་པ་ཡིན།