གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། སོ་དགུ

དེང་ཐོག་ཆུ་རྐྱལ་ར་བ་ཞིག་དུ་འགྲོ་ཟེར། མེ་འཁོར་ས་ཚིགས་རྐང་གསུམ་སྤག་སྤག་ཁ་ལོ་བ་ཞིག་ལ་སྐད་ཆ་དྲིས་དུས། ས་ཁུལ་དེ་འདྲ་གཉིས་ཡོད་ཟེར། གཅིག་སྤྱི་ལེ་བཅུ་ཙམ་དང་གཞན་ཞིག་ཡོད་པ་དེར་སྤྱི་ལེ་སུམ་བཅུ་ཡོད་རབས་ཟེར། ང་ཚོ་གོང་ཚད་ཀྱི་ཐད་ནས་གྲོས་མ་འགྲིག ཁོ་མོས་ཀྱང་དེས་ན་འགྲེན་སྟོན་ཁང་དུ་འགྲོ་ཟེར། དེ་རུ་འགྲོ་བའི་རླངས་འཁོར་ཡོད་པ་རེད་ཅེས་དེབ་ནང་དུ་བྲིས་འདུག་ལ་ས་ཚིགས་ཀྱང་བྲིས་འདུག གང་ནས་རླངས་འཁོར་ཡོད་མེད་འདི་རུ་གསལ་བོ་བྲིས་འདུག ཁྱེད་ཀྱིས་རྒྱ་གར་སྐད་ཤེས་ཀི་མོད། ཁོང་ཚོར་སྐད་ཆ་དྲིས་དང་ཟེར། ངེད་གཉིས་ཀྱིས་ས་ཆ་དེ་སྐད་ཆ་དྲིས་ནས་ཡར་མར་མང་བོ་ཞིག་ལ་སོང་། ཁོ་མོས་བཤད་པའི་དེབ་ནང་གི་བྲིས་པའི་བཞི་མདོ་རྙེད་ཀྱང་། བཞི་མདོ་དེ་ནས་མིང་ཚིགས་ཤིག་བཤད་དེ་དེའི་དོན་དག་རྒྱ་གར་ཚོར་དྲིས་དང་ཟེར། ངས་རྒྱ་གར་ཞིག་ལ་སྐད་ཆ་དྲིས་དུས། དེ་ནི་བཞི་མདོའི་མིང་རེད་ཟེར་གྱི་འདུག་ཞེས་བཤད་དུས། ཁོ་མོས་དེ་ནི་མོ་རང་གི་ཤེས་ཀྱི་ཡོད་ཟེར། དེས་ན་ཁྱེད་རང་གི་ཅི་ཞིག་བཤད་འདོད་པ་ཡིན། དོན་དངོས་ལམ་ཁ་གང་རེད་ཅེས་བྲིས་འདུག་ཞེས་དྲིས་དུས། གཞུང་ལམ་ཞིག་གི་མིང་བཤད་སོང་། གཞུང་ལམ་དེའི་མིང་དྲིས་དེ་ཐང་ཆད་རེག་བར་དུ་སོང་།

རླངས་འཁོར་རྙེད་བྱུང་། ངེད་གཉིས་འགྲེམ་སྟོན་ཁང་གི་སྒོ་འགྲམ་བར་དུ་སླེབས། ཁོ་མོའི་རྣམ་འགྱུར་སྔ་ས་ནས་འགྱུར་བ་དེ་ད་དུང་ཡང་རང་ཅག་རེད་འདུག འགྲེམ་སྟོན་ཁང་དེ་ནས་ལྟད་མོ་བལྟས་ཚར་རྗེས་ཕྱིར་ལམ་དུ་འབུད་མ་ཐག་ཆར་བ་ཤུགས་ཆེན་པོ་འབབ་སོང་། ངེད་གཉིས་ཀྱི་ནང་ནས་ཁོ་མོ་རློན་པ་བཟོས། ཁོ་མོས་ཉི་གདུགས་ཆུང་ཆུང་གསར་བ་ཞིག་བཟུང་ཡོད་ཀྱང་། དེའི་སྲུང་སྐྱོབས་མ་ཐུབ། ང་རང་ལ་ཆུ་ཤོག་གི་ལྰ་བ་ཞིག་ཡོད་སྟབས་རློན་པ་མང་བོ་མ་བཟོས། ཁོ་མོའི་འཛུམ་མདངས་ད་དུང་སླར་ཡང་རྙེད་མི་འདུག ངས་ཐབས་ཤེས་ཅུང་ཙམ་ཞིག་འཐེན་ནས་ཁོ་མོའི་འཛུམ་མདངས་བསུ་ཐབས་བྱས་ཀྱང་། ང་རང་ལ་དེའི་ནུས་པ་མི་འདུག ཕྱོགས་གཞན་ནས་བཤད་ན་རང་གི་དབྱིན་སྐད་ཀྱི་ཆུ་ཚད་ཞན་པས་རེད།

རྐང་གསུམ་སྤག་སྤག་ཞིག་གི་ནང་ནས་རྡེ་ར་སྒྲོང་གི་གྲོང་ཁྱེར་ནང་དུ་ཡོང་། ཟ་ཁང་ཞིག་གི་ནང་ནས་ཟ་མ་ཟོས་རྗེས་ཁོ་མོས་ང་རང་ལ་ལྡི་ལུར་ཡོད་པའིཨ་མ་དབྱངས་ལྷ་ཁ་པར་བཏང་ནས་སོ་སྨན་པ་རེ་ངོ་ཤེས་ཀྱི་ཡོད་མེད་སྐད་ཆ་དྲིས་ཟེར་བ་ལྟར་དྲིས་ཚར་མ་ཐག ཁོ་མོས་ཁྱོད་ཀྱིས་ཅི་ཞིག་ལ་ཁ་པར་ཨང་གྲངས་མ་བླངས་པ་ཡིན་ནམ་ཟེར། སྐད་ཆ་དེ་ལས་འཕྲོས་པའི་ཁོ་མོ་ཁོང་ཁྲོ་བླངས་དེ། ཁྱེད་རང་གི་བསམ་པ་ལྟར་བྱོས། ངས་ཤེས་ཀྱི་མེད། གལ་ཏེ། ཨེས་སུ་རལ་དུ་སླེབས་ན་ཁྱེད་རང་གི་སོ་ན་བའི་ཚེ་ན་སོ་བརྗེ་བོ་རྒྱགས་དགོས་བྱུང་ན་ཨ་སྒོར་སྟོང་ཕྲག་ཁ་ཤས་ཤིག་གནས་ངེས་ཡིན་སྟབས། ང་རང་ལ་དེའི་འགྲོ་སོང་གཏོང་བསྐྱེད་མེད་ཟེར། ངས་མི་སྐྱོན། ང་རང་གི་སོ་ད་དུང་ན་མི་སྲིད། སེམས་འཁྲལ་མ་བྱེད་ཅེས་བཤད་པ་ཡིན།

ཀ་ལི་མིན་གྲོང་དུ་ཡོང་བའི་ལམ་ཁར་གྲོགས་སངས་རྒྱས་དང་ཐུག་ནས་ཁོས་ངེད་གཉིས་དགོང་མོའི་ཟ་མ་ཟ་རུ་ཡོང་བར་མགྲོན་དུ་བོས། ཁོ་མོ་དྲ་ཁང་ཞིག་གི་ནང་དུ་འཛུལ་སོང་། ང་རང་རྗེས་སུ་སོང་དེ་མོ་རང་ལ་སྐད་ཆ་ཞིག་དྲིས་དུས། ཁྱེད་རང་གི་འདོད་པ་བྱོས་ཟེར། ངས་མོ་རང་ལ་ཁྱེད་རང་ཆུ་ཚོད་ག་ཚོད་ཅིག་ལ་དྲ་ཁང་དུ་འདུག་རྒྱུ་ཡིན་ནམ་ཟེར་ནས་དྲིས་དུས། ངས་མི་ཤེས་ཟེར། དེས་ན་ངས་ཁྱེད་རང་ལ་མགྲོན་ཁང་ནས་སྒུག་འདུག་ཞེས་བཤད་དེ་ང་རང་མགྲོན་ཁང་དུ་ཡོང་ནས་དེབ་ཀློག་ནས་ཁོ་མོ་ཡོང་རྒྱུར་སྒུག་ནས་བསྡད་པ་ཡིན། ༢༤།༠༨།༠

རྡེ་ར་སྒྲོང་ནས་ཆུ་ཚོད་གཅིག་གི་རྗེས་སུ་ཆུ་རྩེད་ར་བ་ཆེན་པོ་ཞིག་གི་ནང་དུ་འབྱོར། ཕྱི་དྲོ་ཆུ་ཚོད་ལྔ་བ་མ་ཟིན་བར་དུ་ཆུ་རྩེད་ར་བ་དེ་ནས་དུས་ཚོད་བསྐྱལ། ཆུ་ཚོད་བདུན་པའི་སྟེང་དུ་བཀྲིས་འཁྱིལ་མགྲོན་ཁང་གི་ནང་དུ་བཅོལ་ཡོད་པའི་རྒྱབ་ཁུག་བླངས་དེ་ཕྱིར་རྡེ་ར་སྒྲོང་གྲོང་ཁྱེར་དུ་ཡོང་། རྒྱ་གར་ཇ་ཁང་ཞིག་གི་ནང་དུ་ཆར་བ་འབབ་མཚམས་འཇོག་རྒྱུར་སྒུག་ཞོར་དུ། ཇ་དང་ཆུ། སྟངས་བདེ་ཐུག་པ་བཅས་འཐུང་རྗེས། རྡེ་ར་སྒྲོང་ནས་ལྡི་ལུར་བསྐྱོད་པའི་མེ་འཁོར་ནང་དུ་འཛུལ། མེ་འཁོར་ཆུ་ཚོད་དགུ་བའི་སྟེང་གི་མེ་འཁོར་ཡིན་ཡང་། འགྲོ་འགོ་འཛུགས་དུས་ཆུ་ཚོད་དགུ་དང་སྐར་མ་བཞི་བཅུ་ཞེ་ལྔ་ཟིན་འདུག སང་ཞོགས་ལྡི་ལུར་འབྱོར་ན་ཡང་ལས་ཀ་ཞིག་ཡོད་པ་ནི། གཉེན་རྟོག་པའི་ལས་ཁུངས་ཞིག་གི་ནང་ནས་རྒྱབ་གཉེར་ཡི་གེ་ཞིག་ལེན་ཐུབ་བྱེད་དགོས་པ་དེར་བསམ་བློ་གཏོང་ཞོར་ཉལ་ས་བཟོས་པ་ཡིན། ངའི་ཉལ་སའི་ཨང་གྲངས་བཞི་བཅུ་ཞེ་བདུན་རེད། ང་རང་ཉལ་རྩིས་བྱེད་པའི་སྐབས་སུ་རྒྱ་གར་ཕོ་གསར་ཞིག་གིས་ང་རང་ལ་སྐད་ཆ་འདྲ་མིན་ཞིག་དྲིས་དེ་ང་རང་ལ་སུན་སྣང་ཅུང་ཙམ་བཟོས་སོང་། བར་སྐབས་ཤིག་ལ་ངས་ལན་ཅི་ཡང་མ་ལོག་པར་ཡི་གེ་ཞིག་བྲིས་དེ་བསྡད་དུས། རྒྱ་གར་ཕོ་གསར་དེ་བྱིན་སོང་། ཨ་རོགས་ཞི་མོ། དགོང་མོ་བདེ་ལགས། ༢༦།༠༨།༠༨

ལྡི་ལུར་འབྱོར་ནས་ཉིན་མ་འདི་དག་གི་རིང་དུ་ལས་ཀ་དམིགས་བསལ་གང་ཡང་བྱེད་མ་ཐུབ་པར་ལུས། ཡིན་ཡང་། ཁ་སང་ཞོགས་པ་སོ་སྨན་པ་ཞིག་གི་སར་སོང་ནས་ངའི་སོ་གཙང་མ་ཐེངས་ཤིག་བཟོས་པ་དེར་ཧིན་སྒོར་ཉིས་སྟོང་སྤྲད་པ་ཡིན། ད་དུང་སོ་ཚབ་གཉིས་འཛུག་རྒྱུའི་སྐད་ཆ་བཤད་དུས། ཧིན་སྒོར་སྟོང་ཕྲག་ཉེར་བཞི་དགོས་རབས་ཟེར། ཁོ་མོའི་སེམས་ཐག་གཙང་བཅད་ཀྱིས་ང་རང་གི་སོ་ཚབ་གཉིས་འཛུགས་ཆེད་དུ་ཧིན་སྒོར་སྟོང་ཕྲག་ཉེར་བཞི་སྤྲོད་རྩིས་ཀྱི་འཆར་གཞི་འདུག དེ་ནས་ངེད་གཉིས་ཀྱིས་ཡར་མར་གྱི་སོ་སྨན་པ་ཁ་ཤས་ལ་འབྲེལ་བ་བྱས་རྗེས་སུ། ད་གཟོད་ལྡི་ལི་ནས་སོ་ཚབ་བརྗེ་བ་ལས་རྡ་རམ་ས་ལ་ཤོད་དུ་གོང་ཁེ་བ་ཡོད་པ་ཤེས་སོང་།

ཕྱི་དྲོ་ངེད་གཉིས་ལྡི་ལུར་ཡོད་པའི་ཕོ་བྲང་དམར་པོའི་འགྲམ་གྱི་ཁ་ཆེ་ལྷ་ཁང་རྙིང་བ་དེའི་ནང་དུ་ལྟ་སྐོར་ལ་བྱིན། ཁ་ཆེ་ལྷ་ཁང་དེར་འགྲོ་བ་ལ་བུད་མེད་དག་གིས་ཁ་ཆེ་བའི་ལུགས་སྲོལ་བརྩི་བཀུར་བྱེད་པའི་ཆེད་དུ་དོར་མ་རིང་བོ་དང་མགོ་རས་སོགས་གྱོན་དགོས་ཀྱི་འདུག མོ་རང་གིས་སྒོ་འགྲམ་གྱི་གླ་གཏོང་བར་སྒུག་བཞིན་པའི་དོར་མ་རིང་བོ་ཞིག་དང་མགོ་རས་ཤིག་གླས་སོང་།

དེ་རིང་ཆུ་ཚོད་བཅུ་གཉིས་བར་དུ་ཉལ། ཡར་བླངས་པ་དང་ལྡི་ལུ་ན་སྙན་གྲགས་ཆེ་བའི་ལོ་གྲེས་སྐྱེད་ཚལ་དུ་ཡོང་། ལོ་གྲེས་སྐྱེད་ཚལ་གྱི་ཟ་ཁང་ནི་ཧ་ཅང་སྤུས་གཙང་རེད་འདུག་མོད། ནང་གི་ཟས་རིན་དང་ཆང་རིན་ནི་ཧ་ཅང་གི་གོང་ཆེན་ཤ་སྟག་རེད། ངེད་གཉིས་ཀྱིས་ཟ་མ་གཅིག་བསྔགས་དེ་ཁོ་མོའི་དེབ་བཀླགས་པ་དང་ང་རང་གིས་ཡར་བལྟ་མར་བལྟ་རེ་བྱེད་ཞོར་དུ་ལོ་གྲེས་སྐྱེད་ཚལ་ནང་གི་ཁ་ཆེའི་མི་རིགས་ཀྱི་ཤུལ་བཞག་དང་ཁང་རྙིང་དེ་དག་བསྐོར་ལ་བསམ་གཞིག་བྱས་པ་ཡིན།

ང་རང་གི་དྲན་ཚུལ་ཡིན་ན། ལོ་ངོ་དྲུག་བརྒྱ་ལྷག་གི་ཡར་སྔོན་དུ། ལྡི་ལི་གྲོང་ཁྱེར་གྱི་ཁོར་ཡུག་འདི་ནི། ཁ་ཆེའི་ཡུལ་གྲུ་ཆེན་མོ་ཞིག་ཡིན་པ་འདྲ་སྙམ་པའི་ཚོར་སྣང་སྤྲད་སོང་། སྐབས་དེར་ངེད་གཉིས་ཀྱི་བསྔགས་པའི་ཤ་མོག་གི་ཁ་ཟས་དེ་སླེབས་སོང་། ཡིད་མི་ཆེས་པ་ཞིག་ལ་ཤ་མོག་རྐང་གཅིག་གི་རིན་དུ་ཧིན་སྒོར་ལྔ་བཅུ་གནས་འདུག འདི་ནི་ང་ཡི་རྡ་ས་མེག་ལོར་གྱི་ཉིན་གཅིག་གི་ལས་གླ་རེད། གནམ་ས་ལྟ་བུའི་བར་ཁྱད་ཆེ་བའི་མིའི་རིགས་ཀྱི་འཚོ་བ་བསྐྱེལ་ལུགས་འདིས། མི་དབུལ་བོ་མང་བོ་ཞིག་མི་རབས་ནས་མི་རབས་ལ་དབུལ་བོར་གནས་སུ་འཇུག་བཞིན་ཡོད།

ད་དུང་། རྩིས་རྒྱགས་པའི་སྐབས་སུ་ཟ་ཁང་དེའི་ཟས་རིན་ལས་བརྒལ་བའི་ཁྲལ་ཞིག་ཟས་ཐོའི་བྱུང་འཛིན་སྟེང་དུ་བྲིས་འདུག གངས་དཀར་ལྷ་མཚོས་དེའི་སྐོར་གྱི་སྐད་ཆ་ཞིག་ལས་ཀ་བ་ཞིག་ལ་དྲིས། ངས་ཕྱི་ལོག་དུ་སླེབས་མ་ཐག ཁོ་མོ་ཁྱེད་ཀྱིས་དེའི་རྒྱུ་མཚན་འདྲི་འདོད་ན་ནི་འདྲི་ས་སྤྱིན་བདག་ཡིན་པ་ལས་ལས་ཀ་བ་མ་རེད་ཅེས་བཤད་པ་ཡིན། ༢༩།༠༨།༠༨

མི་རིང་བར་ང་རང་ཕྱི་ལ་ཐོན་ནས་འགྲོ་མཁན་ཞིག་ཡིན་དུས། མོ་རང་གིས་ང་རང་གི་ནུ་མོ་གུང་གསེང་དུ་ཉིན་ཁ་ཤས་ཤིག་ལ་བླངས་དེ་ཚུར་བསུས་ན་འགྲིག་གི་ཡོད་རབས་བཤད་པ་མོས་མཐུན་བྱུང་བ་ལྟར། ང་རང་སྔ་བོ་ནས་ཡར་བླངས་དེ། མ་ཅང་ཀྲེ་ལའི་རླངས་འཁོར་འབབ་ཚིགས་ཤིག་ཡོད་པ་དེ་ནས་ནུ་མོ་ཡོང་བར་ཆུ་ཚོད་གཉིས་ལྷག་གི་རིང་དུ་སྒུག

རྡ་ས་ན་ཡོད་པའི་གྲོགས་པོ་དག་གི་རོགས་རམ་འོག ཁོ་མོ་སློབ་གྲྭ་ནས་གུང་གསེང་དུ་བླངས། དེ་ནས་ལྡི་ལུར་ཡོང་བའི་རླངས་འཁོར་དུ་བཞག་ཡོད་པ་རེད། ནུ་མོ་ཁྲིད་ནས་མགྲོན་ཁང་དུ་སོང་ང་ཚོ་ཕན་ཚུན་སླར་ཡང་མཇལ་མཛོམས་བྱུང་བ་དེར་དགའ་བོ་བྱུང་ཟེར་ནས་མོས་ཀྱང་བཤད། ང་རང་དངོས་ནས་རང་གི་ནུ་མོ་དང་ཐུག་པ་དེར་དགའ་ནས་ཡོད། ངེད་གསུམ་གྱིས་ཞོགས་ཟས་ཟོས་རྗེས་སུ། ཆུ་རྩེད་ར་བར་སོང་། མེ་ཏོག་པདྨའི་ལྷ་ཁང་གསར་བ་དང་། ཧིན་རྡིའི་ལྷ་ཁང་། ད་དུང་ཚོང་ཁང་ཞིག་གི་ནང་དུ་ཆུ་ཚོད་གསུམ་ལྷག་རིང་བསྡད། འདི་ལྟར་ཉིན་མ་འདི་ཚོ་ནི་གར་སོང་ཆ་མེད་དུ་གྱུར། སང་ཞོགས་སྔ་བོ་ནས་བླངས་དེ་འགྲོ་དགོས། ༠༡།༠༩།༠༨

ལྡི་ལུ་ནས་ང་རང་གི་ནུ་མོ་གུང་གསེང་དུ་བླངས་ནས། ཉིན་གཉིས་ཀྱི་རིང་འདི་ལ་ཆུ་རྩེད་རྭ་བ། སྙན་གྲགས་ཅན་གྱི་རྒྱ་གར་གྱི་ཁ་ཆེ་བ་དག་གི་བརྩིགས་པའི་ཕོ་བྲང་རྙིང་བའམ་རོ་ཁང་ཏ་ཇའི་མལ་སོགས་ལ་ལྟ་སྐོར་ལ་སོང་བ་ཡིན། ཁ་སང་ཕྱི་དྲོ་བྲེལ་འཚབ་དང་བཅས་ཕྱིར་རྡ་སར་ཡོང་དགོས་བྱུང་། རླངས་འཁོར་འགྲོ་བཞིན་འདུག གངས་དཀར་ལྷ་མཚོས་ང་ལ་རྙོག་དྲ་བཤད་འགོ་བཙུགས། ང་རང་ལ་གཅིན་གཏོང་རྒྱུ་ཡོད་ཟེར་བ་དང་། ངས་ཆུ་ཚོད་མང་བོ་རིང་དུ་བསྲན་ཐུབ་དཀའ་རྒྱུ་རེད་སོགས་བཤད་དེ་ང་རང་ལ་སུན་པོ་བཟོས་ཀྱང་། ངས་བཟོད་བསྲན་བྱས་དེ་བསྡད་པ་ཡིན། དགོང་མོ་ཟ་མ་ཟ་ས་ནས་འགོ་བཙུགས་དེ་རྣམ་འགྱུར་ཡག་པོ་ཞིག་སྟོན་གྱི་མི་འདུག་གྱང་། ང་རང་ཁ་རོག་གེར་ཡོང་བ་ཡིན།

ཞོགས་པ་རྡ་ས་མེག་ལོར་དུ་འབྱོར་ནས་མགྲོན་ཁང་སྔོན་ཆད་བསྡད་མྱོང་ས་ཞིག་དུ་འདུག་རྒྱུའི་ཐད་བཅད་སོང་མོད། འོན་ཀྱང་། སྐར་མ་ཁ་ཤས་ཀྱི་རྗེས་སུ་ཁོ་མོ་དེ་ནས་འདུག་འདོད་མེད་རབས་བཤད་སོང་། རྒྱུ་མཚན་ནི་ཁང་བ་འདི་ལ་སྨུག་དྲི་ཁ་བོ་འདུག་ཟེར། དེ་དུས་ངས་ངེད་གཉིས་སྔོན་ཆད་ཟླ་གཉིས་ལྷག་གི་རིང་དུ་བསྡད་དུས་ཀྱི་སྨུག་དྲི་ཁ་བ་དེ་དག་བརྗེད་ཆེ་ཡོད་ཅེས་དྲིས་དུས། བརྗེད་སོང་བ་རེད། དེས་ན་ཞོགས་པ་འདིར་སླེབས་དུས་སུ་ཉལ་ཁྲི་གཞན་ཞིག་འཁུར་ཤོག་ཞེས་བཤད་དུས་ཀྱང་མ་དྲན་པ་ཆེ་ཡིན་ཞེས་བཤད་ཀྱང་མོ་རང་གིས་རང་སྐྱོན་ཏུལ་འབྲུ་ཙམ་ཡང་ངོས་ལེན་མི་བྱེད་པར། ང་རང་ལ་ཁྱེད་ཀྱིས་བྱེད་སྟངས་འགྲིག་གི་མི་འདུག་ཟེར། ང་རང་ལ་མི་འགྲིག་ས་ཡོད་དང་ཡོད། ཡོད་ཁོ་ཐག་ཡིན་ནི་རེད། འོན་ཀྱང་། ཁོ་མོའི་དབྱར་ཁའི་གནམ་གཤིས་ལྟ་བུའི་འགྱུར་ལྡོག་རྒོད་པའི་གཤིས་ཀ་དེ་ཡི་ང་རང་ལ་ཅུང་ཙམ་དཀའ་ལས་སྤྲོད་ཀྱི་འདུག་མོད། ཡིན་ཡང་། ཁོ་མོའི་ད་ལྟའི་བར་དུ་ང་རང་གི་ཆེད་དུ་བཏང་བའི་འགྲོ་སོང་བསམ་ན། དོན་དག་ཅི་ཞིག་བྱུང་ཡང་། ངོས་ཁོ་མོར་ཁ་གསབ་བྱེད་དགོས། འདི་ནི་ང་རང་གི་དྲིན་ལན་མཇལ་འདོད་ཀྱི་བསམ་བློ་གཏོང་ཕྱོགས་ཤིག་ཡིན།

ཁོ་མོས་ངས་ཁྱེད་རང་ཡག་པོ་ཞིག་མཐོང་གི་མི་འདུག་ཟེར། དེ་ལ་ལན་ཞིག་འདེབས་རྒྱུ་འདུག་ན་ཡང་། ཚིག་ཇེ་མང་དང་རྙོག་དྲ་ཇེ་མང་ལ་བཏང་བ་ལས་མི་འདུག་བསམ་ནས་ང་རང་ཁ་རོག་གེར་བསྡད་པ་ཡིན། ང་དང་ནུ་མོ་ངེད་གསུམ་ཞོགས་ཇ་ཟ་རུ་སོང་། སྤྲག་ཁང་ནས་ང་རང་ལ་དགོས་པའི་ཡི་གེ་ཞིག་འབྱོར་དགོས་པ་དེ་འབྱོར་མེད་པ་ཤེས་རྗེས་སུ། ངེད་གཉིས་སོ་སྨན་པའི་གམ་དུ་བཅར་བ་ཡིན། ང་རང་གི་སོ་ཚབ་བཟོ་བར་ཧིན་སྒོར་ཁྲི་གཅིག་ལྔ་སྟོང་སྤྲོད་རྒྱུ་བྱས་པ་ཡིན། ཆུ་ཚོད་གཉིས་ལྷག་གི་རིང་དུ་ང་རང་གི་ཁ་ནང་དུ་འཕྲུལ་ཆས་ཀྱི་ལམ་ནས་སོ་ལས་བྱས་སོང་། སོ་ཚབ་སང་ཉིན་ཕྱི་དྲོ་འཛུགས་རྒྱུའི་ཁ་ཆད་གནང་སོང་།

ཕྱི་དྲོ་དག་ཞིང་ཟ་ཁང་གི་ལས་རོགས་ཚོ་དང་ཐུག་ནས་སྐད་ཆ་ཕྲན་པུ་ཞིག་བཤད་དེ་ང་ཚོའི་ལྷན་གཅིག་དུ་ཟ་མ་ཞིག་ཟ་རྒྱུའི་སྐོར་གླེང་བ་ཡིན། དགོང་མོ་དེར་དཀོན་མཆོག་བསྟན་འཛིན་དང་ངའི་ནུ་མོ་ལྷ་མོ་སྐྱིད་ང་ཚོ་བཞིའི་དགོང་ཟས་ཤིག་མཉམ་དུ་ཟས་པ་ཡིན། སྒོར་མོ་དེ་དག་ནི་མོ་རང་གི་བསགས་པའི་སྒོར་མོ་ཡིན་ན་ཡང་། སྐབས་དེར་མོ་རང་གི་སྒོར་ཁུག་ངའི་ལག་པར་བཞག་ཡོད། དངུལ་ཁུག་ནས་སྒོར་ག་དུས་རྫོགས་ན་དེ་དུས་མོ་རང་གིས་དངུལ་འདྲེན་སྒམ་ཆུང་ནས་ཕྱི་ལ་ལེན་བཞིན་ཡོད་པ་རེད།

མཚམས་མཚམས་སུ། ང་རང་དངོས་ནས་གངས་དཀར་ལྷ་མཚོས་བྱེད་སྟངས་ལ་སྙིང་རྗེ་ཡི་འདུག ངོ་མ་བྱིས་པ་ཞིག་དང་འདྲ། དགའ་དགོད་གཉིས་ཀ་ལས་སླ་བོ་འདུག གང་ལྟར། ཁོ་མོས་ང་རང་གི་ཆེད་དུ་བཏང་བས་འགྲོ་གྲོན་ནི་ཉུང་ཉུང་ཞིག་གཏན་ནས་མིན། ངས་དེ་ལ་བསམ་ཤེས་དང་བརྩི་བཀུར་ལོས་བྱེད། ༢།༩།༠༨

ང་ཚོ་གསུམ་སྤག་སོས་གཙང་འགྲམ་དང་སྤག་སོས་ནང་གི་ཚོང་ཁང་དང་ཟ་ཁང་མང་བོ་ལ་སོང་། ངས་ད་གཟོད་གངས་དཀར་ལྷ་མཚོ་ལ་དམིགས་བསལ་གྱི་རང་ཤེད་ཚ་བོ་ཞིག་ཡོད་པ་ཤེས་སོང་། རྒྱུ་མཚན་ནི་མོ་རང་གི་སྣང་བར་འགྲོ་བ་དེ་ནི་བདེན་པར་བརྩི་བ་དང་མོ་རང་གི་སྣང་བར་མ་འགྲོ་བ་དེ་ནི་བདེན་པ་མེད་མཁན་དུ་བསམ་གྱིན་འདུག བྱེད་སྟངས་འདིས་ང་རང་ལ་དམིགས་བསལ་གྱིས་ཚོར་བ་ཁ་ཤས་ཤིག་བསྐྲུན་གྱིན་འདུག

འདང་དགོང་ང་རང་ལ་ཁྱད་དུ་འཕགས་པའི་རྨི་ལམ་ཁ་ཤས་ཤིག་བྱུང་། རྨི་ལམ་དང་བོ་ནི་༧རང་གི་རྩ་བའི་བླ་མ་དང་མཇལ་ནས་གངས་དཀར་ལྷ་མཚོ་བོད་དུ་ང་རང་གི་ཕ་མ་གཉིས་དང་ལྷན་དུ་འདུག་པ་དང་། གངས་དཀར་ལྷ་མཚོ་ཡིན་ཟེར་བའི་བུད་མེད་གཞན་གཉིས་ཀྱིས་ང་རང་ལ་བར་ཆད་བྱེད་ཀྱི་འདུག སྐར་ཆ་ཁ་ཤས་ཀྱི་རྗེས་སུ་ངས་གངས་དཀར་ལྷ་མཚོ་བརླག་སོང་ལ། ང་རང་ཕ་མ་གཉིས་ཀྱི་ལྷན་དུ་འདུག་པ་དང་། ངས་གྲོགས་པོ་ཁ་ཤས་ལ་གངས་དཀར་ལྷ་མཚོ་འཚོལ་རོགས་བྱེད་རྒྱུར་འབོད་སྐུལ་བྱེད་ཀྱི་འདུག རྨི་ལམ་གསུམ་པ་ངས་ནམ་ཡང་རྨིས་མ་མྱོང་བ་དང་གློག་བརྙན་དང་ཡང་ན་གཏན་དུ་མཐོང་མ་མྱོང་བ་ཞིག་རེད། དུག་ས