གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་ལྔ།

ཉིན་བཀང་བོར་ནང་གི་ཕྱི་ལོག་དུ་མ་སོང་བར་ནང་ནས་ཟས་ཐོའི་གསར་བའི་སྐོར་ཞིག་གློག་ཀླད་ཀྱི་སྟེང་ནས་ཁོ་མོ་དང་མཉམ་དུ་ལས་ཀ་བྱེད་ཁུལ་བྱས། ཞོར་དུ་རྒྱ་གར་དུ་ཡོད་པའི་གྲོགས་པོ་ཁ་ཤས་ཤིག་ལ་གློག་འཕྲིན་བཏང་ནས་རང་ཉིད་བདེ་མོ་ཡིན་སྐོར་བྲིས། མི་ཞིག་ཉིན་བཀང་བོར་བསམ་རྒྱུ་དྲན་རྒྱུ་མང་བོ་མེད་པར། ཁུ་སིམ་མེར་འདུག་མཁན་གྱི་མི་ནི་དེ་རིང་གི་ང་རང་ཡིན།

ངས་རང་ཉིད་ཀྱི་ཚོད་ཀྱི་མི་ལོ་གང་མང་རིང་དུ་བསམ་བློ་མང་བོ་བཏང་བ་ཡིན་ལ། དྲན་རྒྱུ་ཡང་ཧ་ཅང་རྒོད་པོ་ཡོད་མཁན་གྱི་མི་ཞིག་བྱེད་མྱོང་ཡོད། ཡིན་ཡང་། ལོ་ངོ་དུ་མའི་ཡར་སྔོན་ནས་བཟུང་ང་རང་ལ་དམིགས་བསལ་གྱི་ཚོར་བ་ཞིག་སླེབས་པ་དང་རྙེད་པ། ཅི་ཞིག་རྟོགས་རྗེས་ཀྱི་ང་རང་ནི་ཧ་ཅང་ཁུ་སིམ་མེར་བསྡོད་ཐུབ་མཁན་གྱི་མི་ཞིག་དུ་གྱུར་བ་ཡིན། དེ་ནས་བཟུང་ང་རང་གིས་ཨ་རག་དང་སྤི་རག་གཏན་སྤངས་བྱས་པ་རེད། དེ་ནི་ང་རང་གི་མི་ཚེའི་ནང་གི་དཀྱོགས་མཚམས་གལ་ཆེན་ཞིག་ཀྱང་ཡིན། དེ་ནས་བཟུང་རང་ཉིད་ཀྱིས་རང་ཉིད་ལ་སེམས་གསོ་ཅུང་ཙམ་རེ་གཏོང་ཐུབ་པ་དང་གཟབ་གཟབ་བྱེད་ཐུབ་ལ། བཟོད་བསྲན་གྱང་སྔར་ལས་མང་བོ་ཞིག་བརྟེན་ཐུབ་ཀྱི་འདུག་པའི་ཚོར་སྣང་བྱུང་། དེ་དག་གི་རྒྱུ་མཚན་གྱིས་ང་རང་དེང་སྐབས་ས་ཆར་གང་དུ་སླེབས་ཀྱང་། རང་ཉིད་ནི་གཞན་ཡུལ་ཞེས་པའི་ཚོར་སྣང་སྐྱོ་བོ་དེ་འདྲ་ཤུགས་ཆེན་པོ་ཡོང་གི་མི་འདུག་པ་དང་། མི་དང་མིའི་རིགས་ཀྱི་བདེ་སྡུག་འདྲ་མཉམ་དུ་བལྟ་ཐུབ་ཀྱི་འདུག ཡིན་ཡང་། ང་རང་ལ་ཚོར་བ་ཡོད།

ང་རང་ལ་སྨྱུ་གུ་ཡོད། ང་རང་ལ་འབྲི་ཤོག་ཡོད། ང་རང་ལ་དུས་ཚོད་ཡོད། དོན་དངོས་ཐོག་ང་རང་ས་མཐའ་རྒྱལ་ཁབ་གཞན་ན་ཡོད། གཞན་ཡུལ་ན་མྱ་ངན་ལྕི་རབས་ཟེར། སྡུག་བསྔལ་ཆེ་རབས་གླེང་། དཀའ་ལས་ཁག་རབས་བཤད། ཡིན་ཡང་། ད་ལྟའི་འཆར་ང་རང་ལ་ཚོར་བ་དེ་དག་གི་གང་ཡང་མེད་པ་ཅི་རེད། ང་རང་ནི་ངོ་མ་གསོན་པོ་ཡིན་ནམ། ངོ་མ་ང་རང་ནི་རྒྱལ་ཁབ་མེད་པ། རང་དབང་མེད་པ། ལས་ཀ་མེད་པའི་མི་ཞིག་ཡིན་ནམ། ང་རང་ལ་འདི་དག་གི་བཙན་འཛུལ་གྱི་ཚོར་བ་གང་ཡང་མེད་པ་རེད་དམ་ཞེས་ངས་སུ་ཞིག་ལ་བགྲོ་གླེང་བྱེད། བོད་མི་ཞིག་ལ། ཡང་ན་མི་རིགས་གཞན་ཞིག་ལ། སྐད་རིགས་ཅི་ཙམ་གྱིས་སྟེང་ནས་ངས་གོ་བརྡ་སྤྲོད་ཐུབ་ངེས། རྒྱལ་ཁབ་འདི་ལ་འབྱོར་ནས་ཉིན་མ་བཅུ་དྲུག་ལྷག་འདས་ཀྱང་། བོད་སྐད་བཤད་ས་མེད་པ་དང་བོད་མི་གཅིག་གྱང་མཐོང་མི་ཐུབ་པའི་སྐབས། ང་རང་ལ་དངོས་ནས་ཚོར་བ་གཞན་ཞིག་ཡོད་ན་རེད། འོན་ཀྱང་། ང་རང་ལ་་་་་་་              ༢༣།༩།༠༨

འདྲ་དཔར་ཁ་ཤས་ཤིག་རྒྱང་རིང་ཕ་ཡུལ་བོད་དུ་འཚོ་བའི་ནང་མི་ཚོར་སྤྲག་ཁང་བརྒྱུད་བཏང་བ་ཡིན། རང་ཉིད་ནི་བདེ་ཐང་ཡིན་པའི་བདེན་དཔུང་དང་གཞན་ཡུལ་ཞིག་ན་ཡོད་པའི་ཁུལ་གྱི་ངོ་སྤྲོད་དུ་ཟེར་ན་འགྲིག་གི་ལོས་ཡོད། ང་ཚོ་གསུམ་གྱིས་དགོང་ཟས་ཟ་སྐབས་སུ་འཛམ་གླིང་གི་རྒྱལ་ཁབ་དང་རྒྱལ་ཁབ་བར། ཆོས་ལུགས་དང་མི་རིགས་བར་གྱི་དཀའ་རྙོག་བསྐོར་གླེང་། ལྷག་པར་རང་ཉིད་འོང་སའི་བོད་ཀྱི་འཚོ་བའི་སྐོར་དང་རྒྱ་བོད་བར་གྱི་བྱུང་རིམ་དང་བོད་ནང་གི་ད་ལྟའི་གནས་ཚུལ་རང་ཉིད་ལ་གང་ཆ་རྒྱུས་ཡོད་པ་དེ་དག་ཞིབ་དུ་གླེང་། གངས་མཚོའི་ཨ་མས་བཤད་ན་ན་གཞོན་གྱི་བསམ་བློ་ནི་ངར་ཤུགས་ལྡན་པ་ཞིག་ཡིན་དུས། དམག་འཁྲུགས་བྱེད་འདོད་ཡོད་ལ། ལོ་ན་བགྲེས་པོ་ཚོ་ཉམ་མྱོང་མང་བོ་ཞིག་བརྒྱུད་སྟབས། དམག་རྒྱག་རྒྱུར་ཧ་ཅང་ཐང་ཆད་ཡོད་པ་རེད་ཟེར། ངས་བསམ་ཚུལ་དེར་ངོས་ལེན་མ་བྱས་པའི་རྒྱུ་མཚན་ཁ་ཤས་ཤིག་མོ་རང་ལ་དྲངས་པ་ཡིན།

མོ་རང་གི་ཨ་མས་ང་རང་ལ་རྒྱལ་ཁབ་འདིར་འབྱོར་ནས་དམིགས་བསལ་གྱི་ཚོར་བ་དང་བསམ་ཚུལ་འདྲ་འདུག་གམ་ཟེར། ངས་ང་རང་འདིར་སླེབས་ནས་ཉིན་གྲངས་བཅུ་ཕྲག་གཅིག་ལྷག་ལས་འགྲོ་ཡི་མེད་ལ། ང་རང་དང་འཕྲད་པའི་མི་རྣམས། ནང་མི་དང་ཉེ་འབྲེལ། མོ་རང་གི་གྲོགས་པོ་དང་གྲོགས་མོ་ཁ་ཤས་ཤིག་ཡིན་སྟབས། ང་རང་ལ་ཚོར་བ་སྐྱེན་་པོ་དེ་འདྲ་གང་ཡང་མི་འདུག་ལ། རང་གི་ནང་དུ་འབྱོར་བ་ལྟ་བུའི་ཚོར་བ་འདུག གཅིག་བྱས་ན་ང་རང་ཕྱི་ལོག་གི་མི་དང་ཐུག་འཕྲད་མ་བྱས་སྟབས་ཡིན་སྲིད་པ་རེད། གལ་ཏེ། ང་རང་ག་དུས་ནས་ཕྱི་ལོག་གི་མི་གསར་བ་དང་འགྲོག་འགོ་བཙུགས་དུས་སུ། མི་གསར་བ་དང་སྐད་ཡིག་གསར་བ། གོམ་གཤིས་གསར་བ་དེ་དག་གི་རྐྱེན་པའི་ང་རང་ལ་དཀའ་ངལ་དང་ཚོར་བ་མི་འདྲ་བ་རེ་ཏན་ཏན་ཡོང་སྲིད་པ་རེད་ཅེས་བཤད་པ་ཡིན། ༢༦།༩།༠༨

ཁ་སང་ཕྱི་དྲོ་གངས་མཚོ་ངེད་གཉིས་རྗོ་སུ་ལམ་ནས་ལམ་དུ་བུད། ཁོ་མོའི་གྲོགས་དང་གྲོགས་མོ་མི་ཉུང་བ་ཞིག་རྒྱལ་ཁབ་འདིའི་འཐུང་ཆུ་ཡི་འབྱུང་ཁུངས། མཚོ་ཞིག་ཡོད་པ་དེ་ཡི་མིང་ལ་ཁས་ན་ཝེས་ཀྲི་ཟེར་གྱི་ཡོད་ལ། མཚོ་དེ་ལ་ཚ་མེད་དུས། རྒྱལ་ཁབ་འདིའི་མི་དམངས་ཀྱི་འཐུང་ཆུ་ཡིན། ལྷག་པར་དུ་མཚོ་མཐའ་དེ་རུ་སྤྲོ་སྐྱིད་གཏོང་མཁན་གྱི་མི་ཡང་མི་ཉུང་བ་ཞིག་ཡོད་ལ། ཆེད་དུ་སྐུ་མགྲོན་དག་གི་ཆེད་དུ་བཟོས་པའི་མགྲོན་ཁང་དང་ཟ་ཁང་ཡང་ཆེས་མི་ཉུང་བ་འདུག ད་དུང་། འགྲམ་དེར་གྲོང་ཁྱེར་ཞིག་ཡོད་ལ། དེ་ཡི་མིང་ཀྲེ་སྤས་རས་ཡ་ཟེར་གྱི་ཡོད། ངེད་གཉིས་ཁས་ན་ཝེས་ཀྲི་ལ་ཐོན་དུས། ཁོ་མོའི་གྲོགས་དང་གྲོགས་མོ་དག་གིས་ངེད་གཉིས་ལ་སྒུག་ནས་འདུག

ངེད་གཉིས་དེར་སླེབས་དུས་མཚན་མོའི་ཆུ་ཚོད་དགུ་དང་ཕྱེད་རེད། ཁོང་ཚོས་ང་རང་སླེབས་ནས་དགོང་ཟས་བཟོ་རྒྱུར་སྒུག་འདུག ངས་ངེད་གཉིས་ཀྱི་ཅ་ལག་དེ་དག་གུར་ཕུབ་པའི་འགྲམ་དུ་བཞག་མ་ཐག ལག་པ་ཞིག་དཀྲུས། རང་ཉིད་ཀྱིས་འཁུར་ནས་འོང་བའི་མོག་མོག་བཟོ་སྣོད་ཕྱི་ལ་བཏོན། མོག་མོག་ཆུ་ཚོད་གཅིག་ཙམ་གྱི་རྗེས་སུ་བཟོས་ཚར་བ་དང་། བུད་མེད་བཞི་དང་ཕོ་གསར་བདུན། ང་ཚོ་ལྷན་དུ་མཚོ་འགྲམ་དེ་ནས་དགོང་ཟས་ལ་རོལ་འགོ་བཙུགས།

ཁོང་ཚོས་ཁྲོད་ཀྱི་བུད་མེད་གཅིག་ཤ་མེད་ཟ་མཁན་རེད། དེ་མིན་ཚང་མའི་ཤ་བསྲེག་མ་དང་མོག་མོག གྲང་ཚལ་ཟས་སྣ་གང་ཙམ་འཛོམས་པོ་འདུག་ལ། ཚང་མའི་ཁ་གཅིག་གྲགས་ཀྱིས་ངས་བཟོས་པའི་མོག་མོག་ལ་བསྟོད་པ་བྱས། སྤི་རག་དང་ཨ་རག སིལ་ཁུ་གྲང་མོ། འཐུང་བའི་རིགས་ཀྱང་གང་ཙམ་འཛོམས་པོ་རེད། མཚན་མོ་འདིར་ངས་མཐོང་ཐུབ་པ་ནི་ཡོད་ཚད་བཀག་རྒྱ་ལས་གྲོལ་བའི་འཚོ་བ་སྐྱེ་ལུགས་ཤིག་རེད། ཐ་མག་ནག་པོ་འཐེན་མཁན་གྱང་ཡོད་ལ། ཨ་རག་འཐུང་མཁན་དང་སྤི་རག་འཐུང་མཁན་ནི་བཤད་མ་དགོས་པ་རེད། གྱོན་པ་གྱོན་ལུགས་དེ་ཡང་སྐྱེ་བ་ཚོ། དོར་ཐུང་ལས་མེད་ལ། བུད་མེད་ཚོར་ནུ་ཁེབས་ལག་འཐིལ་ཙམ་དང་དོར་ཐུང་བྱིས་པ་ཞིག་གི་ལག་ངར་ཙམ་ལས་མེད། འདི་ལྟར་དེང་དུས་ན་གཞོན་གྱི་མི་ཚེ་ཞིག་ལ་འཛོམས་དགོས་པ་དེ་དག་ཡོངས་སུ་འཛོམས་དུས་ཀྱི་མཚན་མོ་འདི་ལ། ང་རང་ལ་དཀའ་ངལ་ཞིག་ཡོད་པ་ནི་སྐད་ཆ་མི་གོ་བ་དེ་ཡིན། ངས་ཁོང་ཚོ་ལ་སྐད་ཆ་བཤད་འདོད་ཡོད་དུས་སུ་དབྱིན་སྐད་ཀྱི་སྟེང་ནས་བྱེད་ཆོག་གི་ཡོད། འོན་ཀྱང་། ཚང་མ་རང་རང་གི་ས་ན་ཁ་གནམ་དུ་གཏད་ནས་ཐ་མག་འཐེན་པ་དང་ཨ་རག་འཐུང་བ། འཚིག་ཇ་འཐུང་བ། སུལ་ཁུལ་འཐུང་བ། རང་རང་གི་ཁམས་དང་མོས་པ་གང་ལ་ཡོད་པ་དེ་ལྟར་རེད་འདུག

ང་རང་ཟུར་ཞིག་དུ་ཁ་རོག་གེར་ཐ་མག་ཞིག་འཐེན་ཞོར་རྐུབ་སྟེགས་རིང་མོ་ཞིག་གི་སྟེང་དུ་ཁ་གན་རྐྱལ་དུ་ལོག་ནས། གནམ་མཁའི་དབྱིངས་སུ་བཀྲ་ལྷམ་མེར་ཡོད་པའི་སྐར་ཚོགས་ལ་བལྟ་ཞོར་བསམ་གཞིགས་ཀྱི་འཇིག་རྟེན་དུ་ཆས། ང་རང་སྐད་ཡིག་མི་གཅིག རྒྱལ་ཁབ་མི་གཅིག་པའི་ཡུལ་འདིར་ཅིའི་ཕྱིར་ཡོང་བ་རེད། འདི་ལྟར་མི་ཚེ་གསར་བ་ནས་སྐད་ཡིག་གསར་བ། རྒྱལ་ཁབ་གསར་བའི་ནང་གི་མི་དང་འགྲོག་འདྲིས་ཅི་ཙམ་རིང་བྱེད་དགོས། ཟླ་བ་ནས་ལོ། ལོ་ནས་ལོ་མཐུད། ག་ཚོད་ཅིག་གི་རྗེས་སུ། ང་རང་ཅི་འདྲ་ཞིག་དུ་འགྱུར་ངེས་ཡིན། ངས་ཅི་ཞིག་འགྲུབ་ངེས་ཡིན།

མཚོ་འགྲམ་འདི་ནས་སྤྲོ་སྐྱིད་གཏོང་བ་ལ་རིན་པ་སྤྲོད་དགོས་ཀྱི་ཡོད། ཆུ་ཚོད་ཞེ་བརྒྱད་རིང་གི་རིན་དུ་ཨ་སྒོར་ལྔ་བཅུ་ང་ལྔ་རེད་འདུག སྐབས་དེར་ངས་སྒོར་མོ་དེ་དག་ཧིན་སྒོར་ལ་བསམ་བློ་ཞིག་བཏང་དུས། ཕལ་ཆེར་ང་་རང་རྒྱ་གར་རྡ་རམ་ས་ལ། མེག་ལོར་རྒན་རྗེའི་དག་ཞིང་ཟ་ཁང་ནང་གི་ཟླ་ངོ་གཉིས་རིང་གི་གླ་ཆེ་རེད་འདུག འཚོ་བ་བསྐྱེལ་སྟངས་དང་སྒོར་མོའི་རིན་ཐང་མི་འདྲ་བའི་དབང་གིས་ང་རང་གི་ལས་པོ་འདི་ལ་ལྷུང་བ་ཡིན་ནམ་ཅི།

འདི་ལྟར་འགྲོ་བ་མིའི་བཟོས་པའི་ལམ་ཕྲན་ཆ་མི་སྙོམས་པ་འདི་བརྒྱུད་དེ་མི་རང་རང་གི་ནུས་པ་ལ་བརྟེན་ནས་འཇིག་རྟེན་འདིའི་སྟེང་གི་འཚོ་བ་འདི་ལ་རྒྱུས་ལོན་དང་གོམ་འདྲིས་མི་བྱེད་པའི་རང་དབང་དེ་མི་སུ་ལ་ཡང་མེད་སྟབས། ང་རང་གིས་ཀྱང་འགྲོ་བ་མིའི་བསྐྲུན་པའི་འཚོ་བ་གསར་བ་འདི་ལ་རྒྱུས་ལོན་དང་བསམ་ཤེས། དང་ལེན་དང་བཟོད་བསྲན་བྱས་དེ་གོམ་གཤིས་ལ་འཇགས་དུ་འཇུག་པར་འབད་དགོས་པ་ལོས་ཡིན། སྐད་ཡིག་དང་གོམ་གཤིས་ལ་ཐུན་མོང་མ་ཡིན་པའི་བསམ་བློའི་སྟོབས་ཤུགས་ཡོད་པ་ཡིན་དུས། ང་རང་ཡང་བོད་ཀྱི་སྐད་དང་ཡི་གེ་ཁྲོད་ནས་འཚར་བ་རེད། ༢༩།༩།༠༨

མུ་འགོད།